A Kurismas A Beltikelreng
President Thomas S. Monson
Rodam me a rodos, ko meral klebokel. Ng meral lungil klungiaol el bek el rak el kumuchel er a Kurismas er ngak lobengkemiu er tiang, el First Presidency Christmas Devotional. Ng betik a renguk er kemiu el rokui, el ngar tial basio malechub e ko morrenges er tial ongdibel lokiu a kuk tara rael.
A sils er a Kurismas, el ngarngii a tokubets el belkul me a klebekelel, a blechoel lolengelid, e mekrolid el mo mekbeches a blakelreng el mora Dios—e meskid-a tekoi el mengai er a chelitakl el “Calvary”—“rest to the weary and peace to the soul.”
Eng di, ng beot el de siseb er a berraod er tial ungil sils e locha choridii sel reng el ngara klengar er kid el soad el smisichii. Uldirkork lomeruul a blechoel ngarngii er a uai tia el taem el mora rebetok er kid. A uchul a ikang a uldimukl er ngii a rua betok el omeruul er a Kurismas el de bo er ngii, betok el kall el dongang, betok el chitel a udoud, mengerchir a kmal betok, me a kmal betok el de simbai. Ng blechoel el blak el reng er kid er a taem er a Kurismas a rullid el morngii a ringel er a uldesued, mui er a berraod, e kmal mo imis el mesaul, er a taem el kired el melchesuar a deureng el kirel a cherellel a Osobel.
A skel a meral deureng er a Kurismas a mei el diak el mengai er a orrechereched el merkui a betok el tekoi, ma ka de betik er ngii er a ocheral a beresent. Kede metik er a meral deureng sel denguu a Osobel el mo ngii a uchul tial sils. Ng sebechel ngara uldesued me a klengar er kid sel doruul a urerel el Ngii a soal a doruul er tial beluu. Me chelechal Kurismas, e bo doltirakl er a Okesiul sel doubeltik el reng e dosiou er a rebebil er kid.
A tebedechel a chelechad er a buai el kmal lousbech olechotel a beltik el reng a debetik er tir er a remechuodel, tokuni a resabisi. Tirkel dikea urungulir me a ngomeda berrusir a remechuodel me a remochu er a kodall.
Ng milluches a Elder Richard L. Evans er a sesei el rak era memong, me ak mo melekoi: “Aikel lousbech er a chelsel a taem el sabisi er a le mechudelang a, diua, ikel dousbech er sel doumededenger er ngii el taem er a de ngeasek: el dodengei el ngara ulecherangel, dodengei el kmo te sorir kid, me a bekokouii el omesiou lokiu a beltikelreng er a rengud me a chim-e diak el belkul a kmong ngercheled, malechub eng kuk di delmerab er a blai, ng bai tokoro el ngara rengul me a klengar er a tang. …
“Ng diak el sebeched el rulleterir el lemuut el mo ngeasek. Engdi bai sebeched el ngosuterir el mo kiei el ngara ungil e klebokel lokiu a ungil uldesued, me a ngelseuid, me a ngarngii el dmolech el beltikelreng.”1
Rodam me a rodos, a meral beltikelreng a oltirakl er a beltikelreng er a Osobel. Chelsel a December er a bek el rak e ke domekedong er ngii el reng er a Kurismas. Ng sebechem el rongesii. Ng sebechem el mesang. Ng sebechem el melchesuar.
A kmal dirk ulemdasu er a ksiliseb er ngii er ak kekerel sechal—el omeruul el bla kuuchais er ngii er a tang malechub eng eru el taem. A kmal dirk mle teruich me a tang. A merredel er kemam er a Primary, el Melissa, e mle klou el redil lungil a rengul e mle cheball. Meng mla risei ea ki dilengchokl el teru er a bechachau el ikelesia. Ng milengaichiklang er ngak e mocha lmangel. Ak mlo mechas a renguk, me ak uleker er ngii el ngera meng lemangel.
Meng millekoi, “Ng diak el sal sebechek el rulleterir tirkal Trail Builder el mo mengull sel lomuchel a Primary. Ng sebechem el ngosukak, e Tommy?”
Ak mle yaksok er a Melissa el molngeseu. Tia kora mle ngoded a renguk er ngii, eng di Melissa dimlak, e tia mlo torrob a melemall er a omengull er a Primary. Ng mlo er a uchul a mondai—ngak. Ng mlekedmokl er a beltikelreng.
Ng mlo cheuekl a betok el rak. Ea Milissa, el mla mo oketiu, e kiliei er a blil a rsemecher er a basio er a Salt Lake City. A uchei er a Kurismas e ak mlo soak el mo oldingel er ngikal betik er a renguk el merredel er a Primary. Meng ngara rasio, e ak rirengesii a chelitakl el Hark! The herald angels sing glory to the newborn King!”2Ak mlo melbedebek er a odngelir a rechad er a ongos er a betok el rak ruchei. Te uluusengk a kolt, chilt, me a mir. Ngak a kuk di ngilai a sengk er a beltikelreng me a renguk el soak el loureng a sulel.
Ak miltik er a Melissa el ngara blil a blengur. Ng ullengeng a kall er a blatingel, loba taod el merutech loba uodel chimal. Ng dimlak longang. Sera kulekoi el morngii, eng mle ungil osengel engdi ulengeng. Me ak ngiluu a taod ra chimal e mocha omeka er ngii, e milengedecheduch el mesaod er omesiou luruul el mora rengalek el sechal me a redil er sera loureor el ngara Primary. Ng dimlak bolecholt el kmong medengei a kulekoi, ma ka lulengedecheduch. A re teru el loureror er tial blil a rechuodel a ulemes er ngak el rrau a rengrir. E a imong er tir a millekoi, el kmo, “Lak mongedecheduch er ngii. Ng diak a di chimo el chad lodengelii—dirrek a telungalek er ngii. Ng dirkak a tang me longedecheduch er sera lekot el mei el mer chelechang.”
Ng mlo merek a sueleb. Me a cheldechedechak a mlo merek. Ak mlo dechor el merolang. A kurrekedii a mechitechut el chimal, e ulemes er a siua eng di klebokel el medal, e dulu, “A Dios lomekngeltengat er kau, e Melissa. Ungil Kurismas.” Ng di mle keberuul, el mengedecheduch, “Ak medengelkau. Kau a Tommy Monson, ngelekek er a Primary. Ak meral betik a renguk er kau.” Ngiluu a chimak el mor bab e turngur el mle mui er a beltik el reng. Ng rirebet a chiuosech ra medal el mera chimomang. A ikal chim er tial sils a mlo mechedaol er a babeluades e mukngeltengak er a Dios. A reanghel a meral milngitakl. A tekingel a Mastang a mlo klou a belkul merngak el dirkak a tang me bla kulechesuar rengii: “Redil, ngika ngelekem! E kuk mora oltirakl er Ngii, “Ngika a delam!”3
Meng ngara Bethlehem eng ua lou ngerngelchelui a ikal tekoi:
El diak a mengitengtik, el diak a mengitengtik
A klebokel el sengk a merusang!
Me a Dios a ngilai locha er a rengul a chad
A klengeltengat er a babeluades er ngii.
El diak a ding el rongesii sel le mei;
Engdi ngar tial beluu er a klengit,
El ngariou a rengrir a mo nguu, el
Ngii el Kristo el soisebang.4
President David O. McKay a millekoi: “A meral deureng a morngii dilmerko doruul er a rebebil el mo dmeu a rengrir. … A [reng] er a Kurismas … a remuul a rengud el mo mui er a beltikelreng er a tang me a klausechelei e odbechid el mora ungil lomeruul me a omesiou. Ngii a reng er a ebangkelio er a Jeus Kristo.”5
Ng diak a ungil taem el ua chelechang, tial taem er a Kurismas, el kid el rokui el mo lmuut loterkeklid el mora osisechakl el ble lolsisechakl a Jesus Kristo. Tia a taem el mo oubeltik el reng er a Rubak, el Dios er kid, loba rengud el rokir-me a rengara bita er kid el diua ikid. Ng dirrek el lungil bodolatk el ngikel lomoket a udoud a klou a longoit; e ngikel chemoit a temel a msa betok; eng di ngikel nguu a bedengel msang a msa rokui.
Mei mede relii a Kurismas el mo ngarngii a meral belkul. Tia diak el dil cheldoech me a ribong, e uaisei alsekum kede mla rulii el mo uaisei er a klengar er kid. A Kurismas a reng er a omerous e diak a uldasu el mo melai. Ng deureng ele kede mes a deuil a rengrir a rechad. Tiang a obes er kid e mo osiik a taem el mora rebebil. Tiang a mengoit a diak a ultutelel e olsiich a meral meklou a ultutelel. Tiang a budech ele kede mla metik a budech er a osisecheklel a Osobel. Tia a taem el bo dodengei el sel doubeltikelreng, eng mengai el mo klou el mo er a rebebil.
Ngarngii a Kurismas er a blai me a ikelesia,
Ngarngii a Kurismas er a stouang;
Engdi ng mo diak modengelii a Kurismas el kmo ngerang
A lak el ngara chelsel a rengum.
A kambalang a locha mo mengesechosm,
Me a chelitakl er a kurismas a dorrengerenges,
Engdi, a reng a mo diak el bol nguu a deuil
A lak a Kurismas er a chelsel .6
Mechelechal taem er a Kurismas el de iiliuekl er a klebkellel, e kid, el diua re Chad er a Ongos, dosiik er a medidiich, el btuch el mo omekrael er kid el mora techall er a Kurismas el ngar omesiou el mo er a rebebil rekid. Mei me dorael el mora Bethlehem el ngara reng, el nguu lobengked a delmedemek, lomekerreu el reng el ngii a sengk er kid el mora Osobel. Mei me a tang me a rokui bol nguu a mui-el deureng er a Kurismas. El ngara chedaol el mlukngeltengat el ngklel a Jesus Kristo, amen.