E Silafia ma Alofa le Atua ia te Oe

Ioe! I le avea ai ma tagata o Le Ekalesia a Iesu Keriso o le Au Paia o Aso e Gata Ai, matou te talitonu o Iesu Keriso o le Alo o le Atua ma o le Faaola o le Lalolagi. E sili atu lona alofa ia i tatou nai lo mea tatou te mafaufauina. Tatou te manatu ia i tatou lava o soo tuuto o Iesu. E ui o nisi o o tatou talitonuga e eseese, ae tatou te talitonu e ala i Lona soifuaga, galuega, taulaga, ma le toetu, e laveaiina ai i tatou e Iesu Keriso mai le agasala, mafatiaga, ma le oti.

Aoao atili e uiga i o tatou talitonuga.

O taimi o sauniga a le Ekalesia e eseese mai lea faapotopotoga i lea faapotopotoga. Peitai, e mafai lava ona e faamoemoeina e i ai se sauniga tapuai autu e tasi mo tagata uma, sosoo ai ma vasega mo tamaiti, talavou, ma tagata matutua.

O le sauniga mo tagata uma e ta’ua o le “sauniga faamanatuga.” O lenei sauniga e aofia ai pese, tatalo, ma lauga (po o “tautalaga”) e tuuina mai e tagata eseese o le faapotopotoga i vaiaso taitasi. Ae o le vaega aupito taua o le sauniga o le taimi tatou te feinu ma ‘aai ai i le faamanatuga (lea e talitutusa ma le komunio) e manatua ai le Faaola.

Aoao atili e uiga i Sauniga i Aso Sa pe saili se lotu e latalata ane ia te oe.

Mo le Au Paia o Aso e Gata Ai, o le malumalu e ese lava mai isi fale o le Ekalesia. O le malumalu o se nofoaga lea e maua ai e le Au Paia o Aso e Gata Ai ni faatonuga faapitoa e uiga i le Atua ma Iesu Keriso. I totonu o le malumalu, e osia ai e tagata o le ekalesia feagaiga e faavavau (po o folafolaga) ma le Atua. E aofia ai folafolaga e tausia poloaiga, ola ai i le talalelei a Iesu Keriso, ia faamaoni i le faaipoipoga, ma fesoasoani e tausia e le tasi le isi e ala i le faasoaina atu o mea ua tatou maua.

Ma le isi, ona tatou te talitonu e faavavau aiga, o le tele o galuega e faia i totonu o malumalu o le faamalosia atili lea o sootaga faaleaiga. O faaipoipoga i le malumalu e faia ina ia tumau e faavavau, ae le na o le “seia oo ina tuueseeseina e le oti.” E avea matua ma fanau ma aiga e faavavau i totonu o malumalu. E mafai foi e tuaa ona maua faamanuiaga uma o le malumalu pe afai e faatino e se tasi ia sauniga paia e fai ma sui o i latou ma ua latou taliaina lena faatinoga o le auaunaga. O malumalu o ni nofoaga pisi!

O le Tusi a Mamona o se tusi o tusitusiga paia musuia lea e aoaoina ai i tatou e uiga i le Atua ma Iesu Keriso. E fesoasoani ia i tatou e maua ai le taitaiga mo o tatou olaga patino ma e mafai ona fesoasoani ia i tatou e lagona ai le latalata atili atu ia Iesu Keriso. O fea e sau ai le igoa? I le faitau fiaselau o tausaga ua mavae, sa tuufaatasia ai e se perofeta e igoa ia Mamona se talafaamaumau o ona tagata. Sa latou feagai ma le tele o luitau lava e tasi o loo tatou feagai ai. Ma e faapei o i tatou, sa latou maua le malosi pe a latou liliu atu ia Iesu Keriso. Ia maua mai se folasaga i le Tusi a Mamona faatasi ai ma faifeautalai.

O le Tusi a Mamona e tutu faatasi ma le Tusi Paia o se isi molimau ia Iesu Keriso ma Lana misiona paia o le Faaola ma le Togiola o le lalolagi. I le faatasia ai, o le Tusi Paia ma le Tusi a Mamona, e maua ai le malamalama atili i le alofa tele o le Atua mo i tatou uma ma e mafai ona fesoasoani tatou te latalata atili ai ia te Ia. 

Aoao atili e uiga i auala e galulue faatasi ai le Tusi Paia ma le Tusi a Mamona.

Ioe. O le Tusi Paia o le afioga a le Atua, o se tusi paia o tusitusiga paia, ma o le mulimuli i ona aoaoga e aumaia ai le olioli i o tatou olaga. Faatasi ai ma le Tusi Paia, tatou te maua ai foi musumusuga i isi tusi o tusitusiga paia e tulaga ese i Le Ekalesia a Iesu Keriso o le Au Paia o Aso e Gata Ai. Latou te galulue faatasi uma e aoao i tatou i upumoni taua e uiga i le Atua ma Iesu Keriso.

Ia iloa atili e uiga i lo tatou talitonuga i le Tusi Paia.