EnglishConnect Ngaahi Tuʻutuʻuni ki he Kau Maí (Fakaleleiʻi he 2021-01-22)

  1. Ko Hai Kitautolu? Ko e EnglishConnect ko ha polokalama ako lea faka-Pilitānia ʻoku fakapaʻanga ‘e he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻa ia ko ha siasi faka-Kalisitiane fakaemāmanilahi ʻoku ʻi ai hono ngaahi hetikuota ʻi Sōleki Siti, ‘Iutā, ʻi he ʻIunaiteti Siteiti ‘o ʻAmeliká (ko e “Siasí”). ‘Okú mau fakatupulaki ʻa e pōto‘i lea faka-Pilitāniá ʻo fakafou ʻi he ngaahi lēsoni ʻoku fakahoko fakatāutaha, ngaahi polokalama ako ʻi he ʻinitanetí mo e leá, mo e ngaahi ‘ekitivitī ako kehe. Neongo ‘oku fakataumuʻa ‘a e ngaahi lēsoní ki he fakalakalaka ‘o e pōtoʻi lea faka-Pilitāniá, ka ʻoku ʻi ai foki mo e me‘a fakalotu. ʻOku ʻikai ke mau fakahoko ha fakamafai ako pe foaki ha mataʻitohi pe fakaʻilonga ʻi ha faʻahinga polokalama fakaako pe ako ngāue.
  2. Ngaahi Tuʻunga ki he Kau Maí. ʻOku talitali lelei ʻa e taha kotoa ke kau mai ki he EnglishConnect, kae kehe kenau tauhi pau ki he Ngaahi Tuʻutuʻuni ko ʻeni ki he Kau Maí.  ʻOku ʻikai ke mau siviʻi ʻa e kau akó ʻi ha faʻahinga founga kimuʻa pea nau lava ke kau maí.  ‘Okú mau fie maʻu koe ke ke tokaʻi mo fakaʻapaʻapa ki he niʻihi kehé. ʻOua naʻá ke kole ha paʻanga, fakafaikehekeheʻi, pe fakahoha‘asi ha taha. Faka‘aongaʻi ‘a e fakakaukau leleí ʻi he meʻa ʻokú ke vahevahe ki he ni‘ihi kehé ʻo fekauʻaki mo koé. ‘Oku ʻikai tali ha ʻulungaanga pe lea ʻa ia ʻoku lau ʻoku ta‘e taau pe ʻa ia ʻokú ne fakatupu ha ʻātakai ‘oku ʻikai malu ki he ni‘ihi kehé. ʻE malava ke toʻo ha taha meí he kulupú ʻe kinautolu ʻokú nau tokoni ʻi he kulupú koeʻuhi ko ha faʻahinga ʻuhinga lelei ʻoku nau loto ki aí.
  3. Totonu Fakatāutaha ki he Fakamatalá.  ‘I he taimi ʻokú ke lesisita ai ki he EnglishConnect mo tuku mai ʻa hoʻo fakamatala fakatāutahá, ‘okú ke fili ai ke kau mai ki heʻemau fakatahaʻangá. Temau ala fetuʻutaki atu kiate koe ke fakahā atu ha ngaahi founga kehe te ke lava ʻo kau mai ai mo kimautolu. ʻOkú mau faka‘apaʻapa‘i hoʻo totonu fakatāutahá pea te mau ngāueʻaki pē ʻa hoʻo fakamatala fakatāutaha ʻo fakatatau ki he lao fakalotofonuá mo e lao ʻo e Siasí Fanongonongo Fakaemāmanilahi ʻo e Totonu Fakatāutahá.  Fakatatau mo e Fanongonongó, ʻe ngofua ke hū mo ngāue ʻa ʻemau kau faiakó, kau ngāue tokoní, mo e kau ngāué ki he fakamatala fakatāutaha naʻá ke tuku mai kiate kimautolú, makatuʻunga ʻi he fie maʻu-ke-ʻiló, ke tokoni mo poupou ki hoʻo kau mai ki he EnglishConnect pe ha ngaahi polokalama kehe ʻa e Siasí. ʻOkú nau fakahoko ia kae lava ke nau ʻoatu ha tali ki haʻo ngaahi kole, tuku atu ha fakamatala mo e ngaahi ngāué, muimuiʻi ha ngaahi meʻa ʻokú ke mahuʻingaʻia ai, mo fakakakato ha ngaahi fie maʻu fakalao.
  4. Hū ki he ʻInitanetí mo e Ngaahi Totongí.  ʻE fie ma‘u ke ke hū ki ha komipiuta ʻoku mālohi ʻa e vave ʻene fehokotaki ki he ʻinitanetí mo e lekooti ongó ke ke ako lelei ai ʻi he EnglishConnect. ‘Oku ʻikai ha totongi ke kau ki he EnglishConnect 1 & 2, neongo ʻe ala hilifaki atu kia koe ha kiʻi totongi koeʻuhi ko e ngaahi tatau ʻo e naunau kuo pākí.  Ko e EnglishConnect 3 ko ha ako totongi maʻamaʻa ʻi he ʻinitanetí ʻa ia ʻoku fakahoko ʻo fou ʻi he BYU-Pathway Worldwide. 
  5. Fakangofua ʻa e Mātuʻá.  Kapau ‘okú ke kei taʻu si‘i ʻi he vahefonua pe fonua ‘okú ke nofo aí, kuo pau ke ke ʻomai ha foomu fakangofua ʻa e mātuʻá/tauhi fānaú ʻa ia kuo fakamoʻoni hingoa kimuʻa peá ke kau ʻi he EnglishConnect.  ‘Oku lava ke maʻu ʻa e ngaahi fōmú meí he kau faiako ‘o e EnglishConnect.
  6. Lesisitá mo e Maʻu Akó.  ‘Oku ʻi ai ʻa e tokolahi ʻo e kau akó ʻoku fie maʻu ke kamata ʻaki ʻa e EnglishConnect ‘i homou feituʻú. Kapau ʻe ʻikai maʻu ʻa e tokolahí, ʻe ʻikai ala lava ke ke kau ki he EnglishConnect ʻi he taimí ni.  ‘I he taimi pē ʻe kamata ai ‘a e polokalama EnglishConnect, ʻoku fie maʻu ʻa e maʻu ako ʻi he ngaahi fakataha pōtalanoa fakauike ʻa e EnglishConnect, ʻoku lau ia ki he konga mahuʻinga ʻo hoʻo fakalakalaka fakalukufuá, pea ʻoku tuʻutuʻuni ia kae maʻu ha tohi fakamoʻoni ako.
  7. Ngaahi Nofoʻanga maʻá e Faingataʻaʻia Fakaesinó.  ‘Oku tokanga ʻa e Siasí ki he lavameʻa ‘a kinautolu kotoa pē ʻoku kau ki heʻenau ngaahi polokalamá. Neongo ʻoku ʻikai tuʻutuʻuni fakalao ia ke ne tuku atu ha ngaahi nofoʻanga pe tokoni maʻá kinautolu ʻoku faingataʻaʻia fakaesinó, ʻoku fai feinga ʻa e Siasí ke foaki tauʻatāina ha tokoni feʻunga maʻa kinautolu ʻokú nau fiemaʻu iá.  ʻE lava ke kole ‘e he kau ako ʻoku faingata‘aʻia fakaesinó ha tokoni meí he kau faiakó mo e kau faifekaú. ʻE ala kehekehe ʻa e tokoni ko iá meí he ngaahi nofoʻanga ʻoku tuku atu ʻe he ngaahi akoʻanga kehé.