Pagpakabuhi nga may Katuyoan: Ang Kaimportante sa “Tinuod nga Katuyoan”
Randall L. Ridd
Ikaduhang Magtatambag sa Kinatibuk-ang Kapangulohan sa Young Men
Usa ka gabii uban ni Brother RandallL. Ridd Tibuok Kalibutan alang sa mga Young Adults • Enero11, 2015 • Brigham Young University–Idaho
Talagsaon kaayo nga oportunidad nga makauban kamo karong gabhiona. Dakong dungog alang sa akong asawa ug ako nga ania dinhi niining gabhiuna. Makapaikag kanako nga ang akong phone nasayud nga na-iskedyul ko nga moanhi sa Rexburg karong adlawa. Mipakita kini nako unsay lakaw sa panahon ug mihatag nako og lista sa mga hotel ug restaurant sa dapit. Gani ang akong phone nagsulti nako sa daghang makadani nga butang nga ania sa Rexburg sa tapos sa semana.
Hey! Karon nga naghunahuna ko niini—wala kini molista sa akong pakigpulong nga usa sa mga makadani. Siguro diha ninyo masayran nga smart phone gyud ni!
Bisan tuod wala girekomendar sa inyong smartphone, matag usa kaninyo mipili nga mogahin og usa ka oras uban kanako karong gabhiuna—usa ka oras nga dili ninyo mabawi. Mao nga, mibati ko og dakong responsibilidad sa paghimo niini nga bililhon. Apan nasayud usab ko nga ang akong isulti dili sama ka importante sa itudlo sa Espiritu kaninyo, ug kana sama lamang ka bililhon sa inyong pasalig nga mosunod niana nga mga pagdasig.
Tingali mouyon mo nako nga maanindot karon nga panahon nga mabuhi. Ang mga sociologists mitawag sa akong henerasyon nga Baby Boomers, nga wala na kaayo gamita karon; ang sunod nga henerasyon, Henerasyon X; ug sila mihingalan ninyo nga Henerasyon Y o ang Milenyu. Nailhan sa inyong kahanas sa teknolohiya ug sa inyong paghangup sa social media, mas listo ug mas edukado kamo kay sa milabayng mga henerasyon. Kini nga mga kinaiya wala lang maghimo kaninyo nga bililhon kaayo sa katilingban karon apan usab sa pagbuhat sa buluhaton sa Ginoo.
Mas daghan ang inyong mga kapilian ug mga oportunidad karon kay sa kaniadto. Sama sa daghang mga butang sa kinabuhi, kini usa ka panalangin ug usa ka tunglo. Sobra kadaghan ang kapilian, ug ang kahadlok nga masayop sa pagdesisyon, moresulta nga walay mahimo hinoon nga desisyon, nga usa sa mga hagit sa inyong henerasyon. Mas lisud ang pagtutok karon! Sa teknolohiya, kon mopalit ka og usa ka butang, dako og purohan nga makaraan na ni dayon inigbiya nimo sa tindahan Daghang tawo ang mahadlok nga mopasalig sa bisan unsa tungod kay sila magpangutana kon aduna bay mas maayong kapilian sa dili madugay. Mao nga mohulat sila—ug moresulta nga walay mapilian. Niining pauyon-uyon nga kinaiya mas dali sila nga malinga. Ang solusyon niana, mga kaigsoonan, maoy akong hisgutan karong gabhiuna—pagpakabuhi nga may katuyoan: ang kaimportante sa tinuod nga katuyoan.
I. Katuyoan
Hunahunaa sa makadali nga nagsakay kamo og sakayan sa dagat, nga walay laing makita gawas sa mga bawud, kutob sa maabot sa mata. Ang sakayan dunay bugsay, apan asa man kamo padulong? Karon hunahunaa nga nakapasigpat mo og yuta. Karon nasayud na kamo kon asa mopadulong. Ang pagkakita ba sa yuta naghatag kaninyo og kadasig ug katuyoan? Ang mga tawo nga walay klarong katuyoan nagpaanud-anod lang. Ang mga nagpaanud-anod nagtugot sa mga sulog sa kalibutan nga maoy magbuot kon asa sila padulong.
Leo Tolstoy
Ang kinabuhi sa halangdong Russian nga tagsulat Leo Tolstoy, tagsulat sa War and Peace, naghulagway niini nga punto. Si Leo Tolstoy dunay kalisud sa pagkabata. Ang iyang mga ginikanan namatay sa dihang mga 13 pa siya. Gitudloan sa iyang magulang nga mga lalaki kabahin sa alkohol, sugal, ug pambabaye, si Leo wala magkugi sa iyang pagtuon. Sa edad nga 22, mibati siya nga ang iyang kinabuhi walay tinuod nga katuyoan ug misulat sa iyang journal, “Nagpakabuhi ko sama sa usa ka mananap.” Paglabay sa duha ka tuig misulat siya, “24 anyos na ko ug wala lang gihapon koy nahimo.” Ang kahigawad ni Tolstoy midasig kaniya nga sugdan ang tibuok kinabuhi nga pagpangita, kasagaran pinaagi sa trial and error, sa katuyoan sa iyang kinabuhi—ang ngano. Sa wala pa siya mamatay sa edad nga 82, iyang gitapos sa iyang journal, “‘Ang tibuok kahulugan ug kalipay sa kinabuhi,’ … anaa sa pagtinguha sa kahingpitan ug pagsabut sa kabubut-on sa Dios”1——ug, ako modugang, pagbuhat sa kabubut-on sa Dios.,.
Ginaingon nga “ang duha sa labing importanteng adlaw sa imong kinabuhi mao ang adlaw nga ikaw natawo ug ang adlaw nga imong nasayran ngano” nga natawo ka.2 Tungod kay anaa nato ang ebanghelyo, dili kinahanglan nga igahin nato ang atong tibuok kinabuhi sa pagdiskubre sa katuyoan niini. Hinoon, makatutok kita sa pagtuman niana nga katuyoan.
Sa Mateo 5:48 atong mabasa, “Busa kamo kinahanglan magmahingpit ingon nga hingpit ang inyong Amahan nga langitnon.”
Nagtuo ko nga kitang tanan adunay tiunay nga tinguha nga molambo. Apan tungod kay kitang tanan masayop, daghan kanato nagtuo nga ang tumong sa kahingpitan dili maabot. Ug dili gayud—kon wala pa ang Pag-ula. Ang sakripisyo sa atong Manluluwas naghimo sa kahingpitan nga posible: “Oo, duol ngadto ni Kristo, ug paghingpit diha kaniya, ug ilimud ang inyong mga kaugalingon sa tanan nga dili diosnon; ug mohigugma sa Dios uban sa tibuok ninyo nga gahum, hunahuna ug kusog, niana ang iyang grasya igo alang kaninyo, nga pinaagi sa iyang grasya kamo mahimo nga hingpit diha ni Kristo” (Moroni 10:32; emphasis gidugang).
Ang atong Manluluwas mihatag kanato og paglaum nga nagdasig kanato nga mahimong sama sa atong Amahan sa Langit. Nasayud kamo, sama sa nakaplagan ni Leo Tolstoy, nga adunay kalipay diha sa panaw sa kahingpitan. Ang mahinungdanong katuyoan moabut sa inyong kinabuhi kon himoon ninyong tinguha ang pagsunod sa kabubut-on sa Ginoo.
Si Elder Tad R. Callister nangutana: “Nganong importante man kaayo nga dunay eksaktong panglantaw niining balaanong padulngan sa pagka diosnon nga gipamatud-an sa mga kasulatan ug ubang mga saksi? Tungod kay sa nagtubong panglantaw moabut ang nagtubong kadasig.”3
Misyon
Sa batan-on pa ko, hapit ko makahukom nga dili magmisyon. Human sa usa ka tuig sa kolehiyo ug usa ka tuig sa army, duna koy maayong trabaho sa lokal nga ospital isip X-ray technician. Usa ka adlaw si Dr. James Pingree, usa sa mga doktor sa ospital, midapit kanako og paniudto. Sa among pag-istorya, nadiskubrehan ni Dr. Pingree nga wala koy plano nga magmisyon ug nangutana ngano? Ako siyang gisultihan nga medyo tigulang na ko ug tingali ulahi na. Siyang miingon nako nga dili kadto maayo nga rason ug nga siya nagmisyon pagkahuman na niya og eskwela pagkadoktor. Dayon mipamatuod siya sa kaimportante sa iyang misyon.
Ang iyang pagpamatuod dunay dakong epekto kanako. Nakapahimo kini nako nga mag-ampo ingon og ako wala sukad makaampo—uban sa tinuod nga katuyoan. Makahunahuna ko og daghang rason nga dili magmisyon. Manggiulawon ko—manggiulawon ko kaayo nga ang paghunahuna nga manamilit diha sa sakrament miting igo na nga rason nga dili moadto. Ganahan ko sa akong trabaho. Duna koy posible nga scholarship nga mawala na human sa pagmisyon. Labing importante, duna koy uyab nga mihulat nako samtang naa pa ko sa army—ug nasayud ko nga dili na siya makahulat og laing duha ka tuig! Nag-ampo ko og maayo nga makadawat og kumpirmasyon nga ang akong mga rason balido ug nga sakto ko.
Sa akong kasagmuyo, wala nako madawat ang yano nga oo-o-dili nga tubag nga akong gilauman. Ang hunahuna miabut kanako: “Unsa ang gusto sa Ginoo nga imong buhaton?” Kinahanglan ko nga moangkon nga gusto Niya nga moserbisyo ko og misyon, ug nahimo kining importanteng desisyon sa akong kinabuhi. Buhaton ba nako ang akong gusto I nga buhaton o ang kabubut-on sa Ginoo? Kana ang pangutana nga maayong ipangutana sa atong kaugalingon kanunay. Pagkaanindot nga sumbanan alang sa matag usa kanato nga maestablisar sa sayo pa sa atong kinabuhi. Sa daghang higayon duna kitay kinaiya nga “Moadto ko asa nimo gusto nga ako moadto ug mobuhat sa imong gusto nga akong buhaton, Ginoo—kon mao sab ang akong gustong adtoan ug maoy akong gustong buhaton.”
Mapasalamaton, mipili ko nga magmisyon ug didto nadestino sa Mexico North Mission. Aron maminusan ang kahinam nga tingali inyong gibati—makasulti ko ninyo nga wala mohulat ang akong uyab, apan naminyoan gihapon nako siya! Usa siya sa labing mahinungdanong mga panalangin sa akong kinabuhi. Nasayud nga ang katuyoan sa atong kinabuhi mao ang mahimong sama sa atong Amahan sa Langit, akong nakaplagan nga walay mas maayong unibersidad kay sa magminyo ug magbaton og pamilya aron sa pagtudlo nato sa gugma sa Dios alang sa Iyang mga anak. Nasayud sa unsay akong nahibaloan, akong buhaton ang tanan nga akong mahimo aron makasulod niana nga unibersidad kon ako pa kamo. Nakasabut ko nga abli na karon ang sayo nga pag-enrol.
II. Tinuod nga katuyoan
Sa dihang ang among anak nagkat-on pa sa pagsulti, kuryuso kaayo siya. Sa iyang limitadong bokabularyo ang iyang paboritong pulong mao ang “Ngano man?” Kon moingon ko, “Oras na para matulog,” motubag siya og “Ngano man?”
“Motrabaho na ko.”
“Ngano man?”
“Mag-ampo na ta.”
“Ngano man?”
“Oras na para moadto sa simbahan.”
“Ngano man?”
Cute kaayo—sa unang 500 ka higayon nga misulti siya niini. Apan bisan kon naminusan na ang ka-cute ug makaugtas na, mapasalamaton ko sa kanunayng pahinumdom sa pagsusi sa ngano luyo (sa tinud-anay) sa tanan nakong gibuhat.
Dili ko sigurado duna bay dakong kahulugan ang letrang Y isip pangalan sa inyong henerasyon, apan naghunahuna ko nga importanteng inyong hunahunaon ang inyong kaugalingon isip ang “Ngano man” Henerasyon. Importante, sa kalibutan karon, nga hunahunaon ngano nga inyong gibuhat ang unsay inyong gibuhat.
Ang pagpakabuhi uban sa tinuod nga katuyoan nagpasabut nga sabton ang “ngano” ug sayran ang mga motibo luyo sa inyong mga gipangbuhat. Si Socrates miingon, “Ang wala gisusi nga kinabuhi walay pulos.”4 Pamalandongi giunsa ninyo paggahin ang inyong panahon, ug pangutana sa kaugalingon, “Ngano man?” Makatabang kini kaninyo nga mapalambo ang abilidad nga makakita lapas sa karon. Mas maayo nga motan-aw sa unahan ug mangutana sa kaugalingon, “Nganong buhaton ko man kana?” kay sa lingion ang nangagi ug moingon, “Ngano, o, nganong gibuhat ko man kadto?” Kon ang bugtong rason ngano mao nga gusto man sa Dios nga buhaton nimo, igo na kana nga rason.
Mga bitoon
Akong nakat-unan ang kaimportante sa tinuod nga katuyoan sa dihang batan-on pa ko nga estudyante sa seminary. Ang among maestro miawhag namo sa pagbasa sa Basahon ni Mormon. Aron masubay ang among paglambo, mihimo siya og tsart nga naa ang among ngalan sa pikas habig ug ang mga basahon nalista sa ibabaw. Matag higayon nga mobasa ka og basahon, usa ka bitoon ibutang tupad sa imong ngalan. Sa pagsugod wala kaayo ko maningkamot sa pagbasa, ug wala madugay nabiyaan na ko nila. Nadasig sa pagbati sa kaulaw ug sa akong hilig sa pakig-indigay, misugod ko sa pagbasa. Matag higayon nga makakuha ko og bitoon, maayo ang akong bation. Ug sa nagkadaghan ang akong mga bitoon, mas nadasig ko nga mobasa—sa wala pa ang mga klase, human sa eskwela, matag bakante nga minuto.
Nindot unta ni nga istorya kon makasulti pa ko ninyo nga akoy nag-una sa among klase—pero wala nako mahimo. (Wala sab hinoon ko maulahi.) Nasayud ba mo unsay akong nakuha sa pagbasa sa Basahon ni Mormon? Nasayud ko nga naghunahuna mo nga usa ka pagpamatuod, di ba? Apan dili. Nakakuha ko og mga bitoon. Nakakuha ko og mga bitoon kay mao na ang rason ngano nga nagbasa ko. Kana ang akong tinuod nga katuyoan.
Klaro si Moroni sa dihang iyang gihulagway unsaon sa pagkasayud nga ang Basahon ni Mormon tinuod: “Ug kon kamo makadawat niini nga mga butang, ako moawhag kaninyo nga kamo mangutana sa Dios, ang Amahan sa Kahangturan, sa ngalan ni Kristo, kon kini nga mga butang dili ba tinuod; ug kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran niini nganha kaninyo, pinaagi sa gahum sa Espiritu Santo.” (Moroni 10:4; emphasis gidugang).
Sa pagtan-aw og balik, akong nakita nga ang Ginoo makiangayon kaayo kanako. Nganong magdahum man ko nga makakita og lahi kay sa akong gipangita? Wala gyud ko mohunong ug mangutana sa akong kaugalingon ngano nga nagbasa ko sa Basahon ni Mormon. Nagpaanud-anod ko, nagtugot sa mga pagdasig sa kalibutan nga mogiya kanako, aron lang masayud nga nagbasa ko sa saktong basahon alang sa sayop nga rason. Ang tinuod nga katuyoan mao ang pagbuhat sa husto nga butang alang sa husto nga rason.
Milabay pa ang mga katuigan, sa dihang nanglimbasog ko sa paghukom kon magmisyon ba o dili, nga mibasa ko sa Basahon ni Mormon uban sa tinuod nga katuyoan. Kon mogahin ko og duha ka tuig sa pagpamatuod sa basahon, kinahanglan una ko nga have pagpamatuod.
Nasayud ko nga ang Basahon ni Mormon nagtuman sa balaanong katuyoan niini sa pagpamatuod sa kinabuhi ug misyon ni Jesukristo tungod kay mibasa ko niini uban sa tinuod nga katuyoan.
Ang Sambingay sa mga Kahil
Gusto kong mopaambit og sambingay sa modernong panahon nga akong tawgon og “Sambingay sa mga Kahil.” Samtang maminaw mo, ikonsiderar unsay gitudlo niini nga istorya kaninyo kabahin sa gahum sa tinuod nga katuyoan.
Adunay batan-ong lalaki nga nangambisyon nga motrabaho sa usa ka kompaniya tungod kay taas ang sweldo dinhi ug inila kaayo. Iyang giandam ang iyang résumé ug aduna siyay pipila ka mga interbyu. Sa katapusan gidawat siya alang sa pangbag-ong sugod nga pwesto. Dayon nangambisyon siya sa iyang sunod nga tumong—supervisor nga pwesto nga maghatag kaniya og mas taas nga dungog ug taas nga sweldo. Mao nga iyang kompletuhon ang mga tahas nga gihatag kaniya. Sayo siyang moabut sa pipila ka buntag ug dugay siyang mouli aron makit-an sa iyang amo nga tagdugay motrabaho.
Human sa lima ka tuig usa ka pwesto sa pagkasupervisor nabakante. Apan, sa dakong kaguol sa batan-ong lalaki, ang laing empleyado, nga unom pa lang ka bulan nakatrabaho sa kompaniya, mao ang na-promote. Nasuko og maayo ang batan-ong lalaki ug miadto sa iyang amo ug nangutana ngano.
Ang maalamon nga amo miingon, “Sa dili pa nako tubagon ang imong mga pangutana, mahimo bang naa koy ipabuhat nimo?”
“Oo, sige,” miingon ang empleyado.
“Mahimo ba nga mopalit ka og pipila ka mga kahil sa tindahan? Ang akong asawa nagkinahanglan niini.”
Misugot ang batan-ong lalaki ug miadto sa tindahan. Sa iyang pagbalik, nangutana ang amo, “Unsa man nga klase sa kahil ang imong gipalit?”
“Wala ko kahibalo,” ang batan-ong lalaki mitubag. “Miingon ra ka nga mopalit og mga kahil, ug mga kahil ni. Dia ra o.”
“Pila man ang bili ani?” ang amo nangutana.
“Dili ko sigurado,” mao ang tubag. “Mihatag ka nako og $30. Mao ni ang imong resibo, ug mao ni ang imong sukli.”
“Salamat,” miingon ang amo. “Karon palihug lingkod ug pag-obserbar og maayo.”
Dayon ang amo mitawag sa empleyado nga maoy na-promote ug mihangyo niya sa pagbuhat sa samang butang. Dali siyang misugot ug miadto sa tindahan.
Sa iyang pagbalik, nangutana ang amo, “Unsa man nga klase sa kahil ang imong gipalit?”
“Kuan,” mitubag siya, “daghan og klase sa tindahan—dunay mga kahil nga navel, Valencia, pula, ukban, ug daghan pang uban (ipakita ang slide sa daghang klase nga mga kahil), ug wala ko masayud unsay paliton. Pero nakahinumdom ko nga miingon ka nga ang imong asawa ang nagkinahanglan sa kahil, mao nga mitawag ko niya. Miingon siya nga duna siyay party ug maghimo siya og orange juice. Mao nga nangutana ko sa namaligya asa ani nga mga kahil ang maayong himoon nga orange juice. Miingon siya nga ang kahil nga Valencia ang tam-is kaayo og duga, mao nga kato ang akong gipalit. Akong gihapit sa inyong balay sa pagbalik nako sa opisina. Nalipay kaayo ang imong asawa.”
“Pila man ang bili ani?” ang amo nangutana.
“Mao na ang laing problema. Wala ko kahibalo unsa kadaghan ang paliton, mao nga mitawag ko og usab sa imong asawa kon unsa kadaghan ang iyang mga bisita. Miingon siya nga 20. Nangutana ko sa namaligya pila ka mga kahil ang gikinahanglan aron makahimo og juice alang sa 20 ka tawo, ug daghan gyud. Mao nga nangayo ko og discount sa namaligya kay daghan man, ug misugot siya! Tag 75 cents ang matag kahil, pero gibayran ra nako og tag 50 cents. Mao ni ang imong sukli ug ang resibo.”
Mipahiyom ang amo ug miingon, “Salamat; makalakaw ka na.”
Milingi siya ngadto sa batan-ong lalaki nga nagtan-aw. Mibarug ang batan-ong lalaki, naghuyhoy ang abaga ug miingon, “Nakasabut na ko sa imong gipasabut,” samtang migawas siya nga dismayado sa opisina.
Unsay kalainan tali niining duha ka batan-ong mga lalaki? Gisugo sila pagpalit og mga kahil, ug ilang gibuhat. Tingali moingon mo nga ang usa mibuhat sobra sa gilauman, o mas hanas, o mas mihatag og pagtagad sa detalye. Apan ang labing importanteng kalainan mao ang kabahin sa tinuod nga katuyoan, kay sa nagbuhat lang sa tahas nga walay paghunahuna sa tuyo niini. Ang unang batan-ong lalaki nadasig sa kwarta, posisyon, ug dungog. Ang ikaduha nadasig sa tinguha nga mahimuot ang iyang amo ug tiunay nga pasalig nga mahimong labing maayong empleyado nga siya mamahimo—ug klaro ang resulta.
Unsaon ninyo paggamit kini nga sambingay sa inyong kinabuhi? Sa unsang paagi ang inyong mga paningkamot sa pamilya, eskwelahan, trabahoan, ug sa Simbahan, mahimong lahi kon kanunay ninyong tinguhaon ang pagpahimuot sa Dios ug pagbuhat sa Iyang kabubut-on, nadasig sa inyong gugma Kaniya?
III. Aplikasyon
Paglikay sa Makalinga—Ang Kaimportante sa Pagtutok
Kapila na kamo molingkod sa may computer aron mobuhat sa homework o buluhaton sa trabaho, dihang dunay kalit nga migawas nga pahinumdom sa sapatos nga sama sa inyong gitan-aw gahapon? Dayon, samtang nag-browse mo sa mga tindahan sa internet, nakabantay mo nga pipila sa inyong mga higala nag-online, mao nga misugod mo pagchat kanila. Dayon nakadawat mo og pahibalo nga ang usa ka higala dunay gi-post sa Facebook, ug kinahanglan ninyo kining tan-awon. Dili mo makabantay, nausikan na ninyo ang bilihong panahon ug nalimtan unsay unang rason nganong nagcomputer mo. Sa daghang higayon malinga kita imbes nga molihok. Ang mga makapalinga makausik sa inyong panahon nga magamit unta sa pagbuhat og maayo. Ang abilidad sa pagtutok makatabang kanato nga makalikay sa mga makapalinga.
Nasayud ko nga kamong tanan ganahan nga mokuha og mga pasulit. Busa, karong gabhiuna hatagan ko kamo og dinaliang pasulit sa inyong abilidad sa pagtutok. Makakita mo og duha ka mga team: ang usa nagsul-ob og puti ug ang usa nagsul-ob og itom. Magpasa-pasa sila sa bola, ug gusto nako nga inyong iphon kapila mopasa ang team nga puti.
[Ang awareness test video gipakita.]
Pila ka mga pasa ang inyong naihap?
Ipataas ang inyong kamot kon nakaihap mo og 19 ka pasa. Pila ang nakaihap og 20? Pila ang nakaihap og 21? Pila ang nakaihap og 22?
Ang sakto nga tubag 21.
Kadtong nakatubag sa sakto nga 21, ipataas ang kamot. Karon, ipabilin sa taas ang inyong kamot kon nakakita mo og tigulang nga babaye nga naglakaw, dayon nag-moonwalk, sa salog. Ipabilin sa taas ang inyong kamot kon nakakita mo og ninja warrior nga mipuli sa usa sa mga player nga nagsul-ob og itom. Nakakita mo sa mga player sa itom nga team nga misul-ob og kalo?
Tan-awa pag-usab, ug tutoki ang wala pa ninyo makit-i sa sinugdan.
[Ang awareness test video gipakita.]
Himoon namo kini nga maanaa unya diha sa social media.
Ang atong pagtutok diha sa kinabuhi importante kaayo. Sama sa gipakita niini nga pasulit, kasagaran atong makit-an ang unsay atong gipangita. O, sama sa gisulti sa kasulatan, “pangita, ug kamo makakaplag” (Lucas 11:9).
Kon nagtutok kita sa mga butang sa kalibutan, dili kita makabantay sa tibuok espirituhanong kalibutan nga naglibot kanato. Basin dili kita makaila sa espirituhanong mga pagdasig nga andam ihatag kanato sa Espiritu Santo sa paggiya sa atong kinabuhi ug pagpanalangin sa uban. Sa laing bahin, kon magtutok kita sa mga butang sa Espiritu ug nianang “mahiyason, matahum, o maayo og dungog o dalaygon” (Mga Artikulo sa Hugot nga Pagtuo 1:13), nan dili dayon kita malinga sa mga tintasyon ug mga makapalinga sa kalibutan. Ang labing maayong paagi nga molikay sa mga makapalinga mao ang lig-ong pagtutok sa atong katuyoan ug matinguhaon sa pagbuhat og maayo. Pagmainampingon sa imong pagtutok—ayaw paggahin og panahon nga nakatutok sa pagkatkat sa bukid aron lang madiskubrehan nga dili mao ang imong gikatkat.
Ang Gahum sa Gagmay nga mga Butang
Treynta y singko ka tuig human ko “miusab sa akong pagtutok” ug mihukom nga magmisyon, giawhag ko sa akong anak nga mobisita sa Mexico kuyog niya ug, malaumon, makakita sa pipila ka tawo nga akong natudloan. Mitambong mi og sakrament miting sa gamayng lungsod diin didto ko misugod sa akong misyon, naghunahuna nga dunay mailhan. Human sa miting, nangutana mi sa bishop kon naa ba siyay nailhan sa akong lista sa mga tawo nga among natudloan ug nabunyagan. Wala gyud. Mipasabut siya nga lima pa lang ka tuig siya nga miyembro. Misugyot siya nga among istoryahan ang usa ka tawo nga miyembro sulod sa 27 ka tuig—gamay og tsansa, pero maayong sulayan. Akong gisubay ang lista uban niya nga walay nahimo hangtud naabot mi sa katapusang ngalan: Leonor Lopez de Enriquez.
“A, oo,” miingon siya. “Kini nga pamilya naa sa laing ward, pero diri sila nga building motambong. Ang ilang sakrament miting maoy sunod; naa na to sila ron taud-taud.”
Igo lang mi nga nakahulat og mga 10 minutos sa dihang misulod si Leonor sa building. Bisan tuod lapas na siya sa 70, nakaila dayon ko niya, ug nakaila siya nako. Dugay mi nga naggakos nga naghilak.
Miingon siya, “Nag-ampo mi sulod sa 35 ka tuig nga mobalik ka aron makapasalamat mi nimo sa pagdala sa ebanghelyo sa among pamilya.”
Sa pagsulod sa building sa ubang sakop sa pamilya, naghinilakay mi ug naggakos. Akong napasiplatan ang akong anak nga nagbarug tupad sa duha ka full-time nga mga misyonaryo nga mipahid sa ilang mga luha gamit ang ilang tie.
Talagsaon kaayo kadto, sa among pagtambong sa sakrament miting, nga masayran nga ang bishop usa sa mga anak ni Leonor, ang pianist iyang apo, ang chorister iyang apo, dunay pipila sa batan-ong mga lalaki sa Aaronic Priesthood nga mga apo. Usa sa mga anak nga babaye naminyo sa usa ka magtatambag sa kapangulohan sa stake. Ang laing anak nga babaye naminyo sa bishop sa duol nga ward. Kasagaran sa mga anak ni Leonor nakamisyon, ug karon ang mga apo usab nagserbisyo.
Among nasayran nga si Leonor mas maayo kaayo nga misyonaryo kay kanamo. Karon, mapasalamaton nga mohinumdom ang iyang mga anak sa iyang walay kakapoy nga paningkamot sa pagtudlo kanila sa ebanghelyo: ang kaimportante sa ikapulo, mga templo, pagtuon sa kasulatan, sa pag-ampo ug hugot nga pagtuo nga mosalig niini. Mitudlo siya kanila nga ang gagmay nga mga desisyon, paglabay sa panahon, moresulta sa hingpit, matarung, ug malipayon nga kinabuhi, ug gitudlo ni nila sa uban. Isip resulta adunay sobra sa 500 ka mga tawo ang miapil sa Simbahan tungod niining usa ka talagsaon nga pamilya. Usa kana sa daghang rason ngano nga gusto sa Ginoo nga magmisyon ko. Mitudlo kini kanako sa mahangturong mga sangputanan sa pagtinguha sa kabubut-on sa Ginoo.
Kining tanan nasugdan sa yano nga panag-istorya sa pagpaniudto. Kanunay kong maghunahuna nga kon mas nakatutok si Dr. Pingree sa iyang panarbaho o ubang kalibutanong tinguha, wala gyud tingali siya makapangutana nganong wala ko magmisyon. Apan nakatutok siya ngadto sa uban ug sa pagpadayon sa buhat sa Ginoo. Mitanom siya og liso nga mitubo ug namunga ug padayon nga midaghan, o gipilopilo sa makadaghan. Ang dinasig nga mga hunahuna momugna og maayong mga buhat; ang maayong mga buhat momugna og uban nga maayong mga buhat, ug magpadayon, sa kahangturan.
Marcos 4:20 nag-ingon, “Ang mga gikasabud diha sa maayong yuta mao kadtong makadungog sa pulong ug magadawat niini ug mamunga, sa katloan ka pilo, ug kan-oman ka pilo, ug usa ka gatus ka pilo.”
Ang ideya nga ang gagmay, yano apan may katuyoan nga mga buhat adunay talagsaong mga sangputanan gisuportahan sa mga kasulatan. Si Alma mitudlo sa iyang anak nga si Helaman:
“Pinaagi sa gagmay ug yano nga mga butang ang mga dagko nga butang ipahinabo. …
“… Pinaagi sa gagmay nga mga pamaagi ang Ginoo molibug sa maalamon ug mopahigayon sa kaluwasan sa daghan nga mga kalag” (Alma 37:6–7).
Kinahanglang usa sa nag-unang leksyon sa kinabuhi mao nga adunay dakong gahum sa natipon nga epekto sa gagmayng butang nga atong gibuhat matag adlaw. Ang gagmay ug yanong mga butang naglihok sa inyong kinabuhi karon—naglihok alang kaninyo o batok kaninyo. Sama nga ang Ginoo naggamit sa ingon nga mga butang sa pagtuboy kaninyo, si Satanas naggamit usab kanila aron malinga kamo ug hinayhinay nga mogiya kaninyo, halos dili mabantayan, palayo sa dalan.
Ang atong hagit mao nga kon makakita kita og talagsaon nga pamilya o tawo nga malampuson sa pinansyal o may espirituhanong kalig-on, wala nato makita ang gagmay ug yanong mga buhat nga nagmugna kanila. Atong makita ang mga atleta sa Olympics, apan wala nato makita ang mga katuigan sa inadlaw nga pagbansay nga naghimo kanila nga mga kampyon. Moadto kita sa tindahan ug mopalit og presko nga prutas, apan wala nato makita ang pagtanum sa liso ug mainampingong pag-amuma ug pag-ani. Motan-aw kita kang Presidente Monson ug ubang mga General Authorities, ug atong mabati ang ilang espirituhanong kalig-on ug kamaayo, apan wala nato makita ang yano nga inadlwang binuhatan nga gibalikbalik pagbuhat. Kini nga mga butang sayon buhaton, apan sayon usab kini nga dili buhaton—ilabi na nga ang resulta dili dihadiha dayon.
Nagpuyo kita sa dinalian nga kalibutan Gusto nato nga moani dayon bisan bag-o pa nananom. Naanad na kaayo kita nga makakuha og dihadiha nga resulta—kon madugay og pipila ka segundo ang pagtubag sa Google sa atong matag pangutana, mairita dayon kita—apan nalimtan nato nga kini nga mga resulta mao ang natipon nga mga epekto sa mga henerasyon nga trabaho ug sakripisyo.
Si Alma mihatag og tambag kang Helaman nga maayo kaayo alang kanato karon. Namulong kabahin sa Liahona ug sa “daghang uban nga mga milagro” nga naggiya sa pamilya ni Lehi “sa matag adlaw,” siya miingon:
“Tungod kay kadto nga mga milagro gibuhat pinaagi sa gagmay nga mga kahimoan kini mipakita ngadto kanila og mga kahibulongan nga mga buhat. Sila mga tapulan, ug nakalimot sa pagbansay sa ilang hugot nga pagtuo ug kakugi ug niana kadto nga mga kahibulongan nga mga buhat mihunong, ug sila wala mouswag diha sa ilang panaw. …
“O akong anak, ayaw itugot kanato nga magtinapulan tungod sa kasayon sa agianan; kay mao kini ingon sa atong mga amahan; kay mao kini ingon nga giandam alang kanila, nga kon sila motan-aw sila unta mabuhi; ingon usab kini uban kanato. Ang agianan giandam na, ug kon kita motan-aw kita mahimo nga mabuhi sa kahangturan.
“Ug karon, akong anak, tan-awa nga ikaw moamping niini nga sagrado nga mga butang, oo, tan-awa nga ikaw mohangad ngadto sa Dios ug magpakabuhi” (Alma 37:40–41, 46–47).
Tulo ka Gagmay ug Yano nga mga Butang
Hatagan nako og gibug-aton ang tulo ka gagmay ug yanong mga butang aron “mohangad ngadto sa Dios” nga makatabang nato nga magpabilin ang atong pagtutok sa atong mahangturong katuyoan. Walay usa niini nga makasurprisa kaninyo—kadaghan na mo makadungog niini. Apan mopamatuod ko nga ang pagbuhat niini nga mga butang nga makanunayon ug uban sa tinuod nga katuyoan wala lang maghimo og kalainan, naghimo kini sa tanang kalainan. Kon nakasabut mo—tinuod nga nakasabut—sa ngano luyo niini nga mga buhat, walay duda, inyo kining himoon nga nag-unang prayoridad sa inyong kinabuhi.
Una, sa atong pag-ambit sa sakrament, kasagaran gibuhat nato kini nga walay paghunahuna. Sa inyong pagtan-aw niini nga video, bantayi ang paghatag og gibug-aton sa paghinumdom, ug ikonsiderar nganong importante kaayo kini.
Elder Jeffrey R. Holland: “Samtang hapit na mahuman ang katapusan ug espesyal nga panihapon sa Pagpalabay, si Jesus mikuhag tinapay, mipanalangin ug mipikas-pikas niini, ug mihatag niini ngadto sa iyang mga Apostoles, nag-ingon:”
Jesukristo: “Kini mao ang akong lawas nga gihatag alang kaninyo: buhata ninyo kini sa paghandum kanako. Kining kopa mao ang bag-ong pakigsaad diha sa akong dugo, nga igaula alang kaninyo buhata ninyo kini sa paghandum kanako.”
Elder Holland: “Sukad nianang kasinatian sa ibabaw nga lawak una pa sa Getsemani ug Golgota, anaa na ubos sa pakigsaad ang mga anak sa saad sa paghinumdom sa sakripisyo ni Kristo niining mas bag-o, mas taas, mas balaan ug personal nga paagi. Uban sa gamay nga baso sa tubig atong hinumduman ang pagpaagas sa dugo ni Kristo ug kalawom sa iyang espirituhanong pag-antus.
“Uban sa usa ka pan, kanunay gipikas-pikas, gipanalanginan, ug gihalad og una, atong hinumduman ang iyang nabun-og nga lawas ug masulub-on nga kasingkasing.
“Niining yano ug matahum nga mga pulong sa pag-ampo sa sakrament nga gihalad sa batan-ong mga priest, ang importanteng pulong nga atong madungog ingon og ang paghinumdom.
“Kon ang paghinumdom mao ang mahinungdanon natong buhaton, unsay mosulod sa atong panumduman kon kadtong yano ug bililhong mga simbolo gitanyag kanato?”
Jesukristo: “Ug kini inyong buhaton ug kini mao ang usa ka pagpamatuod ngadto sa Amahan nga kamo sa kanunay mahinumdom kanako. Ug kon kamo sa kanunay mahinumdom kanako, kamo makaangkon sa akong Espiritu uban kaninyo.
Ang Text sa screen: Unsaon ninyo nga “kanunay mahinumdom” Kaniya?5
Samtang kita kanunay mohinumdom Kaniya ug mosunod sa Iyang mga sugo, hunahunaa sa unsang paagi ang natipon nga epekto sa kanunay nga pagbaton sa Iyang Espiritu uban kanato moapekto sa tanang dapit sa atong kinabuhi. Hunahunaa unsaon niini pag-impluwensya ang atong inadlaw nga mga desisyon ug atong pagkaamgo sa panginahanglan sa uban.
Adunay dili maihap nga mga paagi nga matuman nato ang atong saad sa paghinumdom sa Manluluwas sa tibuok adlaw. Unsaon ninyo paghinumdom Kaniya sa kanunay?
Kasagaran moingon, “Pag-ampo, ug pagtuon sa mga kasulatan.” Ug husto kamo, kon, ug kana dako nga kon, gibuhat kini uban sa tinuod nga katuyoan.
Ang pag-ampo ug pagtuon sa mga kasulatan mao ang mosunod nga duha ka gagmay ug yano nga mga butang nga hatagan nako og gibug-aton.
Klaro ang Ginoo kabahin sa pagkadili epektibo sa atong mga pag-ampo kon ihalad nga walay paghunahuna: “Kini pagaiphon nga dautan ngadto sa usa ka tawo, kon siya moampo ug dili uban sa tinuod nga katuyoan sa kasingkasing; oo, ug kini dili makahatag kaniya og kaayohan, kay ang Dios dili modawat sa ingon niini” (Moroni 7:9).
Ang tinuod nga katuyoan sa pag-ampo mao nga adunay pakigkomunikasyon sa atong Langitnong Amahan, uban sa katuyoan nga mosunod sa bisan unsang tambag nga Iyang ihatag: “Pakigtambag uban sa Ginoo sa tanan nimo nga buhaton, ug siya moagak kanimo alang sa kaayohan; oo, kon ikaw mohigda sa gabii higda ngadto sa Ginoo, nga siya mobantay diha kanimo sa imong pagkatulog; ug kon ikaw mobangon sa buntag himoa nga ang imong kasingkasing puno sa mga pasalamat ngadto sa Dios; ug kon ikaw mobuhat niini nga mga butang, ikaw pagabayawon sa katapusan nga adlaw” (Alma 37:37).
Ang pag-ampo ug pagtuon sa kasulatan kanunay nga mag-uban. Kon magtuon kita sa mga kasulatan ug sa mga pulong sa atong mga modernong propeta nag-andam kini kanato alang sa personal nga pagpadayag. Ang mga ehemplo ug mga pasidaan nga makita sa kasulatan moimpluwensya sa atong mga tinguha. Mao kini ang paagi nga mas masayud kita sa hunahuna ug kabubut-on sa Ginoo.
Ang mga propeta sa kaniadto ug karon mihangyo kanato sa pagbuhat sa gagmay ug yano nga mga butang sama sa pag-ampo ug pagtuon sa mga kasulatan. Nganong wala man kini buhata sa tanan? Tingali usa ka rason mao nga wala dayon kitay makita nga negatibo nga sangputanan kon makapalta kita og usa o duha ka adlaw—sama nga ang inyong ngipon dili dayon madaut ug mahingo sa unang higayon nga makalimot mo pag-tooth brush. Kasagaran sa mga sangputanan, positibo ug negatibo, ulahi nga moabut, paglabay sa panahon. Apan kini moabut gayud.
Katuigan ang milabay mitanom ko og duha ka kahoy nga susama nga klase ug gitas-on sa akong luyo nga nataran. Gitanom nako ang usa diin dili kaayo ni mainitan, ug gitanom nako ang usa diin makakuha kini og sakto nga kainit. Pagkasunod tuig wala koy nabantayan nga kalainan sa pagtubo sa duha ka kahoy, ug dayon ang akong asawa ug ako miserbisyo og tulo ka tuig nga misyon. Sa pag-uli namo, nakalitan ko sa dakong kalainan! Ang natipon nga epekto sa dugang kainit sa adlaw matag adlaw dunay dako kaayo nga kalainan—paglabay sa panahon—sa pagtubo sa mga kahoy. Ang sama nga butang mahitabo sa atong kinabuhi samtang atong ibantang ang atong kaugalingon matag adlaw ngadto sa tinubdan sa tanang kahayag. Tingali dili kita makakita og dihadiha nga kausaban, apan sigurado nga dunay kausaban nga nahitabo sulod kaninyo, ug ang mga resulta makita paglabay sa panahon.
Kining yanong ideya sa natipon nga epekto sa inadlaw nga binuhatan, nga adunay tinuod nga katuyoan, makahimo og dakong kalainan sa tanan nga bahin sa inyong kinabuhi. Mahimong mao kini ang kalainan tali sa pakigbisog diha sa ordinaryo nga kinabuhi o pagkahimong malampuson ug pagpuno sa sukod sa imong pagkalalang.
Kanunay kong maghinumdom sa akong kinabuhi ug maghunahuna nganong lisud kaayo kadto kanako ang paghukom nga magmisyon. Lisud kadto tungod kay nalinga ko—nawala ko sa pagtutok sa akong mahangturong katuyoan. Ang akong mga tinguha ug kabubut-on wala mahiuyon ngadto sa kabubut-on sa Ginoo; kon nahimo pa, sayon ra unta ang pagdesisyon. Ug ngano nga wala kini mahiuyon? Misimba ko ug miambit sa sakrament ma-Dominggo—apan walay tinuod nga katuyoan. Nag-ampo ko, apan kasagaran nagbuhat ko niini nga walay paghunahuna. Nagbasa ko sa mga kasulatan, apan panagsa ra ug walay tinuod nga katuyoan.
Sa inyong pagpaminaw karon, hinaut nga inyong gibati, pinaagi sa mga pagdasig sa Espiritu, unsay inyong angayng buhaton aron mopuyo og tinuyo ug nakatutok nga kinabuhi. Moawhag ko kaninyo sa pagsunod niana nga mga pagdasig. Ayaw pagkaluya tungod sa mga hunahuna sa unsay inyong nabuhat o wala buhata. Tuguti ang Manluluwas nga mohatag kaninyo og bag-ong pagsugod. Hinumdumi ang gisulti sa Ginoo: “Apan ingon sa kanunay nga sila maghinulsol ug mangayo og kapasayloan, uban sa tinuod nga katuyoan, sila pasayloon” (Moroni 6:8; emphasis gidugang).
Sugdi karon. Pagpakabuhi nga adunay katuyoan. Iplastar ang gahum sa pagtipon sa inadlaw nga mga pagdisiplina sa importanteng bahin sa inyong kinabuhi. Mosaad ko nga usa ka tuig gikan karon malipay mo nga inyong gisugdan karon o magmahay mo nga wala ninyo gibuhat.
Gusto nako nga mamalandong kamo niining 3 ka mga pangutana. Modapit ako kaninyo nga ipakigbahin ang inyong mga tubag sa social media, gamit ang #ldsdevo.
Una: Makahimo ba kamo niini? Posible ba nga mabuhat ninyo kining tulo ka gagmay ug yanong mga butang? Makapaningkamot ba kamo sa pagtuman sa inyong pakigsaad nga “kanunay mohinumdom kaniya” (D&P 20:77, 79). Makagahin ba kamo og panahon sa pag-ampo nga may tinuod nga katuyoan ug magtuon sa kasulatan matag adlaw?
Ikaduha: Moepekto ba kini? Nagtuo ba gayud kamo sa saad sa Ginoo? Nagtuo ba kamo nga ang natipon nga epekto nga kanunay magbaton sa Iyang Espiritu uban kaninyo dunay dakong impluwensya sa tanang aspeto sa inyong kinabuhi?
Sa katapusan: Takus ba kini sa tanang paningkamot?
Mopamatuod ko nga kini takus gayud sa tanang paningkamot ug kini ang naghimo sa tanang kalainan. Sa inyong pagbuhat niini, inyong madiskubrehan nga ang labing importanteng “ngano” luyo sa tanan ninyong gibuhat mao nga gihigugma ninyo ang Ginoo ug nakaila sa Iyang dakong gugma kaninyo. Hinaut makakaplag kamo og dakong kalipay sa inyong pagtinguha sa kahingpitan ug sa pagsabut ug pagbuhat sa Iyang kabubut-on. Sa pangalan ni Jesukristo, amen.
© 2015 sa Intellectual Reserve, Inc. Ang tanang mga katungod gigahin. Pagtugot sa Iningles: 12/14. Pagtugot sa paghubad: 12/14. Hubad sa “Living with a Purpose: The Importance of ‘Real Intent.’” Cebuano. PD10053116 853