Mou Omi ke Tau Fakahikihikiʻi Ia—mo e Palaní!
Hangē ko e tokolahi ʻo kimoutolu, ʻoku ou manako foki mo hoku husepāniti matātangata ko Craig, ʻi he hiva faka-Kilisimasí. Kapau te ma lisi e ngaahi hiva ʻokú ma manako taha aí, ʻe muʻomuʻa pē “Mou Haʻu Kāinga.” ʻOku “fakafiefia” pea “lavameʻa” hono fakaleá ʻo ueʻi kitautolu ke tau “omi,” ʻo “mamata,” mo “fakahīkihikiʻi ” hotau Fakamoʻui ko Sīsū Kalaisí—ko e “Tuʻi ʻo e kau ʻāngeló.”1 ʻOku ou ʻiloʻi pau ʻi heʻetau kei hoko ko ha ngaahi laumālie he maama fakalaumālié ʻo ʻilo e palani ʻo e fakamoʻuí, ne ʻikai ngata pē ʻi heʻetau mamatá ka naʻa tau kalanga fiefia he taimi naʻá Ne loto fiemālie ai ke foaki ʻEne moʻuí ko e Fakamoʻui ʻo e māmaní.2 Naʻá Ne folofola ʻaki he loto angamalū ʻa e kupuʻi lea mahuʻinga taha ko ʻení, “Ko Au ʻeni, fekauʻi au.”3
Hangē ko e ʻAposetolo ko Pitá, naʻe naʻinaʻi mai ʻe Palesiteni Monisoni “ke tau nofo teu ke talia … hono ʻuhinga ʻo e ʻamanaki lelei ʻoku ʻiate [kitautolú].”4 ʻI heʻeku vahevahe atu ha ongo manatu melie ki he Kilisimasí, ʻoku ou fakaʻamu te mou lava ʻo ʻilo e ʻuhinga ʻoku ou maʻu ai ha ʻamanaki lelei ʻi he Fakamoʻuí, ʻi he “He naʻe ʻofa pehē ʻa e ʻOtuá [ko ʻetau Tamai Taʻengata] ki māmani, ko ia naʻá ne foaki hono ʻAlo pē taha naʻe fakatupú,”5 pea ʻi he palani haohaoa mo nāunauʻia ʻo e Tamaí ki he fiefiá.
Manatu Melie Fika 1 ki he Kilisimasí
ʻI hoku taʻu 14, naʻe kei nofo ai homau fāmilí ʻi Nuʻu Sila. Naʻe kei taʻu 30 tupu ʻeku tamaí ʻi he taimi naʻe ui ia ke ne hoko ko ha palesiteni fakamisioná.
Ne hokosia e taimi Kilisimasí pea ne mau kei feinga mo hoku ngaahi fototehina ʻe toko nimá ke mau anga ki homau ʻapi foʻoú. Naʻe faingataʻa kiate au—ko ha talavou teʻeki ai matuʻotuʻa—ke u mavahe mei ʻapi, kaungāmeʻá mo e fāmilí. Ne u fakatoupīkoi holo pē, ʻi heʻeku manatu loto ki he ngaahi ongo angamahení, mo hono fakafiefiaʻi ʻo Kilisimasí—ʻa e hivá, māmá, ʻakau Kilisimasí, mo e sinoú kae tautautefito ki he fāmilí. Ne u ʻofa ki he niʻihi ne u tokoua ʻakí, ngaahi mehikitangá mo e faʻētangata ne u ʻilo te nau fakataha hake ki he ʻapi ʻeku Kuitangata ko Kaá ʻi Sōleki Siti ki he paati Kilisimasi fakataʻu ʻa e fāmili Kaá.
Ko e Efiafi ia kimuʻa he Kilisimasi ʻo e 1966. Ne u fakatoupīkoi mai pē ʻo kau fakataha mo hoku fāmilí mo e kau faifekaú ʻi he efiafi fakafāmili ʻi he ʻapi misioná, mou pehē ko ha fetongi kovi moʻoni ʻeni ʻo e paati e fāmili Kaá he ne u fuʻu taʻelata he ʻofa ki aí. ʻOku ʻikai ke u manatuʻi e taimi naʻe tatangi ai e telefoní, ka ko e taimi ia ne liliu ai hoku lotó, ʻo ne fakafonu ʻaki au e ʻofa ki heʻeku tamaí mo ʻeku fakameʻapangoʻia heʻeku siokita kimuʻá.
Ko e telefoni mei he tokoua ʻeku tamaí ko Siō, ʻo talamai ne pā-kālava ʻa ʻeku Kuitangata ʻofa, taʻesiokita, ngāue mālohi mo tauhi fuakava ko Kaá, pea ʻokú ne tokoto falemahaki ʻo ʻikai ke ne toe ʻilo ha meʻa. Ne u manatu ki ha ngaahi meʻa lahi, ki he pēteliake ʻofa, fiefia mo manako he hivá ne mau ʻofa lahi aí! Naʻe ʻohovale lahi ʻeku tamaí ʻi heʻene foki mei he telefoní, ka naʻá ne lototoʻa pē ʻo fai ʻene fakamoʻoni mālohi ki he palani ʻa e Tamaí mo ʻene tui ki he fatongia mahuʻinga ki ai e Fakamoʻuí. Naʻe ongo ʻene fakamoʻoni ki hoku loto mamahí.
Fakaʻofa he naʻe ʻikai toe sai ʻeku Kuitangatá. Naʻá ne mālōlō pē he ʻaho hono hokó. Ko e ʻaho Kilisimasí ia ʻi Nuʻu Sila ka koe efiafi ia kimuʻa he Kilisimasí ʻi Sōleki Siti, ko e ʻaho ia ne manako taha ai ʻeku Kuitangatá. Ko ʻene mālōloó ko e fuofua taimi ia ke u aʻusia ia ha mole ʻa ha taha ne u vāofi mo ʻofa lahi ai. Neongo ne u tengihia ʻene mālōloó, ka naʻe faitāpuekina mo fakafiemālieʻi au ʻe he ʻilo ki he palani nāunauʻia ʻo e fiefiá. Ne u ongoʻi fakapapau te u toe mamata pē ki heʻeku Kuitangatá kapau te u moʻui ʻo tatau mo ʻene moʻuí. ʻOku ʻikai ke u tui naʻe mahino kakato kiate au he momeniti ko ia ʻo ʻeku moʻuí, ʻa e konga mahuʻinga ne fai ʻe he Fakamoʻuí mo ʻEne feilaulau fakaleleí ʻo malava ai ke u toe feʻiloaki ha ʻaho mo e niʻihi ʻoku ou ʻofa aí. Ka naʻe feʻunga pē ʻeku ʻiló ke u fiefia ʻi he palaní. Naʻe feʻunga pē ʻeku ʻiló ke u fakahikihikiʻi Ia ko hono ʻaho ʻaloʻí ʻoku tau fakamanatuá.
Talu mei he Kilisimasi ko iá he ngaahi taʻu lahi kuohilí, mo ʻeku toe ʻilo lahi ange ki hotau Fakamoʻui ko Sīsū Kalaisí. Naʻe akoʻi mai ʻe Palesiteni Harold B. Lee : “Naʻe haʻu ʻa e ʻAlo ʻo e ʻOtuá … ki he māmaní ko e ʻAlo pē Taha naʻe Fakatupú ke fakakakato ha misiona, ke hoko ko e Lami ke tāmateʻí ʻi he fakavaʻe ʻo e māmaní, ke fakahoko ʻa e fakamoʻuí ki he faʻahinga kotoa pē ʻo e tangatá. ʻI Heʻene foaki ʻEne moʻuí, naʻá Ne fakaava ai e matapā ki he toetuʻú mo akoʻi mai e hala ʻe lava ke tau maʻu ai e moʻui taʻengatá. … Ko e tuʻunga ia ne ʻi ai ʻa Sīsuú ʻi he kotoa ʻo Hono ngeiá.”6
Manatu Melie Fika 2 ki he Kilisimasí
Naʻe hoko ha manatu melie ʻe taha ki he Kilisimasí he 1984, ʻo fakatupunga ai ʻeku toe houngaʻia lahi ange ʻi he Fakamoʻuí mo e palani nāunauʻia ʻo e fakamoʻuí. Ne u taʻu 32, ʻosi mali mo hoku husepāniti ʻofeina mo faivelengá pea ʻi ai mo haʻama fānau iiki ʻe toko fā, mei he taʻu tolú ki he hongofulu. Uike ʻe ono kimuʻa he Kilisimasí, ne mau maʻu ha ongoongo mei he toketā ne fakamamahi kiate kimautolu ʻi heʻene talamai e puke ʻi he “kanisaá.” Ne u fesiofaki mo Craig, fakamaʻumaʻu ʻema tangí mo fifili pe ʻe fēfē nai e kahaʻú. Ka ko e meʻa naʻe hokó, ko e ongoʻi nonga mo “melino … ʻa ia ʻoku lahi hake ʻaupito ʻi he faʻa ʻiloá”7 tuʻunga heʻema tui kia Sīsū Kalaisí pea mo e palani ʻa e Tamaí.
Neongo naʻe kei pīsope ʻa Craig he taimi ko iá, ka ne ma vahevahe pē ongoongó ni ki homa fāmilí ke lava ʻo ʻai ke hangē pē ki heʻema fānaú ʻoku ʻikai ha meʻa ia ʻe hokó. ʻI he uike ʻe ono ko ia kimuʻa he Kilisimasí, ne u fakaʻuli he ʻaho kotoa pē ʻi he sinoú mo e ʻaisí ki he faitoʻo he tafaʻaki talatala ʻo e falemahakí—kae siʻi taufetongi pē ʻema ongo faʻeé mo e tuofāfiné mo e tokouá ʻi he tokoni ʻi ʻapí. Ko ha taimi faingataʻa ia, ke ʻi heʻeku fakakaukau atu ki he Kilisimasi ko iá, ʻoku ʻikai ha lea feʻunga ia ke fakamatalaʻi ʻaki e lahi ʻeku houngaʻia koeʻuhí ko e feilaulau fakalelei ʻa hotau Fakamoʻui ko Sīsū Kalaisí pea mo e “palani ʻofa ʻo e Tupuʻanga lahí.”8
Mahalo ʻi heʻema fakatokangaʻi lelei ange ai e pelepelengesi ʻo e moʻuí, ne hoko leva ia ke toe fakatāutaha ange ʻa e palani ʻo e fiefia ʻa e Tamai Hēvaní. Naʻe kehe ʻa e Kilisimasí he taʻu ko iá. Neongo e lahi fau ʻeku ʻofa he Kilisimasí, ko e meʻa pē naʻe mahuʻinga aí ko ʻeku mali taʻengatá, hoku fāmilí, ʻeku tui mo e fakamoʻoni ki he Tamai Hēvaní, Sīsū Kalaisi pea mo e palaní.
ʻI he ʻaho ʻe taha, lolotonga ʻeku mālōlō ʻi ʻapi ʻo fifili ki he kahaʻu ʻema fānau ʻe toko faá, ne u sio ai he makasini ko e Friend pea ne tohoakiʻi ʻeku tokangá ʻe ha hiva. Ne u tangutu hifo he pianó ʻo u tangi pē ʻi heʻeku hivaʻi mo ongoʻi e pōpoaki ne mahuhuhu ai hoku loto vaivaí. Ne u ʻiloʻi naʻe ʻikai ngata pē he fie maʻu ke u akoʻi e hivá ni ki he fānau Palaimeli ʻi homau uōtí, ʻa ia ne u hoko ai ko e faihivá, kae mahuʻinga angé ki he fānau pelepelengesi ʻe toko fā ʻi homau ʻapí.
ʻE tala fēfē ʻe he Tamaí ki he māmaní ʻene ʻofá mo e angaleleí?
ʻI heʻene foaki mai Hono ʻAló, ko ha pēpē valevale, ʻi he melino mo e māʻoniʻoni.
Ne fakahā fēfē ʻe he Tamaí ki he māmaní ʻa e hala ke tau fou aí?
Naʻá ne fekau mai hono ʻAló ke ʻaʻeva mo e tangatá ke tau lava ʻo ʻilo.
ʻE tala fēfē ʻe he Tamaí ki he māmaní ʻa e feilaulaú mo e maté?
Naʻá ne fekau mai Hono ʻAló ke pekia maʻatautolu pea toetuʻu moʻui.
Ko e hā ʻoku kole mai ʻe he Tamaí ke tau faí? Ko e hā e lau ʻa e folofolá?
Tui, ʻamanaki lelei, moʻui hangē ko hono ʻAló, tokoni ki he niʻihi kehé.
Ko e hā ʻokú ne kole maí? Moʻui hangē ko Hono ʻAló.9
Ne fakalika mai ʻe he hiva fakalaumālié ni ʻa e founga ʻe lava ke u fakahaaʻi ai ki heʻeku Tamai Hēvaní ʻeku houngaʻia koeʻuhí ko Hono ʻAló mo ʻEne palaní. Ne u ongoʻi neongo he ʻikai ke u maʻu ha faingamālie ke mamata ai ki ha tupu ʻema fānaú ʻo fuʻu lahí, ka ʻo kapau te nau ʻiloʻi, mahinoi pea moʻuiʻaki e tokāteline faingofua mo mahuʻinga ʻoku ʻi he hiva toputapú ni, te nau lava ʻo hoko ai ko ha kau ākonga moʻoni ʻa Sīsū Kalaisi.
Naʻe nofoʻia homau ʻapí ʻe ha laumālie makehe he taʻu ko iá, ʻo ne tāpuekina kimautolu ʻaki ʻa e nonga mo e feʻofoʻofani he ʻikai pē ke toe ngalo ia ʻiate au. Ne u ongoʻi hangē kuo ʻomi ki heʻema fānaú ha ongoʻi toputapu makehe ʻi he Kilisimasi ko iá. Kuo teʻeki ai tatau kimuʻa pe kimui ange ai, ʻenau fakafaivaʻi e talanoa ʻo e ʻaloʻí ʻi he ongoʻi ʻaʻapa, ofo mo e ʻofa ne mahulu hake ia honau fanga kiʻi taʻu kei īkí. ʻI heʻemau faingataʻaʻia homau ngaahi tūkungá, hangē ne mau maʻu ha ngahai ongo fakalaumālie lahi ange ʻi heʻemau fakalaulauloto mo fakafetaʻi kokeʻuhí ko e meʻafoaki ko hotau Fakamoʻui ko Sīsū Kalaisí pea mo e palani ʻo e fakamoui nāunauʻia ʻetau Tamai Hēvaní.
Ne u faʻa fifili pe ʻoku anga fēfē ha moʻui ʻa ha kakai taʻe ʻi ai e ʻamanaki lelei ʻoku maʻu mei he mahino ʻa e palani ʻo e fakamoʻuí, pea mo e tefitoʻi fatongia ʻo e Fakalelei e Fakamoʻuí ʻi he palani ko iá. ʻOku tānaki loto houngaʻia atu ʻeku fakamoʻoní ki he fakamoʻoni hotau palōfita ʻofeina ko Palesiteni Thomas S. Monson, ʻi heʻene fakamoʻoni mālohi ko ia: “ʻOku ou fakamoʻoni kau kiate Ia naʻá ne veteange kitautolu mei he mate taʻengatá, ʻa ia ko Sīsū Kalaisi, ko ha faiako Ia ʻo e moʻoní—ka ʻokú Ne mahulu hake ʻi he hoko pē ko ha faiakó. Ko Ia ʻa e Faʻifaʻitakiʻanga ʻo e moʻui haohaoá—ka ʻokú Ne mahulu hake he hoko pē ko ah faʻifaʻitakiʻangá. Ko ia ʻa e Toketā Maʻongoʻongá—ka ʻokú Ne mahulu hake he hoko pē ko ha toketaá. Ko ia naʻá ne fakahaofi e ‘niʻihi mole’ ʻo e faʻahinga ʻo e tangatá, ko e Fakamoʻui ʻo e māmaní, ko e ʻAlo ʻo e ʻOtuá, ko e Pilinisi ʻo e Melinó, ko e Tokotaha Māʻoniʻoni ʻo ʻIsilelí—ko e ʻEiki toetuʻú—naʻe folofola, ‘ko au ko e ʻuluakí mo e kimuí; ko au ia ʻa ia ʻoku moʻuí, ko au ia ʻa ia naʻe fakapōngí; ko au homo taukapo ki he Tamaí.’” [ D&C 110:4 ].”10
ʻI heʻetau fakakaukau atu ki Heʻene feilaulau taʻefakatatau maʻatautolú, ʻoku moʻoni ia ko e ngaahi foʻi lea fakaʻofa taha ʻeni kuo folofola ʻaki ʻe he Fakamoʻuí: “ʻE ʻalu foki mo kimoutolu?”11 ʻI he taimi ʻo e faingataʻá, te tau lava ʻo fai ha fili ke tafoki meiate Ia ʻo fefaʻuhi tokotaha pē mo hotau ngaahi ʻahiʻahí, pe ko ʻetau fili ke tafoki kiate Ia mo e palani ʻa e Tamaí, ʻo ʻilo ai he ʻikai ke tau mamahi “ʻi ha faʻahinga faingataʻa, taʻemole atu ia ʻi he fiefia ʻa Kalaisí.”12 Ko ʻeku lotú ke tau tali e fakaafe ʻo e himi Kilisimasi toputapú, ke tau “[omi ʻo fakahikihikiʻi ia], mo ʻetau Tamai Hēvaní koeʻuhí ko ʻEne palani nāunauʻia mo haohaoá! ʻI he huafa ʻo Sīsū Kalaisí, ʻēmeni.