Vahevahe e Ngaahi Talanoa Fakafāmilí mo e Niʻihi Kehé

ʻOku ʻomi ʻe he ngaahi talanoa fakafāmilí ha faʻahinga ongo ki hotau tuʻungá pea fakafehokotaki kitautolu ki hotau tukufakaholó. ʻOku fakamanatu mai ʻe heʻetau fetuʻutaki mo hotau ngaahi fāmili ʻi he māmaní ko e fānau kotoa kitautolu ʻa ha Tamai ʻi Hēvani ʻofa. ʻOku tau kāinga pea ʻoku ʻi ai hatau fatongia ke fetokoniʻaki ke tau toe foki hake ki ʻapi kiate Ia.

ʻOku tokoni ʻa hono fevahevaheʻaki ʻo e ngaahi talanoa fakafāmilí mo fefanongoʻakí ke fakatupu ai ha mahino, manavaʻofa mo e falala. ʻOku fakamālohia e ngaahi vā fetuʻutakí ʻi he taimi ʻoku tau vahevahe ai e meʻa ʻokú ne ʻai kitautolu ke tau aʻusia hotau tuʻungá.

Ko ha fanga kiʻi fehuʻi faingofua ʻeni ʻe lava ke ke ʻeke ki he niʻihi kehé ke kamataʻi ai ha pōtalanoa:

• Ko e hā ha ngaahi talanoa ʻokú ke ʻiloʻi fekauʻaki mo hoʻo ngaahi kuí?
• ʻOku ʻi ai nai haʻo ngaahi ʻulungaanga ʻoku faitatau ai mo kinautolu?
• Ko e hā ha niʻihi ʻo hoʻo ngaahi tukufakaholo fakafāmilí?
• Ko hoʻo ngaahi kuí mei fē?

ʻE lava ke hoko hoʻomou talanoá ko ha faingamālie ia ke tokoniʻi ai ha taha ke ne ʻilo lahi ange ki honau fāmilí. Ko e FamilySearch.org mo e Fuʻu ʻAkau Fakafāmilí ko ha maʻuʻanga tokoni lelei ia ʻoku ʻatā taʻetotongi ki he tokotaha kotoa pē.

Kapau ʻoku ʻikai ke ke fiemālie ʻi hono fakaʻaongaʻi ʻo e polokalama FamilySearch pe ko e Fuʻu ʻAkau Fakafāmilí, fetuʻutaki ki hoʻo faifaleʻi ki he temipalé mo e hisitōlia fakafāmilí. Te nau lava ʻo tokoniʻi koe pe ko haʻo kaungāmeʻa ke mou maʻu ha aʻusia fiefia ʻi he hisitōlia fakafāmilí.

ʻE lava ʻe he ngaahi fepōtalanoaʻaki faingofuá pe ko hono tokoniʻi ha taha ke ako lahi ange ki honau fāmilí, ʻo fakaava e lotó ki he ivi tākiekina ʻo e Laumālie Māʻoniʻoní. ʻI he taimi ʻokú ke maʻu ai ha ngaahi faingamālie, te ke lava ʻo vahevahe ʻa e ngaahi meʻá ni mo ha ngaahi moʻoni kehe:

• Ko e fāmilí ko ha konga mahuʻinga ia ʻo e palani ʻa e ʻOtuá.
• Te tau toe moʻui kotoa pē ʻo fakafou ʻia Sīsū Kalaisi.
• Ko e fehokotaki ko ia ʻoku tau ongoʻi mo ʻetau ngaahi kuí, ko ha fakamanatu ia mei he ʻOtuá ʻo fakafou ʻi Hono Laumālie Māʻoniʻoní naʻe fakataumuʻa ʻa e fāmilí ke tolonga ʻo ope atu ʻi he moʻuí ni.

ʻOku vahevahe ʻe Palesiteni Lāsolo M. Nalesoni mo hono uaifi ko Uenitī W. Nalesoní ʻa e founga ʻoku hoko ai hono tānaki ʻo ʻIsilelí ʻi he ongo tafaʻaki fakatouʻosi ʻo e veilí ʻi he taimi ʻoku tau tokoniʻi ai e niʻihi kehé ke nau ako lahi ange ki honau talanoa fakafāmilí.

Fekumi ki ha ngaahi vitiō lahi ange ʻi heni.

Fekumi ki ha ngaahi ʻekitivitī maʻá e ngaahi kulupú pe fāmilí ʻi heni.