“Ayaw Pagduha-duha, apan Pagmatinuohon”

Elder Dale G. Renlund

Sa Korum sa Napulog Duha ka mga Apostoles

Uban ni Sister Ruth L. Renlund

Tibuok Kalibutan nga Debosyonal alang sa mga Young Adult • Enero 13, 2019 • Brigham Young University–Hawaii

Elder Dale G. Renlund:Salamat sa inyong pakig-uban namo karon. Nasayud kami nga kamong tanan dunay uban pang buhatunon. Nag-ampo kami nga ang Dios mopanalangin kaninyo sa inyong pagsakripisyo. Magpasalamat ko ninyo alang sa Ginoo ug sa Iyang Simbahan tungod sa inyong pagtuo ug kamatinud-anon.

Sister Ruth L. Renlund:Nindot kaayo nga maanaa dinhi. Ang choir talagsaon ug nakatampo sa Espiritu sa miting. Mapasalamaton kami sa uban nga naglingkod sa podium ug giila ang ilang tahas diha sa inyong kinabuhi ug sa amoa. Nakadayeg kami sa ilang ehemplo sa pagkadisipulo.

Naaghat kami nga maghisgot og usa ka hilisgutan nga anaa sa among mga hunahuna sulod sa daghang mga bulan: pagtuo ug pagduha-duha. Sa miaging tuig, niadtong Hunyo, mipaambit kami og usa ka sambingay sa sibya sa tinuig nga pagbansay alang sa mga magtutudlo sa Seminaries and Institutes of Religion. Samtang atong sugdan karon, gusto namong ipaambit kining samang sambingay kaninyo.

Elder Dale G. Renlund:Hunahunaa nga nalunod ang barko samtang naglawig sa kadagatan. Nagsul-ob ka og salbabida ug pila na ka oras nga naglangoy padulong sa imong gituohan nga labing duol nga baybayon, apan dili ka sigurado. Hilabihan na kakulang ang tubig sa imong lawas [dehydrated], mao nga sa matag higayon nga molangoy ka, mura ka og malipong ug kapuyon. Sa imong banabana ang baybayon mga 30 ka kilometro, o 18 ka milya, pa ang gilay-on. Nahadlok ka alang sa imong kinabuhi tungod kay dili ka makalangoy og ingon niana ka layo. Sa layo nakadungog ka og andar sa gamay nga makina. Ang tingog mura og nagpadulong nimo; ang imong paglaum nga maluwas misaka. Sa imong pagtan-aw, nakakita ka og bangka nga pangisdaan nga nagkaduol.

Sister Ruth L. Renlund:“Salamat sa kahitas-an,” naghunahuna ka, “nakakita ang kapitan nako!” Ang bangka mihunong ug usa ka buotan, pagba og pamanit [weather-beaten] nga mangingisda mitabang nimo sa pagsakay sa bangka. Mapasalamaton ka nga mikamang ngadto sa lingkuranan sa bangka, nakapanghupaw sa kalipay. Gihatagan ka og tubig ug biskwit sa mangingisda. Dali-dali nimo kining gikaon. Ang tubig ug mga biskwit nakahatag og igong kusog aron ka maulian. Nahuwasan ka ug malipayon kaayo. Paingon na ka nga mopauli.

Sa dihang naulian na ka ug misugod na nga maayo og pamati, misugod ka pagkamatikod sa mga butang nga wala nimo mamatikdi sa una. Ang tubig gikan sa sudlanan medyo bahaw na ug dili katong imong ganahan, sama sa Evian o Perrier. Ang biskwit maayo ra apan ang gusto gyud unta nimo mao ang espesyal nga karne nga sundan og tsokolate nga croissant. Namatikdan usab nimo nga ang buotang mangingisda nagsul-ob og daan nga botas ug maong. Ang panapton sa iyang kalo naay mansa, ug medyo bungol na siya.

Elder Dale G. Renlund:Nabantayan usab nimo nga ang bangka daan na kaayo ug dunay mga lumping sa tuo nga bahin sa dulong. Ang ubang bahin sa pintal nahup-ak ug nangapaksit. Imong nakita nga kon luagan sa paggunit sa mangingisda ang timon, ang bangka mokabig sa tuo. Nagsugod kag kabalaka nga kining bangka ug kining kapitan dili makahatag nimo og siguridad nga imong gikinahanglan. Nangutana ka sa mangingisda bahin sa mga lumping ug sa timon. Miingon siya nga wala kaayo siya mabalaka nianang mga butanga tungod kay gimaneho niya ang bangka pangadto-nganhi sa pangisdaan, sa samang rota, kada adlaw, sulod na sa mga dekada. Ang bangka kanunayng midala niya bisan asa niya gusto sa luwas ug kasaligang paagi.

Nakalitan ka! Nganong wala man siya mabalaka sa mga lumping ug sa pagtimon? Ug nganong ang pagkaon dili man kadtong mas gusto nimo? Samtang mas mitutok ka sa bangka ug sa mangingisda, mas misamot ang imong kabalaka. Nakapangutana ka sa imong desisyon nganong misakay pa sa bangka. Nagkadako na ang imong kahadlok. Sa katapusan, mimando ka sa mangingisda nga ihunong ang bangka ug tugutan ka nga mobalik sa tubig. Bisan og sobra ka pa sa 20 ka kilometro, o 12 ka milya, gikan sa baybayon, dili na ka makaagwanta nga maghunahuna nga naa ka sa bangka. Uban sa kasubo, gihunong sa mangingisda ang bangka ug gitabangan ka nga mobalik sa tubig. Nag-inusara na usab ka.

Sister Ruth L. Renlund:Ikonsiderar kini nga istorya isip usa ka sambingay diin ang sakayan nagrepresentar sa Simbahan ug ang mangingisda nagrepresentar niadtong nagserbisyo sa Simbahan.¹Ang bugtong katuyoan sa Ang Simbahan ni Jesukristo sa mga Santos sa Ulahing mga Adlaw mao ang pagtabang sa Langitnong Amahan ug ni Jesukristo sa Ilang buhat sa pagpahinabo sa kinabuhi nga dayon sa mga anak sa Dios.²Naghatag kini sa dalan sa pakigsaad, ang paagi nga makabalik ngadto sa atong Langitnong Amahan. Kadtong nagserbisyo sa Simbahan, bisan og dili perpekto, mahinungdanon aron sa pagtabang ug pag-awhag kanato sa dalan sa pakigsaad.

Unsa ang matudlo kanato sa bangka ug sa mangingisda bahin sa Simbahan? Ang mga lumping ug nangapaksit nga pintal sa Simbahan nakausab ba sa abilidad niini sa paghatag sa awtorisado nga makaluwas ug makapahimaya nga mga ordinansa sa pagtabang nato nga mahimong sama sa atong Amahan sa Langit? Kon ang mangingisda kinahanglang mogunit sa timon sa duha ka kamot aron magpadayon ang bangka sa padulngan niini, nakapakunhod ba kana sa iyang abilidad ug sa bangka sa pagdala kanato kon asa kita gustong moadto? Dili gikinahanglang na-orden kamo nga manalagna, sama sa akong bana, aron mahibalo nga ang pagbalik ngadto sa tubig mas kuyaw kay sa magpabilin sa bangka. Apan kon dili nato tan-awon ang mga butang gamit ang mas dakong panglantaw, ang gagmayng mga lumping ug napaksit nga pintal daw dagkong mga butang diha sa atong hunahuna.

Ang matag miyembro sa Simbahan nagkinahanglan sa iyang kaugalingong pagsaksi sa katinuod sa gipahiuli nga Simbahan. Kon walay tinuod nga pagkakabig, lakip ang dakong kausaban sa kasingkasing, tingali mosugod kamo sa pagtutok sa mga butang nga dili importante.

Presidente Russell M. Nelson niadtong kinatibuk-ang komperensya sa Abril 2018 miingon: “Dili na kamo kinahanglan maghunahuna kon unsa ang kamatuoran [tan-awa saMoroni 10:5]. Dili na kamo maghunahuna kinsa ang inyong luwas nga masaligan. Pinaagi sa personal nga pagpadayag, makadawat kamo sa inyong kaugalingon nga pagsaksi nga ang Basahon ni Mormon mao ang pulong sa Dios, nga si Propeta Joseph Smith usa ka propeta, ug nga kini ang Simbahan sa Ginoo. Bisan kon unsa man ang isulti o buhaton sa uban, walay bisan kinsa ang makapawala sa pagsaksi nga midala ngadto sa inyong kasingkasing ug hunahuna kon unsa ang kamatuoran.”³Kini nga pagsaksi mas mahinungdanon karon kay sa kaniadto.

Elder Dale G. Renlund:Ang sinugdanan sa akong pagpamatuod nahitabo sa dihang nagpuyo ko sa Göteborg, Sweden. 11 anyos pa ko. Ang presidente sa misyon midapit sa tanang batan-on sa pagbasa sa Basahon ni Mormon. Akong gidawat kadto nga hagit ug misugod sa pagbasa niini. Kadugayan sa akong pagbasa, usa sa mga magtatambag sa presidente sa misyon misulti namo nga kinahanglang mag-ampo kami bahin sa unsay among gibasa. Nakahinumdom gyud ko sa gabii nga gisunod ko kadto nga pagdapit. Miluhod ko sa kilid sa higdaanan, ug akong gisugdan ang yano kaayong pag-ampo aron masayud kon tinuod ba ang Basahon ni Mormon.

Wala ko makadungog og tingog, apan daw ang Dios misulti kanako, “Ako nagsulti na nimo nga kini tinuod.” Kana nga kasinatian miusab kanako; miusab kini sa akong kinabuhi. Gisugdan niini ang proseso sa pagtuo, usa ka proseso nga maanaa sa dalan sa pagkigsaad ug maningkamot nga mas daghan ang mabuhat ug mas maayo ang mabuhat. Didto sa Göteborg nga nakat-on ko kon unsaon sa paghinulsol. Didto sa Göteborg nga nakaangkon ko og kahibalo bahin sa akong Manunubos. Didto sa Göteborg nga nagsugod ko sa pagtamud sa mga indibidwal nga mitrabaho sa ilang mga calling ug kinsa nagkugi og maayo sa pagtukod sa gingharian sa Dios. Ang Göteborg ang nahimo nakong “katubigan sa Mormon.”⁴

Sister Ruth L. Renlund:Diin man kamo nakaangkon og kahibalo bahin sa inyong Manunubos? Unsay inyong gibati? Kon nakalimot na kamo, moawhag kami ninyo nga dunay buhaton aron makuha og balik ang pagbati. Kini nga kahibalo ug kini nga mga pagbati maoy sinugdanan sa pagtuo.

Ang hugot nga pagtuo usa ka pagpili nga kinahanglang himoon sa matag tawo. Ang hugot nga pagtuo dili lumalabay nga tinguha nga ang usa ka butang tinuod ug mokumbinser sa inyong kaugalingon nga tinuod kini. Ang hugot nga pagtuo mao ang kasiguroan sa pagkaanaa sa mga butang nga wala nato makita diha sa unod. Ang hugot nga pagtuo usa usab ka baruganan sa paglihok.

“Ang hugot nga pagtuo kinahanglang itumong diha ni Jesukristo aron kini makagiya sa tawo ngadto sa kaluwasan. … Ang hugot nga pagtuo mapukaw pinaagi sa pagpaminaw sa ebanghelyo nga gitudlo sa awtorisado nga [mga magtutudlo] nga pinadala sa Dios [tan-awa saMga Taga-Roma 10:14–17]. Ang mga milagro dili makamugna og hugot nga pagtuo, apan ang lig-ong pagtuo mapalambo pinaagi sa pagkamasulundon sa ebanghelyo ni Jesukristo. Sa laing pagkasulti, ang hugot nga pagtuo moabut pinaagi sa pagkamatarung [tan-awa saAlma 32:40–43].”⁵Ang hugot nga pagtuo dili moabut gikan sa pagpangayo og mga timailhan gikan sa Dios apan pinaagi sa pagtuman ug pagsunod sa Iyang mga sugo.

Elder Dale G. Renlund:Gusto sa Dios nga makabaton kita og hugot nga pagtuo aron makapanalangin Siya kanato.⁶Ang hugot nga pagtuo mao ang yawe nga makaabli sa kalooy sa Dios. Ang usa ka tawo kinahanglang mohukom nga gusto siyang makabaton og hugot nga pagtuo ug dayon molihok uban sa pagtuo sa dili pa motubo ang pagtuo. Mitudlo si Alma: “Apan tan-awa, kon kamo mopukaw ug modasig sa inyong mga galamhan, bisan ngadto sa pagsulay sa akong mga pulong, ug pagbansay sa usa ka tipik sa hugot nga pagtuo, oo, bisan kamo kutob ra sa pagtinguha sa pagtuo, tugoti kini nga tinguha nga molihok diha kaninyo, gani hangtud kamo motuo sa paagi nga kamo makahatag og luna alang sa usa ka bahin sa akong mga pulong.”⁷Aron motubo ang pagtuo, ang tawo kinahanglang mopili nga makabaton og pagtuo ug dayon lihukon kini.

Sister Ruth L. Renlund:Ang tinguha sa usa ka tawo alang sa pagtuo kinahanglang moresulta sa paglihok. Sa daghang paagi, atong mapahayag ang atong pagtuo pinaagi sa lihok.

Kini nga baruganan gipahayag diha sa saad sa Basahon ni Mormon nga gisunod sa akong bana sa dihang 11 anyos pa. “Ug kon kamo makadawat niini nga mga butang, ako moawhag kaninyo nga kamo mangutana sa Dios, ang Amahan sa Kahangturan, sa ngalan ni Kristo, kon kini nga mga butang dili ba tinuod; ug kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran niini nganha kaninyo, pinaagi sa gahum sa Espiritu Santo.”⁸

Kon sugdan ninyo sa pangutana nga, “Dili ba kaha tinuod kining mga butanga?” kini moresulta sa pagsugod sa pagtuo nga kon amumahon motubo. “Dili ba kaha tinuod kining mga butanga?” maoy usa ka pangutana nga nangagpas nga kini tinuod. Sama pananglit, kon moingon ko, “Dili ba kita modrayb gikan sa Honolulu padulong sa amihanang baybayon?” kini nagdahum nga magdrayb kita. Ang pangutana nga giawhag ni Moroni nga atong ipangutana mahitungod sa Basahon ni Mormon maoy pangutana nga nadasig sa pagtuo ug busa moresulta sa dugang nga pagtuo.

Kon magsugod hinoon kita sa pangutana, “Dili ba kaha kini bakak?”, moresulta kini sa pagduha-duha. Ug ang pagduha-duha dili gayud mosangpot sa pagtuo.

Elder Dale G. Renlund:Sa usa ka okasyon samtang nagtambong og usa ka komperensya sa stake, ang presidente sa stake mihangyo nako sa pagpakigsulti sa tawo nga akong tawagon og Stephen. Si Stephen nagmatinud-anon nga miyembro sa Simbahan. Nakaserbisyo siya og misyon ug naminyo sa templo. Matinud-anon siyang miserbisyo sulod sa daghang katuigan apan misugod sa pagduha-duha bahin sa Simbahan. Samtang nakigsulti ko ni Stephen, miingon siya nga duna siyay problema sa kamatuoran nga si Joseph Smith misaysay og upat ka bersyon sa Unang Panan-awon. Naghunahuna siya nga tingali nagpasabut kini nga gihimo-himo lang ni Joseph Smith ang iyang kasinatian.

Akong gipakontak si Stephen sa usa ka tawo nga misiksik niining upat ka mga bersyon mga dekada na ang milabay. Si Stephen nakigsulti sa tigsiksik. Sa sunod higayon nga nakig-istorya ko ni Stephen miingon ko, “Unya, unsa man ang imong gibati mahitungod sa Unang Panan-awon?”

Miingon siya, “Nan, okay na akong gibati bahin niana kay natubag man ang akong pangutana. Wala na kana maghasol kanako. Apan karon nabalaka ko bahin sa poligamiya nga gibuhat didto sa Nauvoo ug human sa Manifesto niadtong 1890. Nakasamok gyud na nako.”

Gihangyo nako si Stephen nga makigsulti og tawo nga nakasiksik niini nga mga hilisgutan sa kasaligang nag-una nga mga tinubdan. Human niadto nga diskusyon, akong gikontak si Stephen ug nangutana kon kumusta na siya.

Miingon siya, “Aw, wala na kana maghasol nako. Nakasabut na ko sa nahitabo, ug nasulbad na ang akong mga kahingawa. Apan karon naproblema gyud ko nga ang priesthood gidili sulod sa usa ka panahon gikan sa kaliwat og Afrikano.”

Sister Ruth L. Renlund:Makaguol nga gipili ni Stephen nga magduha-duha kanunay. Alang niya, ang pagduha-duha nakapahimuot niya labaw sa pagkasayud⁹ug iyang gikalot sa pagduha-duha ang unsay iyang gitanom sa pagtuo.¹⁰Paglabay sa panahon, samtang masulbad na ang usa ka problema, adunay lain nga makit-an. Bisan unsaon sa pagpaningkamot nga matubag kini nga mga pangutana, makakita siya og laing hilisgutan nga iyang kabalak-an. Nakapunting siya sa mga lumping sa bangka imbis sa kapabilidad sa bangka nga modala kaniya ngadto sa mga panalangin sa Pag-ula ni Jesukristo. Ang gibuhat ni Stephen maoy usa ka matang sa “whack-a-mole sa kasaysayan sa Simbahan.” Kana ang dula sa mga bata diin mosulpot ang usa ka mole gikan sa lungag sa tabla ug samtang imo kining bunalan, adunay laing mole nga mosulpot sa laing lungag.

Samtang ang dugang nga intelektwal nga impormasyon mahimong temporaryong makasulbad og intelektwal nga problema, ang dugang nga impormasyon dili mao ang hingpit nga sulbad tungod kay, sama sa gisulat ni Pablo sa mga Taga-Corinto, “Apan ang tawo nga kalibutanon dili magadawat sa mga igatudlo sa Espiritu sa Dios: kay alang kaniya kini mga binuang, ug siya dili arang makasabut niini tungod kay kini ugod kinahanglan mang pagatugkaron sa espirituhanon nga paagi.”¹¹Ang pagtuo diha ni Jesukristo ug usa ka saksi gikan sa Espiritu gikinahanglan usab.

Daghan kinsa adunay mga pangutana, kinsa nagduha-duha diha sa ilang mga hunahuna, ug naglisud sa pagkaplag sa ilang espirituhanong kalig-on nagpabilin gihapong matinud-anon ug nagpabilin sa dalan sa pakigsaad. Kasagaran, samtang nag-ampo sila, nakadawat sila sa tubag nga nadawat ni Elder Neil L. Andersen mga dekada na ang milabay dihang naghunahuna siya kon igo ba ang iyang kaandam nga mosulod sa mission field. Samtang nag-ampo siya, ang pagbati miabut: “Ikaw wala masayud sa tanan, apan ikaw igo nga nasayud!”¹²Usahay—gani kasagaran—ang tubag sa Ginoo mao ang, “Igo ang inyong nasayran aron magpabilin sa dalan sa pakigsaad ug mosunod sa Akong mga sugo.”

Sa dihang gipangutana si Nephi kon nasayud ba siya unsa ang pagpakig-angay sa Dios, miingon siya, ‘Ako nasayud nga [ang Dios] nahigugma sa iyang mga anak; bisan pa niana, ako wala masayud sa kahulugan sa tanan nga mga butang.”¹³Igo ang iyang nasayran. Niini nga kinabuhi, dili gayud kita masayud sa kahulugan sa tanang butang, apan igo ang atong nasayran. Ang atong mga padulngan mag-agad sa pagpakita og gamayng pagtuo nga motubo samtang molihok kita uban sa pagtuo.

Elder Dale G. Renlund:Ang pagduha-duha dili gayud ug dili mahimong makamugna og pagtuo sama nga ang kahayag dili mag-agad sa kangitngit aron mamugna kini. Si Pedro wala sultihi, samtang nagkaunlod siya sa tubig human nga misulay sa paglakaw ibabaw niini, “O Pedro, kon dako pa lang unta ang imong pagduha-duha.” Wala, gisultihan siya nga, “O tawong diyutayg pagtuo, nganong nagduhaduha ka man?”¹⁴

Sa Lectures on Faith,ang kalainan tali sa pagtuo ug pagduhaduha gipasabut: “Kon anaa ang pagduhaduha ug kawalay kasiguroan … wala ang pagtuo, ni mahimong maanaa kini. Tungod kay ang pagduha-duha ug pagtuo dili maanaa sa samang tawo sa samang higayon; … ang mga tawo kansang mga hunahuna ubos sa pagduha-duha ug kahadlok dili makaangkon og lig-ong pagsalig; ug kon wala ang lig-ong pagsalig, ang pagtuo huyang; ug kon ang pagtuo huyang ang mga tawo dili makasukol sa tanang oposisyon, kalisdanan, ug mga kasakit nga kinahanglan nilang masinati aron mahimong tigpanunod sa Dios, ug kauban nga tigpanunod ni Kristo Jesus; ug magmaluyahon sila diha sa ilang mga hunahuna, ug ang kaaway makaangkon og gahum batok kanila ug molaglag kanila.”¹⁵

Mao kini ang nahitabo kang Stephen. Gitugutan niya ang pagduha-duha ug kawalay kasiguroan nga mookupar sa iyang hunahuna. Paglabay sa panahon, wala na siyay kusog sa pagharong sa mga hagit nga atubangon sa tawo isip miyembro sa Simbahan. Nagkaluya siya diha sa iyang hunahuna, ug ang iyang pagtuo nahanaw.

Sister Ruth L. Renlund:Ang pagkaadunay mga pangutana mahitungod sa Simbahan ug sa mga doktrina niini normal lang ug maoy gamot sa pagkat-on sa ebanghelyo. Nasabtan kana ni Joseph Smith sa dihang nabasa niya, “Kon aduna man kaninyoy nakulangan og kaalam, papangayoa siya sa Dios, nga nagapanghatag ngadto sa tanang mga tawo sa madagayaon gayud, ug sa walay pagpamoyboy; ug kini igahatag kaniya.”¹⁶

Apan ang tudling mipadayon, “Hinoon kinahanglan nga mangayo siya uban sa pagtuo, sa walay pagduhaduha.”¹⁷

Sa laing pagkasulti, pangayo sa Dios, dili magduha-duha nga makahatag Siya kaninyo sa tubag. Ang tudling mipadayon, “Kay siya nga nagaduhaduha [o nagduda], sama sa balud sa dagat nga ginahandos ug ginakusokuso sa hangin. Ayaw ipadahum sa maong tawo nga siya adunay madawat gikan sa Ginoo. Siya nga maoy tawong tagurhag panghunahuna mabalhinon sa tanan niyang mga paagi.”¹⁸

Aron makadawat sa matang sa tubag nga gitinguha ni Joseph Smith, aron makadawat sa matang sa tubag nga atong gusto, kinahanglan kitang moduol sa Dios inubanan sa matuohon nga kasingkasing ug hunahuna nga nagtinguha nga ang mga butang sa Dios mabutyag ngari kanato.

Elder Dale G. Renlund:Ganahan kita sa usa ka pamahayag nga gihimo ni Elder John A. Widtsoe, usa ka Apostol sa sayong bahin niini nga dispensasyon. Akong usbon ang iyang gisulti. Ang pagduha-duha, gawas kon mausab ngadto sa pagpangutana gikan sa kasaligan nga mga tinubdan, walay pulos o bili. Ang nag-urong nga maduha-duhaon, tawo nga kontento na sa kaugalingon, nga dili andam mohimo sa tukmang paningkamot, nga mobayad sa bugti sa balaang pagkaplag, dili malikayan nga mosangpot sa kawalay pagtuo ug kangitngit. Ang iyang mga pagduha-duha motubo sama sa makahilo nga uhong diha sa kangitngit sa iyang mental ug espiritwal nga mga luna. Sa katapusan, buta sama sa mole diha sa iyang lungag, sa kasagaran iyang ipuli ang pagbugal-bugal sa rason, katapulan imbis pagkugi, ug nahimong tapulan nga iskolar. Dili sayop ang pagduha-duha gawas kon kini maoy nahimong katapusang tumong. Kana nga pagduha-duha nga modako ra sa iyang kaugalingon, ug mopasanay og dugang nga pagduha-duha, maoy dautan.¹⁹

Ang mga pulong ni Elder Widtsoe tinuod gihapon. Ang nakapundong pagduha-duha dili mosangpot sa pagkasayud sa katinuod sa Manluluwas, nga si Jesukristo ug sa Iyang Pag-ula; dili kini mosangpot sa pagkahibalo gayud nga kita adunay mabination, mahigugmaong Langitnong Amahan kinsa mipasiugda sa mahinungdanong plano sa kaluwasan. Atong mahibaloan ang katinuod niining buhat sa ulahing mga adlaw, apan nagkinahanglan kini nga kita mopili sa pagtuo, dili sa pagduha-duha, ug nga kita moadto sa kasaligan nga mga tinubdan alang sa atong mga tubag.

Sister Ruth L. Renlund:Namulong usab si Alma bahin niini nga baruganan. Miingon siya: “Ug busa, siya nga mopatig-a sa iyang kasingkasing, ang mao modawat sa gamay nga bahin sa pulong; ug siya nga dili mopatig-a sa iyang kasingkasing, ngadto kaniya ihatag ang dako nga bahin sa pulong, hangtud kini ihatag ngadto kaniya ang kasayuran sa mga misteryo sa Dios hangtud siya masayud kanila sa hingpit. Ug sila nga mopatig-a sa ilang mga kasingkasing, ngadto kanila ihatag ang gamay nga bahin sa pulong hangtud sila wala nay masayran mahitungod sa iyang mga misteryo; ug unya sila pagadad-on nga mga bihag sa yawa, ug pagadad-on pinaagi sa iyang kabubut-on ubos ngadto sa kalaglagan.”²⁰

Mangayo ba kamo og pinansyal nga tambag gikan sa tawo nga walay kwarta ug utangan?

Elder Dale G. Renlund:Mangayo ba mo og medikal nga tambag gikan sa mangingilad nga namaligya og tambal?

Sister Ruth L. Renlund:Asa man mo mangayo og tambag kon unsaon nga moumento ang inyong forehand sa tennis—sa panagsa ra modula o kang Roger Federer?

Elder Dale G. Renlund:Nganong isalig man ninyo ang inyong mahangturong kaayohan niadtong bangkaruta sa espirituhanong paagi tungod kay gilangkat nila sa pagduha-duha kadtong gitanum nila kaniadto sa pagtuo²¹o kinsa, sama sa giingon ni Jeremias, “mingbiya [ni Jesukristo], ang tuburan sa mga tubig nga buhi, ug sila nanagkutkot og mga atabay, mga atabay nga likian, nga dili kasudlan og tubig?”²²Kining mga tawhana mibiya nianang tinubdan sa buhi nga tubig ug gusto nga mosalig kamo nianang dili kasudlan og tubig.

Sister Ruth L. Renlund:Mga kaigsoonan, mahimo kamong masayud nga adunay Buhi nga Kristo.²³Ang mga blog diha sa internet dili makapuli sa pagtuon sa kasulatan ug pagbasa sa mga pulong sa buhing mga propeta ug mga apostoles. Palamboa ang inyong pagtuo pinaagi sa pag-adto sa kasaligan nga mga tinubdan aron makakita og mga tubag sa inyong mga pangutana.

Elder Dale G. Renlund:Kon sulayan nato sa pagtino kon ang usa ka butang tinuod ba o dili, si propeta Mormon mihatag kanato og sundanan nga angayang sundon:

“Busa, ang tanan nga mga butang nga maayo nagagikan sa Dios; ug kana nga mga dautan nagagikan sa yawa; …

“Apan tan-awa, kana nga iya sa Dios nagdapit ug nagdani sa paghimo sa maayo sa kanunay; busa, matag butang nga magdapit ug magdani sa pagbuhat sa maayo, ug sa paghigugma sa Dios, ug sa pag-alagad kaniya, dinasig sa Dios.

“… … Kini gihatag nganha kaninyo ang paghukom, nga kamo unta masayud sa maayo gikan sa dautan; ug ang paagi sa paghukom ingon ka yano, nga kamo mahimo nga masayud uban sa usa ka hingpit nga kasayuran, ingon nga ang kahayag sa adlaw gikan sa kangitngit sa kagabhion.

“Kay tan-awa, ang Espiritu ni Kristo gihatag ngadto sa matag tawo, siya masayud sa maayo gikan sa dautan; busa, ako mopakita nganha kaninyo sa paagi sa paghukom; kay ang matag butang nga modapit sa paghimo sa maayo, ug sa pagdani sa pagtuo diha kang Kristo, gipadala pinaagi sa gahum ug gasa ni Kristo; busa kamo mahimo nga masayud uban sa usa ka hingpit nga kasayuran nga kini gikan sa Dios.

“Apan bisan unsa nga butang nga modani sa mga tawo sa pagbuhat sa dautan, ug sa dili pagtuo kang Kristo, ug sa paglimud kaniya, ug sa dili pag-alagad sa Dios, niana kamo masayud uban sa usa ka hingpit nga kasayuran nga kini gikan sa yawa.”²⁴

Busa, simple lang kini. Kon ang pagpili makahimo kaninyo sa pagbuhat og maayo ug sa pagtuo kang Kristo, nagagikan kini sa Dios. Kon ang pagpili nag-agni kaninyo sa paghimo og dautan ug paglimud kang Kristo, kini iya sa yawa. Sa inyong pagsubay sa dalan sa pagkigsaad, makahibalo kamo nga kadtong mga butang nga makabalda kaninyo gikan niana nga dalan, kanang mag-awhag kaninyo sa dili pagtuo diha ni Kristo, sayop. Kadtong mga butang nga nag-agni kaninyo sa pagtuo sa Dios, sa paghigugma Kaniya, ug sa pagsunod sa Iyang mga sugo nagagikan sa Dios. Dili ninyo masinati ang importanting espirituhanong mga panghitabo kon mopili kamo sa kanunayng pagduha-duha, nga gisugnuran og mga tubag nga gikan sa walay pagtuo ug dili matinud-anon nga mga tinubdan.²⁵

Sister Ruth L. Renlund:Atong balikan ang atong sambingay, kadtong mopili nga magpabilin diha sa daan, nalumping nga bangka nga nangapaksit ang pintal mao kadtong miila nga ang bangka moluwas kanila gikan sa pagkalumos ug luwas nga makadala kanila ngadto sa baybayon. Sa laing pagkasulti, nagsubay sila sa dalan sa pakigsaad ug nagpabilin sa dalan sa pagkigsaad. Dayon, samtang molahutay sila hangtud sa katapusan, ang saad sa kinabuhing dayon ihatag. Mao kini ang labing dako nga gasa nga mahatag sa Dios. Pinaagi niini nga proseso nga kita makaila ni Jesukristo, mahibalo sa Iyang buhi nga reyalidad, ug masayudo sa Iyang gugma ug kalooy.

Ang Doktrina ug mga Pakigsaad miingon, “Ngadto sa uban kini gihatag pinaagi sa Espiritu Santo aron masayud nga si Jesukristo mao ang Anak sa Dios, ug nga siya gilansang sa krus alang sa mga sala sa kalibutan. Ngadto sa uban kini gihatag sa pagtuo sa ilang mga pulong, nga sila unta makabaton og kinabuhi nga dayon kon sila magpadayon nga matinud-anon.”²⁶Timan-i nga ang ganti susama ra kon nasayud man kamo o nagtuo—kinabuhing dayon ngadto sa mga matinud-anon.

Elder Dale G. Renlund:Niadtong Abril 2009 gipaluyohan ko isip usa ka General Authority sa Simbahan. Pagka-Oktubre 2009, gihangyo ko nga mamulong sa kinatibuk-ang komperensya. Matinguhaon ko nga makapaminaw ang akong amahan sa komperensya. Mitrabaho siya isip panday sa tibuok niyang kinabuhi ug, sa edad nga 92, adunay grabing problema sa iyang likod. Dili siya makaadto sa Conference Center. Busa, usa sa akong mga igsoong babaye misiguro nga makatan-aw siya sa sesyon diha sa TV sa iyang panimalay sa Salt Lake City.

Human sa komperensya miadto ko sa iyang balay aron masuta unsay iyang hunahuna sa akong pakigpulong. Hilumon siya nga tawo ug dili kaayo hilig mohatag og pagdayeg.

Miingon ko, “Pa, nakakita ba ka sa komperensya?”

Siya miingon, “Ja.”

Miingon ko, “Pa, nakadungog ba ka sa akong pakigpulong?”

Siya miingon, “Ja.”

Miingon ko, “Unya, Pa, unsay imong hunahuna?”

Miingon siya, “Ah, maayo ra man to. Hapit ko magpasigarbuhon.”

Apan akong nahibaloan nga medyo nahasol siya nianang gabhiuna tungod kay gusto gayud niyang ipaambit ngari nako ang usa niya ka damgo sa miaging gabii. Dili kaayo siya tigdamgo. Dili siya mahandurawon og hunahuna. Wala gayud ko kabantay nga mamakak siya. Kanunay siyang pintok nga manulti. Miingon siya, “Nagdamgo ko nga namatay ko ug nakita ang Manluluwas, si Jesukristo. Gidawat ko Niya sa Iyang mga bukton ug miingon nga gipasaylo na ang akong mga sala. Ug Dale, nindot kaayo kadto pamation.” Mao ra kadto ang iyang gisulti, ug nagpugong ko nga mangutana pa. Namatay siya paglabay sa duha ka bulan samtang si Ruth ug ako didto sa Madagascar.

Ang akong papa, human mipasakop sa Simbahan didto sa Larsmo, Finland, sa edad nga 24, nagpakabuhi sumala sa kahayag ug kahibalo nga iyang nadawat. Iyang nabuhat ang tanan nga gipabuhat kaniya. Nahimo siyang usa kinsa takus nianang gasa sa Espiritu nga mahibalo nga si Jesus mao ang Kristo ug gilansang sa krus alang sa mga sala sa kalibutan, ug sa iyang mga sala. Ang pagkahimong takus niini nga gasa wala mag-agad sa sekso, ug wala mag-agad sa katungdanan sa priesthood. Kini ang gisaad nga ganti tungod sa pagpili sa pagtuo ug pagpili sa dalan sa pakigsaad.²⁷

Sister Ruth L. Renlund:Busa, unsaon nato sa pagpalambo og pagtuo ug mapadayon kining lig-on? Nagkinahanglan kini og buhat. Nakasulay ba mo og klase sa math—ingnon ta calculus—ug nakita ang propesor nga misulbad og usa ka problema? Ang iyang kahibalo awtomatik ba nga nabalhin kaninyo tungod kay nagtan-aw mo sa propesor nga nakakita sa tubag? Makaguol nga dili. Aron makaangkon og kahibalo—ang samang kahibalo sa propesor—kinahanglan ninyong mosulbad og problema sa calculus nga kamo ra; kinahanglan mo nga magtuon ug sulbaron ang pangpraktis nga mga problema hangtud nga komportable na kamo sa proseso, sa mga equation, ug sa mga simbolo.

Sa samang paagi, ang pagkaplag og pagtuo ug paglig-on sa pagtuo nagkinahanglan og buhat. Tingali nadasig kita sa usa ka tawo kinsa adunay dakong pagtuo, apan ang pagtuo sa laing tawo dili mabalhin kanato niana nga proseso. Kinahanglang mohimo kita og atong kaugalingong pagtuon sa mga kasulatan ug sa mga pulong sa buhi nga mga propeta. Kinahanglan kitang mag-ampo, tinud-anay nga maningkamot nga makig-istorya sa Langitnong Amahan, sa ngalan ni Jesukristo. Mahinungdanon ang takus nga pag-ambit sa sakrament matag semana ug sa paghinumdom unsa ka maloloy-on ang Dios ngari kanato sa paghatag sa Iyang Anak aron motubos sa atong mga sala. Kining personal, pribado nga mga buhat sa debosyon makaugmad ug makapatunhay sa pagtuo.

Elder Dale G. Renlund:Ang unang responsibilidad nako isip sakop sa Korum sa Napulog Duha ka mga Apostoles mao ang pag-adto ug pagsulti sa Church History Department nga pulihan nako si Elder Jeffrey R. Holland isip usa ka tigtambag sa ilang departamento. Sama sa inyong mahanduraw, adunay mga “paghilak, ug pagdangoyngoy, ug pagpangagot sa mga ngipon”²⁸sa dihang ilang nahibaloan nga ang ilang pinanggang tigtambag pulihan. Nagkulang na gud sa tisyu.

Isip kabahin sa akong tahas isip tigtambag sa Church History Department, akong gibasa ang tanang volume sa The Joseph Smith Papers.Gibasa usab nako ang unang volume ug ang unang porsyon sa ikaduhang volume sa bag-ong sugilanon sa kasaysayan sa Simbahan, nga giulohan og Mga Santos. ²⁹Ang pagbasa sa tanan nga gisulat sukad ni Joseph Smith o gikataho nga iyang gisulti yanong nakapalig-on sa akong pagpamatuod sa iyang papel isip propeta nga gipili sa Dios aron sa pagpahiuli sa Iyang buhat dinhi sa yuta.

Si Joseph Smith kanunay nga nagmatinud-anon sa iyang pagpamatuod. Makanunayon siya. Kanunay siyang milihok isip tawo nga tinud-anay nga nakakita sa atong Langitnong Amahan ug ni Jesukristo; ni Moroni; ni Juan Bautista; ni Pedro, Santiago, ug Juan; ni Moises; ni Elias; ug ni Elijah. Milihok siya isip usa ka tawo nga nakahupot sa bulawan nga mga palid ug mihubad niadtong karaan nga mga teksto pinaagi sa gasa ug gahum sa Dios. Milihok siya isip usa ka tawo nga nakadawat og pagpadayag gikan ni Jesukristo Mismo. Milihok siya isip usa ka tawo kinsa nakadawat sa awtoridad sa pagkapari ug sa mga yawe sa balaan nga pagka-Apostol.

Nakahibalo ko sa mga paagi nga mas gamhanan ug mas masaligan kay sa unsay mabatyagan sa lima ko ka balatian ug mopadayag nga si Joseph Smith nakakita sa unsay iyang gisulti nga iyang nakit-an, mihubad sa Basahon ni Mormon pinaagi sa gasa ug gahum sa Dios, ug nakadawat sa pagkapari inubanan sa mga yawe niini alang sa kaluwasan sa katawhan. Nakahibalo ko nga kini tinuod. Nakahibalo ko nga kadtong mga yawe ania sa yuta karon ug nga si Presidente Nelson mao ang angayan nga sumusunod ni Joseph Smith dinhi sa yuta.

Unsay atong gihunahuna nga mga lumping ug nangapaksit nga pintal sa karaan na kaayo nga bangka mahimong mogawas nga balaanong gitugotan ug balaanong gisugo gikan sa mahangturong panglantaw. Ang Ginoo mahimong nakagunit sa nalumping ug sa nahup-ak nga pintal o Siya migamit niini alang sa Iyang kaugalingong mga katuyoan. Ako mismo nasayud nga ang Ginoo, si Jesukristo, naggiya sa Iyang buhat dinhi sa yuta karon. Ang Iyang mga sulugoon nakaila kaayo Kaniya.

Sister Ruth L. Renlund:Mapasalamaton kong modugang sa akong pagpamatuod nga ako nasayud nga si Jesukristo mao ang atong Manluluwas. Kon mopakita kita og pagtuo, dili magduha-duha, diha sa Iyang maulaong pagsakripisyo ug sa mga bunga sa Iyang Pag-ula, ang atong mga kinabuhi mapanalanginan sa hangtud. Mapasalamaton ko nga Iyang gipahiuli ang Iyang Simbahan karon uban sa mga panalangin nga magamit gayud sa mga anak sa Dios dinhi sa yuta.

Elder Dale G. Renlund:Si Jesukristo buhi ug mao ang Manluluwas sa kalibutan. Mopamatuod ko sa Iyang kalooy, gugma, ug maamumahong pagpakabana alang sa tanang anak sa Dios. Mosaksi ko sa Iyang walay ikatandi nga maulaong pagsakripisyo alang kaninyo ug kanako. Sa akong pagkaila sa Manluluwas, nakat-on ko sa Iyang dakong tinguha sa pagtabang sa pag-alim sa mga samad ug sa paghupay sa mga nagmasulub-on.

Mag-ampo ko nga ang labing bililhong mga panalangin sa Dios maanaa kaninyo. Mag-ampo ko nga makaugmad kamo og pagtuo diha ni Jesukristo, nga kamo “[dili mag]duha-duha, apan [m]agmatinuohon.”³⁰Dapiton ko kamo sa pagpalambo sa inyong pagtuo diha ni Kristo pinaagi sa pagtuon sa mga kasulatan ug sa mga pulong sa buhing mga propeta, sa pag-ampo ug pakig-istorya sa Langitnong Amahan, ug sa mahunahunaong pagpangandam ug takus nga pag-ambit sa sakrament matag semana. Ang Dios mopanalangin kaninyo samtang mohimo kamo niining personal, pribado nga mga buhat sa debosyon ug moserbisyo ug mangalagad sa uban. Sa pangalan ni Jesukristo, amen.