Stanap long Tabu Bus

Elda Marlin K. Jensen

Blong Olgeta Seventi

Pikja

JES Divosen blong Ol Yang Adalt • 6 Mei, 2012 • Sakramento, Kalifonia

Gudnaet ol brata mo sista. Mi talem tangkyu tumas mo mi gat tingting i stap daon blong gat spesel wok ia we i kam long Fas Presidensi blong toktok long yufala tedei. Blong stat, mi wantem yufala i save se i bin gat wan taem we fes blong mi i no rafraf, mi gat dak hea, mo mi gat fulap paoa, olsem yufala—mi pat blong wanem skripja i stap singaotem “jeneresen we i stap kam antap.” Mi no save stret wanem toktok nao i talem i defren long i kam antap—ating “i draon” o “i stap lus”—be nomata wanem toktok ia, hem i tokbaot taem blong laef blong mi we mi stap long hem naoia, mo ating i no saon gud tumas long mi!

Nomata mi stap long wan naesfala japel kolosap long Sakramento Kalifonia Tempol, long maen blong mi, mi save luk ol plante taosen blong yufala—we yufala i toktok kolosap 40 defren lanwis—we yufala i kam tugeta raon long wol. Mi gat blesing blong visitim plante kantri blong yufala, blong harem yufala i toktok mo talem testemoni blong yufala long lanwis blong yufala, blong mi witnesem stret, fet mo strong tingting blong yufala long Lod. Mi lavem mo presem yufala from stret mo gud fasin blong yufala. Mi save se laef, taem yufala i yangfala, i had, mo mi save se samtaem, yumi mestem rod mo gat nid blong sakem sin. Be, long tru hat blong mi, mi talem tangkyu blong yufala i stanap strong long bilif blong yufala long Kraes mo gospel blong Hem we i kambak. Bigfala samting we mi wantem tedei, i blong mi gat blesing ia blong toktok tru long paoa blong Tabu Spirit, mo long wei ia, mi givhan blong mekem bilif blong yufala i kam antap.

Ol Tabu Ples

I gat ol ples long wol ia we oli kam tabu from ol samting we oli bin hapen long ol ples ia. Folem OlTesteman, wan long ol ples ia i Sinae, Oreb, o “hil blong God,” (Eksodas 3:1; luk tu longEksodas 3:12; 34:2, 12; 34:2), ples we Lod i bin kamaot long Moses long faea we i laet long wan smol tri. Taem Moses i bin stap kam kolosap long tri ia, Lod i talem long hem se: “Yu no kam klosap tumas! Yu tekemaot sandel blong yu! Graon ya we yu stap stanap long hem i tabu ya!” (Eksodas 3:5).

Famle blong mi mo mi, i bin gat blesing wantaem blong stap long wan tabu ples. Long 1993—fo yia afta we mi kasem koling olsem wan Seventi—oli bin askem mitufala blong stap tu yia long Misin blong Jos long Niu Yok Rojesta. Misin ia, i tekem taon blong Palmaera (ples we Josef Smit mo famle blong hem i bin stap long hem long ol yia 1820), mo Feyet (ples we Jos i oganaes long hem long Epril 1830). Samples 110 mael Saot long Palmaera long Stet blong Pensilvania, i gat Hamoni i stap (ples we Josef Smit mo Ema Hel i mit mo stap long hem long stat blong mared laef, mo taem Josef Smit i stap transletem Buk blong Momon long en blong ol yia 1820). Ful eria ia, oli save long hem olsem “Bed blong Restoresen”, from we ples ia nao Jos i bon long hem. Hem i wan naes rural eria we i stap develop, ol hil wetem ol tri, ol lek mo smol reva, mo ol naesfala pipol. Hem i wan ples we i kam tabu from ol samting we oli bin hapen long ples ia.

Tabu Bus

Insaed long wan bus blong ol natora, ok tri, mo mapol tri mo ol nara tri, samples wan kwota mael Wes long haos blong Josef mo Lusi Mak Smit, kolosap long Palmaera, Josef Smit, we i gat 14 yia, i bin luk wan visen abaot God Papa mo Pikinini blong Hem, Jisas Kraes, long spring blong 1820. Tabu taem ia i hapen olsem ansa blong prea blong Josef we i wantem save trutok long saed blong ol relijin, mo olsem wanem bae hem i save kam klin aot long ol sin; hemia i stat blong kambak (Restoresen) blong gospel long las dispensesen ia. Hemia i mekem tu se bus blong ol tri ia, oli stap olsem wan tabu ples insaed long histri blong Jos blong yumi—wan ples we yumi givim ona wetem nem ia, “Tabu Bus.”

Taem mi bin stap olsem misin presiden, famle blong mi mo mi i bin kam blong lavem tumas bus blong ol tri ia, mo filim se ples ia i tabu. Mifala i stap go ia plante taem. Evri manis, taem ol niu misinari oli kam, mo olgeta we oli stap finisim misin oli stap go, mifala i stap tekem olgeta long ples ia. Bae mifala i kam tugeta long wan ples blong go insaed long bus, mo afta we mifala i singsing fas hym blong tedei, we oli singsing long hem i naes tumas—“Prea blong Josef Smit” ¹—bae mifala i invaetem ol elda mo ol sista blong go olbaot mo faenem wan kwaet ples insaed long bus ia, bong oli save toktok wetem God long prea, mo mekem mo givim ripot abaot komitmen blong olgetawan long Hem. Ol visit ia, i go long Tabu Bus, oli bin mo oli stap yet olsem wan gudfala eksperiens blong evriwan we oli gat janis ia.

Mi luksave se wan smol namba nomo blong yufala bae i save go visitim Tabu Bus hemwan. From hemia, long spring blong 2012–192 yia afta long Fas Visen blong Josef Smit—mi wantem yufala blong kam long Tabu Bus tru long pikja. Stanap wetem mi, long ples ia tunaet, taem mi stap serem wetem yufala sam pikja blong bus ia, mo talemaot ol risen blong lav blong mi from tabu ples ia, mo ol bigfala lesen blong laef we wan i save lanem.

Mi gat kaon long Brata Robet Parot, wan man blong lukaot long bus, we Jos i stap pem hem, we i stap long Palmaera, blong i soemaot long mi sam samting abaot Tabu Bus, mo bae mi serem wetem yufala. Nomata hem i no wan memba blong Jos blong yumi yet, Brata Parot i laekem Tabu Bus mo i stap lukaotem gud wetem evri save blong hem.

Pikja blong Skripja Wetem Ol Tri

Taem we, mi bin wokbaot tru long Tabu Bus wetem respek, o sidaon wetem tingting long ol stul we oli stap, mi stap tingting long evri pikja blong skripja we i gat ol tri,ol branj, ol rus, ol sid, ol frut, mo ol bus, long hem. Adam mo Iv, ol fas papa mo mama blong yumi, i tru, tufala i bin kasem fas lesen blong planem mo lukaotem ol tri. Profet Jekob, taem hem i talem toktok blong Sinos long Buk blong Momon, i serem wan gudfala stori blong wan sid we oli planem mo lukaotem gud mo hemia blong wan wael olif tri, taem hem i bin stap tij abaot fasin we Isrel i seraot mo i kambak tugeta (luk long Jekob 5). Mo huia long medel blong yumi, speseli sapos yumi no go long wan misin yet, i no ridim, o i no ridim bakegen, mo i no bin prea mo tingting hevi long sid blong fet we Alma i stap invaetem yumi blong planem wetem fasin blong lukaot gud mo fasin blong fidim sid ia blong i kam “wan tri we i gro i kam antap kasem laef we i no save finis.” (( Alma 32:41; luk long ol ves 27–43).

I semmak long Tabu Bus. Wan man we i save lukluk gud ol samting we oli stap gro—speseli taem hem i wokbaot wetem wan man we i gat bigfala save olsem Brata Robet Parot—i save lanem ol bigfala lesen aot long fasin blong laef blong ol bus we i stap ia. Bae mi tekem sot taem mo serem fo lesen wetem yufala tedei:

Ol Lesen blong Laef we Oli Kamaot long Tabu Bus

Lesen namba 1 1:: Ol tri oli stap gro oltaem folem laet.

Wan gud samting blong stap luk insaed long Tabu Bus i we ol tri oli stap gro long ples we fas dakbus i stop long hem, mo tu, olgeta we oli stap insaed long bus ia folem ol smol rod. Plante taem, oli gro oli kam tolfala evriwan—blong kamaot long ol lif we i blokem olgeta—mo gro antap evriwan blong kasem laet blong san. Stamba blong olgeta i kruked mo branj blong olgeta, yu save luksave gud aot long ol narafala tri we oli gro stret nomo. Ol tri, olsem eni samting we i laef, i nidim laet blong save laef mo traehad. Bae oli mekem evri samting long paoa blong olgeta blong kasem ful laet blong san blong mekem saekol i gohed—hemia blong tanem paoa blong laet i kam gas o “fiul” we ol nara samting we oli laef oli yusum.

Mi save gud se ol smat yangfala maen blong yufala i save finis weaples nao pikja ia blong Tabu Bus i stap tekem yumi i go long hem! “Laet” i wan strong paoa long ples blong spirit blong jenisim laef bitim eni narafala paoa. I olsem, from se yumi nidim laet blong gro long saed blong spirit, mo blong yumi luksave ful paoa blong yumi olsem ol boe mo gel blong God.

Tudak i narasaed blong laet, mo i soemaot ol paoa blong wol we oli stap wantem seperetem yumi long God mo i spolem tabu plan blong laef blong yumi. Plante taem, hem i afta we ples i tudak, o long ol tudak ples we ol paoa blong devel oli stap soemaot ful paoa blong olgeta. Long taem blong laef blong yufala, hem i blong brekem loa blong jastiti, fasin blong stil, plei mane, brekem Tok blong Waes, mo ol nara fasin we Papa long Heven i blokem; ol samting ia, oli wokem insaed long tudak. Iven taem yumi jusum blong mekem rong samting long bigfala delaet—eksampol, taem yu kopi long taem blong eksam, taem yu kopi wok blong wan narawan mo talem se i blong yu, tokbaot nogud man, talem swea, o giaman—yumi no save help, blong gat ol filing blong tudak.

Laki nomo, Spirit blong Kraes i givim laet long evri man o woman we i kam long wol ia; mo Spirit i givim laef long evri man raon long wol, we i stap lisin long voes blong Spirit.

Mo evriwan we i lisin long voes blong Spirit, i kam long God, we i Papa (D&C 84:46–47).

Toktok ia, we i kamaot long Doktrin mo Ol Kavenan i talemaot gud we man i luk i go antap, fasin ia we i stap insaed long yumi we God i givim—sapos yumi no sakemaot—blong go from laet mo taem yumi mekem olsem, blong go from God mo Pikinini blong Hem mo blong kam moa olsem Tufala. Taem Hem i tokbaot Hemwan, Kraes i se: “Mi nao … laet blong ol man long wol. Man we i biaen long mi, bae hem i no save wokbaot long tudak, …bae i gat laet blong laef” (Jon 8:12).

Blong andastanem ol skripja, yu save faenem fulap samting abaot wan toktok tru long ol nara toktok we hem i stap wetem. Long skripja stadi blong yu, luk hamas taem ol toktok ia, laet, Spirit, trutok, mo Jisas Kraes oli stap stap kolkolosap. Kolosap oli semmak, mo oli pulum yumi i go antap, i go long wan wei blong laef we i moa hae, i moa tabu.

Wetem ful hat blong mi, mi askem strong yufala blong stap longwe long tudak blong sin long eni kaen wei blong hem, mo blong yufala i fulumap laef blong yufala wetem Spirit, trutok, mo laet blong Sevya blong yumi, Jisas Kraes. Yu save mekem hemia taem yu stap lukaotem ol fren wetem gud fasin, lukaotem miusik mo art we i givim insperesen, kasem save aot long ol gud buk (speseli ol skripja), gat ol taem blong mekem tru prea, ol kwaet taem long bus, ol gudfala aktiviti mo storian, mo wan laef we long medel blong hem, i gat Kraes mo ol tijing blong Hem abaot lav mo seves. Tingbaot oltaem, mo speseli taem yu lukaotem wan kompanion we i no save finis, toktok ia blong Lod we i talem se trutok i akseptem trutok, klin fasin i lavem klin fasin, mo laet i karem laet i kam (D&C 88:40). Prinsipol ia, se gud samting i pulum gud samting i kam—i givim hop se sapos yumi gat wan laef insaed long laet blong gospel, bae yumi faenem wan kompanion we i wokbaot long semmak rod ia blong stret mo gud fasin. Mi save se moa bae yumi traehad blong fulumap laef blong yumi wetem laet, nao bae i nomo gat tumas rum blong tudak, mo bae yumi save kam kolosap blong kam olsem Kraes, Laet blong Wol.

From spesel blesing ia we mi gat tedei blong toktok long yufala, ol spesel yang Lata-dei Sent, mi wantem leftemap voes blong givim woning, be tu, blong leftemap wan voes blong leftemap tingting mo wan voes blong givim hop long saed blong tudak ia we bae i kam long laef blong yufala sapos yufala i stap tajem ponografi. Taem yu yusum ol ponografi samting, long eni wei, i mekem God i harem nogud mo i agensem komanmen blong Hem blong yumi no mekem adaltri o eni samting we i semmak long hem (luk long D&C 59:6). Taem yu yusum ponografi, i lidim yu blong yu foldaon long loa blong jastiti. Sapos yu stap yusum ponografi plante taem mo tekpat long eni fasin blong seks we i agensem loa, i save mekem se fasin ia i kam strong long yu, mo bae oli mas lukluk long yu mo mas stretem yu long semfala wei we oli stap lukaotem ol man we oli gat problem wetem alkol o drag.

Sapos ponografi i prapa spolem laef blong yu, mo i wan problem we i strong mo i stap kambak oltaem, mi plis long yu blong yu lukaotem help long ol lida blong Jos mo ol dokta. Plis, yu mas save se blong yu adik long ponografi i no wan “smol problem” nomo we yu save winim wetem tru prea blong hat blong yu, skripja stadi mo moa kontrol long yuwan.

From se adiksen long ponografi i save daonem paoa blong tingting blong yu blong jusum gud ova long nogud, bae yu nidim blong no stap flas mo gat tingting i stap daon blong akseptem Atonmen blong Jisas Kraes, mo kasem blesing blong paoa blong Atonmen. Wanem nao samting ia i minim long ril laef, i blong yu hadwok plante—we i gat tu blong go tru long fasin blong sakem sin wetem help blong bisop o branj presiden blong yu blong yu kasem fogivnes long sin mo go tru long wan longfala rod blong kamgud bakegen, we i tekem wok wetem ol dokta blong tingting, mo tu, wan grup sapot blong winim adiksen blong yu—bae paoa blong givhan blong Atonmen (we Baebol Diksonari i tokbaot olsem wan tabu tul blong help o paoa²), bae paoa blong givhan ia i helpem yu blong winim fasin blong go from ponografi, mo wetem taem, bae i hilim ol nogud risal blong hem. Tru long paoa blong Atonmen, yu save kasem tugeta ia, blong kasem fogivnes long sin mo kamgud bakegen long adiksen ia; tufala samting ia i gud tumas.

Plis, sakemaot tudak, mo olsem ol tri, oltaem lukaotem blong gro i go from laet blong san.

Lesen namba 2:: Ol tri oli nidim samting we i blokem olgeta blong oli save kasem ful mak blong kriesen blong olgeta.

Oli bin folem fulap defren tingting long fasin blong lukaotem bus truaot ol yia, long saed blong Tabu Bus ia. Long wan taem, oli bin jusum wan pis graon blong mekem tes, mo oli mekem wanem oli singaotem “fri rilis.” I wok olsem: ol man blong lukaotem bus oli jusum wanem oli ting se oli ol yang tri we oli bigwan mo helti moa long graon ia, mo afta, oli katemaot mo katkatem klinim olgeta tri we oli no gud tumas mo ol nara tri we oli save gro kwik. Tingting i stap se, taem oli katemaot kompetisen from wota, laet blong san, mo kakae blong graon, ol tri ia we oli jusum olgeta, bae oli fri blong gro mo bae oli kam bigbigwan.

Afta sam yia, oli luksave se hemia i no wok nating be i go nara wei. Taem oli fri long kompetisen, ol tri ia, oli kam slak nomo. Oli nomo gro i go antap i go from laet, oli slodaon, mo oli givim plante branj daon we bae i no gat yus from, mo kam fatfat. Smol taem afta, ol tri we oli bin karemaot, oli gro bakegen oli kam fulap mo bae oli no kam ol gudfala tri, be oli gohed blong yusum wota mo kakae blong graon. Ol bus ia oli bin gohed blong kompit wetem ol tri ia we oli bin jusum, be i no blong oli gro gud. Long en, i no gat wan tri long tes graon we oli save komperem saes blong hem mo helt blong hem wetem olgeta tri we oli gro long nomol fasin mo oli mas kompit mo winim samting we i blokem rod blong olgeta blong oli save laef mo givim flaoa.

Olsem we yufala i save, wan long ol ki doktrin blong Buk blong Momon, i we i mas gat agens long evri samting. Wan wol we i gat samting we i agens, i givim ol joes bitwin gud mo nogud, blong mekem se fridom blong joes i save wok. Wanem we i impoten semmak, i prinsipol ia se i mas gat agens blong mekem se gro long saed blong spirit i kam antap—o, olsem papa Lihae i talem—blong “tabu fasin” i mas hapen (2 Nifae 2:11). Mi wantem talemaot gud se blong andastanem prinsipol ia—se gro long saed blong spirit i nidim fasin blong blokem yu mo fasin blong agens—mo blong yufala i akseptem prinsipol long yangfala taem blong yufala, i ki blong akseptem, mo blong stap hapi long laef. Hem i wan nid tu blong gat hemia blong save gro mo develop.

Bae i gat wan taem, we yumi evriwan bae i fesem wan we i blokem o agensem yumi. Sam samting i kam from nomo yumi stap long wol ia, we samting i no stret. Hemia i wanem evri kaen man bae i fesem. Kaen fasin blong agens i kam long plante wei. Ating i paoa blong kriesen. Ating hem i smol sik, o bigfala sik (i luk se mi stap kasem flu nating we mi tekem stik from!). I save kam long fom blong temtesen. Long sam, ating i blong akseptem samting we yu no kontrolem. (Bae mi laekem blong mi tolfala moa, be mi lanem blong stap hapi wetem wanem we mi gat, mo fasin we bae oli mekem pulpit i kam daon evriwan taem mi givim toktok.) Ating i save kam tu long wei we yu stap yuwan, o taem yu gat problem long bodi, o long tingting o yu disebol—lis blong ol fos we oli agens oli no gat en—mo i semmak tu long ol blesing blong gro mo develop yuwan sapos yumi gat fet blong lukluk i go longwe mo stap strong gud kasem en. I nid tu blong akseptem toktok blong Lod long Josef Smit long Libeti Kalabus long wan taem we ol trabol blong Josef oli bigbigwan tumas. Lod i talem long Josef se hem i mas save se evriwan long ol samting ia bae oli givim eksperiens long hem, mo bae i blong gud blong hem ( luk long D&C 122:7).

Samtaem, ol samting we oli kam blokem yumi mo ol trabol oli kam from se yumi no jusum gud samting. Nogud helt o soa i kam from yu no lukaot gud long laef, tingting i fasfas o harem nogud i kam taem wan i brekem loa blong God, harem nogud we i kam afta we yumi no yusum gud taem blong yumi mo talen we oli givim long yumi—evri situesen ia oli kamaot from samting we yumiwan i mekem. Yumi mas talem tangkyu long Sevya blong yumi from Atonmen we i givim rod long yumi blong stretem ol samting we oli brok.

Mi luk se, plante taem, taem yumi fesem fasin we i agensem yumi, yumi askem: “From wanem—From wanem mi? From wanem naoia? From wanem hemia?” be i gud yumi askem : “Wanem?” hemia bae i moa gud. Wan taem, mi sendem wan leta blong leftemap tingting long wan kapol we i fesem hadtaem from we hasban bae i ded from wan sik we i no gat meresin from. Ansa blong tufala i gud tumas: tufala i mekem lis blong ol blesing we God i bin givim long tufala taem tufala i laef tugeta, mo afta, tufala i stap tingting long “wanem” nao God i stap traem blong tijim tufala long las pat blong lesen ia.

I gat ol tri long Tabu Bus we Brata Parot i singaotem “ol strong tri”. Ol tri ia, oli soemaot se fasin blong agens, i save kam long gud blong yumi, mo long en, yumi winim fulap samting. Ol tri ia, oli mas girap mo stretem olgeta, mo samtaem, oli mas kamgud bakegen long ol defren samting we i blokem o agensem olgeta—wan laetning, wan strong win, bigfala sno o aes, fasin blong man i mekem nogud long olgeta, mo samting, wan tri long saed we i blokem hem. Aot long ol situesen ia agensem hem, sam long ol tri ia oli kam ol tri we oli strong moa insaed long bus ia. Wanem we oli lusum from se oli no gro stret, bae oli winim long strong fasin blong olgeta.

Aot long eksperiens blong laef blong mi, mi save testifae se samting we i agens, hadtaem, samting we i kam agens i mekem bildimap fasin mo i mekem yu gro. Sam long ol eksperiens we i gat moa jalenj mo i askem fulap long mi—ol filing se mi no naf, se mi save se mi rong o no long taem blong yangfala laef blong mi, misin blong mi long Jemani taem mi yang man, mo blong lanem lanwis blong Jemani, blong kasem wan loa digri mo pasem eksam blong stap loya, ol hadwok blong mi wan gud hasban mo papa, mo lukluk long ol nid long saed blong spirit mo bodi blong famle wetem eit pikinini, taem mi lusum papa mo mama blong mi mo ol narawan we mi lavem, mo tu, seves blong mi long pablik olsem wan Jeneral Atoriti (mo blong rere mo givim toktok ia tedei long naet)—evri samting ia mo fulap moa, nomata i wan jalenj mo i had, i givim eksperiens long mi, mo i bin blong gud blong mi!

Mi save se i no isi blong winim tingting blong yufala, ol yangfala, be mi ones. Sapos bae yumi kasem evri samting we Papa i gat (luk long D&C 84:38), bae i no save hapen sapos yumi no givim evri samting we yumi gat. Papa long Heven i nidim ol boe mo ol gel we oli gat gud fasin olsem we Lihae i tijim, mo tabu fasin i save hapen nomo tru long fasin we i kam agens mo ol tes. Ol pipol, olsem ol tri, oli nidim samting we i blokem olgeta blong oli save kasem ful mak blong kriesen blong olgeta.

Lesen namba 3: Ol tri oli gro gud long ol bus, be i no olgetawan.

Sapos yu tingting gud, yu no save faenem tumas wan tri we i stap hemwan. Plante taem oli hip long wan bus, mo wetem taem, i kam wan dakbus. Tabu bus, i moa bitim wan grup blong ol tri. Ol defren saekol blong laef we i stap long hem i tekem plante kaen flaoa mo lif. Yu save luk ol samting we oli defdefren wetem evri defren kaen wael flaoa, bus, smol tri, masrum, nalumlum, animol we i kakae tri, rabet, dia, mo ol nara kriesen we oli stap. Ol defren samting ia oli stap wanples mo oli dipen long olgeta wanwan from kakae, ples blong haed, mo wan ples we evriwan i save gat eksperiens blong saekol blong laef blong olgeta wanwan.

Plan blong God from laef blong yumi, i semmak mo i tekem ol defdefren samting tugeta. Yumi mas wok blong Jisas i sevem yumi tugeta, i no yumi wanwan. Jos i bildim ol mitinghaos, i no ol smosmol haos. Oli askem yumi blong go long wan stret wod o branj—i no blong yumi pikimap wan mo jusum wanem kongregesen we yumi wantem go long hem olsem long sam nara Jos. Waes polisi ia, i mekem se bae yumi mas lan blong wok wan wetem ol narawan mo ansa long bisop blong yumi o branj presiden blong yumi; i no blong yumi ron mo go haed taem we taem i taf smol! Yumi kasem komanmen blong lavem ol neiba blong yumi (wetem ol memba blong famle blong yumi), mo blong lan blong lavem olgeta we oli kolosap long yumi i moa had bitim blong stap longwe mo lavem “ful wol”. Stat long stat blong Restoresen, komanmen i bin kam long ol Sent blong oli “kam long Saeon” mo oli kam tugeta long ol komuniti blong lan blong laef gud tugeta mo sapsapotem wanwan long yumi taem yumi ona long kavenan blong yumi blong baptaes, “we i blong tekem trabol blong narawan, blong krae wetem olgeta we oli krae mo leftemap tingting blong olgeta we oli nidim” (Mosaea 18:8–9). Olsem ol pikinini blong God, taem yumi stap yumiwan, yumi no save gro moa kwik bitim wan tri we i stanap hemwan. Ol helti tri oli nidim ol nara samting; ol helti pipol oli nidim ol narafala man.

I gud tumas we, insaed long yumi evriwan, yumi wantem blong gat wan sosaeti, gat wan kompanion, mo ol tru fren. Olsem ol memba blong famle blong God we i no save finis, yumi evriwan i wantem filim glad mo sekiuriti we ol longfala mo gud rilesensip i tekem i kam. Bae yu lanem se blong krietem ol kaen rilesensip olsem i tekem taem, hadwok, mo fulap lav. Olsem we Momon i talem, “bigfala lav …i no lukaotem samting blong hemwan nomo” (Moronae 7:45)—blong gud blong hemwan nomo; i no ol intres blong hemwan; mo i no glad blong hemwan nating. Nomata Intanet mo ol sosol netwok oli givim wan wei blong gat fren, oli no save riplesem ones, open, fes tu fes storian we i mas hapen blong ol tru mo longfala rilesensip oli hapen.

I tru, ol fas mo ol bes skul blong lanem blong wok wan wetem ol narawan, hem i long hom. Hem i long hom we yumi lanem ol lesen blong givim seves, fasin blong no stap selfis, fogivnes, mo blong save wet longtaem we i nid blong stap insaed long ol longfala rilesensip wetem ol narafala man. Mi ting se from hemia nao, i nid blong gat fasin ia blong save “klin inaf blong go long tempol,” from yumi mas stap gud wetem ol memba blong famle blong yumi.

I gud tu we oganaesesen blong Jos we i kamtru long insperesen, i givim ol naesfala janis mo ol ples we yumi save developem fasin blong stap ol fren. Stat long ol yangfala yia i go kasem taem yumi olfala, yumi pat blong wan wod o branj mo yumi stap long ol situesen we ol rilesensip blong yumi wetem ol narawan oli save kam bigwan. Long ol koling long Jos, ol miting, ol klas, ol kworom, ol kaonsel, ol aktiviti, mo ol nara janis blong mekem fren, yumi developem ol kwaliti mo ol skil we bae i helpem yumi rere from ol sosol oda we oli stap long heven. Taem hem i stap tokbaot hae oda ia, Lod, tru long Josef Smit i bin talem se: mo semfala fasin we i stap long medel blong yumi long ples ia, bae i stap wetem yumi long nekis laef, be antap long hem i gat glori we i no save finis, we glori ia, yumi no kasem yet naoia ( luk long D&C 130:2).

Sapos yumi hop blong gat ol sem frensip ia blong heven mo glori we i kam wetem long wol we i stap kam, yumi nidim blong oltaem, kam antap long hem, mo tu, long saed blong spirit taem yumi stap ia long wol. Ol pipol, olsem ol tru, oli gro gud long komuniti, i no olgetawan.

Las lesen, lesen namba 4: Ol tri oli tekem paoa aot long ol kakae we ol jeneresen blong ol tri bifo oli krietem.

I bin gat wan taem we oli stap lukaotgud long ol samting insaed long Tabu Bus, taem we olgeta we oli wok oli disaed se bae bus ia i mas luk klin. Oli bin oganaesem ol seves projek blong ol yut mo misinari blong kliarem bus ia long ol tri we oli foldaon, mo ol branj mo ol doti, mo roten stamba blong tri mo ol ded lif. From hemia, i no tekem taem nating blong gud helt blong bus ia i go daon. Ol tri oli gro slo, sam niufala tri nomo oli gro, mo sam kaen wael flaoa oli stat blong lus, mo laef blong ol wael animol mo pijin oli stap go daon.

Taem Brata Parot i tekova long bus ia sam yia i pas, hem i askem blong oli mas lego bus ia olsem we hem i stap. Nao oli lego ol tri mo ol branj we oli foldaon blong oli roten mo mekem graon i kam rij. Ol lif oli stap long ples we oli foldaon long hem. Oli bin askem ol visita blong stap nomo long rod we oli makem blong mekem se oli no spolem bus mo graon i no strong tumas. Afta long sam yia nomo, bus i stat blong kam niu bakegen mo i jenis bigwan. Tedei, i luk se i niu, i no gat samting i tajem, wetem fulap grin lif mo fulap wael animol.

Lesen blong lanem aot long eksperiens ia blong lukaotem bus, i impoten long mi. Blong seven yia nao, i bin wan janis blong mi stap olsem man we i raetem histri mo kipim rekod blong Jos. Hemia i wan ofis we Profet Josef Smit i bin krietem blong ansa long komanmen blong Lod long dei we oli bin oganaesem Jos: Luk, i mas gat wan man blong raetem histri long medel blong yufala ( luk long D&C 21:1). Stat long dei ia—stat long taem we oli bin jusum Oliva Kowdri olsem fas man blong raetem histri mo kipim rekod—mo kasem tedei—i gat fulap histri blong Jos we oli bin raetem mo kipim. Jon Witma i bin tekem ples blong Oliva Kowdri mo Lod i bin talem long hem blong kipim wan histri blong evri impoten samting, we i blong gud blong Jos, mo blong ol jeneresen we oli stap kam antap we bae oli groap long graon blong Saeon ( luk long D&C 69:3, 8).

From wanem nao, blong kipim rekod, blong kolektem, lukaotem gud, mo serem histri i wan impoten samting insaed long Jos blong Jisas Kraes? From wanem i impoten tumas long yufala olsem pat blong ol jeneresen blong tedei we oli stap kam antap, blong yufala i tingting mo tekem paoa aot long ol jeneresen blong bifo?

Ansa. Mi ting se i no posibol blong laef fulwan long taem tedei we i stap go—i no posibol blong plan from fiuja blong yumi—sapos yumi no save wanem i bin hapen bifo. Trutok ia i bin kam strong long mi sam manis i pas, taem mi mitim wan gudfala kapol we i bin gotru long wan tes we i spesel we bae mi serem wetem raet blong tufala. Afta sam yia blong mared, mo ol pikinini oli bon, waef i bin kasem wan bigfala aksiden. Hem i stap long hospital sam wik we hem i no save wan samting. Taem hem i girap, hem i nomo tingbaot wan samting blong laef blong hem. Hem i no gat histri. From se hem i nomo tingbaot laef blong hem, hem i no gat samting blong hang long hem. Hem i no save hasban blong hem, ol pikinini blong hem, o papa mo mama blong hem! Taem hasban ia i talem stori ia long mi, hem i talem se ol fas manis afta long aksiden, hem i wari se bae waef blong hem bae i go olbaot sapos i no gat man blong lukaotem hem. Hem i fraet tu se bae woman blong hem bae i no lavem hem bakegen. Long taem blong stap fren, hem i bin wan naes spot yang man wetem hea i fulap long hed. Naoia, long medel yia blong laef, bodi i nomo strong mo hem i no gat tumas hea!

Tangkyu tumas, long evriwan, oli bin kipim sam rekod i stap. Hasban i bin holem taet ol leta we waef blong hem i bin raet i go long hem taem hem i bin stap long misin. Hemia i bin wan pruf se tufala i bin lavem tufala wan taem. Hem i bin kipim jenol blong hem tu we hem i raetem fulap samting. Sloslo, ova long sam yia, plante histri blong waef blong hem, olgeta we oli lavem hem, oli raetemdaon.

Spesel mo kaen situesen ia i soemaot hamas rilesensip we i pas i kam kasem taem naoia mo i go long fiuja i impoten. Hem i help tu blong glad moa long mining blong Lod long toktok ia trutok olsem we Hem i bin talemaot long Josef Smit se Trutok, i save blong ol samting olsem we oli stap, mo olsem we oli bin stap, mo olsem we bambae oli kam yet ( luk long D&C 93:24). Save we yumi gat abaot laef blong yumi bifo, i from ol rekod we oli bin raetem, mo save abaot fiuja i from ol skripja mo ol tijing blong ol profet we oli laef, we oli givim yumi save long olsem wanem blong yusum gud fridom blong joes blong yumi long taem we yumi stap laef. I tru, save ia, i givim moa bitim wan tingting we i kam long God from se hem i mekem yumi go kolosap moa long paoa blong Hem blong gat evri samting i stap long fored blong ae blong yumi ( luk long D&C 38:2).

Olsem ol memba blong Jos we yumi blong plante nesen, yumi evriwan i serem histri blong Jos ia. Hem i impoten blong yumi evriwan i kam blong savegud histri blong Jos blong yumi, speseli wanem mi singaotem “ol stamba stori.” Ol stori ia, Fas Visen blong Josef Smit, taem we Buk blong Momon i kamtru, ol visit blong ol enjel olsem Jon Baptaes, Pita, Jemes mo Jon, Elaeja, Ilaeas, mo ol narawan—ol stori ia oli tekem ol stamba trutok we Restoresen blong gospel i stanap long hem.

Sore tumas, long taem ia we teknoloji i givim fulap infomesen—sam oli stap tokbaot nogud ol taem mo pipol long histri blong Jos—mekem se fet blong sam Lata-dei Sent i seksek, mo oli stat blong gat kwestin long ol bilif blong longtaem. Long wanwan we i gat ol kwestin ia, mi givim lav mo andastaning mo stret tok se sapos oli obei long ol gospel prinsipol mo gohed blong prea taem oli stap stadi long histri blong Jos—blong oli stap stadi inaf blong andastanem samting moa be i no blong stadi smol mo kasem haf save—bae Tabu Spirit bae i konfemem bilif blong olgeta long ol stamba pat blong histri blong Jos taem bae i givim pis long maen blong olgeta. Long wei ia, bae tingting blong olgeta i stret long ol samting abaot histri blong Jos we i bin kambak mo bae oli no flae wetem evri kaen win blong doktrin( luk long Efesas 4:14). Mi bin putum ful laef blong mi i folem rod blong ol kaen filing blong pis ia long saed blong Fas Visen blong Josef Smit o ol nara samting we i bin hapen long gospel we i bin kambak, olsem plante long yufala i bin mekem, mo mi save se bae yumi neva harem nogud from.

Histri, hem i wan rekod blong ol pipol mo laef blong olgeta, mo aot long ol laef ia, i gat ol stori mo ol lesen we i save kam mekem wanem yumi biliv long hem, wanem yumi stanap from, mo wanem yumi mas mekem long fored blong agens, i kam strong moa. I no evri stori we i mekemap histri blong yumi oli olsem hemia blong Fas Visen blong Josef Smit, o blong misin blong Wilfod Wudrof long Inglan. I tru, sam gudfala stori oli kamaot long laef blong ol Lata-dei Sent, we hem i plante long yumi we yumi stap ia. Oli gud tumas mo, oli stap helpem yumi taem ol stori ia, oli abaot ol bubu blong yumi tu.

Eksampol. Long ol yia 1920, bubuman mo bubuwoman Jensen—nomata tufala i wok longfala aoa—tufala i mas givimbak wan fam long ona blong hem we tufala i wantem pem long hem mo tufala i stap long hem long Stet blong Aedaho. Tufala i wantem gobak, wetem ol yang pikinini blong tufala, long homtaon blong tufala long Yuta be tufala i no save aot long Aedaho kasem taem tufala i pemaot kaon blong 350 dola. Tedei, i olsem wan smol mane, be i bin bigwan long taem ia. Bubuman i traem blong boro mane ia long sam man we oli gat mane ia, be i no gat. I no posibol blong boro long wan bank from tufala i pua. Hem mo bubuwoman i bin prea from help evri dei. Wan Sandei moning, long wan prishud miting, wan man we bubuman i no save gud hem i kam long hem mo talem long hem se hem i harem problem blong hem, mo bae hem i givim 350 dola ia long bubuman, mo taem bubuman i gobak long Yuta, bae i jes pembak hem. Tufala i agri mo sekhan mo bubuman i mekem folem promes blong hem.

Simpol stori ia, we bubuwoman Jensen i rekodem i wan rij famle stori. Hem i givim insperesen long mi blong soemaot hadwok, fasin blong stap ones, winim samting we i kam blokem yu, famle rilesen, mo moa impoten i soem han blong God long laef blong ol fetful bubu blong mi. Mi karem bigfala paoa mo tingting aot long eksampol blong tufala mo aot long eksampol blong ol narawan, olgeta we oli hae mo olgeta we oli simpol, blong ol jeneresen blong bifo.

Ating bae yu faenem ol semmak stori long kantri blong yu mo insaed long famle blong yu. Taem i gat, mi askem yufala blong putum tugeta ol stori ia, mo kipim gud, mo serem olgeta. Tekem kea blong pasem olgeta long wan jeneresen i go long wan nara jeneresen. Ol pikinini blong mi (mo naoia, plante long ol apu pikinini blong mi) oli laekem taem mi talem ol stori abaot “taem mi smol boe.” Mi harem se wan pipol i no bigwan moa bitim ol stori blong hem, mo mi biliv se hemia i tru tu wetem ol famle. Ol gudfala stori—sapos oli tru—oli kam gud histri. Tingbaot, ol pipol, olsem ol tri, oli tekem paoa aot long ol gudfala kakae we ol jeneresen bifo oli krietem.

Las Toktok

Naoia, blong endem toktok blong mi, mi wantem yufala blong gobak wetem mi long Tabu Bus mo stanap wetem mi kolosap long wan we oli singaotem, “ol witnes tri.” Ol tri ia, we oli bin stap gro long bus ia 192 yia i pas long taem blong Fas Visen blong Josef Smit. I gat tri long olgeta we oli laef yet insaed long bus, mo trifala ded witnes tri we oli stanap yet, tru long bigfala skil blong Brata Parot.

Taem mitufala i stap long misin kolosap long Palmaera, samtaem bae mi go long Tabu Bus miwan mo stanap, wetem respek, long saed blong witnes tri we mi laekem. Mi stap tingting se sapos tri ia i save toktok, bae i talem long mi wanem i bin hapen long spring dei long yia 1820. Be mi no nidim tri ia blong talem long mi; mi save finis. Tru long eksperiens blong spirit mo ol filing we oli stat taem mi yang mo i gohed yet naoia, mi kam blong save, miwan mo i no gat man i talem bakegen, se God, Papa blong yumi, i stap laef. Mi save tu, se Pikinini blong Hem Jisas Kraes, i Sevya mo i Ridima blong evri kaen man. Mi save se tufala Hae Man ia i bin kamaot long Josef Smit long Tabu Bus long spring blong yia 1820. Tufala i bin mekem Josef i profet, long las gospel dispensesen ia. Taem hem i bin wok anda long tabu daereksen blong Tufala, Josef i bin transletem Buk blong Momon, i bin kasem ol prishud ki mo atoriti, mo i bin oganaesem Jos blong Kraes bakegen long ol las dei ia. Yumi gat fulap blesing blong save laef long taem naoia mo blong stap olsem ol memba blong Jos blong Kraes.

Ol bigfala trutok ia, we mi bin testifae abaot olgeta, oli stat long Tabu Bus. Olsem we yufala i bin stanap wetem mi long Tabu Bus tedei, stanap oltaem insaed long maen mo hat blong yufala long tabu ples ia mo laef long tru fasin long ol trutok we God i stat blong soemaot long ples ia.

Tingbaot tu, ol lesen blong laef we Tabu Bus i tijim:

Taem ol paoa blong tudak oli lukaot blong prapa spolem yu, olsem we oli bin mekem wan taem, long yangfala Josef Smit taem hem i bin stanap long Tabu Bus, mo tingbaot laet we i bin kamaot we i saen i bitim laet blong san (luk long Joseph Smith—History 1:15–17).
Taem samting we i blokem mo agensem yu i kam long rod blong yu, mo hop i go daon, stanap insaed long Tabu Bus mo tingbaot se evri samting ia i blong yu gat eksperiens mo i blong gud blong yufala ( luk long D&C 122:7).
Taem yu stap yuwan mo stap longwe, mo yu traehad blong gat ol rilesensip wetem ol man, stanap insaed long Tabu Bus ia wetem komuniti blong ol Lata-Dei Sent we oli bin mekem kavenan blong oli givhan blong leftemap yu mo helpem yu long taem blong nid.
Mo taem ol eksperiens o ol pipol o ol trutok oli jalenjem fet blong yu mo oli krietem tu tingting long saed blong kambak blong gospel blong Jisas Kraes, stanap long Tabu Bus mo tekem paoa mo gud tingting we i kam long ol jeneresen blong ol fetful Lata-Dei Sent we oli bin stap strong blong stanap long ples ia fastaem long yu.

Hemia i prea blong mi from yufala, ol yang fren blong mi, mo mi givim wetem lav, mo long nem blong Jisas Kraes, amen.