Ngaahi ʻEkitivitī ki Hono Vahevahe ʻo e Ngaahi Talanoa Fakafāmilí

Fakafiefiaʻi e ngaahi anga fakafonua fakamatakali pe fakalotú

Vahevahe ha meʻakai, ʻaati, hulohula, mūsika, ākenga vala, pe ngaahi tukufakaholo mei he feituʻu ʻokú ke nofo aí pe feituʻu ne nofo ai hoʻo ngaahi kuí.

Te ke lava ʻo fakamanatua fakakātoa ʻa e anga fakafonuá, pe te ke fili ke nofotaha pē ʻi ha tafaʻaki pau ʻo e anga fakafonuá, hangē ko e mūsiká pe meʻakaí.

Kapau te ke fili ke fakahoko ha polokalama lahi, ʻe lava ke fakaʻaliʻali ʻa e ngaahi anga fakafonuá ʻo fakaʻaongaʻi ha ʻū palepale, sīpinga fakatātā, fakameʻite, pe ngaahi fakaʻaliʻali. Te ke lava ʻo tokoni ke fokotuʻu ha vā fetuʻutaki lelei mo e ngaahi konga kehe ʻo homou tukui koló ʻaki hono fakakau atu e kau ʻōfisa fakapuleʻanga fakalotofonuá, ngaahi siasi kehé, tukui kolo fakafonuá, pe mītia ongoongó.

Fevahevaheʻaki ha ngaahi talanoa fekauʻaki mo ha taha hoʻo ngaahi kuí

Kole ki he niʻihi ʻe kau maí ke nau omi mateuteu mo ha talanoa kau ki ha kui ʻoku ʻuhingamālie kiate kinautolu. ʻE lava ke nau ʻomi ha meʻa ke fakatātaaʻi ʻaki ʻenau talanoá. ʻAi ke nau tauhoa pe fakakulupu ʻo fevahevaheʻaki ai ʻenau talanoá.

Hili iá, aleaʻi e laumālie ʻo ʻIlaisiaá pea mo e founga ʻoku tokoni ai hono vahevahe ʻo e ngaahi talanoa fakafāmilí ki hono langaki ʻo e fetuʻutakí mo fakamālohia ʻa e ngaahi vā fetuʻutakí. Te ke ala fai ha ngaahi fehuʻi hangē ko ʻení:

Ne akoʻi ʻe Palesiteni Lāsolo M. Nalesoni ko e laumālie ʻo ʻIlaisiaá ko hano “fakahaaʻi mai ia e fakamoʻoni ʻa e Laumālie Māʻoniʻoní ki he natula fakaʻotua ʻo e fāmilí.” Kuó ke aʻusia nai ʻeni ʻi he taimi ʻokú ke fai ai ha ngaahi talanoa fakafāmili?
ʻOku pehē ʻe he Malakai 4:6 ko ʻIlaisiā “te ne liliu ʻa e loto ʻo e mātuʻá ki he fānaú, pea ko e loto ʻo e fānaú ki heʻenau mātuʻá.” Ko e hā ʻene ʻuhinga kiate koé?

Poupouʻi e kulupú ke hokohoko atu ʻenau vahevahe ʻa e ngaahi talanoa fakafāmilí mo e niʻihi kehé pea kole ki honau ngaahi kaungāmeʻá mo e kau mēmipa ʻo e fāmilí ke nau vahevahe ange ha ngaahi talanoa kiate kinautolu.

Vakaiʻi ʻa e polokalama Fuʻu ʻAkau Fakafāmilí

ʻAhiʻahi fakahoko pē ʻe koe pe ʻi ha kulupu ʻa e ngaahi meʻa ʻi he polokalama Fuʻu ʻAkau Fakafāmilí ʻi he FamilySearch pea mo e peesi Ngaahi ʻEkitivitī ʻo e Hisitōlia Fakafāmilí ʻi he FamilySearch.org.

Download ʻa e polokalamá ki hoʻo telefoni toʻotoʻó pe tablet pea fakaʻaongaʻi hoʻo ʻakauni FamilySearch ke hū ki loto. Kapau ʻoku ʻikai ke ʻi ai haʻo ʻakauni, faʻu ha ʻakauni taʻetotongi.

ʻOku ʻi ai ha ʻekitivitī ʻe ua—Kumi ha Tokotaha ʻi he polokalama Fuʻu ʻAkau Fakafāmilí mo e Meʻa Kotoa Pē Fekauʻaki mo Au ʻi he FamilySearch.org—ʻoku ʻikai fie maʻu ki ai ha ʻakauni pe fakamatala ki he hisitōlia fakafāmilí.

ʻE lava ʻe he niʻihi fakafoʻituitui kuo ʻosi maʻu haʻanau fakamatala ʻi heʻenau fuʻu ʻakau fakafāmilí ʻo ʻahiʻahiʻi ʻa e Kāinga ʻOku Mau Feohí mo e Mapeʻi Hoku Kāingá ʻi he polokalama Fuʻu ʻAkau Fakafāmilí kae pehē ki he Famous Relatives, Compare-a-Face, mo e Picture My Heritage ʻi he FamilySearch.org.

Vahevahe mo e niʻihi kehé ha faʻahinga fakamatala mālie pē ʻokú ke maʻu, pea fakakaukau ke vahevahe hoʻo ngaahi ʻiló ʻi he mītia fakasōsialé.