Puipuiina o Tamaiti ma le Autalavou

Youth Protection Program: Christ with Children

Ia faamae’aina e taitai ma faiaoga uma o tamaiti ma le autalavou le aoaoga lenei i totonu o le tasi le masina talu ona valaauina.

O gaoioiga ma vasega a le Ekalesia o avanoa ia mo tamaiti ma le autalavou e lagona ai le alofa o le Faaola ma le faatosinaga a le Agaga Paia. A o auai, e manaomia ona lagona e tamaiti ma le autalavou le saogalemu ma le puipuiga. E tatau i taitai ma faiaoga ona mulimuli i faataitaiga o le alofa ma le popole o le Faaola mo tamaiti.

O lenei aoaoga e aofia ai le auala e iloa ai ma puipuia ai le sauaina faaletino, faalefeusuaiga, faalegagana, ma isi ituaiga o sauaga faatautala. O punaoa o loo i lalo e mafai foi ona fesoasoani ia te oe ina ia iloa ma puipuia mai le sauaina. O aoaoga e tuuina atu ai ni vaaiga e fesoasoani ia te oe ina ia malamalama lelei atili ai ma faaaoga mataupu faavae ma aiaiga.

O Mataupu Faavae Autu ma Aiaiga o loo Aofia ai i le Aoaoga

Ua faamoemoeina i tatou e le Alii ina ia faia mea uma tatou te mafaia e taofia ai le sauaina ma ia puipuia ma fesoasoani atu ia i latou ua aafia i sauaga faatautala.
E le taliaina e le Ekalesia ni sauaga faatautala o soo se ituaiga. O sauaga faatautala o le solia lea o tulafono a le Atua ma faapea foi ona avea o se solitulafono o tulafono o nuu ma alalafaga.
Pe a aoaoina e ni tagata matutua ia tamaiti po o le autalavou i tulaga faale-Ekalesia, “ia le itiiti ifo ma le toalua ni tagata matutua lelei e tatau ona i ai” (Tusitaulima Aoao: Vasega mo le Autalavou, 13.4.1 ma le Malupuipuia o Tamaiti, 12.5.1).
“E tatau ona le itiiti ifo ma le toalua ni tagata matutua e tatau ona auai i gaoioiga uma e lagolagoina e le Ekalesia e auai ai tamaiti, autalavou, ma talavou nofofua matutua” (Tusitaulima Aoao: Vaavaaiga a se Tagata Matua [Adult Supervision], 20.7.1).
Aloese mai le faia o fesootaiga taitoatasi ma tamaiti po o le autalavou, ma ia fesootai atu e le aunoa ma matua po o tagata e vaaia [le tamaitiiti] e uiga i gaoioiga po o ni atugaluga.

Afai e tulai mai se amio e lē talafeagai po o se sauaga faatautala, e tatau ona e vave galue e puipui le tamaitiiti po o le talavou.

I.S. ma Kanata

Afai e te iloaina ni uiga sauaina, e tatau loa ona e vave faafesootaia ia le pulega faaletulafono. E tatau foi ona e fefautuaai ma lau epikopo po o le peresitene o le siteki, o e o le a valaau i le laina fesoasoani o le sauaina mo se taitaiga i le fesoasoani atu i tagata ua afaina ma le ausiaina o mea e manaomia mo le lipoti atu.

O Atunuu i Fafo atu o le I.S. ma Kanata

Aoao pe faapefea ma po o afea e tatau ai ona e lipoti atu se sauaga faatautala. I le tele o atunuu, o le a manaomia vave ona e faafesootaia ia pulega faaletulafono. Fefautuaai ma lau epikopo po o le peresitene o le siteki mo le taitaiga. Afai e le avanoa le laina fesoasoani o le sauaina i lo outou atunuu, o le a fefautuaai le epikopo ma le peresitene o le siteki ma le ofisa o le eria ina ia a’oa’o le faagasologa talafeagai mo le lipotia o sauaga faatautala ma le puipuia o le tagata na sauaina.

O tamaiti ma le autalavou o e na sauaina e manaomia le agaalofa, le taulai atu o le tausiga lelei mai taitai musuia o le Ekalesia, tagata o le aiga, aofia ai ma tagata tomai aoaoina faapolofesa, o e mafai ona fesoasoani ia i latou e faatoilaloina aafiaga faatamaia o le sauaina. O le mana faamalolo o le Faaola o Iesu Keriso o le a faaitiitia avega ma tuuina atu le malosi e faatoilalo ai le fili.

Faamolemole iloilo ia Fesili e Masani ona Fesiligia ai o loo i lalo mo nisi faamatalaga faaopoopo e uiga i lenei aoaoga i luga o le initoneti ma le auala e puipuia ma tali atu ai i le sauaina i lou valaauga.

O Fesili e Fesiligia Soo

O lenei aoaoga e mo soo se tagata ua valaauina e galue faatasi ma tamaiti po o le autalavou. E aofia ai:

Au peresitene o siteki ma itu, au epikopo, ma au peresitene o paranesi.
Fautua maualuga.
Au peresitene o le Peraimeri, Alii Talavou, Tamaitai Talavou, Aoga Sa, ma le Aualofa o le siteki, itu, uarota, ma le paranesi; au peresitene o le korama a toeaina.
O Failautusi, faiaoga, faufautua, taitai tolauapiga, taitai o aso o gaoioiga, taitai musika, ta piano, ma isi o loo galulue i tofiga i totonu o faalapotopotoga o le Peraimeri, Tamaitai Talavou, ma Alii Talavou.
Faiaoga o vasega a le autalavou o le Aoga Sa ma le seminare.

“O le taiala ia toalua ni tagata matutua lelei ia i ai faatasi ma se talavou e le faaaogaina i le tofitofiga o soa o auaunaga. Peitai, i lalo o le taitaiga a lo latou epikopo, e tatau ai i taitai ona faaaoga le atamai ma saili atu i musumusuga pe a tofia ni talavou e avea ma soa i tagata matutua.

“E tatau i soa matutua ona aloese mai tulaga lea e ono malamalama sese i ai. E tatau ona latou mataalia e faatatau i mataupu i nofoaga mamao taitoatasi ina ia maua e le autalavou se aafiaga saogalemu ma tauia i le auaunaga. E le gata i lea, e tatau i taitai ona faaaoga le atamai ia aua ne’i tofia le autalavou i ni aiga po o auaiga e i ai ni tulaga faigata.

“A tofia se autalavou i se soa e le o se matua, e tatau i taitai ona faamaonia e le o tetee i ai matua i lea tofitofiga” (Tusitaulima Aoao: Faatulagaina o Auaunaga e Tali Atu ai i Manaoga o le Lotoifale, 21.3, ChurchofJesusChrist.org).

“A fono pe talanoa se tasi o se au epikopo po o le au peresitene o le siteki po o se isi taitai ua tofia ma se tamaitiiti, talavou, po o se tamaitai, e talosagaina e ia se tasi o matua po o se isi tagata matua ia i ai i se potu e sosoo atu ai, faapaologa, po o le potutele. Afai e manao le tagata lea o loo faatalanoaina, e mafai ona valaaulia se isi tagata matua ina ia auai i le taimi o le faatalanoaga. E tatau i taitai ona aloese mai tulaga uma e mafai ona malamalama sese i ai” (Tusitaulima Aoao: Puipuia mai le Faauigaseseina, 31.4, ChurchofJesusChrist.org).

Ioe, o le a manaomia ona e saini e alu i totonu i lau Faitotoa a le Ekalesia. Afai o lau Faitotoa a le Ekalesia e le’o faafesootaia i lau Numera o le Pepa Faamaumau (NPF), o le a manaomia ona e faafouina lena faamaumauga a o le’i faamae’aina le aoaoga po o le ‘a lē faamaumauina lau faamae’aga.

Ina ia faafesootaia lau NPF i lau Faitotoa a le Ekalesia, muamua lava, saili lau NPF o loo i luga o lau pepa faataga o le malumalu po o le fesili atu i le failautusi a lau uarota po o se isi taitai o le Ekalesia ina ia sue i luga o le ChurchofJesusChrist.org pe e ala atu i le polokalama o le Meafaigaluega a Tagata o le Ekalesia. A i ai loa sau NPF, alu i le vaega o faamaumauga o lau Faitotoa a le Ekalesia. Mo nisi faamatalaga, asiasi i le Church Account help.

Punaoa o le Ekalesia

Punaoa Faaopoopo ma Faamatalaga

Matagaluega a le Fanau