Ang mga Oportunidad ug Responsibilidad sa mga Magtutudlo sa CES sa Ika-21 nga Siglo

Elder M. Russell Ballard

Sa Kurom sa Napulog Duha ka mga Apostoles

Usa ka Gabii nga Kauban si Elder M. Russell Ballard

Pakigpulong ngadto sa mga CES Religious Educators • Pebrero 26, 2016 • Salt Lake Tabernacle

Akong mga kaigsoonan, salamat sa dili ordinaryo ninyong mga paningkamot sa pagpanalangin sa kinabuhi sa atong mga mga kabatan-onan sa Simbahan.

Bag-o lang nakong giribyu ang basahon nga, By Study and Also By Faith: Usa ka Gatus ka tuig sa Seminaries and Institutes of Religion. Milagruso kini nga sugilanon! Sa akong pag-browse niini, akong nakita ang mga tahas sa akong apohan sa tuhod si Joseph F. Smith ug sa akong apohan nga si Melvin J. Ballard sa pagpalambo sa Church Education.

Karon nagserbisyo ako sa dapit nga ilang giserbisyuhan sa una tungod sa akong asosasyon kaninyo. Sukad niadtong 1985, duna koy pribilehiyo nga makaserbisyo og 14 ka tuig sa Board of Education, 7 ka tuig niini sa Executive Committee, ug upat ka tuig nga ako ang Nangulo.

Sa akong panahon sa Board, nakapasalamat ko og dako sa Church Educational System. Karon namulong ko ngadto sa tanang ginikanan ug mga apohan, ug gani sa mga apohan sa tuhod dinhi sa Simbahan samtang gipasalamatan nako kamong mga magtutudlo ug mga tigdumala ug ang inyong mga pamilya sa matinud-anon ninyong pagserbisyo. Ang nahimo sa CES sa milabayang usa ka gatus ka tuig talagsaon. Hinoon, mas interesado ko sa nagsunod nga 100 ka tuig kon unsaon ninyo sa pagtabang ang inyong mga estudyante sa pag-atubang sa nagkausab nga mga hagit sa ika-21 nga siglo.

Sa usa ka training nga miting sa mga General Authority, si Presidente Gordon B. Hinckley mitudlo sa hilisgutan nga “huptan ang doktrina nga putli ug ang Simbahan sa husto nga dalan.” Miingon Siya, “Kinahanglang mag-amping gayud kita. Kita kinahanglan gayud nga magmatngon nga dili kita mosimang [sa dalan]. Sa atong mga paningkamot nga mahimong orihinal ug lab-as ug lahi, mahimong makatudlo kitag mga butang nga dili hingpit nga haum sa nag-unang mga doktrina niining gipahiuli nga Simbahan ni Jesukristo. … Mas maayo nga mas igmat kita. … Kinahanglan gayud nga tigbalantay kita sa tore.”¹

Samtang ang Church education padayong nag-uswag sa ika-21 nga siglo, ang matag usa kaninyo angay nga mokonsiderar sa tanang kausaban nga angay ninyong buhaton aron kamo maandam unsaon ug unsay inyong itudlo kon kamo magpalig-on sa pagtuo sa kinabuhi sa bililhon natong mga kabatan-onan.

Wala na ang panahon nga kon ang estudyante tinuorayng mangutana tubagon lang sa magtutudlo, “Pasagdi lang na!” Wala na ang mga panahon nga kon ang estudyante dunay tinuorayng problema mohatag lang og pagpamatuod ang magtutudlo isip tubag sa tuyo nga likayan ang isyu. Wala na ang mga panahon nga ang mga estudyante panalipdan gikan sa mga tawo nga moatake sa Simbahan. Pagkabulahan, ang Ginoo mihatag niining haum ug tukma nga tambag kaninyo mga magtutudlo: “Ug sa ingon sa tanan nga walay hugot nga pagtuo,pangitaa ninyo nga makugihon ug magtudlo sa usag usa sa mga pulong sa kaalam; oo, pangitaa ninyo gikan sa labing maayo nga mga basahon ang mga pulong sa kaalam; pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo.”²

Magamit kaayo kini karon kay dili tanan ninyong mga estudyante dunay pagtuo aron makasagubang sa umaabut nga mga hagit ug kay ang daghan kanila nabantang sa Internet sa makalaglag nga mga pwersa sa nagtubo nga pagkakalibutanon nga supak sa pagtuo, pamilya, ug sa mga sumbanan sa ebanghelyo. Nagkagrabe ang pagkatap sa Internet sa tibuok kalibutan hapit sa tanang panimalay ug naa na sa mga kamot ug hunahuna sa inyong mga estudyante.

Matabangan ninyo ang mga estudyante pinaagi sa pagtudlo nila unsay ipasabut nga tipunon ang pagtuon ug pagtuo samtang magkat-on sila. Tudloi sila pinaagi sa pagpakita niini nga kahanas ug sa pamaagi sa pagtudlo.

Naobserbahan ni Presidente Harold B. Lee:

“Among ipahinumdom kaninyo nga ang pag-angkon og kahibalo pinaagi sa pagtuo dili sayon nga dalan sa pagkat-on. Nagkinahanglan kini og matinguhaon ug padayong paningkamot pinaagi sa hugot nga pagtuo. …

“Mao nga, ang pagkat-on pinaagi sa pagtuo dili mahimo sa tawo nga tapulan. Adunay miingon, nga, ang ingon nga proseso nagkinahanglan sa pagtugyan sa tibuok kalag, nga magsumpay sa kinaladmang hunahuna ug pagbati sa tawo ngadto sa Dios—ang hustong koneksyon angay nga pormahon. Niana lamang moabut ang kahibalo pinaagi sa pagtuo.’ ”³

Ang kahibalo pinaagi sa pagtuo makamugna og lunsayng pagpamatuod, ug ang lunsayng pagpamatuod may gahum sa pag-usab og kinabuhi, sigon sa gihulagway sa tulo ka mugbo nga mga istorya.

Una, si Phoebe Carter mibiya sa iyang balay aron makig-uban sa mga Santos niadtong mga 1830. Miingon siya, “Nahibulong ang akong mga higala sa akong gihimo, ako usab, apan sa sulod kanako may nag-ingon nga padayon lang. Ang kasubo sa akong inahan sa akong pagbiya daw dili nako maantus, ug kon dili tungod sa espiritu nga akong gibati nasayop unta ko sa kaulahian.”⁴

Gisunod ni Phoebe ang propeta ug nakig-uban sa mga Santos sa Ohio ug dayon sa Utah, diin didto siya namatay nga usa ka matinud-anong Santos sa Ulahing mga Adlaw ug asawa sa Presidente sa Simbahan nga si Wilford Woodruff.

Ang sunod nga istorya naggikan sa kang Marion G. Romney nga biography.

Isip usa ka estudyante sa kolehiyo, si Marion nakahukom nga dili na magmisyon tungod sa pinansyal nga sitwasyon sa iyang pamilya. Usa ka okasyon, nadungog niya si Elder Melvin J. Ballard nga namulong. Nag-ingon ang biography, “Wala kaayo mahibalo si [Marion] nga ang iyang kinabuhi, sa mubo kaayong panahon, hapit na mausab sa hingpit.”

Padayon ang istorya: Ang “[papa ni Marion] misulti sa iyang mga anak … nga dako kaayo ang kalainan tali sa tawo nga nagpakabuhi ubos sa inspirasyon sa Espritu ug sa tawo nga wala, sama sa kalainan tali sa buhi nga kahoy ug sa usa ka tuod. Sa unang higayon nasabtan sa hingpit ni Marion … kon unsa ang [pagbati] kon ubos ka sa impluwensya sa inspirasyon. Usa ka hait, makatandog nga pagbati mipuno sa iyang kalag. Siya … sukad wala pa matandog og sama niana nga naminaw sa mga pulong niining pinakabag-o nga Apostoles. …

“Ang batan-ong si Marion … nadasig. Ang kasanag sa panagway sa Apostol ug sinseridad sa iyang pagpamatuod wala makapugong sa tinguha niya nga magmisyon. … Nasayud siya nga ang iyang mga plano para sa dugang nga edukasyon dili lang una idayon.”⁵

Dayon, si Marion miadto sa Australia, diin matinud-anon siyang miserbisyo. Wala madugay, nahimo siyang talagsaong Apostol ug sakop sa Unang Kapangulohan.

Ang katapusang istorya gisugilon ni Presidente Boyd K. Packer mahitungod sa epekto sa edaran nga magtutudlo ngadto kang William E. Berrett. Ang magtutudlo, kinabig sa Norway, dili maayong mo-Iningles. Bisan sa mga limitasyon sa maong magtutudlo, nahinumdom si Presidente Packer nga si “Brother Berrett [mi]pamatuod labaw sa usa ka okasyon, ‘Hilabihan kahugot ang iyang pagtuo.’ ”⁶

Wala madugay, si William nahimong dako-dako sa seminary, institute, ug sa mga eskwelahan sa Simbahan.

Alang kang Phoebe, Marion, ug William, ang pagpamati sa lunsay nga pagpamatuod nahimo nga elemento nga nakausab sa ilang kinabuhi sa hangtud. Mahitabo sab kana sa inyong mga estudyante. Hinoon, tungod sa reyalidad sa kalibutan karon, ang lunsayng pagpamatuod mahimong dili na igo. Si Phoebe, Marion, William limpyo ug putli ug layo sa pornograpiya ug pagkakalibutanon dihang personal silang gitudloan sa dinasig nga mga misyonaryo, magtutudlo, ug mga lider. Ang Espiritu dali ra nga misulod sa ilang malumo ug putling kasingkasing.

Karon, ang istorya lahi ra kaayo, kay ang pipila sa inyong mga estudyante naapektuhan na sa pornograpiya ug pakakalibutanon sa dili pa mosulod sa inyong klase.

Mga henerasyon pa lang ang milabay nga ang akses sa atong mga kabatan-onan sa impormasyon bahin sa atong kasaysayan, doktrina, ug mga binuhatan limitado ra sa inimprinta nga mga materyal sa Simbahan. Gamay ra nga mga estudyante makasugat og lahi nga mga panabut bahin sa Simbahan. Kadaghanan, ang atong kabatan-onan protektado sa ilang panimuyo.

Ang kurikulum nato niadtong higayuna, bisan og maayo ang tuyo, wala andama para sa mga estudyante sa karon—diin ang mga estudyante dunay akses diha dayon sa computer sa lahi-lahing panan-aw mahitungod sa Simbahan. Karon, unsay ilang makita sa ilang mga device maingon og makahagit sa pagtuo labaw kay sa makadugang og pagtuo. Daghan sa atong kabatan-onan mas hanas sa Google kay sa ebanghelyo, mas ganahan sa internet kay sa inspirasyon, ug mas importante ang Facebook kay sa pagtuo.

Tungod niini nga mga hagit, ang Board of Education bag-o lang miaprubar og bag-ong inisyatibo sa seminary nga gitawag og Doctrinal Mastery. Gibasi sa pamaagi sa Scripture Mastery, kining bag-ong inisyatibo magtutok sa atong mga estudyante sa pagpalig-on sa ilang pagtuo kang Jesukristo ug madugangan ang ilang abilidad nga masunod ug ma-apply ang ebanghelyo sa ilang kinabuhi. Pinaagi sa paggamit sa mga kasulatan ug sa pulong sa mga propeta, makat-unan nila unsaon sa paglihok uban sa pagtuo kang Kristo sa pag-angkon og espirituhanong kahibalo ug panabut sa Iyang ebanghelyo. Ug may oportunidad sila sa pagkat-on unsaon sa pag-apply ang doktrina ni Kristo ug mga baruganan sa ebanghelyo diha sa mga pangutana ug mga hagit nga ilang madungog ug makita kada adlaw sa ilang mga higala ug sa social media.

Kini nga inisyatibo dinasig ug tukma sa panahon. Duna kini talagsaong impluwensya sa atong kabatan-onan. Hinoon, ang kalampusan sa Doctrinal Mastery, ug sa uban pang mga programa sa pagtuon sa CES, mag-agad sa inyong paghatag og importansya niini.

Kon naa kini nga mga hagit, unsa man ang inyong mga oportunidad ug responsibilidad isip mga magtutudlo sa CES sa ika-21 nga siglo? Dayag lang, kinahanglan nga higugmaon ninyo ang Ginoo, Iyang Simbahan, ug ang inyong mga estudyante. Kinahanglan nga ihatag sab ninyo ang lunsay nga pagpamatuod sa sinserong paagi ug kanunay. Dugang pa, labaw kay sa bisan kanus-a sa atong kasaysayan, ang inyong mga estudyante nagkinahanglan usab nga mapanalanginan pinaagi sa pagkat-on og doktrinal o historikal nga sulod ug kinatibuk-ang kahulugan pinaagi sa pagtuon ug pagtuo inubanan sa lunsay nga pagpamatuod aron masinati nila ang hingkud ug malungtarong pagkakabig sa ebanghelyo ug tibuok kinabuhi nga pasalig kang Jesukristo. Ang hingkud ug malungtarong pagkakabig nagpasabut nga sila “magpabilin sa sakayan ug manggunit” sa tibuok nilang kinabuhi.⁷

Para kamo makasabut sa doktrinal ug historikal nga sulod ug kinatibuk-ang kahulugan sa mga kasulatan ug sa atong kasaysayan, kinahanglan ninyong tun-an ang “pinakamaayong mga basahon,” sigun sa gisugo sa Ginoo. Ang “pinakamaayong mga basahon” naglakip sa mga kasulatan, sa pagtulun-an sa modernong mga propeta ug mga apostoles, ug pinakamaayong LDS scholarship nga anaa. Pinaagi sa makugihon ninyong paningkamot sa pagkat-on pinaagi sa pagtuon ug pagtuo, matabangan ninyo ang inyong mga estudyante sa pagkat-on og mga kahanas nga gikinahanglan sa pag-ila tali sa kasaligang mga impormasyon nga makabayaw nila ug sa dili hustong mga interpretasyon sa doktrina, kasaysayan, ug mga binuhatan nga makalaglag kanila.

Tudloan sila bahin sa mga hagit nga ilang atubangon kon magsalig lang sila sa Internet pagtubag sa mga pangutana nga may mahangturong mga kahulugan. Pahinumduman sila nga si Santiago wala moingon nga, “Ug kon aduna man kaninyoy nakulangan ug kaalam, paadtoa sila sa Google!”⁸

Ang maalamong mga tawo dili magsalig sa internet aron masusi ug matambalan ang emosyunal, mental ug pisikal nga suliran, ilabi na sa makahulga sa kinabuhi nga mga hagit. Hinoon, moadto sila sa mga eksperto sa panglawas, sa lehitimo ug lisensyadong mga mediko. Gani, ang mabuot nga mga tawo mangayo og ikaduhang opinyon.

Kon kana man ang maayong paagi sa pagpangita og tubag sa emosyunal, mental, ug pisikal nga mga problema, mas labaw pa kon ang kinabuhing dayon maoy isyu. Kon dunay butang nga hulga sa espiritwal natong kinabuhi, sa pinakabililhon natong mga relasyon sa pamilya, ug sa pagkahisakop sa gingharian, kinahanglang mangita kita og mahunahunaon ug matinud-anong mga tawo nga motabang kanato. Ug, kon mahimo, mangutana kitta niadtong nakadawat og tukma nga training sa akademik, kasinatian, ug eksperto sa pagtabang.

Ingon ani gyud ang akong buhaton kon magkinahanglan kog tubag sa kaugalingon nakong pangutana nga di nako matubag. Magpatabang ko sa akong Kaigsoonan sa Korum sa Napulog Duha ug gikan sa uban nga eksperto sa natad sa kasaysayan ug doktrina sa Simbahan.

Kinahanglang kamo ang mag-una, nga dili kapamilya sa inyong mga estudyante, sa pagpaila sa awtorisadong mga tinubdan sa mga hilisgutan nga dili kaayo pamilyar o hilisgutan nga kontrobersyal aron matimbang-timbang sa mga estudyante ang bisan unsay ila unyang madungog og mabasa batok sa mga butang nga inyo nang natudlo kanila.

Gipasusi nato ang bililhon natong mga misyonaryo sa dili pa sila magmisyon aron mapanalipdan sila batok sa mga sakit nga makadaot o makapatay nila. Sa samang paagi, palihug, susiha ang inyong mga estudyante pinaagi sa paghatag og matinud-anon, mahunahunaon, ug tukmang interpretasyon sa doktrina sa ebanghelyo, mga kasulatan, atong kasaysayan, ug sa mga topic nga usahay masaypan sa pagasabut.

Ang pipila ka mga hilisgutan nga dili kaayo pamilyar o hilisgutan nga kontrobersyal, mao ang mahitungod sa polygamy, mga bato sa manalagna, lahi-lahi nga istorya bahin sa Unang Panan-awon, ang proseso sa paghubad sa Basahon ni Mormon o ang Basahon ni Abraham, isyu bahin sa pagkalalaki ug pagkababaye, kaliwat, ug sa priesthood, ang Mountain Meadows Massacre, o Langitnong Inahan.

Ang paningkamot nga masusi ang atong kabatan-onan kadaghanan anaa kaninyo mga magtutudlo sa CES. Uban niana nga panghunahuna, gahini og panahon ang pagpamalandong sa inyong mga oportunidad ug mga responsibilidad.

Ang mga lider sa Simbahan karon, hingpit nga nahibalo sa walay limit natong access sa impormasyon, mihimo og dili ordinaryong paningkamot aron mahatag ang tukmang kahulugan ug panabut sa Pagpahiuli. Usa sa nag-unang example niini nga paningkamot mao ang 11 ka Gospel Topics essays sa LDS.org nga naghatag og balanse ug kasaligang interpretasyon sa mga kamatuoran alang sa mga kontrobersyal ug dili pamilyar nga hilisgutan nga may kalabutan sa Simbahan.

Importante nga mahibaloan ninyo ang sulod niini nga mga essay sama nga kini inyo na gayud nga nahibaloan. Kon duna moy mga pangutana mahitungod niini, palihug pangutana ngadto sa nakatuon ug nakasabut na niini. Sa ato pa, “pangitaa ang pagtulun-an, gani pinaagi sa pagtuon ug usab pinaagi sa pagtuo.” samtang i-master ninyo ang sulod niini nga essay.

Kinahanglan usab nga inyong mapamilyar ang Joseph Smith Papers website ug ang Church history nga seksyon sa LDS.orgug ubang mga kapanguhaan pinaagi sa matinud-anong mga LDS scholars.

Ang paningkamot nga makita ang tanan unsay anaa sa ebanghelyo ug ang espirituhanong pagsusi pinaagi sa pagtuon sa doktrina ug kasaysayan, uban sa nagdilaab nga pagpamatuod, maoy pinakamaayong tambal aron matabangan ang mga estudyante nga makasugakod sa mga pangutana o pagduha-duha ug kakulang sa pagtuo nga ila unyang atubangon.

Kon kamong mga magtutudlo maningkamot nga mas masabtan ang atong kasaysayan, doktrina, ug mga buhat—maandam kamo sa paghatag og mahunahunaon, mainampingon, ug dinasig nga tubag sa pangutana sa inyong mga estudyante.

Usa ka paagi nga mahibaloan ninyo unsay pangutana sa inyong mga estudyante mao ang pagpaminaw gayud kanila.

Ang una namong gamayng anak, sa pag-edad niyag lima, mikat-kat sa akong paa samtang nagbasa ko og newspaper. May gisulti siyang para niya importante, ug wala ko manumbaling. Mao nga giisa niya ang iyang gagmayng kamot, gibira ang newspaper, gihampak ang akong nawong, gitutukan kog maayo, ug miingon, “Daddy, wa ka maminaw nako!” Sakto siya—ug ako ang sayop sa wala pagpaminaw. Ang tanang maayong magtutudlo kinahanglang maayo nga tigpaminaw.

Agig dugang sa pagpaminaw sa inyong mga estudyante, awhaga sila sa pagpangutana nimo sa klase man o sa pribado sa bisan unsang topic.

Usa sa pinakaimportanting pangutana nga tingali ilang ipangutana mao ang “Ngano?”

Kon pangutan-on kamo og sinserong tinguha nga makasabut, ang “Ngano?” maoy maayo kaayong pangutana. Pangutana kana nga gustong madawat sa mga misyonaryo gikan sa ilang mga investigators. Nganong nia kita dinhi? Nganong ang dili maayong mga butang nahitabo sa buotang mga tawo? Nganong kinahanglan kitang mag-ampo? Nganong kinahanglan kitang mosunod ni Kristo? Kasagaran ang pangutana nga “ngano” maoy makahatag og inspirasyon ug pagpadayag. Ang pagkahibalo sa plano sa atong Langitnong Amahan sa kaluwasan makatabang sa pagtubag sa daghang pangutana nga “ngano”. Hisgutan nako ang dugang pa mahitungod niini sa makadiyot.

Diay katapusang pahinumdom bahin sa pagtubag og mga pangutana. Importante nga matudloan ang mga estudyante nga bisan og daghan ang mahatag sa ebanghelyo, kondili man tanan, ang uban sa pinakaimportanting pangutana dili matubag dinhi sa mortalidad tungod kay kulang kita sa impormasyong gikanahanglan alang sa tukmang tubag. Sigon sa atong nakat-unan kang Jacob: “Tan-awa, mahinungdanon ug kahibulongan ang mga buhat sa Ginoo. Unsa ka pagkatulukibon ang giladmon sa mga misteryo diha kaniya; ug kini dili mahimo nga ang tawo makakaplag sa tanan niya nga mga paagi. Ug walay tawo nga masayud sa iyang mga paagi gawas kon kini ipadayag diha kaniya.”⁹

Karon usa ka pulong sa pasidaan: Palihug hibaloi basin og nagtuo mo, sama sa ubang estudyante, nga kamo eksperto sa kasulatan, doktrina, ug sa kasaysayan sa Simbahan. Ang bag-ong pagtuon nagpakita nga “kon ang mga tawo nagtuo nga daghan silag nahibaloan sa usa ka hilisgutan makapangangkon sila nga nakasabut lapas sa ilang nahibaloan, gani ngadto sa punto nga tuohan na nila ang sayop ug hinimo-himo nga mga impormasyon.”¹⁰

Naila kini nga “nanubrang pagpangangkon,” kini nga tintasyon kinahanglang likayan ninyong mga magtutudlo sa CES. Walay problema ang pag-ingon nga, “Wa ko kahibalo.” Hinoon, kon nasulti na kana, ikaw dunay responsibilidad sa pagpangita sa pinakaposibling mga tubag sa mahunahunaong mga pangutana sa inyong mga estudyante..¹¹

Sa pagtudlo sa inyong mga estudyante ug pagtubag sa ilang mga pangutana, mopasidaan ko ninyo ayaw isugilon ang mga istorya nga giingon nga makapasiugdag pagtuo o tabi-tabi o mga napapas nang panabut ug pagpasabut sa atong doktrina ug gipanghimo kaniadto. Kanunay nga magmaalamon nga himoon nga usa ka praktis ang pagtuon sa pulong sa buhing mga propeta ug mga apostoles; updated kanunay sa bag-ong mga isyu sa Simbahan, polisiya, ug mga pamahayag pinaagi sa mormonnewsroom.org ug LDS.org;ug konsultahon ang mga buhat sa lehitimo, mahunahunaon, ug matinud-anong mga LDS scholars sa pagsiguro nga dili ninyo matudlo ang dili tinuod, gipapas na, o mga katingad-an, ug lahi.

Ang mga author sa pagtuon sa sobra nga pangangkon nakabantay nga “ang kahilig sa nanubrang pagpangangkon, ilabi na sa pangangkon nga siya eksperto, makabugnaw sa mga tawo gikan sa pag-edukar sa ilang kaugalingon sa mga butang nga gikonsiderar nila nga sila maalamon.”

Ang BYU’s academic vice president nakabantay nga ang, “Pagka-eksperto sa usa ka hilisgutan makahinam gayud, labi na sa mga estudyante nga naminaw sa matag pulong nga atong gisulti. Hinoon, kon wala ang dako nga pasalig sa padayon nga pagkat-on mabiktima kita sa nanubrang pagpangangkon, walay ganahan sa tawong moingon nga ‘kahibalo siya sa tanan.’ ”¹²

Akong sublion ang pasidaan ni Presidente Hinckley, “Kinahanglang mag-amping gyud kita. Kita kinahanglan gayud nga magmatngon nga dili kita moluwak [sa dalan].”¹³

Agig dugang sa pagkahimong tibuok kinabuhi nga tigkat-on, kinahanglan nga nagbuhat sab kamo sa mga butang nga nagtugot sa Balaang Espiritu nga maglihok diha kaninyo. Kanang mga butanga naglakip sa sinserong inadlaw nga pag-ampo, tinuorayng pagpuasa, regular nga pagtuon ug pamalandong sa kasulatan ug sa pulong sa buhing mga propeta, paghimo sa Igpapahulay nga kahimut-an, pag-ambit sa sakrament uban sa pagpaubos ug paghinumdom kanunay sa Manluluwas, pagsimba sa templo kanunay kon mahimo, ug, sa katapusan, pagtabang sa mga timawa, kabus, ug nagsubo—sa naa man sa duol ug sa tibuok kalibutan.

Aron matuman sa tukma ang inyong mga oportunidad ug responsibilidad, kinahanglan ninyong praktison kon unsa man ang inyong isangyaw!

Pagmaisugon sa pagpangita og tambag ug koreksyon gikan sa inyong kasaligan—kapikas, lider sa priesthood, o mga supervisor. Pangutan-a sila kon asa mo pwedeng molambo sa personal ninyong pagkadisipulo. Labaw kining importante para sa atong full-time nga mga empleyado, nga gisuportahan sa sagrado natong pundo sa ikapulo. Likayi gayud ang mga butang nga makapalayo sa Espiritu.

Dugang pa, akong isugyot nga personal ninyong interbyuhon ang inyong kaugalingon usahay ug ribyuha ang 2 Nephi 26:29–32, Alma 5:14–30, ug Doktrina ug mga Pakigsaad 121:33–46.. Makatabang kana sa pag-ila sa matang sa mga tintasyon nga atubangon natong tanan. Kon may angayan usabon sa inyong kinabuhi, sulbara kini.

Likayi ang tintasyon nga mo-kwestyon sa motibo sa inyong kauban sa trabaho. Hinoon, palihug susiha og maayo ang inyong kasingkasing ug siksika ang inyong mga tinguha ug motibo. Niana lamang ang Manluluwas makausab sa inyong kasingkasing ug mapahaum ang kaugalingon ninyong tinguha ug motibo ngadto sa Iyaha.

Ang nagtubo nga henerasyon niini nga Milenyum nagkinahanglang mahibalo, makasabut, mohangop, ug moapil sa plano sa kaluwasan. Ang pagkasabut sa plano mohatag nila og balaang panabut diin makita ang ilang kaugalingon isip mga anak sa Dios, nga makatabang sa pagsabut sa matag doktrina, buhat, ug polisiya sa Simbahan

Isip mga magtutudlo sa CES karon, kinahanglan ninyong dawaton ang oportunidad ug responsibilidad sa pagtudlo sa ika-21 nga siglo sa saktong mga baruganan bahin sa balaang pagtugot sa kaminyoon ug tahas sa pamilya sa plano sa kaluwasan. ¹⁴

Ang doktrina sa mahangturong kaminyoon ug pamilya maoy mahinungdanong bahin sa plano sa Dios sa kalipay. Naglakip kini sa kaugalingon natong na-sealed sa templo nga mga pamilya nga kabahin sa mahangturong pamilya sa Langitnong Amahan mismo sa celestial nga gingharian. Tungod kay kini direktang may kalabutan sa kaugalingon Niyang pamilya ug sa Iyang espiritung mga anak, gitudloan kita sa Genesis nga ang “lalaki ug babaye iyang gibuhat sila.” ug gisugo niya si Amahang Adan ug Inahang Eva nga “sumanay ug dumaghan kamo, ug pun-on ninyo ang yuta.”¹⁵

Ginaingon nga ang plano sa kalipay magsugod ug matapos sa pamilya. Sa pagkatinuod, nagsugod ang pamilya didto pa sa premortal nga kalibutan, diin nagpuyo kita nga mga sakop sa pamilya sa atong Langitnong mga Ginikanan. Ug unya sa katapusan, ang mga pasalig sa pamilya ug mahigugmaong mga relasyon dili lamang magpadayon kondili magkadaghan pa pinaagi sa proseso sa pagpanganak. ¹⁶

Ang gikinahanglan gayud aron makonektar kining tanan—diin ang plano sa Dios ug atong destinasyon mag-agad ug magsentro—mao ang atong Manluluwas, si Jesukristo. Ang maulaon Niyang sakripisyo naghimong posible sa tanang butang, apan dili limitado sa mahigugmaon, mapinanggaon, ug mahangturong kaminyoon ug pamilya.

Gitudlo sa Ginoo kanato nga walay dili minyo nga tawo, bisan sa iyang pagkamatarung, ang makabaton sa tanan nga ihatag sa atong Langitnong Amahan para sa Iyang mga anak. Ang dili minyo nga indibidwal katunga ra sa pormula, dili makapasanay ug dili makapuyo sa kinatas-ang dapit sa ginghariang celestial.¹⁷

Kinahanglang masabtan sa inyong mga estudyante nga ang katuyoan sa mortalidad mao ang pagkahimong sama sa Dios pinaagi sa pag-angkon og pisikal nga lawas, mogamit sa kabubut-on, mobuhat sa mga tahas nga kanhi naa lamang sa atong Langitnong mga Ginikanan—mga tahas sa bana, asawa, ug ginikanan.

Gipaniguro sa mga propeta nga ang tanang takus ug mosalig ni Ginoong Jesukristo apan wala ma-seal sa usa ka kapikas o walay mga anak niining kinabuhia makabaton niana nga mga oportundid sa kalibutang moabut.

Tudloi ang mga kabatan-onan nga sa Simbahan sa Ginoo, adunay dapit alang sa pagsimba, pagserbisyo, ug paglambo isip mga igsoon sa ebanghelyo. Pahinumdumi sila sa gitudlo ni Lehi, nga ang tumong sa Dios ug paglaum alang kanato mahimong maglangkob sa mosunod: “Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay.”¹⁸

Gusto sa Langitnong Amahan nga dawaton nato ang Iyang depinisyon sa kaminyoon ug sundon ang Iyang unang sugo sa “pagsanay ug pagpuno”—dili lang sa pagtuman sa iyang plano apan sa pagpangita usab og kalipay nga gidesinyo sa Iyang plano nga ihatag ngadto sa Iyang mga anak.

Dili lamang mga miyembro sa Simbahan ang makamatikud niini nga mga baruganan. Ang New York Times nga kolumnista si David Brooks nakabantay nga, “Ang mga tawo dili ingon ka malipayon kon hatagan sila sa maximum nga personal nga kagawasan sa paghimo unsay ilang gusto. Mas malipayon sila kon duna silay mga pasalig nga mas labaw kay sa ilang personal nga pagpili—pasalig sa pamilya, sa Dios, panarbaho ug nasud.”¹⁹

Isip mga Church educators, tabangi ang atong mga batan-on nga makabaton og tin-awng panabut sa plano sa Dios sa kalipay diin ang tinuod nga kalipay maggikan sa Iyang mga anak. Tabangi silang mahibalo, mohangop, moapil ug manalipud niini. Sa 40 ka tuig nakong kasinatian isip General Authority, nahingawa ko sa daghang miyembro sa Simbahan, batan-on ug mas gulang, nga wala makasabut sa plano para sa mahangturon ug balaan nilang destinasyon.

Kaubanan kong mga magtutudlo, Kinahanglan natong pangitaon ug ikalipay kining mga oportunidad sa pagpasabut, sa doktrinal ug sa espiritwal, nganong mituo kita nga ang pagkahibalo sa dakong plano sa Dios sa kalipay makatubag sa daghang “ngano” nga tingali ipangutana kanato. Ang pagpahayag sa atong gituohan bahin sa premortal nga kinabuhi diin nagpuyo kita isip espiritwal nga mga anak sa Langitnong Amahan ug Langitnong Inahan magtugot nato sa pagpasabut nganong gimugna kini nga yuta. Usa sa mahinungdanong katuyoan sa mortal nga kinabuhi mao nga mahimo natong masunod kana nga kasinatian sa pamilya nga kita mismo, dinhi niining kinabuhia isip mga ginikanan kay sa mga anak lamang. Ibahandi ang inyong mga nasabtan sa doktrina ug katuyoan sa plano sa Langitnong Amahan para sa mahangturon natong kalipay. Ug ipadayon ang pagtudlo niini.

Busa, sa pagtapos ug sa pag-summarize: Gikan sa mga komentaryo ni Elder Kim B. Clark niining gabhiona atong nakat-unan nga kamo pinadala gikan sa Dios, puno sa pagtuo, paglaum, kamapainubsanon, ug gugma..²⁰

Ang mga punto nga akong gipakigbahin kaninyo mao kini:

Tudloan ang mga estudyante nga tipunon ang pagkat-on pinaagi sa pagtuon ug pagtuo uban sa lunsayng pagpamatuod. Tudloan sila nga magpabilin sa sakayan ug manggunit!
Tudloan ang mga estudyante nga kontrolahon ang ilang mga mobile device ug tutukan kon konektado ba sila sa Balaang Espiritu kay sa Internet.
Susihon ang ang mga estudyante uban sa mga kamatuoran sa plano sa kaluwasan nga anaa sa ebanghelyo ni Jesukristo.
I-master ang sulod sa Gospel Topics essays.
Hinumduman nga ang “Ngano?” mahimo nga talagsaong pangutana nga mosangput sa pagkasabut sa ebanghelyo.
Dili pasubraan ang pagpangangkon, ug dili mahadlok sa pag-ingon nga, “Wala ko kahibalo.”
Magmahimong tibuok kinabuhi nga tigkat-on.
Tinguhaon ang tambag ug koreksyon gikan sa inyong kasaligan.
Ikonsiderar ang paghimo og personal nga ribyu pagnagsa sa atong espirituhanong preparasyon, kakugi, ug kaepektibo.
Tudloan nga ang plano sa kalipay magsugod ug matapos sa pamilya. Hunahunaa kanunay ang plano sa kaluwasan sa tanang panahon.
Tudloan nga ang kaminyoon ug pamilya magdala og kalipay nga mohangtud.
Hinumduman nga, nga kon tipunon ang pagkat-on pinaagi sa pagtuon, pagtuo ug lunsayng pagpamatuod mahitabo ang tinuod ug mahangturong pagkakabig.
Labaw sa tanan, ang lig-ong pagtuo sa Pag-ula ni Jesukristo mahinungdanon alang sa atong espirituhanong kalig-on ug paglambo.

Karon, akong minahal, kaubanang mga magtutudlo, unta ang matag usa kaninyo panalanginan sa Dios. Ang bisan unsang palas-anon nga inyong gipas-an mapagaan. Unta inyong makaplagan ang kalipay ug kalinaw nga moabut gumikan sa pagkahibalo pinaagi sa inyong pagtudlo nga kamo nakatandog og kinabuhi, nakabayaw og usa ka anak sa Langitnong Amahan diha sa iyang panaw nga ugma damlag makasulod na usab ngadto sa Iyang presensya. Ibilin nako ang akong pagsaksi ug pagpamatuod nga anaa kanato ang kahingpitan sa ebanghelyo ni Jesukristo nga gipahiuli pinaagi ni Propeta Joseph Smith. Ang kahingpitan sa ebanghelyo anaa sa atong mga kamot. Kinahanglang masilsil kini sa atong mga hunahuna ug kasingkasing ug itudlo kini uban sa gahum. Unta ang Dios manalangin sa matag usa kanato mao ang mapaubsanon nakong pag-ampo ug panalangin, sa pangalan ni Jesukristo, amen.

© 2016 sa Intellectual Reserve, Inc. Ang tanang mga katungod gigahin. Pagtugot sa Iningles: 1215. Pagtugot sa paghubad 1215. Hubad sa “The Opportunities and Responsibilities of CES Teachers in the 21st Century.” Cebuano. PD60001102 853