Ko Hono Talitali Lelei ʻo e Niʻihi Kehé ki Heʻetau Fakatahaʻanga ʻo e Tuí
Ko e ongoʻi ʻoku talitali lelei kitá ko ha konga mahuʻinga ia ʻo e kau ki ha fakatahaʻanga. Ko e ʻuhinga ia ʻoku mahuʻinga taha ai hono ʻai ke ongoʻi ʻe heʻetau kau ʻaʻahí ʻoku talitali lelei kinautolú! Ko ha ngaahi fakakaukau ʻeni ʻe ala tokoni atu.
Ko e taimi ʻoku ongoʻi ai ʻe he kakaí ʻoku talitali lelei kinautolu ʻi he lotú, ʻe fakanatula pē ʻenau fie nofo aí.
Ko ha ngaahi meʻa ʻeni te ke lava ʻo fakahoko ke talitali kakai lelei ange ai hoʻomou uōtí
ʻE lava ke meʻanoa pē ʻa e maʻulotu he Sāpaté kapau kuó te faʻa maʻulotu maʻu pē. Ka ki he niʻihi kuo teʻeki ʻaupito ke nau maʻulotú, ʻe lava ke ongoʻi lōmekina ia. Ko ha ngaahi meʻa ʻeni ʻe niʻihi te ke lava ʻo fakamatalaʻi ki hoʻo ngaahi kaungāmeʻa ʻoku nau toki fuofua maʻulotú ke tokoniʻi kinautolu ke nau mateuteu:
- ʻOku ʻikai ke tau ʻave holo ha peleti ke tānaki ki ai ha paʻanga pe kole ha ngaahi tokoni fakapaʻanga.
- Ngaahi meʻa ʻoku hoko lolotonga ʻetau ʻuluaki houalotú (hivaʻi ha ngaahi himi, fakahoko ʻe he kāingalotu ʻo e fakatahaʻangá ha lea mo e akoʻi, ko e sākalamēnití, mo e alā meʻa pehē.)
- ʻOku ʻikai fie maʻu ia ke nau kau ʻi he sākalamēnití; te te lava pē ʻo ʻave ʻa e laulaú ki he tokotaha hokó.
- ʻE teuteu lelei e kau mēmipa ʻo e haʻofangá, ka ʻe sai pē ia kapau ʻoku ʻikai ke te teuteu lelei; ko e mahuʻinga tahá ke te feinga ke hā fakaʻofoʻofa.
- ʻOku tau ō ki ha ngaahi kalasi he hili ʻa e houalotu sākalamēnití (Palaimelí maʻá e fānaú, Lautohi Faka-Sāpate maʻá e kakai lalahí mo e toʻu tupú, pea mo e ngaahi kalasi fakahili uike maʻá e houʻeiki fafiné, houʻeiki tangatá, kau finemuí, mo e kau talavoú).
ʻE ala tokoni ke ʻaʻahi ki he ChurchofJesusChrist.org/ComeUntoChrist. ʻOku lahi ai e ngaahi meʻa lelei maʻanautolu ʻoku ʻikai kau mai ki heʻetau tuí ka ʻoku nau fie ako lahi ange ki he Siasí. ʻAi ke ke maheni mo e meʻá ni pea vahevahe ia mo ho ngaahi kaungāmeʻá.
ʻI he fakataha alēlea fakauōtí pe ngaahi fakataha fakatakimuʻa kehé, talanoa ai ki ha ngaahi founga ʻe lava ke lelei ange ai e talitali kakai homou uōtí. Ko ha ngaahi fakakaukau ʻeni ke kamataʻi ʻaki e fepōtalanoaʻakí:
- Mamata ʻi ha niʻihi ʻo e ngaahi vitiō “Talitali Lelei Koe” ʻi he peesi ko ʻení. Ko e hā ha ngaahi kaveinga pe aʻusia ʻoku hā makehe? ʻE ongoʻi nai ʻe he kau mēmipa/fāmili foʻou ko ʻení ʻoku talitali lelei kinautolu ʻi hotau uōtí/koló?
- ʻOku hoko nai hotau uōtí ko ha feituʻu ʻoku nau talitali lelei ai e niʻihi kehé? Ko e hā e meʻa ʻoku tau fai ke tauhi ʻaki hotau fāmili fakauōtí?
- ʻOku ʻi ai nai ha faʻahinga palopalema fekauʻaki mo e tuenoá pe fakasītuʻaʻí ʻi hotau uōtí?
- Te tau lava nai ʻo fokotuʻu ha ngaahi uiuiʻi ke tokoniʻi e kakaí ke nau ongoʻi ʻoku talitali lelei ange kinautolu? (tokotaha talitali kakai he uōtí, kouʻotineita ki he ngaahi ʻekitivitií, etc.)
Aleaʻi e ngaahi tefito ko ʻení ʻi ha fakataha he Sāpate 5. ʻAi ke fakafiefia ʻa e fakatahá pea fakakau mai ʻa e tokotaha kotoa pē.
- Mamata ʻi he ngaahi vitiō “Talitali Lelei Koe” ʻoku ʻoatu ʻi he peesi ko ʻení, pea fai ha fealēleaʻaki. Fakamahinoʻi ʻa e ngaahi meʻa naʻe ngāue lelei pea ongo fakanatula peé mo e ngaahi meʻa ne mei lava ke toe lelei angé. Fakakaukauʻi ha ngaahi fakakaukau kehe ʻe ala tokoni ki he niʻihi kehé ke nau ongoʻi ʻoku talitali lelei kinautolu ʻi he lotú. Ko e hā ha ngaahi kaveinga pe aʻusia ne makehe kiate koe? ʻE ongoʻi nai ʻe he kāingalotu foʻou ko ʻení ʻoku talitali lelei kinautolu ʻi hotau uōtí/koló?
- ʻOku talitali lelei nai e natula ʻulungaanga hotau uōtí/koló? Ko e hā ha sīpinga ʻe niʻihi ʻo e meʻá ni? Ko e hā ha ngaahi tafaʻaki ʻoku fie maʻu ke tau fakaleleiʻi?
- Ko e hā ha ngaahi sīpinga lelei ʻo e talitali kakai leleí kuó ke mamata ai ʻi he ngaahi uooti/kolo kimuʻá? Te ke lava ʻo fakahoko ia ʻi homou uooti he taimi ní?
- Kuó ke aʻusia nai ha ongoʻi ʻoku ʻikai talitali lelei koe ʻi ha uooti pe kolo? Ko e hā ha ngaahi meʻa te ke lava ʻo fai ke fakapapauʻi ʻoku ʻikai aʻusia ʻe he niʻihi kehé ʻa e meʻa tatau? Ko e hā ha meʻa kuó ne ʻai ke ke ongoʻi ʻoku talitali lelei koe?
- Ko e hā te tau lava ʻo fai ʻi heʻetau hoko ko ha fāmili fakauooti/fakakolo ke hoko ko ha fakatahaʻanga ʻoku talitali kakai leleí?
- Mamata ʻi he ngaahi vitiō “Haʻu ʻo Mamata” ʻoku ʻoatu ʻi he peesi ko ʻení. Ko e hā ha ngaahi ngāue ʻokú ke lolotonga fakahoko fakauooti pe fakafoʻituitui?
ʻOku ʻoatu ʻi lalo ha ngaahi maʻuʻanga tokoni lahi ange ke mamata mo aleaʻi mo homou uōtí:
- Ngāue Fakafaifekaú: Ko Hono Vahevahe e Meʻa ʻI Ho Lotó
ʻOku ʻi ai ha Feituʻu Moʻoku?
Talanoa ʻi ha fanga kiʻi kulupu iiki pe ko ha fakataha alēlea fakasiteiki, fekauʻaki mo ha ngaahi founga ke fakamuʻomuʻa ai e ngāue fakafaifekaú ʻi homou siteikí. Ongoʻi tauʻatāina ke fakaʻaongaʻi e fakamatala ʻi he pēsí ni ke kamataʻi ʻaki e fealeaʻakí. Ko ha fanga kiʻi tokoni ʻeni ke kamata ʻaki:
- Mamataʻi ha niʻihi ʻo e ngaahi vitiō “Talitali Lelei Koe” ʻi he peesi ko ʻení (kau ai e ngaahi talanoa ʻa e kau mēmipa foʻoú). Ko e hā ha ngaahi kaveinga pe aʻusia ʻoku hā makehe? ʻE ongoʻi nai ʻe he kāingalotu/fāmili foʻou ko ʻení ʻoku talitali lelei kinautolu ʻi hotau siteikí?
- Ko e hā ha ngaahi meʻa te tau lava ʻo fai fakasiteiki ke fakatupulaki ai ʻetau feʻofaʻakí?
- ʻOku ʻi ai nai ha ngaahi meʻa ʻe lava ke fai ʻe he kau takí ke ongoʻi ai ʻe he kakai foʻou ʻoku omí ʻoku talitali lelei kinautolu? Ko e hā te tau lava ʻo fai ke faʻu ai ha ʻulungaanga ʻo e talitali kakai leleí?
- ʻE lava nai ke nofotaha pē ʻa e ngaahi uiuiʻi pe ngaahi ngāue fakasiteikí ki hono talitali lelei ʻo e kau mēmipa foʻoú (hangē ko hono tokangaʻi ʻo e fakatahaʻi ʻo e kāingalotu foʻoú ki he ngaahi uōtí, kouʻotineita fakasiteiki ki ha polokalama, mo e alā meʻa pehē)?