Gospel blong Jisas Kraes i save blesem laef blong yu

!Yes! Olsem ol memba blong Jos Ia blong Jisas Kraes blong Ol Lata-dei Sent mifala biliv se Jisas Kraes i Pikinini blong God mo i Sevya blong Wol. Hem i lavem yumi evriwan moa bitim we yumi save tingting long hem. Mifala i tingting long mifalawan olsem ol tru man blong folem Jisas. Taem sam long ol bilif blong mifala i klia, mifala i biliv se tru long laef blong Hem, ministri, sakrifaes, mo laef bakegen long ded blong Hem, Jisas Kraes i sevem yumi aot long ol sin blong yumi, fasin blong stap safa mo ded.

Lanem moa abaot ol bilifblong mifala.

Ol taem blong Jos seves oli defdefren blong wan kongregesen long wan nara kongregesen. Be, oltaem yu save kaontem se i gat wan mein wosip seves blong evriwan, we i folem wetem ol klas blong ol pikinini, yut, mo ol adalt.

Seves blong evriwan oli singaotem “sakramen miting.” Miting ia, i gat ol singsing, prea mo prijing (o “ol toktok”) we ol defren memba blong kongregesen oli givim evri wik. Be moa impoten pat blong miting ia i taem we mifala i tekpat long sakramen (we i semmak long komunion) blong tingbaot Sevya.

Faenem moa abaot Ol Sandei seves o faenem wan jos we i kolosap long yu.

Blong Ol Lata-dei Sent, wan tempol i defren long ol nara Jos bilding. Tempol i wan ples we ol Lata-dei Sent oli kasem ol spesel instraksen abaot God mo Jisas Kraes. Insaed long tempol, ol memba oli mekem ol kavenan we i no save finis (o ol promes) wetem God. Hemia i tekem tu promes blong obei ol komanmen, laef folem gospel blong Jisas Kraes, stap fetful long mared, mo blong help blong lukaotem gud wanwan long mifala taem mifala i serem wanem we mifala i gat.

Mo tu, from we mifala i biliv se famli i blong taem we i no save finis, fulap long ol wok we oli mekem insaed long ol tempol i blong mekem famli rilesensip i kam moa strong. Ol mared we oli mekem insaed long tempol i blong taem we i no save finis, be i no blong “kasem ded i seperetem yutufala” Ol papa, mama mo pikinini oli kam ol famli blong taem we i no save finis insaed long tempol. Ol bubu blong bifo oli save kasem evri blesing blong tempol sapos wan i mekem ol tabu odinens ia long bihaf blong olgeta mo oli akseptem ak blong seves ia. !Ol tempol oli ol bisi ples!

Buk blong Momon i wan buk blong skripja we i givim insperesen mo i tijim yumi abaot God mo Jisas Kraes. I helpem yumi kasem daereksen long laef blong yumi wanwan mo i save helpem yumi filim moa kolosap long Jisas Kraes. ?Nem ia i kam wea? Handred yia i pas, wan profet blong bifo we nem blong hem i Momon i bin putum tugeta rekod blong ol pipol blong hem. Oli bin fesem fulap semmak jalenj olsem yumi. Mo olsem yumi, oli faenem paoa taem oli tanem olgeta i go long Jisas Kraes. Kasem wan introdaksen blong Buk blong Momon wetem ol misinari.

Buk blong Momon i stanap long saed blong Baebol olsem wan narafala testeman blong Jisas Kraes mo tabu misin blong Hem olsem Sevya mo Ridima blong wol. Tugeta, Baebol mo Buk blong Momon i givim moa andastaning abaot bigfala lav blong God long yumi evriwan mo i save helpem yumi blong kam moa kolosap long Hem. 

Lanem moa abaot olsem wanem Baebol mo Buk blong Momon i wok tugeta.

Yes. Baebol hem i toktok blong God, wan tabu buk blong skripja, mo taem yumi folem ol tijing blong hem i givim glad i kam long laef blong yumi. Wetem Baebol, mifala i faenem insperesen tu long ol nara buk blong skripja we oli spesel long Jos Ia blong Jisas Kraes blong Ol Lata-dei Sent. Evri buk ia i wok tugeta blong tijim yumi ol impoten trutok abaot God mo Jisas Kraes.

Lanem moa abaot bilif blong mifala long Baebol.