Kirismas Iei Limpoak
President Thomas S. Monson
Riei ohl oko oh lih oko, kumwail me inenen kaselel mehlel. I kapingki ansou mwahu nan pahr koaros en tapiada ahi Kirismas rehmwail ni met, Kaudok en Kirismas en Presidensi Keieu. I poakohng kumwail koaros, me mih nan ihmw lap wet de me pil wie rongorong kaudok wet ni ekei wiepe tohrohr.
Ansou en Kirismas, pwehki lingan oh wehwe tohrohr me e ahniki, kin kalapw kahrehieng pilen mesatail en keredi, kin elehieng atail weliakapw atail inou ong Koht, oh kin kihda—ni duwen mahsen kan en koul lingan “Calvary” —“komoal ong me pwangadahr oh popohl ong ngeni.”
Ahpw, e kin mengei en kedirepwkihla ansou wet oh mwein salongasang ngehno me kitail kin raparapahki ong atail mour. Tohto kitail kin kalapw nohnla doadoahk laud ni ansou wet. Kahrepe kan kak iangahki nohnla tohtohlahn kemwekid kan en Kirismas en towehda, nohn laudila mwonge, nohn laudila mwohni me kitail netikihla, nohn laudila me kitail kasik, oh nohn laudila pwunod. Ekei pak atail nannanti kan ni ansou en Kirismas kin elehieng atail tihwohla, sohla kak ong me kitail koasoanehdi en wia, oh pwangada ni ansou me kitail konehng pehm peren en ketemenpen ipwidi en atail Sounkomouro.
Diarada peren mehlel en Kirismas sohte kin kohdo sang ni karkaruwaruseli en kapwaiada doadoahk tohto, de ni pwainda diren kisakis. Kitail kin diar peren mehlel ni atail kin kihieng Sounkomouro en wia poahsoan en ansou kiset. Kitail kak kolokol ih nan atail madamadau oh nan atail mour ni atail kin wia doadoak me E ketin kupwurki kitail en wia pohn sampah. Ni mehlelo, nan ansou en Kirismas wet, kitail idawehn Sapwellime karasaras ni atail poakohng oh papah iengetail aramas akan.
Ehu pwihn nanpwungatail me uhdahn anahne kasaladahn limpoak iei irail akan me mahlahr, oh ni mehlel ansou me re kin kehn nsensuwed en loaloid. Pepehm en nsensuwed kin kalapw pwarada rehn irail akan me mahlahr oh pahn kereniengehr mehla.
Elder Richard L. Evans ntingihdi pahr kei samwalahro: “Ih me re anahne nan pahr me re kin mahlahr oh loaloid, mwein ekis, iei me kitail anahne ansou me kitail pwulopwul oh soakoahiek: pepehm en wia kisehn pwihn de peneinei, pepehm en mie me poakohng, oh sawas kadek sang mohngiong oh pehn aramas limpoak; kaidehnte pwehki ih me konehng, de en mih nan pere ehu de nan ihmw ehu, ahpw en mih nan mohngiong de nan mour en aramas. …
“Kitail sohte kak kapwurehdo irail en pwulopwul. Ahpw kitail kak sewese irail en mour nsenamwahu ni kihrlahn ketipin me pahn ahpwete lingankihla atail tehk wasa, sawas, oh atail limpoak mehlel.”1
Riei ohl oko oh lih oko, limpoak mehlel wia kasalepen limpoak en Sounkomouro. Nan Tihsempe en ehuehu pahr kitail kin kahdaneki met ngehn en Kirismas. Kumwail kak rong. Kumwail kak kilang. Kumwail kak pehm.
Ansou kerendo I tamanda irair ehu me wiawihiongie ni ahi pwulopwulo—irair me I koasoaiahdahr mwein pak ehu de riau. I sounparete 11. Aht president en Primary, Melissa, wia lih laud men me limpoak oh me moangepwet. Ehu rahn mwurin Primary, Melissa peki ien mihmi pwe sen kak tuhpene. Kiht riemeno mwomwohd kelehpw nan ihmw sarawio. E kihda peho pohn pwopweie oh tepida sengiseng. Pwuriamweila, I idek reh dah me e wie sengisengki.
E sapengki, “Pwutak en Trail Builder ko sohte kin rongie oh sohte kin nennenla ansoun Primary. Ke kak seweseie Tommy?”
I inoukihieng Melissa me I pahn sewese ih. Ngehi me pwuriamweikihla, kaidehn Melissa, me kahpwal koaros en sohte nennenla nan Primary tokedi mwurin ansouo. E inenlahngete aramas me elehieng kahpwalo—ngehi. Me kapwungala iei limpoak.
Pahr kan mwadangete doula. Melissa kaselelo, met sounpar 90 samwa, kin mih nan wasahn apwalih me mah ni paliepeng oh pali kapi en Salt Lake City. Mwohnte Kirismas I koasoanehdi me I pahn kohla mwemweit rehn ahi president en Primary. Nan sidohsao I rong koul “Hark! The herald angels sing glory to the newborn King!”2 I medewe duwen ohl eripit ko me kohdo pas rehn serihmen pahr tohto samwalahro. Irail wahdo kisakis en kohl, insens, oh war pwohmwahu. Ihte me I wahdo iei kisakis en limpoak oh ineng en nda kalahngan.
I diarada Melissa nan wasahn mwongeo. E wie kilikilang kene mwengeo, doakdoakoahki pwohk me e wie kolokol nan peh mahlahro. E sohte kang mwongeo. I lokaiahieng ahpw e kilengdo sohte dehdehkinie. I ale pwohko ngehi tepida kamwenge Melissa, koasoakoasoaiahkihieng sawas me e kihieng kiht pwutak oh serepein kan ansou me e kin doadoahk nan Primary. Sohte mehkot liho nda oh e sohte mwomwen taman mehkot douluhl. Aramas akan wasao kilangie mwomwen pwuriamweila. Emen irail nda, “Kedehr lokaiahieng. Sohte douluhl me e ese—pil lella ah peneinei. E sohte douluhl lokaia erein eh kin mihmi wasaht.”
Ansoun mwonge imwisekla. Ahi koasoakoasoai kelehpwo pil imwisekla. I kesihnenda pwe ien samwalahr. I koledi pehn lih luweto, kilenglahng nan mese mahlahr ahpw kaselelo, ngehi nda, “Koht en kapaikomwihda, Melissa. Merry Kirismas.” Ni ahi sohte kasik, liho ndahla, “I eseiuk. Kowe Tommy Monson, nei kisin pwutak en Primary-o. Uwen ahi poakepoakeiuk.” E koledi pehie ong ni kilin ewe oh mehn pehie ni limpoak. Pilen mesen liho wie kereker oh peht ko koaros wisekesekala. Rahno pehko kasarawihkihla nanleng oh kapaida sang Koht. Mehlel me tohnleng ko koul. Mahsen en Mwohnsapwo ahniki wehwe me inenen laudsang mahs: “Lih kilang noumw pwutaken!” Oh ong Sapwellime tohnpadahko, “Kilang inomwen!”3
E mwomwen me sang Pedleem mahsen kan peido:
Uwen meleilei, uwen meleilei
Me kisakis kaselelo kin kohda!
Eri Koht kin ketkihieng mohngiong kan
Kapai kan en nanleng.
Sohte saleng pahn rong eh ketido;
Ahpw nan sahpw en dihp wet,
Wasa me ngehn aktikitik kan pahn alehdahte ih,
Krais kadeko kin ketilong.4
President David O. McKay mahsanih: “Peren mehlel kin kohdo sangete ni atail kin kihieng aramas teikan peren. … [ngehn en] Kirismas … kin kihieng mohngiongitail kan en lingankihla limpoak en pirien oh kadek oh kin kahreieng atail kin wia doadoahk en papah. E wia ngehn en rongamwahu en Sises Krais.”5
Sohte ansou mwahusang met, nan ansou en Kirismas wet, kitail koaros en inousapahl ong padahk kan en Sises Krais. E wia ansou en poakohng Kauno, atail Koht, ni mohngiongitail unsek—oh mehn mpatail duwe pein kitail. E mwahu en taman me ih me kin kihda mwohni kin kihda laud; ih me kin kihda ansou kin kihda laudsang; ahpw ih me kin kihda pein ih kin kihda mehkoaros.
Kitail wiahda pwe Kirismas en mie katepe mehlel. E sohte pidete mehn kapwat de mehn kidim kisakis, lao kitail wiahda en mehlel ong pein atail mour. Kirismas pid ngehn en kisakis ni sohte medemedewe alehdi mehkot. E pid peren pwehki atail kin kilang peren rehn aramas. E pid manokehla pein kitail oh ahniki ansou ong mehteikan. E pid kesehla soahng kan me sohte katepe oh tetehk soahng kan me mehlel. E pid popohl pwe kitail diar popohl nan padahk kan en Sounkomouro. E pid ansou me kitail kin diarada me laudlahn atail kapahwei limpoak, e kin laudila eh kin mie rehtail en kapahwei.
Mie Kirismas nan ihmw oh nan mwomwohdiso,
Mie Kirismas nan sidohwa;
Ahpw ke sohte pahn ese dahkot Kirismas
Ma sohte nan omw mohngiong.
Ngilen pehl kan kak sekesek nan sinoh,
Oh ngilen koul kan peido nan wehwe,
Ahpw mehlel, mohngiong pahn katiasang peren
Ma Kirismas sohte mwo.6
Ni ansou en Kirismas eh pahn tepida kidimkitailkipene lingan, kitail en, duwehte me Ohl Loalokong Ko wia, rapahki usu marain, tohrohr, en kaweid kitail ong atail ansou mwahu nan Kirismas en papah iengetail aramas akan. Kitail koaros en ahniki ni pali ngehn seiloako ong Pedleem, weuwa mohngiong me mwuterek, oh limpoak en wia atail kisakis ong Sounkomouro. Oh emenemen kumwail en ahniki Kirismas me popohl. Ni mwahr sarawi oh kapaida en Sises Krais, ahmen.