Oh, Tuhkuh, Lwelah Kuht in Ahkfuhlwactyacl—ac Plwacn sac!
Oacna inkaiowos, mukul kahto tuhmuhk, Craig, ac nga luhngse yohk on muhtahl luhn Kristmas. Kuht fin oraclah tahk ke on kuht luhngse yohk emet, “Oh, Come, All Ye Faithful” ac oasr lucng kac. Kahs engan ac wolacna ma oasr kac ac suli kuht in tuhkuh, liye, ac luhngse Mwet Lahngo lasr, Jisus Kraist—“Tohkohsrah luhn lupufacn.”1 Nga puhla yohk, ke kuht nguhn met liki moul se inge suc lutlut ke plwacn in molwelah, kuht tiac liye ac luhngse muhkwena tuhsruhktuh kuht ahkkahlwemye engan yohk ke El sulwaclah ke ohiyac puhsisacl in Mwet Lahngo luhn facluh.2 Ke kahs ekahsr ma yohk emet, El puhsisacl in fahk lah El ac som in “Mwet Lahngo lasr.”3
Mwet Sap Peter el kai kuht in “Akola pacl nukewa in sang … ke srihpac luhn finsrak se su oan in [kuht].”4 Ke nga akacsruhi kuhtuh mwe esam sifacna luhk ke Kristmas, nga finsrak kowos ac kuh in liye lah efuh oasr finsrak sihk nuh sin Mwet Lahngo, ke “God [Pahpah tuhmasr Ma Pahtpaht] El [suc] luhngse facluh ouinge: El ase wen sefanna natul, tuh elos nukewa su lulalfongi in el fah tia misa, a elos fah eis moul ma pahtpat.”5ac ke plwacn luhn engan wolacna ac suwohswohs luhn Pahpah.
Mwe Esam Se Met luhn Kristmas
Ke nga matwac yac 14, sucu lasr muhta fin acn New Zealand. Pahpah tuhmuhk el mukul fuhsr matwac yac 30 ke el pahngonyuck in kuhlwacnsap we in ekihn sie prestuhn luhn misin se we.
Pacl luhn Kristmas tuhkuh, ac ma limekohsr wiyuck ac nga tuh srackna srihke ahkpahyekuht nuh ke lohm sasuc sesr ke acn sasuc se. Ma upac se nuh sihk—mwet fuhsr se suc soenna lahlmwetmwet—in som liki lohm, kawuck, ac sucu uh. Nga tiac engan, ac ahsroelah mwe lohng, liye, ac ahkfuhlwactye ma nga etuh ke Kristmas—on uh, kahlwem kuh, sahk soko luhn Kristmas, snow an, ac yohk na sucu. Nga ahsroelah kuhsin, aunt, ac uncle suc nga etuh ac apkuhran tuhkweni ke lohm sin Pahpah Mahtuh Kjar ke acn Salt Lake City in weluhl ke ahkfuhlwact luhn Kristmas ke sucu luhn Kjar.
Pacl in Kristmas Eve ke yac 1966. Nga wi sucu luhk ac misineri finne nga tiac luhngse in oruh ekuh in toeni luhn sucu ke lohm luhn misin, ac luhlahlfongi lah tuhkweni se inge, ke ma wo emet, ac srackna tiac wo oacna ahkfuhlwact luhn sucu luhn Kjar ma nga srohnfuhsr kac. Nga tiac kuh in esam pacl ma tacluhfon ah ring, tuhsruhktuh ma sikyak ke pahng uh sa in ekuhllah puhla ke infuckihl ac—yohk na ekuhllah inse fuhsr luhk. Pacl sacn oruh nga in puhla ma yohk nuh sin pahpah wolacna tuhmuhk ac ahsor ke mukwikwi nuhnkuh kac sifacna luhk.
Pahng uh tuhkuh sel uncle Joe luhk (ma wiyacn pahpah tuhmuhk), in fahk lah Pahpah Mahtuh Kjar tuhmwacsr suc luhngkihnyuck, wacngihn nuhnkuh kac sifacna, orekma upac, karihngihn wuhlweacng, tuhfahna kweok ke stroke yohk se ac oan ke lohm ono ac soenna nguhtwaclihk. Mwe esam luhk uh tuhkuh nuh sihk ke pahpah se suc luhngse petsac, on, mwe pwacr, ac sucu suc kuht luhngse yohk! Pahpah el sielacna ke el fohlohk ke pahng sac, tuhsruhktuh el tuhkahkwack, tuyak loes, ac fahkwack luhlahlfongi kuh lal ke plwacn luhn Pahpah ac luhlahlfongi lal ke ip yohk luhn Mwet Lahngo kac. Luhlahlfongi lal pihrihk insiyuck ahsor.
Ma na ahsor se, Pahpah Mahtuh el tiacna wolac. El sa in misac ke lwen se tohkoh. Pa Lwen Kristmas se New Zealand tuhsruhktuh Kristmas Eve, lwen se ma pahiyacl Pahpah Mahtuh ke yac uh, fin acn Salt Lake City. Misac lal pa pacl se emet ma mwet se misac suc arlac fototo nuh yuruk ac luhngseyuck sihk. Finne nga ahsor ke misac lal, nga ahkinsewowoyeyuck ac ahkkweyeyuck ke etuh luhk ke plwacn wolacna luhn engan. Nga puhla kuh lah nga ac sifilpac liye Pahpah Mahtuh tuhmuhk nga fin moul oacna el. Nga muh nga tiac allac kahlwem suwohs, ke pacl se ingacn ke moul luhk, ip yohk luhn Mwet Lahngo ac iwaclah Lal in lwelah nga in sifilpac tuhkweni yurin mwet luhngseyuck luhk ke sie lwen. Tuhsruhktuh nga etuh ma fal in engankihn plwacn sac. Nga etuh ma fal in ahkfuhlwactyacl ke isuslac Lal.
E ke pacl luhn Kristmas sac yac puhs tari ac, nga lotwelah ma yohk ke Mwet Lahngo lasr, Jisus Kraist. Prestuhn Harold B. Lee el luti: “Wen nuhtin God … el sruok kuh in oraclah facluh, in sang molwelah nuh sin mwet uh. El tuhkuh nuh ngwe ekihn Wen Kuloh Sefanna in oruh orekma se, in oacna soko Lamb acnwucki met liki muhtwacwacyacn facluh, in molwelah mwet uh. Ke srihpen El sang moul Lal El ikacslah sruhngucl in sifilpac moulyak ac luti ke inkacnek soko ma kuht kuh in eis moul ma pahtpaht uh. … Pa inge Jisus sac ke ohiyac fuhlwact Lal.” 6
Mwe Esam Ahkluo luhn Kristmas 2
Kristmas ke yac 1984 pa sie pac mwe esam yohk ke tarilacna luhk ke plwacn wolacna luhn molwelah ac ip yohk luhn Mwet Lahngo kac. Nga yac 32, pahyuck nuh sin mukul wolacna, luhlahlfongi yohk tuhmuhk, ac ninac se nuh sin tuhlihk srihsrihk ahkosr, suc matwac yac tolu nuh ke singucul. Wik ohnkohsr met liki Kristmas, kuht eis pweng sin taktuh se ma ekuhllah ohiyacn moul lasr. Luhman fal tuh snow uh afuhnlah ma nuh kwewa ke lwen sacn. Nga kutongyuck ke puhla upac luhk ke taktuh el fahk lah oasr “cancer” sihk ke Craig ac nga ngwetacni nuh sin sie sin sie ke suhlahlahlfongi, ac ke motko lah meac ac fah sikyak uh. Puhla ahkluo, tuhsruhk, pa wo ac “misla … suc yohk liki ma mwet uh kuh in kalwem kac uh” 7 ke srihpen luhlahlfongi lasr nuh sin Jisus Kraist ac plwacn luhn Pahpah.
Finne Craig el kuhlwacnsap ekihn pisap luhn ward lasr ke pacl sacn, kuht sulwaclah in akacsruhi pweng an yurin sucu lasr uh muhkwena in lwelah ma nuh kwewa sahyac in tiac eklac nuh sin tuhlihk nahtuhsr. Ke wik onkohsr inge met liki Kristmas, nga som apkuhran lwen nuh kwewa, ke snow ac ice, in eis unweyuck ke lwen uh ke lohm ono—ke ninac ac tahmtahel pahkomuhta wiyacsr ah kais sie na ayaol in kahsruh ke lohm ah. Pa inge sie pacl upac, tuhsruhktuh nga motko ke pacl in Kristmas sac ke kahs suhfal in ahkuhtweyac tarilacna loal luhk ke kihsac in iwaclah luhn Mwet Lahngo lasr, Jisus Kraist, ac “plwacn in pahkotwen luhn Mwet Oraclah sac.” 8
Ke nga akihlen wo likina pacl met ah lah fuhkah suhkawihliyacn moul uh, nga puhla plwacn luhn Pahpah tuhmasr Inkuhsrao in ahkfototoye nuh sihk yohk likina met ah. Kristmas uh sienna ke yac sacn. Finne nga luhngse ma nuh kwewa ke Kristmas, ma na yohk srihpac nuh sihk ke pacl sacn pa pahyuck ma pahtpaht, sucu luhk, ac luhlahlfongi luhk nuh sin Pahpah tuhmuhk Inkuhsrao, Jisus Kraist, ac plwacn sac.
Sie lwen ah ke nga monglac ke lohm ah, fosrngah ac elyah ke pacl fahsruh uh luhn tuhlihk ahkosr nahtuhsr ah, nga ritiFriend mackuhsin se ac nga akihlen on soko ke sie sra puk ac. Nga muhta sisken piano ac muhtwacack in sritacl on ah. Nga tuhng ke nga on ac puhla pweng ke on uh som nuh ke insiyuck. Nga puhla nga enenuh luti on tiac nuh sin tuhlihk siofok ke U luhn Tuhlihk Srihsrihk ke ward lasr muhkwena, suc nga kuhlwacnsap kac oacna mwet kol ke on luhn U luhn Tuhlihk Srihsrihk, tuhsruhktuh yohk likina nuh sin tuhlihk ahkosr uh suc muhta ke lohm sesr.
Pahpah El kuh in sruhmuhn fuhkah nuh sin mwet facluh ke luhngse ac kuhlwacng yohk uh?
El suhpwacma Wen nahtuhl, ahwowo sasuc, ke mihslac ac muhtahl.
Pahpah El kuh in ahkkahlwemye fuhkah nuh sin mwet facluh, inkacnek kuht in fahsr kac uh?
El suhpwacma Wen nahtuhl in fahsr wi mwet fin facluh uh, kuht in muh kuh in etuh.
Pahpah El kuh in sruhmuhn fuhkah nuh sin mwet facluh ke kihsac uh, ke misac uh?
El suhpwacma Wen nahtuhl in misac kacsr ac sifilpac moulyak.
Meac Pahpah El siyuck kuht in oruh? Meac ma suhmuhslah uh fahk?
Enenuh in oasr luhlahlfongi, finsrak, moul oacna Wen nahtuhl, kahsruh mwet sahyac ke inkacnek lalos.
Meac se El siyuck? Moul oacna Wen nahtuhl.9
On moklweyuck soko inge use kahlwem srihsrihk se nuh sihk lah fuhkahngan kuh in ahkkahlwemye tarilacna luhk nuh sin Pahpah tuhmuhk Inkuhsrao ke Wen Nahtuhl ac ke plwacn Lal. Nga puhla muh nga finne tiac lwelah in liye tuhlihk nuhtihk mahtuhlah, elos fin kuh in lotwelah in etuh, kahlwem, ac moulkihn mwe luti fihsracsr tuh yohk ma oasr ke on muhtahl soko inge, elos kuh in ekihn mwet tuhma lutlut pwacye luhn Jisus Kraist ac nga ac ahkfalye ip luhk ekihn ninac kiyaclos.
Oasr puhla na sacohk se ke lohm sesr ke yac sacn, ahkinsewowoye kuht ke mihslac ac luhngse nuh sin sie sin sie ma nga tiac kuh in muhlkuhnlah. Nga sifacna puhla lah tuhlihk nahtuhsr elos eis puhla muhtahl yohk ke Kristmas. Wacngihn pacl met kuh tok ma elos oruh mukwikwi ke nativity ke kain ohiyac efahl, ke wolacna ac luhngse se ma arulacna wo ke yac fuhsr lalos. Ke kuht srihkeyuck ac kapwack ke pacl sacn, kuht luhman puhla moklweyuck sin nguhn yohk likina met ke kuht motko ac sang kuloh ke mwe sang luhn Mwet Lahngo lasr, Jisus Kraist, ac plwacn wolacna luhn molwelah sin Pahpah tuhmasr Inkuhsrao.
Pacl puhs nga motko lah mwet uh kuh in moul fuhkah ke wacngihn finsrak se ma tuhkuh ke sie kahlwem luhn plwacn in molwelah ac srihpac yohk ke Iwaclah luhn Mwet Lahngo ke plwacn sac. Nga srui in sang luhlahlfongi luhk wi mwet pahluh sacohk lasr, Prestuhn Thomas S. Monson, suc fahkwack kuh: “Ke El suc molwelah kais sie sesr ke misac wacngihn sahflahiyac, finne Jisus Kraist, nga fahkwack lah El pa mwet luti luhn ma pwacye—tuhsruhktuh el yohk likina mwet luti se. El pa Mwet Srihkasrak ke moul suwohs—tuhsruhktuh El yohk likina mwet srihkasrak se. El pa Taktuh Luhlahp—tuhsruhktuh El yohk likina taktuh se. El suc loangwelah mwet tuhlac pa Mwet Lahngo pwacye luhn facluh, Wen nuhtin God, Fihsrack luhn Mihslac, Mwet Muhtahl Se luhn Israel—finne Leum moulyak—suc fahk, ‘Nga pa muhtwacack ac sahflah; Nga pa el suc moul, Nga pa el suc misac; Nga pa mwet ahkkweye lowos yurin Pahpah.’” Liye [D&C 110:4].”10
Ke kuht nuhnkuh ke kweok ma kuht tiac kuh in kahlwem kac Lal nuh sese, pwacye lah inmahsrlon kahs limekohsr fwack sin Mwet Lahngo lasr inge pa mwe ahsor emet uh: “Yac kowos lungse pac som?”11Ke pacl uh upac, kuht kuh in sulwaclah in forlah Luhkwel ac sifacna srihke kuht ke mwe kweok lasr uh, kuh kuht kuh in sulwaclah in foracng nuh Sel ac plwacn luhn Pahpah, ac konwacack lah kuht fah “tiac kweokkihn kuhtwena mwe kweok, sahyacn ma inge in sesseslah ke engan in Kraist.”12 Pruhe luhk kacsr kais sie pa in insese nuh ke mwe suli ke on in Kristmas muhtahl soko inge ma fahk muh in alu nuh sel ac Pahpah tuhmasr Inkuhsrao ke plwacn wolacna ac suwohswohs Lal! Ke inen Jisus Kraist, amen.