9:41

Manatu, Manatu

Fakataha Lotu Faka-Kilisimasi ʻa e Kau Palesitenisī ʻUluakí ki he 2023

Tracy Y. Browning

Tokoni Ua ʻi he Kau Palesitenisī Lahi ʻa e Palaimelí

Sāpate, 3 Tīsema 2023

ʻI he feituʻu ʻoku ou nofo aí, kamata ʻi he māhina ko Nōvemá, hangē ʻoku lingolingoa takatakai ʻa natulá. Ko e lauʻiʻakau lanumata ne faʻa tāvilivili he havilí ʻi he ngaahi māhina ʻo e failaú mo e māfaná, kuo ngangana ʻo pakupaku mo mōmoa pea longoaʻa ia ʻi heʻeku lue aí. ʻOku fakalongolongo e fanga manupuná, pea hangē ʻoku puli ʻa e ʻalaha namu kakala ʻo e matalaʻiʻakaú. ʻOku puli fakataimi ʻa e ngaahi meʻa ko ia ʻi natula ʻoku felāveʻi mo e moʻuí, pea ʻi he lōngonoa mo e lingolingoa ko iá—ʻi he ofi ki he fakaʻosinga ʻo e taʻú pea kimuʻa pē pea ngalo ke u fiefiá—ʻoku tūʻuta mai ʻa e meʻaʻofa ʻo e Kilisimasí.

Pea ʻi hoku kiʻi tuliki ʻi he māmani fakaofo ʻa e ʻOtuá, ʻoku ou manatuʻi. ʻOku ou manatuʻi ke tokanga ki he ʻuluʻakau lanu mata ʻoku ʻalaha mei ai ʻa e ngaahi nanamu kehekehé. ʻOku ou manatuʻi ke fakasio ʻa e matalaʻiʻakau mo e fuamelie lanu kulokula pe hinehiná mo fanongo ki he ngaahi hiva angamaheni ʻoku ongo ki he lotó mo e ʻapí mo e ngaahi fale ʻo e lotú, ʻo fakahā “fiefia ki māmaní,” ʻi heʻeku fakasio ʻa e ngaahi fakaʻilonga ʻo e Kilisimasí ʻoku ou “hiva mo langi mo natula” mo fakaafeʻi au ke u manatuʻí.

Ko e taha ʻo e ngaahi meʻa fakaofo ʻo e faʻahitaʻú ni ko e hangē ko e kau Kalisitiane kotoa, mo e tokolahi ʻoku ʻikai tui faka-Kalisitiané, ʻoku nau fakaʻaongaʻi ʻa e taimi ko ʻení ke fekumi fakamātoato mo fakafonu ʻenau moʻuí ʻaki ʻa e ngaahi fakaʻilonga ʻo e fakamanatú ʻi he Kilisimasí.

Ko e Kilisimasí ko e hala fakakavakava ia ʻoku tau fononga ai ke tataki kitautolu ki he taʻu foʻoú. Pea ʻi heʻetau fonongá, ʻoku fakaafeʻi kitautolu ke fakakaukau ki he mana ʻo e “[ʻEikí] ko e ʻOtua taʻengatá ia, ko e Tupuʻanga ʻo e ngaahi ngataʻanga ʻo māmaní,”¹ ʻa ia naʻe ʻaloʻi ʻi he ngaahi tūkunga fakaʻofa ʻi he kolo ko Tēvitá pea “takatakai ʻaki ia ʻa e kofu, pea tokoto ia ʻi he ʻaiʻangakai ʻo e manú.”² ʻI heʻetau fakahoko ʻetau fononga ʻi he Kilisimasí, mahalo te tau vakai kiate kitautolu ko e kau tangata mo fafine poto ʻi onopooni, ʻoku mamata ki he ngaahi fetuʻu ʻi ʻolunga he ʻuluʻakau lanu matá mo e maama takatakaí pea “fiefia ʻi he fiefia lahi ʻaupito”³ ʻi he ngaahi fakaʻilonga kuo tuku mai ʻi muʻa ʻiate kitautolú ke tataki mo fakahinohino ʻetau fonongá kia Sīsū Kalaisi, ʻa Ia ko e “maama ʻo māmaní.”⁴ Kapau te tau fakatokangaʻi ha ʻalaha namu kakala pau lolotonga ʻa e faʻahitaʻú ni, mahalo ʻoku ʻomi ia ke fakamanatu mai kiate kitautolu ke tau ʻomi ʻa e ngaahi meʻaʻofa ke foaki ki he “ʻAlo ʻo e ʻOtua moʻuí”⁵—ʻo ʻikai ko e “koula, mo e laipeno, mo e mula”⁶ ka ko ha feilaulau moihū ʻo hotau “loto-mafesifesí mo e laumālie fakatomalá.”⁷ Pea ko kinautolu ko ia ʻoku ʻofa mo tokangaʻi ʻa e fānaú, mahalo ʻoku tau tatau mo e kau tauhisipi ʻi he lolotonga ní ʻi hono “leʻohi [ʻetau] fanga sipí,”⁸ ʻo fakafanongo ki he kau ʻāngelo ʻi māmani kuo fekauʻi mai ʻe he ʻEikí mo e ngaahi fakaafe ke “ʻoua ʻe manavahē,” he ʻoku nau omi mo e ngaahi fakahinohino ki he feituʻu ʻe ala ʻilo ai hotau Fakamoʻuí.⁹ ʻOku tau manatuʻi nai ke fanafana ʻa e ngaahi “ongoongolelei ʻo e fiefia lahi” ko ʻení ki he telinga ʻetau fānaú ko ha fakamoʻoni? Koeʻuhí ʻi heʻenau fifili ʻi heʻenau kei siʻí ki he lanu kulokula mo e lanu mata, koula mo e hinehina ʻo e Kilisimasí, ʻoku nau manatu ki he feilaulau fakalelei maʻa mo haohaoa ʻa honau Huhuʻi ko Sīsū Kalaisí, ʻo foaki kiate kinautolu ʻa e meʻaʻofa ʻo e fakamoʻuí mo e moʻui foʻou mo taʻengatá.

ʻOku fakaʻatā ʻe he Kilisimasí ke tau fononga fakalaumālie ki Pētelihema ke maʻu haʻatau fakamoʻoni ki hotau Fakamoʻui ko Sīsū Kalaisí, pea ʻave leva ʻa e fakamoʻoni ko iá ʻaki ʻa e loto fie vahevahe mo e ongo vaʻe mo e nima mateuteu ke “ongoongoa”¹⁰ ia pea fakamoʻoni ki he meʻa kotoa kuo tau ʻilo ʻo kau kiate Iá. Te tau lava ʻo fakahoko ʻa e fononga ko iá ki he Fakamoʻuí ʻaki ʻetau manatú.

ʻOku foaki mai ʻe he ʻOtuá ʻa e meʻa-foaki ʻo e manatú ke ʻoua naʻa ngalo ʻiate kitautolu ʻa e Tokotaha Foakí, ke tau ongoʻi ʻEne ʻofa taʻefakangatangata kiate kitautolú pea ako ke ʻofa foki kiate Ia. ʻOku naʻinaʻi mai ʻa e palōfita ko Molonai ʻi he kuongamuʻá ke tau manatuʻi “ʻoku tupu meia Kalaisi ʻa e meʻa-foaki lelei kotoa pē.”¹¹ ʻOku foaki ʻe hotau Fakamoʻuí ha ngaahi meʻaʻofa ʻoku ʻikai hangē ko e foaki ʻa e māmaní—ʻo fakataimi, fakakonga, pea iku ʻo ʻauha ʻi he fakalau ʻa e taimí. ʻOku foaki ʻe Sīsū Kalaisi ha ngaahi meʻaʻofa tuʻuloa, mo mahuʻinga, kau ai ʻa e:

Ngaahi meʻa-foaki ʻo e Laumālié, hangē ko e ʻiló, potó, fakamoʻoní, mo e tuí.¹²
Ko e meʻa-foaki ʻo e Laumālie Māʻoniʻoní.
Ko e meʻaʻofa ʻo e moʻui taʻengatá.

Pea ʻi heʻetau fakakaukauloto ki he moʻuí kotoa ki he ngaahi “meʻaʻofa lelei” lalahi mo iiki kuo tau maʻú, ʻoku tau vakai nai ki hono fakahaofi kitautolu ʻe he toʻukupu ʻo e ʻEikí, ʻi hono fakaivia mo fakanonga kitautolú?

Neongo ʻi ha ngaahi taimi ʻe mamaʻo ʻetau fakakaukaú mo hotau lotó meiate Ia, ka ʻokú Ne fakapapauʻi maʻu mai pē ʻoku ʻikai teitei ngalo kitautolu ʻi he ʻEikí—ʻi he Kilisimasí pe ko ha faʻahinga taimi kehe. Kuo fakahā ʻe he ʻEikí kuo tohi tongi kitautolu ʻi Hono ʻaofi nimá.¹³ ʻOku tauhi pau maʻu pē ʻEne ngaahi talaʻofá. ʻOkú Ne manatuʻi ʻa e ngaahi fuakava naʻá Ne fakahoko mo kitautolu pea mo ʻetau ngaahi tamaí. ʻOkú Ne fanongo mo manatuʻi ʻetau ngaahi lotu ki he Tamai Hēvaní ʻo tatau ai pē pe ʻoku tau tūʻulutui pe tautapa mei hotau loki mohé pe lotu loto pē. ʻOkú Ne manatuʻi, hangē ko e akonaki ʻa Palesiteni Lāsolo M. Nalesoní, ke “kau mai ʻi he moʻui ʻa kinautolu ʻoku nau tui kiate Iá.”¹⁴ ʻOkú Ne manatuʻi ke fakamolemoleʻi kitautolu ʻi he tuʻo lahi taha te tau fakatomala aí. ʻOkú Ne manatuʻi ke folofola mai fakafou ʻi he folofolá mo e kau palōfitá ke tokoniʻi kitautolu ke ʻilo maʻu pē hotau hala ki ʻapí—neongo pe ko e hā hono mamaʻo mo e fuoloa ʻetau mavahé. Pea ʻokú Ne manatuʻi ke tuku mai Hono Laumālié ke kei nofoʻia ʻiate kitautolu ʻi heʻetau fāifeinga ke tauhi ʻetau palōmesi toputapu ke “manatu maʻu ai pē kiate iá.”¹⁵

Naʻe akonaki ʻa Palesiteni Sipenisā W. Kimipolo: “ʻI hoʻo fakasio ʻi he tikisinalí ki he foʻi lea mahuʻinga tahá, … ʻe malava pē ko e manatu. Koeʻuhí kuo mou fakahoko kotoa ha ngaahi fuakava[,] … ko ʻetau fiemaʻu lahi tahá ke manatu.” ʻOkú ne hoko atu ʻo pehē, “Ko e ʻuhinga ia ʻoku ʻalu ai ʻa e tokotaha kotoa ki he houalotu sākalamēnití ʻi he ʻaho Sāpate kotoa pē—ke maʻu ʻa e sākalamēnití mo fanongo ki he lotu ʻa e kau taulaʻeikí ke nau ʻmanatu maʻu ai pē kiate ia, mo tauhi ʻene ngaahi fekau ʻa ia kuó ne tuku kiate kinautolú.ʼ … Ko e foʻi leá ko e manatu. Ko e ngāué ko e manatu.”¹⁶

ʻOku ueʻi kitautolu ʻi hono manatuʻi ʻa e ʻOtuá ke tafunaki hotau ivi fakalaumālie leleí pea fakaafeʻi kitautolu ke ngāue ʻi ha ngaahi founga faka-ʻOtuá. Fakakaukau ki he ngaahi akonaki ko ʻeni kuo fakaafeʻi kitautolu ʻe Palesiteni Nalesoni ke tau manatuʻí:

“Tuku ke lāngilangiʻia ʻa e ʻOtuá ʻi hoʻo moʻuí” pea “tuku haʻo taimi lahi ange kiate Ia.”
“Fekumi mo ʻamanaki ki ha ngaahi mana.”
“Fakangata ʻa e fepakipaki ʻi hoʻo moʻuí”¹⁷ pea hoko ko ha tokotaha faʻa fakalelei.¹⁸

ʻE lava ke hoko ʻa e Kilisimasí ko ha faingamālie ke ngāue ai ki he ngaahi fakaafe ko ʻení pea fakaʻaongaʻi tauʻatāina hotau natula ke manatuʻi ke fakakaukau lahi ange kia Sīsū Kalaisí, fakakaukauloto ki he mana ʻo Hono ʻaloʻí, pea ngāue ki ha feohi lahi ange mo e fānau ʻa e ʻOtuá. ʻOku faʻa fakatokangaʻi ʻa e ngaahi fakaʻilonga ʻo e fakamanatú ʻoku angamaheni ʻi he faʻahitaʻu Kilisimasí ʻi heʻetau:

Manatu ke fakaaʻu ha pōpoaki Kilisimasi ki he ngaahi kaungāmeʻá, fāmilí, mo e solá.
Manatu ke foaki ha ngaahi meʻaʻofa ko hano fakahaaʻi ʻa e ʻofá.
Manatu ke angaʻofa kiate kinautolu ʻoku faingataʻaʻiá pea talitali lelei ʻa kinautolu ʻoku hūfia hotau ngaahi ʻapí.
Manatuʻi ke fakamamafaʻi ʻa e mahuʻinga ʻo e fakatahataha fakafāmilí mo e ngaahi tukufakaholo ʻoku makehe ai ʻa e Kilisimasí.

Ki he tokolahi lolotonga ʻa e taimi ko ʻení, ʻoku hoko ʻetau ʻofa lahi ʻi hono teuteuʻi ʻa e meʻatokoni tataú, toutou fakahoko e ngaahi talanoa fakafāmilí, mo hono teuteuʻi ʻetau ʻakau Kilisimasí ʻaki ʻa e ngaahi meʻateuteu ʻoku tau fakaʻaliʻali ʻi he taʻu kotoá, ko ha ngaahi ʻekitivitī mahuʻinga ia ʻoku fakatolonga ai ʻetau holi fakanatula ke manatuʻi ʻa e ngaahi aʻusia ʻoku mahuʻinga kiate kitautolú. ʻE lava ke hoko ʻa e ngaahi meʻatokoni makehé, ngaahi talanoa pau, mo e ngaahi teuteu ʻo e ʻaho mālōloó ko ha suvenia ki heʻetau manatú. Naʻa mo ʻetau holi mālohi ange ke tau manavaʻofa ange ʻi he taimi ko ʻení ʻe lava ke fakaʻilongaʻi ai ʻetau taumuʻa ke manatuʻi ke loto-houngaʻiá. Ko e faʻahinga ʻofa makehe ko ia ʻoku tau maʻu ʻi he hokosia ʻa e Kilisimasí ko ha faingamālie foki ia kuo tuku mai ke fakatefito ʻetau ngaahi taumuʻá mo e angafaí ʻia Sīsū Kalaisi: “Manatu, manatu ʻoku makatuʻunga ʻi he maka ʻo hotau Huhuʻí, ʻa ia ko Kalaisi, ko e ʻAlo ʻo e ʻOtuá, kuo pau ke mo langa ai homo makatuʻungá.”¹⁹ Manatuʻi ʻi heʻetau fakaofi atu ki he ʻosi ʻa e taʻu ʻe tahá pea tau fononga he hala fakakavakavá ki he taʻu foʻoú—ko e kau tangata mo fafine potó, ko e kau tauhisipi tokangá—ʻoku tuʻunga ia ʻi he mālohi ʻo e toʻukupu ʻo e ʻEikí²⁰ ʻa ʻetau lavaʻi iá.

Ko ia ko e fē pē feituʻu ʻokú ke nofo ai ʻi he māmaní, manatuʻi ke tokanga ki he ngaahi fakaʻilonga kehekehe ʻokú ne fakaafeʻi koe ke sio kia Kalaisí. ʻI he meʻa kotoa ʻoku tau fakamahuʻingaʻi ʻi he taimi ko ʻení, ʻa e pōpoaki kotoa ʻoku tau fakahokó, ki he tokotaha kotoa ʻoku tau fakakaukau ki aí, ʻoua muʻa naʻa ngalo ke tau manatuʻi ʻa e Tokotaha Foaki moʻoní—ʻa Ia ʻoku ʻikai teitei ngalo kitautolú mo foaki mai ʻa e mālohi ke tau manatuʻi Ia fakafou ʻi Hono Laumālié, ʻi he taimi Kilisimasí pea ʻi he taimi kotoa pē. ʻOkú Ne ʻomi ʻa e “fiefiá ki māmani” mo fakaafeʻi hotau lotó ke “teuteu ha potu maʻana”²¹ ke tali hotau Tuʻí. Ko Ia ʻa e fakavaʻe pau ʻoku tau fononga aí. Ko Ia ʻa e Maama ʻo e Māmaní mo e ʻAlo ʻo e ʻOtua moʻuí. ʻOku ou fakamoʻoni ʻi Hono huafá, ko Sīsū Kalaisí, ʻēmeni.