Ko e Meʻaʻofa Haohaoá
Palesiteni Henry B. Eyring
Tokoni ʻUluaki ʻi he Kau Palesitenisī ʻUluakí
ʻOku tau fakamanatua ʻi he taimi Kilisimasí ʻa e meʻaʻofa haohaoa ʻa ʻetau Tamai Hēvaní, Hono ʻAlo ʻOfaʻanga ko Sīsū Kalaisí, ko e Fakamoʻui ʻo e māmaní. ʻOku hoko e faʻahitaʻu Kilisimasí ki hatau tokolahi ko ha taimi ʻo e fiefia he foaki ki he kakai kehé, ʻo ne fakamanatu mai ai ʻa e meʻaʻofa maʻongoʻonga tahá ni.
Naʻá ku hoko ʻi he 1970 ko ha tamai ki ha fānau tangata ʻe toko tolu. Pea hangē ko e ngaahi mātuʻa teʻeki taukei tokolahi, naʻá ku ngāue mālohi ke tokonaki maʻa ha fāmili naʻe fakaʻau ke tokolahi. Naʻá ku ʻiloʻi naʻe fie maʻu ke u fai ha fononga fakapisinisi ʻi he ʻosi ha ʻaho ʻe ua mei he Kilisimasí, kae tuku ki hoku uaifi ko Kathleen, ke ne ʻai ke fiefia ʻa e fānau tangatá ni ʻi he lolotonga ʻo ʻenau ʻaho mālōlō mai mei he akó. Naʻá ma fili fakalelei ʻemau ngaahi meʻaʻofá ʻi heʻema ʻilo mahalo ʻe makatuʻunga ʻenau fiefia mei haʻanau maʻu ha ngaahi meʻaʻofa Kilisimasi lelei ke nau vaʻinga mo iá. Naʻá ma ʻoange ki heʻema tamasiʻi lahí, ʻa ia naʻe taʻu fitu he taimi ko iá, ha palōmeta, ko ha meʻangāue ki hono tala ʻo e matangí.
Naʻá ma ʻilo naʻe fie maʻu ke fokotuʻutuʻu. Ko ia ne u tangatu hifo ai mo hoku fohá ke fokotuʻutuʻu ʻene palōmeta foʻou mo fakaʻofoʻofá. Ne ma folahi e ngaahi kongokonga ʻe hongofulu tupú peá ma ako fakalelei leva e fakahinohino ki hono fokotuʻú.
Ne mahino kiate au ʻi ha ʻosi ha ngaahi houa, ʻe tatau ai pē kapau te ma fokotuʻu totonu e ngaahi kongokongá kotoa, ʻoku ʻi ai ha meʻa ʻoku ngali kehe ʻi he palōmetá he ʻokú ne ʻai ʻa e huhuʻa he palōmetá ke ʻalu hake mo holo ki lalo. Naʻá ku feinga ke fufuuʻi ʻeku veiveiuá mei hoku fohá, ka ʻi he fuoloa ʻo e poó, ʻi he ʻosi ʻene ʻalu ʻo mohé, naʻá ku fuʻu ʻita peá u fakaʻaongaʻi leva ʻeku tohinoá ke hiki ai haʻaku tohi lāunga ki he kautaha naʻá ne faʻu ʻe palōmetá. Ko ha konga ʻeni ʻo e tohí, ka naʻá ku fiefia ne ʻikai ke u ʻave:
“ʻOku fiefia ʻema tamasiʻí heʻene palōmetá. ʻOku taʻu fitu pea ʻoku tui ka ʻi ai ha meʻa ʻoku fakaʻofoʻofa kuo pau ke ngāue. ʻOku ou fakaʻamu he ʻikai liliu ʻa e ʻeá ki muʻa pea maʻu mai ha talí, he ʻoku ʻikai ke u fie totolo au ki ʻolunga ke kākaaʻi ʻaki haʻaku seti nima pē, pea ʻoku ʻikai ke u loto ke taʻefalala ki hoʻomou palōmetá. … Kātaki ʻo fakahinohino mai e founga ke ʻai ai ke ngāué. ʻOku ʻikai ko homou ongoongó ʻoku maumaú ka ko haʻakú, kehe pē ke mou tokoni mai.”
Naʻe teʻeki ke aʻu mai ʻa e tokoni ʻofa fakaetangatá ʻi he taimi totonu ke ngāue ai e meʻaʻofa Kilisimasi koi á. Ka kuo hoko hoku fohá ko ha tamai ʻi he taimí ni, ʻo manatuʻi ʻa e ʻofa ne mau vahevahe ʻi heʻemau fetokoniʻakí. Pea ʻokú ne kei ongoʻi ʻa e tui naʻa mau maʻu, ki he ngaahi fokotuʻu ʻa e ʻOtua ʻo e fakatupu ʻo e māmani mo e ʻetimosifiá ʻa ia ʻokú ne ngaohi ke lelei ʻa e ngaahi fakamatala ʻeá. Naʻe ʻikai holo ʻa e tui ko iá ʻi heʻemau hohaʻa ke maʻu ha palōmeta ke ngaué.
Naʻa mau ako mei ai ʻa e meʻa ʻoku mou ʻilo mei hoʻomou aʻusiá: Ko e ola fiefia ʻi he Kilisimasí ʻoku faʻa kau ai ʻa e tokoni mei he niʻihi kehé. ʻOku hāhāmolofia ke maʻu ia ʻi he feohi fakakaungāmeʻá. ʻI he fakataha mo e niʻihi kehé te ne fakamafola ʻa e fiefiá mo ʻai ke fuoloa ange. Pea mahalo ko e meʻa mahuʻinga tahá, lotu ʻi he tui ki he Fakamoʻuí, ko e Fakatupu mo e maʻuʻanga ʻo e fiefia taʻengata kotoa pē, fakaafeʻi ʻa e ʻofa haohaoa ʻa e ʻOtuá, ʻa ia ko e lahi taha ʻo e ngaahi meʻaʻofa kotoa pea mo e makatuʻunga pau ʻo e fiefia taʻengatá.
Naʻe tō loloto ʻa e lēsoni ko iá ʻi homau ngaahi lotó lolotonga ha faʻahitaʻu Kilisimasi hili ʻemau fononga mo e palōmetá.
Naʻá ku fakakaukau ke u tā ha palani mo faʻu ha puha papa tukuʻanga koloa maʻa hoku uaifí. Naʻá ku fie maʻu ha tokoni ʻofa ʻa ha kakai tokolahi kehe naʻa nau maʻu ʻa e ngaahi meʻangāue mo e taukei naʻe ʻikai ke u maʻu. Naʻe lau uike ʻa ʻemau ngāué. Naʻá ku toe fie maʻu foki mo e Laumālie Māʻoniʻoní ke u ʻilo ai e ngaahi founga ke fakahoko atu ai ʻa e ʻofa pea mo e tui ʻi he ongoongoleleí, ʻi he meʻaʻofa ko iá.
Naʻá ku tā ʻi he funga tāpuní ha fakaʻilonga fakafāmili. Naʻá ku fokotuʻu ʻi muʻa ha ongo laʻi papa ʻe ua. Naʻá ku tongi ʻi he laʻi papa ʻe taha ʻa e ʻuluaki mataʻitohi ʻo hoku hingoá, pea ko e ʻuluaki mataʻitohi e hingoa hoku malí ʻi he laʻi papa ʻe tahá. ʻE toki lava pē ʻo fakaava ʻa e puhá ʻaki hano ngāueʻaki ha foʻi kī kehekehe ʻe ua, ko e taha ke fakaava ʻaki e loka he tafaʻaki ʻoku ʻi ai hoku hingoá pea ko e tahá ki he loka he tafaʻaki ʻoku ʻi ai he mataʻitohi e hingoa hoku malí.
ʻOkú ma fakaʻaongaʻi he taimí ni ʻa e meʻaʻofa ko iá ko ha puha tukuʻanga koloa ʻa e fāmilí. ʻI he Kilisimasí leva, ko e taimi ʻoku ʻi he lalo ʻakaú aí, pea mo e ngaahi ʻaho kotoa talu mei aí, ʻoku fakafonu ʻemau fakakaukaú mo homau lotó ʻaki ha feʻofaʻaki pea ki he feilaulau ʻa e Fakamoʻuí ʻokú ne ʻai ke lava ʻo maaʻusia ʻa e malí mo e fāmili taʻengatá. ʻOku fakafonu e puhá he taimí ni ʻaki ha ngaahi tā fakafāmili mo ha ngaahi tuʻunga fasi hiva Kilisimasi, ʻo tuku he veʻe piano motuʻa ʻi homau loto falé. Naʻe ʻomi ʻe hono faʻu ʻo e meʻaʻofa ko iá ha ongoʻi ʻofa ki he fāmilí pea mo e ʻEikí.
ʻOku ou kei mamata pē mo fakamālō, ki he kakai ne nau tokoni mai ʻi hono faʻu ʻo e puhá. Ko e taimi ʻoku ou mamata ai kiate kinautolú, ʻoku lava pē ke u ongoʻi ʻa e fiefia ne mau maʻu ʻi hono faʻu ha meʻaʻofa ʻo e ʻofa maʻá ha fāmilí pea mo e fakaʻilonga ʻo e ʻofa ʻoku tau maʻu ki he Fakamoʻuí. ʻOku ou fakatokangaʻi ha fofonga malimali ʻi hoku ngaahi kaungāmeʻá, ʻo hangē pē ko ia ne hoko ʻi heʻemau ngāue fakataha ki he puhá.
ʻOku mou ʻilo mei hoʻomou ngaahi aʻusia he lolotonga ʻo e faʻahitaʻu Kilisimasí ʻe lava ke maʻu ʻa e fiefia ʻoku vahevahe ko iá mei hono ngaohi mo foaki ʻo aʻu ki he fanga kiʻi meʻaʻofa iiki ʻo e ʻofá. Hangē ko ʻení, ʻoku ʻi ai hamou tokolahi ne mou ʻosi tokoniʻi ha fānau ke ne ʻave ha ngaahi peleti kūkisi ki he niʻihi ʻoku nau mātuʻaki ongoʻi liʻekina he Kilisimasí. Ko e taha ko ē ʻokú ne maʻu ʻa e meʻaʻofa siʻisiʻi ko ʻení mei ha taha ʻo e fānaú, ʻe lava ke fotu ʻo hangē ha meʻa-namukakala mahuʻingá. Pea ʻe lava ʻe he fānau ʻokú ne ʻomi e faʻahinga meʻaʻofa peheé ʻo fakamanatu kiate kinautolu ʻo e kau Tangata Poto ne nau ʻomi e ngaahi meʻaʻofa mei he Hahaké ki he Fakamoʻuí. ʻE lava ke fakatou manatuʻi ʻe he taha ʻokú ne talí mo e taha ʻokú ne foakí ʻa Kalaisi mo ongoʻi ha ʻofa mo ha loto houngaʻia.
ʻE lava ke foaki ʻe he kau talavou mo e kau finemui ʻi he Siasí, fakataha mo honau kau takí, ha ngaahi meʻaʻofa ʻo e ʻofa pea mo ha fakamoʻoni ʻi he vai faiʻanga papitaiso ʻo hotau ngaahi temipalé. Ko e lahi ange ʻo e ngaahi temipale ʻoku ofi ange ki he toʻu kei talavoú ʻokú ne ʻai e aʻusia ʻo ʻenau foakí ke toe lahi ange pea mo tuʻo lahi ange. Ko e kau pīsope mo e kau taki ʻo e toʻu tupú, te nau tokoni ʻi hono fakalotolahiʻí; ʻoku ʻi ai mo ha niʻihi te nau iku kau fakataha mo e toʻu tupú ʻi he temipalé. ʻOku nau fevahevaheʻaki kotoa ʻi hono foaki ʻo e tāpuaki ʻo e fakamaʻa mo e fakahaohaoaʻi ko ē naʻe fai ʻe he Fakamoʻuí, kiate kinautolu naʻe ʻikai nau lava ʻo maʻu e meʻaʻofa ko iá he lolotonga ʻenau kei moʻuí.
ʻOku tokolahi ange ha kau faifekau ʻoku nau kau fakataha mo e Fakamoʻuí pea mo honau ngaahi hoá ʻi hono foaki ʻo e meʻaʻofa ʻo e moʻui taʻengatá. ʻI he liliu ko ia e taʻu ki he ngāue fakafaifekaú, ʻe ongoʻi ʻe ha kakai tokolahi ange ʻa e fiefia ʻo hono foaki ʻo e meʻaʻofa mahuʻinga ko iá. ʻOku foaki foki ʻe he kau faifekaú ʻa e Tohi ʻa Molomoná ki he kakai kotoa pē ʻoku nau fetaulaki. Ko ha meʻaʻofa ia ʻo e ʻofa mo ha fakamoʻoni, naʻe fokotuʻu ʻi he fakahinohino fakalaumālie ʻa e ʻOtuá ki he kau palōfita faivelengá ʻi ha ngaahi senituli lahi. Naʻe fie maʻu ʻe he Fakamoʻuí ʻa e tokoni ʻa e kau palōfita ko iá ke faʻu ʻaki ha ngaahi meʻaʻofa ʻo e fakamoʻoni ki he Tohi ʻa Molomoná, pea ʻokú Ne fie maʻu ʻe tokoni ʻa e kau faifekaú ʻi hono vahevahe atú.
ʻOku toe foaki foki ʻe he ngaahi fāmilí ha ngaahi meʻaʻofa mahuʻinga ʻo e ʻofá mo e fakamoʻoní ʻi he taimi Kilisimasí, ʻo fou ʻi he mūsiká mo e ngaahi folofolá foki. ʻI heʻeku kei tamasiʻi siʻí, naʻá ku faʻa fakatahatahaʻi hoku fāmilí ʻi he veʻe pianó, kuo laka hake ʻeni he taʻu ʻe teaú hono motuʻá. Naʻe tuʻu e pianó ʻi homau loto falé, ofi ki he puha koloá. ʻOku kei hoko pē pianó ko ha meʻa tauhiʻofa mahuʻinga koeʻuhí he naʻe mahuʻinga ki heʻeku faʻeé he ko ha meʻaʻofa ia mei hono husepānití ʻi he taimi ne nau masiva aí. Naʻe ʻosi ʻilo ʻe heʻeku mātuʻá ʻa e masivá pea naʻá na fakapotopoto leva. Ko e ngaahi meʻaʻofa Kilisimasi ne mau maʻú naʻe feʻunga pē. Ka ne maʻu ʻe heʻeku faʻeé ha leʻo solo mālie. Naʻá ne tā ʻene pianó ʻi he Kilisimasí ʻi heʻene tataki kimautolu ʻi he hiva Kilisimasí pea mo e ngaahi himi toputapú.
ʻOku ʻikai ke u ʻilo pe naʻe toe fakakaukau kiate ia ʻi heʻene fakaafeʻi kimautolu ke vahevahe ha meʻaʻofa ʻoku tolongá. Ka neongo ʻeku kei siʻí, naʻá ku ongoʻi ha fiefia taʻe-mafakatalaʻi ʻi hono hivaʻi e ngaahi hiva ko iá. Naʻe fakafonu ʻe he mūsiká homau kiʻi ʻapí ʻaki ha laumālie ʻo e nonga. Naʻe ʻikai ngata pē ʻi heʻeku ongoʻi ʻa e ʻofa ʻa ʻeku faʻeé mo ʻeku tamaí mo hoku ongo tokouá, ka mo e ʻofa ʻa e Tamai Hēvaní mo e Fakamoʻui ko Sīsū Kalaisí.
Naʻá ku ongoʻi ko e ʻofa ne u maʻu he taimi ko iá ko ha faʻahinga meʻa naʻá ku ʻosi aʻusia ki muʻa ʻi he maama ki muʻa he māmaní. Naʻá ku fie maʻu ke ongoʻi ia ʻi ha ʻaho ʻo laka ange ʻi ha toe meʻa. Pea naʻá ku fie moʻui ke u moʻui koeʻuhí ke u lava ha ʻaho ʻo foki mo hoku fāmilí ki heʻetau Tamai Hēvaní, ʻa ia ʻoku ou ʻilo ʻe tatali mei ai ʻa e Tamai Hēvaní mo Sīsū Kalaisí. Ko e taimi ʻoku ou sio ai he taimí ni ki he kiʻi puha koloá mo e pianó, ʻoku haʻu kiate au ʻa e ngaahi manatu ʻo e ʻofa mo hoku fāmilí, pea mo e ʻofa mai ʻa e ʻEikí kiate aú.
Ko e taimi ʻoku tau hiva ai he kuaeá, ʻi he fāmilí, mo e kalasí, pea naʻa mo e taimi ʻoku tau fanongo fakataha ai he pōní, ʻoku fakamanatu mai ʻe he ngaahi hiva ʻo e Kilisimasí ʻa ʻetau kalanga fiefia ʻi he taimi ne tau ʻilo ai te tau omi ki māmani pea mo foaki mai a e Fakamoʻuí ke huhuʻi kitautolú. Te tau hivaʻi ʻi ha ʻaho ʻa e ngaahi hiva ko iá fakataha mo e tokolahi ʻo e langí.
ʻOku ou fakatauange ʻe tāpuakiʻi kitautolu ʻe he Laumālié ʻi he Kilisimasi ko ʻení pea mo e ngaahi taʻu ka hoko maí, ʻaki ʻa e mālohi ke foaki ha ngaahi meʻaʻofa kehe ʻo e ʻofa pea mo ha fakamoʻoni kia Sīsū Kalaisi mo ʻEne ongoongolelei kuo fakafoki maí. ʻOku ou ʻilo ʻe lava ke tataki kitautolu ʻe he Laumālié ʻi ha ngaahi founga lahi mo mahino ke tau foaki ai ha ʻofa, tui, mo ha fiefia ki he niʻihi kehé ʻi he faʻahitaʻu ko ʻeni ʻo e fiefiá.
ʻOku ou fakamoʻoni ko Sīsū Kalaisí ko e ʻAlo moʻoni ia ʻo e ʻOtuá pea mo e Fakamoʻui ʻo e māmaní. Ko e meʻaʻofa haohaoa Ia mei heʻetau Tamai ʻofá. ʻI he faʻahitaʻú ni pea mo e faʻahitaʻu kotoa pē, ʻoku fakaafeʻi kitautolu he hotau Fakamoʻuí ke tau kau fakataha mo Ia pea mo ha niʻihi kehe ʻi hono foaki e meʻaʻofa mahuʻinga ʻo e fiefiá. ʻOku ou fakatauange te tau fai ia ʻi he huafa ʻo Sīsū Kalaisí, ʻēmeni.