Kirisimas Mi Tong
Preseten Thomas S. Monson
Pwi me fefinei, ami mi fokkun ningoch. Ua feioch pwe iteiten ier ua tongeni poputani ai fansounen Kirisimas remi non ei, Mwichen Kirisimas An ewe Aewin Presetensi. Ua wau ai tong ngeni ami meinisin, ina mo ika oua nom ikei non ei imw are oua ausening ngeni ei mwich ren pwan och napanap.
Pokiten wewen me ningan ewe fansounen Kirisimas, fan chommong a afisi kechiu, a amwasangakich ach sipwe forsefani ach pwon ngeni Kot, me usun ewe kon mi murino itan “Calvary” a mak “a asosono ekkewe mi pekus me awora kinamwe ngeni ngunuch.”
Nge ina mo, a fen mecheres ach sipwe chok ekieki usun ekkewe osukosuken ei fansoun me naman ewe ngun minne sia kutta non manauach epwe poutseni kich. Fan chommong kich sia fori mettoch nap seni met mi namwot non ei fansoun. Naman a fis pokiten ach fiti chommong parien Kirisimas, ach mongo mong, ach kamo chommong mettoch, ach mochen mettoch ese tufich, me ach mefi osukosuk. Fan chommong ach angang non ei fansounen Kirisimas a afisi ach memefin weires, osukosuk, me pekus non ewe fansoun ita sipwe fen mefi ewe pwapwa mi feitoseni ach pwapwaiti uputiwen ach Chon Amanau.
Ach kuna ennetin pwapwan Kirisimas ese feito seni ach atepwanepwan ne fori och mettoch, ese pwan feito ren ach kamo niffang. Sipwe kuna ennetin pwapwa nupwen sia weswesen ekieki usun ewe Chon Amanau non ei fansoun. Sipwe anomu I non ach ekiek me non manauach nupwen sia fori ewe angang ita I epwe pwisin fori ika a nom fonufan. Weswesen non ei fansoun, sipwe appiru I ren ach tongei me angang ngeni aramas.
Mi wor ew kinikinin aramas mi weswesen mochen angei angangen tong, ir ekkewe mi chinnapano, me weswesen ekkewe mi riaffou pokiten ra akanemon chok. Ewe asepwanen netipengau me netipechou a ku chommong me nein ekkewe aramas mi chinnap me ekkewe mi arapato ewe fanson ar repwene mano.
Ekkoch ier me nom Elter Richard L. Evans a makei ekkei kapas: “Met mi auchea ngeni ir ar repwe angei non ar kewe ierin chinnap, mi pwan usun chok met mi auchea ngenikich non ach ierin serafo mi uren osukosuk: pwe repwe mefi pwe mi wor nenier, pwe mi wor chon aucheianir, me angang seni netip me pau mi uren tong; esap chok ren ar fori pokiten wiser, esap pwan ren ew rumw non ew imw, nge ew neni non netipen me manauan emon. …
“Sise tongeni aniwinir ngeni ar kewe ieren serafo. Nge sia tongeni anisir pwe repwe nom non kinamwen ew mwiritup mi wesen ning pokiten ach ekiek usur, ren ach aninis, me ren ach anganga ach tong seni unusen netipach.”1
Pwi me fefinei, tong ennet mi pwarata ewe tongen ewe Chon Amanau. Non December iteiten ier sia iteni ei tong ennet ewe ngunun Kirisimas. Oua tongeni rongorong. Oua tongeni kuna. Oua tongeni mefi.
Non ekkewe wik ua ekieki usun ew poraus seni nekukuni—ew poraus ua fen aporausa me nom. A chok 11 ieri. Am presetenin Kinter, Melissa, mi emon fefin chinnap mi uren tong. Ew ran non Kinter, Melissa a tingorei ai upwe witii pwe aupwe chufengen. Iwe am me ruemon chok aua momot fengen non ewe nenein sakrament. A iseta poun won afarei me a poputa ne kechiw. Ua mairu, me ua kapas eis pwata a kechiw.
A ponueni, “Use tongeni ai upwe amosonosona ekkewe atin ekkewe Trail Builder non ewe nepoputan Kinter. En mi tongeni anisiei, Tommy?”
Ua pwon ngeni Melissa pwe upwe anisi. Ngang use weweiti, nge Melissa a fen weweiti, pwata ena a awesano ewe osukosukun akurang non Kinter. A fen kuna popun ewe osukosuk—ngang. A tongeni awesano ei osukosuk ren tong.
Chommong ier a no. Melissa, iei a 90 ierin, a nom non ew nenien tumunu chinap non ewe kinikin Salt Lake City mi nom enefen me otiw. Me mwen Kirisimas ua finata ai upwe churi ai presetenin Kinter minne ua tongei. Seni ai radio ua rong Rongorong! Ekkewe chon nang ra kon ngeni ewe King mi uputiw!2 Ua ekieki usun atun ekkewe re-tipachem ra churi Jises me nom. Ra uwei niffangen gold, me nopwokus me myrrh. Ua chok uwei ewe niffangen tong me ai mochen apasa ai kinisou.
Ua kuna Melissa non ewe nenien mongo. A momot me chok nenengeni anan mongo, a urumot ren anan ren ewe fork a komoch non poun mi chinnap. Ese Mongo. Nupwen ua kapas ngeni, a chok nenau. Ua angei ewe fork me ua poputa ne amongoni Melissa, me ua chok kapas usun an angang ngeni ekkewe at me nengin nupwen a angang ren ekkewe Kinter. A usun ese chechemeni, ese pwan kapas. Ruemon chon ewe chok neni ra chok nenengeniei pun rese weweiti met ua fori. Emon a kapas ngeniei, a apasa, “Kosap kapas ngeni neminan. Ese chiwen esinna chon an famini. Ese fen apasa ew chok kapas non unusan ewe fansoun a nonnom ikei.”
A ser ewe fansounen mongo. Me ua awesano ai poraus ngeni ewe fefin. Ua uta ita upwe feino. Ua komoch poun mi apwangapwang non pei, me nenong non mesan mi ning, me ua apasa, “Kot epwe efeiochuk, Melissa. Merri Kirisimas.” Ua mairu pwe a apasa ekkei kapas, “Ua esinnok. En Tommy Monson, nei we chon Kinter. Ua fokkun tongek.” A minata pei ngeni awan me a kisi ren ew kis mi uren tong. A surutiw chonun mesan me a achechenu poum kewe. Ekana pau non ena ran mi pinino me ren nang me ra feioch me ren Kot. Ekkewe chon nang ra kon. Me rei mi pwan wor ew wewen minafo an ekkewe kapasen ewe Masta minne use mo mefi tori ena fansoun: “[Neminan,] ina i noum na.” me ngeni noun chon kaeo, “Ina I inom na. !”3
Mi usun ekkei kapas mi feito seni Bethlehem:
Ifa ukukun mosonoson
Ewe niffang mi nap a fangano!
Pwe Kot a ngeni netipen aramas
Ewe feiochun an nang
Esap wor sening epwe rong an feito;
Nge non ei fonufanen tipis,
Mi wor chon tipetekison mi mochen etiwa i
Ewe Kraist mi acheingicheing mi tonong.4
Preseten David O. McKay a apasa pwe: “Ennetin pwapwa a feito seni ach apwapwaiti ekkoch. … Ewe [ngunun] Kirisimas … a urano netipach ren tongen pwipwi me chiechioch me a afisi ach mochen anisi aramas. Mi ewe ngunun ewe kapas allimin Jises Kraist.”5
Ese wor ew fansoun nap seni iei, ei fansounen Kirisimas, pwe sipwe apochokuna sefani ach mochen anneasochisi ekkewe annuk minne Jises Kraist a aiti. Iei ew fansoun pwe sipwe tongei ewe Samon, ach Kot, ren unusen netipach—me chon unukuch usun pwisin kich. Mi murino sipwe chechemeni pwe emon a niffang moni a niffang a fangano och; emon a niffang an fansoun a fangano nap seni ewe a niffang moni; nge ewe emon an fangano pwisin i a fangano meinisin.
Sipwe kutta ennetin popun me wewen Kirisimas. Esap chok ekkewe minen ning, tiwen chok ika ena met sia aucheani non manauach. Wewen Kirisimas pwe sipwe ekieki usun ach fangafangoch nge sisap ekieki usun ach angei niffang. A pwapwa pokiten sia kuna aramas mi pwapwa. A wewen ach sipwe monukano usun pwisin kich me fangano ach fansoun fan iten ekkoch. A wewen sipwe nikitano met mi namwotongaw me ekieki usun met mi auchea. A kinamwe pokiten sia kuna kinamwe me ren an ewe Chon Amanau afanafan. A ewe fansoun sia weweiti pwe ika sia awatteno ewe tong sia awora, a pwan awatteno ewe tong fan iten ekkoch.
Mi wor Kirisimas non imwach me non ewe mwichefen,
Mi wor Kirisimas non ewe sitoa,
Nge kosap sinei met wewen Kirisimas
Chinon chok ika a nom non netipom.
Ekkewe pen mi etik non ewe snow,
Me kon mi nom non ewe asepwan,
Nge o, netipach esap pwapwa
Chinon chok ika Kirisimas mi nom non.6
Nupwen ewe fansounen Kirisimas a feitiw woch ren an ning, amo ita, sipwe fori usun ekkewe Re-Tipachem, me kutta ewe fuu mi saramaram ne emweni kich ngeni ewe tufichin Kirisimas ne angang ngeni aramas. Amo ita sipwe feino ngeni Bethlehem non pekin ngun, fiti netipach mi uren kirokiroch pwe ach niffang ngeni ewe Chon Amanau. Me amo ita aramas meinisin repwe pwapwa non ei fansounen Kirisimas. Fan ewe it mi pin mi uren feioch iten Jises Kraist, amen.