« ’Eiaha e fē’a’apiti, e fa’aro’o rā »
Purera’a ’ati ti’a i te ao nei nō te feiā ’āpī pa’ari • 13 nō Tēnuare 2019 • Brigham Young University–Hawaii
Elder Dale G. Renlund:Māuruuru nō tō ’outou taera’a mai. ’Ua ’ite māua ē, ’ua rahi ato’a tā ’outou ’ohipa. Tē pure nei māua ’ia ha’amaita’i mai te Atua ia ’outou nō tā ’outou fa’atusiara’a. Nā niʼa i te iʼoa o te Fatu ʼe o tāna ʼĒkālesia, tē haʼamāuruuru nei au ia ʼoutou nō tō ʼoutou faʼaroʼo ʼe tō ʼoutou haʼapaʼo maitaʼi.
Tuahine Ruth L. Renlund :Mea ’oa’oa roa te taera’a mai i’ō nei. E mea nehenehe te pupu hīmene ’e ’ua tauturu rātou i te Vārua ’ia pārahi mai i roto i teie rurura’a. ’Ua māuruuru māua i te tahi atu mau ta’ata i ni’a nei, e ti’ara’a rahi tō rātou i roto i tō ’outou orara’a ’e tō māua ato’a. ’Ua fa’ahiahia māua i tō rātou hi’ora’a pipi.
’Ua tae mai te mana’o e paraparau ia ’outou i te hō’ē tumu parau tei vai noa i roto i tō māua ferurira’a e rave rahi ’āva’e : te fa’aro’o ’e te fē’a’a. I te matahiti i ma’iri, i te ’āva’e Tiunu, ’ua fa’a’ite māua i te hō’ē parabole i roto i te ha’apurorora’a ha’api’ipi’ira’a matahiti nā te mau ’orometua Séminaire ’e te Institut. I teie mahana, e ha’amata māua i te fa’a’ite atu i teie ā parabole ia ’outou.
Elder Dale G. Renlund :E feruri na ’outou ē, tē fano ra ’outou i ni’a i te moana ’e ’ua ta’ahuri tō ’outou pahī. ʼUa ʼōʼomo ʼoutou i te hōʼē pereue faʼaora ʼe tē ’au nei ʼoutou e rave rahi mau hora i te mea tā ʼoutou e tiʼaruri nei ē, ʼo te tahatai piri roa aʼe, ʼaita rā ʼoutou i pāpū. ʼUa pohe roa ʼoutou i te poʼihā, ʼe nō reira, i te mau taime atoʼa ʼe haʼamata ʼoutou i te ʼau, e ta’anini tō ’outou upo’o ’e ’ua rohirohi. ’Ia hi’o ’outou, e 30 kilometera ʼaore rā 18 maile te tahatai te ātea. Tē mata’u ra ’outou nō tō ’outou ora, inaha, e’ita ’outou e nehenehe e ’au i terā āteara’a. Tē faʼaroʼo nei ʼoutou i te ātea i te hōʼē hāruru mātini naʼinaʼi. E au ra ē, tē piri mai ra terā māniania ; ʼua pūai roa mai tō ʼoutou tiʼaturiraʼa nō te tauturu. I tō ’outou hi’ora’a atu, tē ʼite neiʼoutou i te hōʼē poti taiʼa ’o tē tāpiri mai ra.
Tuahine Ruth L. Renlund :’Ua mana’o atura ’outou : « ’Auē te māuruuru rahi, ’ua ’ite mai te tāpena iā’u ! » Tāpeʼa ihora te poti ʼe tauturu mai nei te hōʼē taʼata rāvaʼai maitaʼi ʼe te ʼiri ravarava ia ’outou ’ia i tē paʼuma mai i niʼa i te poti. E māuruuru iti rahi tō ’outou i te neʼera’a atu i te hōʼē pārahiraʼa o te poti, ’ua ora ’outou. Hōroʼa mai nei te taʼata ravaʼai i te hō’ē fa’ariʼi pape ʼe te tahi mau faraoa paʼapaʼa. E au ’outou i te ta’ata ’amurahi. ’Ua nava’i roa terā pape ʼe terā faraoa paʼapaʼa nō ’outou ’ia maita’i mai. ’Ua topa roa tō ’outou hau ’e te ’oa’oa iti rahi. Tē hoʼi nei ʼoutou i te fare.
Tē haʼamata ra ʼoutou i tē oraora mai ʼe i tē maitaʼi mai ’e tē haʼamata ato’a ra ’outou i te ’ite i te tahi mau mea ʼaita ʼoutou i haʼapaʼo maita’i nā mua atu. E mea au ’ore riʼi te pape i roto i te fa’ariʼi, e ʼere pa’i i te pape tā ʼoutou i au roa—mai te Evian ʼe te Perrier. E mea maita’i iho ā ïa te faraoa pa’apa’a, te māʼa rā tā ʼoutou i hinaʼaro roa, ʼo te tahi ïa māʼa maitaʼi ’ia ʼāpeʼehia e te tahi croissant chocolat. Tē ’ite ato’a ra ʼoutou ē, e tīaʼa puiti tahito tō te taʼata ravaʼai ʼe te piripou parata nīnamu. ʼUa nīnaemoahia ’o roto i tōna taupoʼo ʼe e au ra ē, e tariʼa turi tōna.
Elder Dale G. Renlund :Tē ’ite ra ʼoutou ē, e poti teie tei faʼaʼohipa-rahi-hia ʼe ’ua ʼāpoʼopoʼohia i te pae ʼatau o te muara’a. ʼUa pāparari haere te pēni ʼe ʼua mātaratara. Tē ’ite ra ’outou ē, ’ia vaiiho riʼi noa te taʼata rāvaʼai i te hoe faʼatere, e horo ïa te poti i te pae ʼatau. E haʼamata ʼoutou i te haʼapeʼapeʼa ē, ʼe eʼita e noaʼa i teie poti ʼe teie tāpena e hōro’a mai ia ʼoutou te tautururaʼa hinaʼarohia ʼe ʼoutou. ’Ua ui ’outou i te ta’ata rāvaʼai nō niʼa i te mau ʼāpoʼopoʼo ʼe te hoe. ’Ua pāhono mai ’oia ē, ʼaita ʼoia i haʼapeʼapeʼa a’enei nō taua mau mea ra, nō te mea ’ua faʼahoro ʼoia i te poti i te mau vāhi tāiʼaraʼa ’e ’ua ho’i mai, terā noa te ’avei’a i te mau mahana atoʼa, e rave rahi matahiti i teienei. ʼUa ʼāfaʼi noa te poti iāna ma te maitaʼi ʼe te pāpū i te mau vāhi atoʼa e hinaʼaro ʼoia e haere.
’Ua māere roa ’outou ! Nāhea pa’i ’oia ’eiaha e ha’ape’ape’a i te mau ʼāpoʼopoʼo ʼe i te faʼahororaʼa ? ʼE nō te aha pa’i te māʼa e ʼore ai e riro rahi atu ā mai tā ʼoutou i au ? Rahi noa atu ʼoutou i te ferurira’a i te poti ʼe te taʼata rāvaʼai, rahi ato’a atu tō ʼoutou haʼapeʼapeʼaraʼa. Tē uiui ra te mana’o ē, ’ua tano ānei ’outou i tē paʼumaraʼa i roto i terā poti i te haʼamataraʼa. Tē haʼamata nei ʼoutou i te hepohepo rahi. I te pae hopeʼa, ani ihora ʼoutou i te taʼata ravaʼai ’ia tāpe’a i te poti e pou atu ’outou i roto i te pape. Noa atu ā ʼua hau i te 20 kilometera ʼaore rā te 12 maile te tahatai i te ātea, eʼita e haere fa’ahou ia ʼoutou ’ia faʼaea i roto i te poti. Mā te ’oto, ’ua tāpe’a ihora te taʼata ravaʼai i te poti ʼe ’ua tauturu ia ʼoutou ’ia pou i roto i te pape. Fa’ahou ā, ’o ’outou ana’e atura.
Tuahine Ruth L. Renlund:E feruri i teie ’ā’amu mai te hō’ē parabole ’e te poti ’o te ’Ēkālesia ïa, ’e te ta’ata rava’ai ’o rātou ïa e tāvini nei i roto i te ’Ēkālesia.1Hō’ē noa fā a te ’Ēkālesia a Iesu Mesia i te Feiā Mo’a i te Mau Mahana Hope’a Nei, ’o te tauturura’a i te Metua i te Ao ra ’e ia Iesu Mesia i roto i tā rāua ’ohipa te fa’atupura’a i te ora mure ’ore o te mau tamari’i a te Atua.2Tē hōro’a nei te reira i te ’ē’a nō te fafaura’a, te ’ē’a nō te ho’i atu i tō tātou Metua i te Ao ra. ’O rātou e tāvini nei i roto i te ’Ēkālesia, noa atu ā tō rātou mau hapehape, e mea faufa’a rātou nō te tauturu ’e nō te fa’aitoito ia tātou i ni’a i te ’ē’a nō te fafaura’a.
E aha tā te poti ʼe te taʼata ravaʼai e haʼapiʼi nei ia tātou nō niʼa i te ʼĒkālesia ? E taui ānei te mau ʼāpoʼopoʼo ʼe te pēni mātaratara o te ʼĒkālesia i tōna ʼaravihi ’ia hōroʼa i te mau ʼōroʼa mana nō te faʼaoraraʼa ʼe te faʼateiteiraʼa, nō te tauturu ia tātou ’ia riro mai tō tātou Metua i te Ao ra te huru ? Mai te mea e tītauhia i te taʼata ravaʼai ’ia tāpeʼa e piti rima i niʼa i te hoe ’ia vai noa i niʼa i te ʼaveiʼa, ’ua ’ore ānei tōna ʼaravihi ʼe tō te poti nō te faʼatae ia tātou ma te pāruru ʼe te pāpū i te vāhi tā tātou e hinaʼaro e haere atu ? ʼAita i tītauhia ’ia riro ’outou ’ei hi’o fa’atōro’ahia, mai tāʼu tāne faʼaipoipo, nō tē ʼite ē, e mea ata’ata a’e ʼia pou atu i roto i te pape i te faʼaea-noa-ra’a i roto i te poti. Teie rā, i te taime e mo’e ia tātou i tē hi’o i te hōho’a rahi, e riro te mau ’āpo’opo’o iti ’e te pēni mātaratara i tē fa’arahi i roto i tō tātou ferurira’a.
Tītauhia ’ia noa’a i te mau melo atoʼa tō rātou iho ʼiteraʼa nō te parau mau o te ʼĒkālesia i fa’aho’ihia mai. ’Ia ʼore taua faʼafāriuraʼa mau ra, ’e tae noa atu te tauiraʼa pūai o te ʼāʼau, e riro ’outou i te hi’o noa i niʼa i te mau faraoa paʼapaʼa ʼe te pēni mātaratara.
Tē nā ’ō ra te peresideni Russell M. Nelson i te ’āmuira’a nō ’Ēperēra 2018 : « ʼAita ʼoutou i tītauhia ’ia ui e aha te parau mau [hiʼo Moroni 10:5] ’Aita e faufa’a ’ia ui ’outou ’o vai tē ti’aturi atu ma te hau. E mea nā roto i te heheura’a o te ta’ata iho e fāri’i ai ’outou i tō ’outou iho ’ite ē, e parau nā te Atua te Buka a Moromona, e peropheta ’o Iosepha Semita ’e e ’Ēkālesia teie nā te Fatu. Ta’a ’ē noa atu tā verā ma e parau ’e e rave, e’ita e ta’ata e nehenehe e rave ’ē i te hō’ē ’ite nō ni’a i te parau mau i fa’a’itehia i tō ’outou ’ā’au ’e i tō ’outou ferurira’a ».3E mea faufa’a roa te reira ’ite, rahi atu i teienei i te tahi noa atu tau.
Elder Dale G. Renlund:’Ua ha’amata tō’u ’itera’a pāpū i te orara’a vau i Göteborg, i Suede. E 11 matahiti tōʼu. ʼUa hōro’a mai te peresideni misiōni i te feiā ’āpī ato’a i te anira’a e tai’o i te Buka a Moromona. ’Ua fāri’i au i te reira ’e ’ua ha’amata vau i te tai’o. I te hō’ē taime i roto i tā’u tai’ora’a, ’ua parau mai hō’ē tauturu a te peresideni misiōni e pure nō ni’a i te mea tā mātou i tai’o. Tē haʼamanaʼo maita’i nei au i te pō ʼa ha’apa’o ai au i taua aniraʼa ra. ’Ua tūturi au i te hiti o te roʼi ʼe ʼua haʼamata vau i te hōʼē pure ʼōhie noa, nō te ʼite e parau mau ānei te Buka a Moromona.
ʼAita vau i faʼaroʼo i te hōʼē reo, mai te mea rā ē ʼua parau mai te Atua iāʼu ē, « I parau noa nā vau ia ʼoe ē e parau mau te reira ». ’Ua taui terā ’ohipa i tupu iā’u ; ’ua taui te reira i tō’u orara’a. ʼUa haʼamata te reira i te hōʼē raveraʼa nō te tiʼaturiraʼa, te hōʼē raveraʼa ʼia tiʼa atu i niʼa i te ʼēʼa nō te fafauraʼa ʼe te tāmataraʼa ʼia rave atu ā ʼe te tāmataraʼa ʼia rave maitaʼi aʼe. I Göteborg tōʼu haʼapiʼiraʼa nāhea i tē tātarahapa. I Göteborg tōʼu ’apora’a mai ’ia ’ite i tōʼu Faʼaora. I Gōteborg tōʼu haʼamataraʼa i tē hiʼo atu i te mau taʼata e rave maita’i i tō rātou piʼiraʼa ʼe ’o tei haʼa itoito nō te paturaʼa i te bāsileia o te Atua. ʼUa riro Gōteborg ʼei « Pape nō Moromona » nō’u.4
Tuahine Ruth L. Renlund :I hea tō ’outou ’ite-maita’i-ra’a nō tō ’outou Fa’aora ? E aha te mana’o i tae mai ia ’outou ? Mai te mea ’ua mo’ehia te reira ia ’outou, tē a’o atu nei māua ia ’outou ’ia rave i te hō’ē ’ohipa nō te ’apo fa’ahou mai i te reira mana’o. Teie ʼite-maita’i-ra’a ʼe teie mau manaʼo ’o te haʼamataraʼa ïa o te faʼaroʼo.
Te faʼaroʼo ʼo te hōʼē ïa māʼitiraʼa e ti’a i te taʼata tātaʼitahi ’ia rave. E ʼere te faʼaroʼo i te hinaʼaro noa i te tahi mea ’ia riro ’ei parau mau ʼe te haʼapāpū-noa-raʼa ia ʼoutou iho ē e parau mau. Te faʼaroʼo ʼo te pāpūraʼa ïa i te vairaʼa o te mau mea tā tātou e ʼore e ʼite nei i te tino nei. E parau tumu nō te ’ohipa atoʼa te fa’aro’o.
« Tītauhia te fa’aro’o ’ia fa’atumuhia i ni’a ia Iesu Mesia [’ia ti’a] i te reira ’ia arata’i i te ta’ata i te fa’aorara’a… E faʼaʼamahia te faʼaroʼo nā roto i te faʼaroʼoraʼa i te ʼevanelia tei haʼapiʼihia e [te mau ’orometua] haʼamanahia ʼe tei tonohia e te Atua [hi’o Roma 10:14–17]. Eʼita te mau temeio e faʼatupu mai i te faʼaroʼo, e hotu rā te faʼaroʼo pūai nā roto i te haʼapa’oraʼa i te ʼevanelia a Iesu Mesia. E nehenehe e parau ē, nō roto mai te fa’aro’o i te parau ti’a [hi’oAlama 32:40–43] ».5 Eʼita te faʼaroʼo e tae mai nā roto i te aniraʼa i te mau tāpaʼo nō ’ō mai i te Atua ra, nā roto rā i te haʼapaʼoraʼa ʼe te peʼeraʼa i tāna mau faʼaueraʼa.
Elder Dale G. Renlund:’Ua hina’aro te Atua ’ia roa’a tō tātou fa’aro’o ’ia ti’a iāna ’ia ha’amaita’i ia tātou.6E tāviri te fa’aro’o nō te tātara i te aroha o te Atua. Tītauhia ’ia faʼaoti te hō’ē ta’ata ē ’ua hinaʼaro ānei ʼoia e fāri’i i te faʼaroʼo, e ʼohipa atu ai ma te faʼaroʼo hou e tupu rahi ai te fa’aro’o. ʼUa ha’api’i Alama : « Inaha rā, mai te mea e ara ʼoutou, ʼe e faʼaitoito hoʼi i tō ʼoutou ʼāʼau, i tē tāmata i tāʼu nei parau, ʼe i tē faʼatupu hoʼi i te faʼaroʼo iti ha’iha’i noa iho ; ʼoia ïa, ’aita atu i ti’a ia ʼoutou, maori rā ʼo te hinaʼaro i te faʼaroʼo ʼia tupu ā taua hinaʼaro i roto ia ʼoutou ra, ē tae noa atu i te faʼaroʼo e ti’a ai ia ʼoutou i tē fariʼi i te tuhaʼa o tā’u nei parau ».7 Nō tē fa’arahi i te fa’aro’o, tītauhia ’ia mā’iti te ta’ata ’ia fāri’i i te fa’aro’o ’e i muri iho e ’ohipa atu ai nō te reira.
Tuahine Ruth L. Renlund :Tītauhia i te fa’aro’o o te hō’ē ta’ata ’ia riro ’ei ’ohipa. E rave rahi hi’ora’a, e fa’a’ite tātou i tō tātou fa’aro’o ’e tō tātou ’āvae.
’Ua fa’ahitihia te reira parau tumu i roto i te fafaura’a o te Buka a Moromona tā tā’u tāne fa’aipoipo i pe’e i te 11 o tōna matahiti. « ’E ’o teie tā’u a’o ia ’outou na, ’ia ’itea teie nei mau parau ia ’outou, e ui atu i te Atua, i te Metua Mure ’ore ra, i te i’oa o Iesu Mesia ē, [e ’ere ānei teie mau mea i te parau mau] ; ’e ’ia ui atu ’outou ma te ’ā’au hina’aro mau, ma te mana’o pāpū, ’e ma te fa’aro’o i te Mesia, nāna ïa e fa’a’ite mai i te parau mau ia ’outou nā roto i te mana o te Vārua Maita’i ».8
ʼIa haʼamata anaʼe ʼoutou ma te uiraʼa, « e nehenehe ānei teie mau mea e ’ere i te parau mau ? », e arataʼi ïa te reira i te ha’amatara’a o te faʼaroʼo e tupu i te rahi mai te mea e fa’a’amuhia. « E nehenehe ānei teie mau mea e ’ere i te parau mau ? », o te hō’ē uira’a ’o te fa’atupu i te mana’o, e parau mau ïa. ’Ei hi’ora’a, ’ia parau ana’e vau ē : « E’ita ānei tātou e fa’ahoro mai Honolulu atu i te pae apato’erau », tā mana’o ra ïa tātou, e fa’ahoro atu. Te uira’a i a’ohia mai e Moroni e ui nō ni’a i te Buka a Moromona, e uira’a ïa tei tūra’ihia e te fa’aro’o, nō reira e arata’i te reira i te fa’aro’o rahi atu ā.
ʼIa haʼamata anaʼe rā tātou ma te uiraʼa : « E nehenehe ānei teie mau mea e ’ere i te parau hape ? », e arataʼi ïa te reira i te fēʼaʼaraʼa. E’ita roa ho’i te fēʼaʼaraʼa e arataʼi atu i te faʼaroʼo.
Elder Dale G. Renlund:I te hōʼē taime, i tōʼu haereraʼa i te hōʼē ʼāmuiraʼa titi, ʼua ani mai te hōʼē peresideni titi ʼia haere e fārerei i te hōʼē taʼata tāʼu e piʼi ʼo Stephen. E melo ha’apa’o maitaʼi ʼo Stephen nā mua a’e. ’Ua tāvini i te hō’ē misiōni ’e ’ua fa’aipoipo i roto i te hiero. ʼUa tāvini itoito ʼoia e rave rahi matahiti ʼua haʼamata rā ʼoia i te fēʼaʼa nō niʼa i te ʼĒkālesia. I tōʼu fārereiraʼa ia Stephen, ʼua parau mai ʼoia ē tē fifi ra ’ōna nō te mea ʼua fa’ati’a Iosepha Semita e maha huru ʼāʼamu nō ni’a i te ʼŌrama mātāmua. Iāna, te aura’a ra, ’ua hāmani Iosepha Semita i teie ʼāʼamu.
ʼUa hōroʼa vau ia Stephen i te iʼoa ʼo te hōʼē taʼata tei tuatāpapa i teie nā ʼāʼamu e maha e rave rahi mau matahiti nā mua atu. ʼUa fārerei Stephen i terā ʼaivānaʼa. Te taime i muri iho tōʼu paraparauraʼa ia Stephen ʼua nā ’ō atu vau : « E aha atura tō ʼoe manaʼo nō niʼa i te ʼŌrama mātāmua ? »
ʼUa nā ’ō mai ’oia : « E mea maitaʼi au i teienei ʼua pāhonohia tāʼu mau uiraʼa. ʼAita te reira e haʼapeʼapeʼa faʼahou iāʼu. I teienei tē fifi mau ra vau nō niʼa i te fa’aipoipora’a vahine rau i ravehia i Nauvoo ʼe i muri iho i Manifesto i te matahiti 1890. Tē haʼapeʼapeʼa mau nei te reira iāʼu ».
ʼUa ani au ia Stephen ʼia fārerei i te tahi ʼē atu taʼata tei tuatāpapa i te reira i roto i te buka tumu mau. I muri aʼe i taua tauʼaraʼa parau ra, ʼua niuniu atu vau ia Stephen ma te ani atu e aha tōna huru.
ʼUa nā ’ō mai ʼoia : « ʼAita fa’ahou vau e fifi nei nō te reira. ʼUa taʼa iāʼu i te mea i tupu, ʼe ʼua matara tōʼu fifi. I teienei tē fifi ra vau nō ni’a i te autahuʼaraʼa tei ʼore i hōroʼahia i te mau taʼata ʼereʼere ».
Tuahine Ruth L. Renlund:Te vāhi ’oto i’ō nei, ’ua mā’iti Stephen ’ia riro ’ei ta’ata fē’a’a noa. Iāna, e mea au a’e te fē’a’a i te ’ite9’e tē heru ra ’oia ma te fē’a’a i tāna i tanu ma te fa’aro’o.10’Ua haere noa ē, ’ia pāhonohia te hō’ē fifi, e fifi ’āpī tei ’itehia mai. Noa atu ā te rahiraʼa ta’ata tei tāmata i tē ha’amāramarama ʼe i tē pāhono i terā mau uiraʼa, e ʼiteahia iāna te tahi atu manaʼo fēʼaʼa. ’Ua fa’atumu ’oia i ni’a i te mau ’āpo’opo’o o te poti ’eiaha rā i ni’a i te ’aravihi o te reira e arata’i iāna i te mau ha’amaita’ira’a o te tāra’ehara a Iesu Mesia. Te mea tā Stephen i rave mai te ha’utira’a « whack-a-mole » nō ni’a i te ’Ēkālesia. Tē ta’a ra ia ’outou terā ha’uti tamari’i, e fa’aura mai te hō’ē « taupe » mai raro i te ’aira’amā’a ’e ’ia tūpa’i atu ’oe e fa’aura mai nā te tahi ’ē atu vāhi.
E noa’a iho ā ïa ’ia fa’a’āfaro-ri’i-hia te hō’ē fifi tā ’oe e feruri ra nā roto i te tuatāpapara’a ’e te ferurira’a, e ’ere rā te tuatāpapara’a i te rāve’a hope inaha ’ua pāpa’i Paulo i tō Korinetia ē : « E ’ore rā te ta’ata e ha’apa’o i tā te tino ra e fāri’i mai i tā te Vārua o te Atua ra : E mea ma’ama’a ïa iāna : E ’ore ho’i ’oia e ’ite i te reira, nō te mea, i ’imihia te reira e te vārua ».11Tītau-ato’a-hia te fa’aro’o ia Iesu Mesia ’e te ’ite nā roto mai i te Vārua.
E rave rahi ta’ata e uira’a tā rātou, tei tomohia tō rātou ferurira’a e te fē’a’a, ’e ’ua fifi i te ’ite mai i hea e ta’ahi ai te ’āvae i te pae vārua ’e ’ua vai ha’apa’o maita’i noa rā ’e ’ua vai noa i ni’a i te ’ē’a nō te fafaura’a. ’Ia pure rātou, e mea pinepine rātou i te fāri’i i te pāhonora’a tā Elder Neil L. Andersen i fāri’i e tau ’ahuru matahiti i ma’iri i te uiuira’a tōna mana’o ē, ’ua tano ānei tāna fa’aineinera’a nō tē tomo atu i roto i te ’āua misiōni. I te purera’a ’oia, ’ua tae mai te mana’o ē, « ’Aita ’oe i ’ite pauroa, ’ua nava’i rā tā ’oe i ’ite ! »12I te tahi taime—e mea pinepine ho’i—e riro te pāhonora’a a te Fatu ē : « ’Ua nava’i tā ’oe i ’ite nō tē vai noa i ni’a i te ’ē’a nō te fafaura’a ’e nō te ha’apa’o i tā’u mau fa’auera’a. »
I te anira’ahia Nephi ē, ’ua ’ite ānei ’oia i te aroha o te Atua, ’ua nā ’ō atu ’oia ē : « ’Ua ’ite au ē, ’ua aroha ’oia i tāna mau tamari’i ; ’āre’a rā, ’aita vau i ’ite i te aura’a o te mau mea ato’a ».13’Ua nava’i tāna i ’ite. I roto i teie nei orara’a, e’ita tātou e ’ite i te aura’a o te mau mea ato’a, ’ua nava’i rā tā tātou i ’ite. Tei ni’a tō tātou hope’ara’a i te fa’a’ohipara’a i te fa’aro’o iti ’o te riro i te tupu i te rahi ’a ’ohipa noa ai tātou ma te fa’aro’o.
Elder Dale G. Renlund:’Aita te fē’a’a e riro ’e e’ita roa e riro mai ’ei ’ōmuara’a nō te fa’aro’o, mai te māramarama e riro i tē tūru’i atu i ni’a i te pōiri nō tōna hāmanira’a. ’A tomo ai Petero i raro i te pape i te tāmataraʼa ’oia i te haere nā niʼa i te reira, ʼaita ’oia i parauhia ē : « E Petero, ʼahani pa’i i rahi atu ā tō ʼoe fēʼaʼa ». ʼAita, ʼua parauhia atu ʼoia : « E teie nei taʼata faʼaroʼo haraini, e aha ʼoe i mataʼu ai ? »14
I roto i te Lectures on Faith [Mau aʼoraʼa nō niʼa i te Faʼaroʼo], ʼua fa’ata’ahiahia te tāʼa-ʼē-raʼa i rotopū i te faʼaroʼo ʼe te fēʼaʼa : « I te vāhi tē vai ra te fēʼaʼa ʼe te pāpū ʼore… ʼaita ïa e faʼaroʼo, eʼita atoʼa te reira e tupu. Nō te mea eʼita te fēʼaʼa ʼe te faʼaroʼo e tupu i roto i te hōʼē taʼata i te hōʼē ā taime… e ʼore ai e noaʼa i te mau taʼata tei raro aʼe tō rātou feruriraʼa i te fēʼaʼa ʼe i te mataʼu te tiʼaturiraʼa ʼāueue ʼore ; ʼe i te vāhi ʼaita e tiʼaturiraʼa ʼāueue ʼore e mea paruparu ïa te faʼaroʼo ; ʼe i te vāhi ʼe mea paruparu te faʼaroʼo eʼita ïa e noaʼa i te mau taʼata ’ia aro atu i te mau pātoʼiraʼa atoʼa, te mau tāmataraʼa, ʼe te mau ’ati tā rātou e faʼaruru atu nō tē riro ʼei fatu ʼāi’a nā te Atua, ’e e mau fatu ʼāi’a ho’i ʼe te Mesia Iesu ; ʼe e rohirohi ā tō rātou feruriraʼa, ʼe e mana a’era tō te ʼenemi i niʼa ia rātou nō tē haʼamou ia rātou ».15
’O te ’ohipa ïa i tupu nō Stephen. ʼUa vaiiho ʼoia i te fēʼaʼa ʼe te pāpū ʼore i tē faʼa’apiapi i tōna feruriraʼa. ’A ma’iri noa ai te tau, ʼaita tōna e pūai faʼahou ā nō tē faʼaruru i te mau tāmataraʼa tā te taʼata melo nō te ʼĒkālesia e fa’aruru nei. ʼUa rohirohi ā tōna feruriraʼa ’e ʼua moʼe roa tōna faʼaroʼo.
Tuahine Ruth L. Renlund :Te roa’ara’a te mau uira’a nō ni’a i te ’Ēkālesia ’e nō ni’a i tāna mau ha’api’ira’a tumu, e ’ohipa mātau te reira ’e e a’a ho’i nō te ha’api’ira’a i te ’evanelia. ʼUa māramarama Iosepha Semita i te reira ʼa tai’o ai ’oia : « Tē ’ere ra rā te hō’ē o ’outou i te ’ite, e ani ’oia i te Atua ra, ’o tei hōro’a hua mai i te maita’i i te ta’ata ato’a ra, ma te pāto’i ’ore ; ’e e horo’ahia mai tāna ».16
Tē parau fa’ahou nei rā te ʼīrava ē : « E ani rā ʼoia ma te faʼaroʼo, ʼeiaha e fēʼaʼa ».17
ʼOia hoʼi, e ani i te Atua, ma te fēʼaʼa ʼore e ti’a iāna ’ia hōroʼa mai ia ʼoutou i te hōʼē pāhonoraʼa. Tē parau faʼahou nei te ʼīrava : « ʼO tei fēʼaʼa ra, e au ïa i te ’aru miti i patuhia e te mata’i ’e fēto’ito’i a’era. ʼEiaha hoʼi te reira taʼata e mana’o ē, e faufaʼa tāna e noaʼa i te Fatu ra. E taʼata ʼāʼau piti ïa, ʼe te pāpū ʼore i tōna atoʼa ra mau haereʼa ».18
Nō tē fāriʼi i te huru pāhonoraʼa tā Iosepha Semita i tītau, nō tē fariʼi i te huru pāhonoraʼa tā tātou e hia’ai nei, tītauhia ïa ’ia haʼafātata tātou i te Atua ma te ʼāʼau tiʼaturi ʼe te feruriraʼa hinaʼaro ʼia faʼaʼitehia mai ia tātou te mau mea a te Atua.
Elder Dale G. Renlund: Mea au nā māua te hōʼē faʼahitiraʼa parau a Elder John A. Widtsoe, te hōʼē ʼĀpōsetolo mātāmua i roto i teie tau tuʼuraʼa. E huru fa’ahiti atu vau i te mea tāna i parau. E mea faufa’a ’ore ’e te ho’ona ’ore te fē’a’a maori rā ’ia tauihia te reira ’ei tītorotorora’a i te mau mātēria e nehenehe e tūru’i i ni’a iho ’e e ti’aturi ho’i. Te taʼata fēʼaʼa taimāmū ʼo tē māuruuru iāna iho, ʼo te ’ore i ineine e rave i te tūtavaraʼa tano ’e te ʼaufau i te hoʼo nō te ʼiteraʼa hanahana, e tae’ahia iāna te tiʼaturi-ʼore-raʼa ʼe te pōuri taʼotaʼo. E tupu ïa tōna mau fēʼaʼaraʼa mai te mau pūʼāvere taʼero i raro a’e i te mau ata pōuri o tōna mau piha feruriraʼa ʼe vārua. Ē i te pae hopeʼa, e mātapohia mai te « taupe » i roto i tōna ʼāpoʼo, e faʼariro a’era ʼoia i te parau tāhito o te feruriraʼa ’e te faʼatau ʼei ʼohipa ’e e riro mai ’ei ’aivāna’a hupehupe. E ʼere te fēʼaʼaraʼa i te mea hape maori rā ’ia riro mai te reira ʼei fā nō te oraraʼa. Taua fēʼaʼa ra ’o te faʼaʼamu iāna iho ʼe ’o te fa’atupu iāna iho, ’e ʼo tē faʼatupu rahi atu ā i te fēʼaʼaraʼa, ʼe mea ino ïa.19
E parau mau noa ā te mau parau a Elder Widtsoe. Eʼita te fēʼaʼa taimāmū e arataʼi atu i te ʼiteraʼa i te vairaʼa mau o te Faʼaora Iesu Mesia ’e tāna tāra’ehara ; eʼita te reira e ʼarataʼi i te ʼite-roa-raʼa ē, e Metua here i te Ao ra tō tātou ʼe te maitaʼi ho’i tei ha’amau i te fa’anahora’a rahi nō te fa’aorara’a. E ti’a ia tātou ’ia ʼite i te parau mau o teie ʼohipa nō te mau mahana hopeʼa nei, e tītau rā te reira ’ia māʼiti tātou i te faʼaroʼo, ʼeiaha rā i te fēʼaʼa, ʼe ʼia haere atu tātou i te mau vāhi e nehenehe e tūru’i i ni’a iho ’e e ti’aturi ho’i, nō tā tātou mau pāhonoraʼa.
Tuahine Ruth L. Renlund :’Ua paraparau ato’a Alama nō ni’a i teie parau tumu. ʼUa nā ’ō ’oia ē : « ʼE tenāna, te taʼata e faʼaʼetaʼeta i tōna ra ʼāʼau, ʼo te taʼata iho ā ïa e roaʼa iāna ra te tufaʼa iti o te parau ; ʼo te taʼata rā e ʼore e faʼaʼetaʼeta i tōna ra ʼāʼau, e roaʼa iāna ra te tufaʼa rahi o te parau, ē tae noa i te roaʼaraʼa iāna te ʼite i te mau parau ʼaro a te Atua, ’e ’ia hope te reira i te ʼiteahia e rātou. ʼE ʼo rātou hoʼi te faʼaʼetaʼeta i tō rātou ra ʼāʼau, e hōroʼahia ia rātou te tufaʼa iti o te parau ē tae noa atu i ʼere roa ai rātou i te ʼite i tāna ra mau parau ʼaro ; ʼei reira rātou e rave-tītī-hia ai e te diabolo, e arataʼihia ai hoʼi i tōna ra hinaʼaro i raro i te pohe ».20
E tītau ānei ’outou i te mana’o i te pae moni i te hō’ē ta’ata tei topatari ’e tei roto i te tārahu ?
Elder Dale G. Renlund :E tītau ānei ’outou i te mana’o i te pae o te ea i te hō’ē ta’ata e fa’atīani mai ia ’outou i te maita’i o te hinu ’ōphi ?
Tuahine Ruth L. Renlund :’O vai tā ’outou e tītau i te mana’o nō tē ha’amaita’i ia ’outou i te tā’iri pōpō—hō’ē ta’ata e ha’uti noa mai terā ’aore rā ’o Roger Federer ?
Elder Dale G. Renlund :E aha ïa ’outou e ti’aturi ai i tō ’outou maita’i mure ’ore i roto i te rima o te feiā tei tā’ihitumu ma te fē’a’a i tā rātou i tanu na ma te fa’aro’o21’aore rā mai tā Ieremia i parau ’o rātou « i fa’aru’e [i te Mesia], te tumu o te pape ora nei ; ’e ’ua pao rātou i te fāri’i pape nā rātou iho, e fāri’i amaha ïa, e ’ore e mau te pape i roto ? »22’Ua haere ’ē teie mau ta’ata i te tumu o te pape ora ’e ’ua hina’aro rātou ’ia tu’u ’outou i tō ’outou ti’aturi i roto i te mea e ’ore e mau te pape i roto.
Tuahine Ruth L. Renlund :Te mau taea’e ’e te mau tuahine, e ti’a ia ’outou ’ia ’ite ē tē vai nei te hō’ē Mesia ora.23E’ita e haere i te mau ’ohipa blog ’ia mono i te tuatāpapara’a pāpa’ira’a mo’a ’e i te tai’ora’a i te mau parau a te mau peropheta ora ’e te mau ’āpōsetolo. ’A aupuru noa i tō ’outou fa’aro’o nā roto i te haerera’a i te mau vāhi ti’aturi e noa’a mai te pāhonora’a i tā ’outou mau uira’a.
Elder Dale G. Renlund :’Ia tāmata tātou i te hi’o ē, e parau mau ānei ’aore rā ’aita, ’ua hōro’a mai te peropheta Moromona i te hō’ē arata’ira’a e pe’e :
« Nō reira, te mau mea maitata’i ato’a ra, nō ’ō mai i te Atua ïa ; ’e te mea ’ino, nō te diabolo mai ïa…
« Inaha rā, ’o tā te Atua, ’o te parau mai ra ïa ’e te fa’aitoito noa mai ra ïa i te rave tu’utu’u ’ore i tei maita’i ; nō reira, ’o te mau mea ato’a te parau mai ’e te fa’aitoito mai ’ia rave i tei maita’i, ’e ’ia hina’aro i te Atua, ’e ’ia tāvini iāna, ’o tei fa’atupuhia ïa e te Atua ra.
« … ’ua roa’a ia ’outou te mana e ’ite ai ’outou i te maita’i ’e te ’ino ; E mea pāpū roa te rāve’a e ’itea-maita’i-hia ai te maita’i ’e te ’ino ; e au ïa i te ’ite mau e ’itea ai te māramarama mahana ’e te pō pōuri ra.
« Inaha ho’i, ’ua hōro’a-noa-hia mai te Vārua o te Mesia i te mau ta’ata ato’a ra ’ia ’ite rātou i te maita’i ’e te ’ino ; nō reira tē fa’a’ite atu nei au ia ’outou i te rāve’a e ta’a ’ē ai ; ’o te mau mea ato’a ho’i te tītau mai ’ia rave i te maita’i, ’e te tītau ho’i ’ia fa’aro’o i te Mesia, ’ua ha’aponohia mai ïa i te mana ’e te hāmani maita’i a te Mesia ; nō reira e ti’a ia ’outou i te ’ite pāpū roa ē, nō ’ō mai ïa i te Atua ra.
ʼO te mea rā i tītauhia ai te taʼata ʼia rave ʼoia i te mea ʼino, ʼeiaha ʼoia e faʼaroʼo i te Mesia, ʼe ʼia huna iāna, ʼe i tāpeʼahia ai ʼeiaha e tāvini i te Atua, ʼei reira e ʼite pāpū roa ai ʼoutou ē, nō te diabolo ïa ».24
Nō reira, ʼe mea ʼōhie. Mai te mea e arataʼi te hōʼē māʼitiraʼa ʼia rave i te mea maitaʼi ʼe ʼia tiʼaturi i te Mesia, nō ’ō mai ïa i te Atua ra. Mai te mea e faʼatiani te māʼitiraʼa ia ʼoutou ʼia rave i te mea ʼino ʼe ʼia huna i te Mesia, nō te diabolo ïa. ʼIa tae anaʼe ʼoutou i niʼa i te ʼēʼa nō te fafauraʼa, e nehenehe ïa ia ʼoutou ʼia ʼite ē e mea hape taua mau mea ra ʼo tē faʼahahi ʼē atu ia ʼoutou i taua ʼēʼa ra, ʼo tē ʼume ia ʼoutou ʼia ’ore e tiʼaturi i te Mesia. Taua mau mea ra ʼo tē ʼume ia ʼoutou ʼia tiʼaturi i te Atua, ʼia here iāna, ʼe ʼia haʼapaʼo i tāna mau faʼaueraʼa, nō te Atua ïa. E ’ere ’outou i te mau ’ohipa faufa’a rahi i te pae vārua ’ia mā’iti ’outou i te fē’a’a tāmau, fa’a’amuhia e te pāhonora’a a te feiā fa’aro’o tāpetepete ’e te ha’apa’o ’ore.25
Tuahine Ruth L. Renlund :E hoʼi na tātou i tā tātou parabole, te feiā tei māʼiti i tē faʼaea mai i niʼa i te poti faʼaʼohipa-rahi-hia ʼe te ʼāpoʼopoʼo ’e te pēni mātaratara, ʼo rātou ïa tei fāri’i ē, ’ua fa’aora mai teie poti ia rātou i te paremora’a ’e e ti’a ho’i i te reira ’ia ’āfa’i pāpū ia rātou i ni’a i te fenua. ’Oia ho’i, tei niʼa rātou i te ʼēʼa nō te fafauraʼa ʼe tē fa’aea nei rātou i niʼa i te ʼēʼa nō te fafauraʼa. ’E ’a tāpeʼa maite ai rātou ē tae noa atu i te hopeʼa, e tu’uhia mai te ora mure ʼore i parauhia. ’O te hōroʼa rahi roa aʼe tā te Atua e nehenehe e hōroʼa. E mea nā roto i teie ’ohipa tau maoro e ʼite ai tātou ia Iesu Mesia, e ʼite ai tātou i tōna oraraʼa mau, ʼe e ʼite ai tātou i tōna here ʼe te aroha.
Tē nā ’ō ra Te Parau Haʼapiʼiraʼa ʼe te mau Parau Fafau : « ʼUa hōroʼahia i te tahi e te Vārua Maitaʼi ʼia ʼite ē ʼo Iesu Mesia ra ʼo te Tamaiti ïa nō te Atua, ʼe ’ua faʼasātaurohia hoʼi ʼoia nō te mau hara o tō te ao nei. ʼUa hōroʼahia ia vetahi ʼē ra, ʼia [ti’aturi] i tō rātou ra mau parau, ʼia noaʼa ia rātou te ora mure ʼore mai te mea e vai noa rātou i te faʼaroʼo ».26E hi’o maita’i ē, hō’ē ā utu’a maita’i nō te ’itera’a ’e nō te ti’aturira’a—’o te ora mure ’ore nō tei ha’apa’o maita’i.
Elder Dale G. Renlund :I te ’āva’e ’Ēperēra 2009 ’ua pāturuhia vau i roto i te Huimana fa’atere rahi o te ’Ēkālesia. I te ʼāvaʼe ʼAtopa 2009 ra, ʼua anihia vau e hōro’a i te a’ora’a i te ʼāmuiraʼa rahi. ʼUa hina’aro rahi au ’ia fa’aro’o tō’u metua tāne i te ʼāmuiraʼa. E tāmuta ʼe e taʼata patu fare itoito ’oia i tōna oraraʼa tā’āto’a, ʼe i te 92 o tōna matahiti e fifi rahi tōna i te tua. ʼAita i nehenehe iāna ʼia haere mai i te Pū ʼāmuiraʼa. Nō reira, ʼua haʼapāpū te hōʼē o tōʼu mau tuahine ē e mataʼitaʼi ’oia i terā tufaʼa ʼāmuiraʼa i ni’a i te ʼāfata teata, i tōna fare i Roto Miti.
I muri aʼe i te ʼāmuiraʼa ʼua haere atu vau i tōna fare nō tē hiʼo e aha ra tōna manaʼo nō niʼa i tāʼu aʼoraʼa. E ʼere ʼoia i te taʼata paraparau roa, e mea iti tāna mau parau haʼapōpou.
ʼUa nā ’ō atu vau : « E pāpā, ʼua hiʼo ʼoe i te ʼāmuiraʼa ? »
ʼUa parau mai ʼoia, « Ja.
ʼUa nā ’ō atu vau : « E pāpā, ʼua faʼaroʼo ʼoe i tāʼu aʼoraʼa ? »
ʼUa parau mai ʼoia, « Ja.
ʼUa nā ’ō atu vau : « E, pāpā, e aha tō ʼoe manaʼo ? »
ʼUa parau mai ʼoia : « ’Aita, e mea maitaʼi. Fātata roa vau i te fa’ahiahia ».
I muri iho ïa tō’u ’itera’a ē, ʼua pe’ape’a riʼi ʼoia i terā pō, nō te mea ʼua hinaʼaro ʼoia e faʼaʼite mai iāʼu i te hōʼē moemoeā tāna i fāriʼi i te pō nā mua atu. E ʼere ʼoia i te taʼata moemoeā. ʼAita a’enei tōna e mau ferurira’a huru ’ē. ʼAita a’enei au i ʼite iāna i te paraura’a i te parau haʼavare. E taʼata teie e hue noa mai i te parau mau ma te hi’o ʼore i tā te ta’ata e mana’o mai. ʼUa nā ’ō mai ʼoia : « ʼUa moemoeā vau ē ʼua pohe au ʼe ʼua ʼite au i te Faʼaora, ia Iesu Mesia. ʼUa rave mai ʼoia iāʼu i roto i tōna rima ma te parau ē ʼua faʼaʼorehia tāʼu mau hara. ’E Dale, ʼe mea au maitaʼi ». Terā noa tāna i parau mai, ʼe ʼua faʼahepohia vau ’eiaha e tuatāpapa atu ā. ʼUa pohe ʼoia e piti ʼāvaʼe i muri mai, tei Madagascar māua Ruth i taua taime ra.
I muri aʼe i tōna tomora’a i roto i te ʼĒkālesia i Larsmo (Finelani), i te 24ra’a o tōna matahiti, ʼua ʼora noa tōʼu pāpā i tōna oraraʼa mai te au i te māramarama ʼe te ʼite tāna i fāriʼi. ʼUa rave ʼoia i te mau mea atoʼa i anihia iāna ʼia rave. ʼUa riro mai ʼoia ’ei hōʼē tei noaʼa iāna taua hōroʼa ra o te Vārua ʼia ʼite ē ʼo Iesu te Mesia ʼe ʼua faʼasātaurohia ʼoia nō te mau hara a tō te ao nei, ʼe nō tāna iho mau hara. Te fariʼiraʼa i teie nei hōroʼa e ʼere ïa mai te au i te huru o te taʼata ʼe e ʼere mai te au i te tōroʼa autahuʼaraʼa. ’O te utu’a maita’i te reira i parauhia nō te mā’itira’a i te fa’aro’o ’e i te ’ē’a nō te fafaura’a.27
Tuahine Ruth L. Renlund :Nō reira, nāhea tātou i tē fa’atupu i te fa’aro’o ’e i te tāpe’a pūai noa i te reira ? Tītauhia te tahi ’ohipa. ’Ua haere a’enei ’outou i te hō’ē ha’api’ira’a nūmera—mai te ta’ura’a (calcul)—’e ’ua hi’o ’outou i te ’orometua i te hāmanira’a i tāna « problème » ? ’Ua pe’e hua ānei tōna ’ite i ni’a ia ’outou i te hi’ora’a atu ’outou i te ’orometua i te pāhonora’a i tāna « problème » ? ’Aita roa atu ho’i. ’Ia noa’a mai terā ’ite—te ’ite o te ’orometua—tītauhia ’ia hāmani ’outou iho i te hō’ē « problème » ; tītauhia ’ia tuatāpapa ’outou ’e ’ia rave i te tahi mau « exercice » ē tae roa ’ua mātau ’outou i terā ’ohipa, te mau « équations » ’e te mau tāpa’o.
Nā reira ato’a, tītauhia te ’ohipa nō te ’ite mai i te fa’aro’o ’e nō te ha’apūai i te reira. E nehenehe tātou e fa’auruhia e te hō’ē ta’ata fa’aro’o rahi, e’ita rā tōna fa’aro’o e pe’e mai i ni’a ia tātou i reira. Tītau-roa-hia ’ia tuatāpapa tātou iho i te mau pāpa’ira’a mo’a ’e i te mau parau a te mau peropheta ora. Tītau-roa-hia ’ia pure tātou, ’ia ha’a mau nō te paraparau i te Metua i te Ao ra nā roto i te i’oa o Iesu Mesia. Te hō’ē ’ohipa faufa’a rahi, ’o te ravera’a ïa i te ’ōro’a i te hepetoma tāta’itahi ’e te ha’amana’ora’a i te aroha mau o te Atua ia tātou ’ia ti’a i tāna Tamaiti ’ia tara ’ē i tā tātou mau hara. E riro teie mau ’ohipa ha’amorira’a ’ōmo’e nā tātou iho, i tē patu ’e i te tāpe’a i te fa’aro’o.
Elder Dale G. Renlund :Tāʼu hōpoiʼa mātāmua ʼei melo nō te pupu nō te Tino ’Ahuru Ma Piti ʼo te haereraʼa ïa e fa’aara i te tuha’a fa’atere nō te ʼĀʼamu o te ʼĒkālesia ē, nā’u e mono atu ia Elder Jeffrey R. Holland ʼei tauturu haʼapaʼo ia rātou. Mai tā ʼoutou e nehenehe e feruri ʼua tupu te « ʼoto, ʼe te taʼi, ʼe te ʼauʼauraʼa niho »28 i te ’itera’a rātou nā’u e mono i tō rātou tauturu ha’apa’o iti. ʼUa pau roa te Kleenex terā vaira’a.
ʼEi tufaʼa nō tāʼu ʼohipa ʼei tauturu haʼapaʼo i te tuha’a fa’atere nō te ʼĀʼamu o te ʼĒkālesia, ʼua taiʼo vau i te tā’āto’ara’a o te mau Buka nō Te mau parau a Iosepha Semita.’Ua ta’io ato’a vau i te buka mātāmua ’e te tuha’a mātāmua o te piti o te buka o te fa’ati’ara’a ’āpī nō te ’ā’amu o te ’Ēkālesia, te Feiā mo’a. 29I tō’u tai’ora’a i te mau mea ato’a tā te peropheta Iosepha Semita i pāpa’i ’aore rā i fa’ahiti, ’ua ha’apūai te reira i tō’u ’itera’a pāpū nō tōna pi’ira’a ’ei peropheta mā’iti a te Atua nō tē fa’aho’i fa’ahou mai i tāna ’ohipa i ni’a i te fenua nei.
’Ua vai pāpū noa Iosepha Semita i ni’a i tōna ’itera’a pāpū. ’Ua tu’ati tāmau noa i te reira. ’Ua rave noa ’oia mai te hō’ē ta’ata tei ’ite mau i tō tātou Metua i te Ao ra ’e ia Iesu Mesia ; ia Moroni, ia Ioane Bāpetizo ; ia Petero, Iakobo ’e Ioane ; ia Mose ; ia Elia ’e ia Eliaha. ʼUa rave pāpū ʼoia i te ʼohipa mai te ta’ata tei mau i te mau ʼapi ’auro ʼe tei ʼīriti i te reira mau pāpaʼiraʼa tahito nā roto i te hōroʼa ʼe te mana o te Atua. ʼUa rave pāpū ʼoia i te ʼohipa mai te ta’ata tei fāriʼi i te heheuraʼa nō ’ō mai ia Iesu Mesia iho. ʼUa rave pāpū ʼoia i te ʼohipa mai te ta’ata tei fāriʼi i te mana o te autahuʼaraʼa ʼe te mau tāviri nō te ʼāposetoloraʼa moʼa.
ʼUa ʼite au nā roto i te mau rāveʼa hau atu i te pūai ʼe te pāpū i tā tōʼu nā rāveʼa e pae ʼe nehenehe ʼe ʼite ʼe e parau ʼe ʼua ʼite Iosepha Semita i te mea tāna i parau ʼua ʼite ʼoia, ʼua ʼīriti i te Buka ʼa Moromona nā roto i te hōroʼaraʼa ʼe te mana ʼo te Atua, ʼe ʼua fāriʼi i te autahuʼaraʼa ʼe te mau tāviri nō niʼa i te faʼaoraraʼa i te taʼata nei. ʼUa ʼite au e parau mau te reira. ʼUa ʼite au ʼe tei niʼa i te fenua nei i teie mahana taua mau tāviri ra ʼe ’o te Peresideni Nelson ʼo te mono tiʼa ïa nō Iosepha Semita i niʼa i te fenua nei.
Te mea tā tatou e faʼariro nei ʼei mau ʼāpoʼopoʼo ’e te pēni mātaratara i niʼa i te poti faʼaʼohipa-rahi-hia, ʼua faʼatiʼahia ïa ʼe te raʼi ʼe ʼua arataʼihia mai roto mai i te hōʼē hiʼoraʼa mure ʼore. ʼUa faʼatupu te Fatu i te mau ʼāpoʼopoʼo ʼe te pēni mātaratara ʼaore rā ʼua faʼaʼohipa ʼoia i te reira nō tāna mau ʼōpuaraʼa. ʼUa ʼite vau nōʼu iho ē, tē faʼatere nei te Fatu, ʼo Iesu Mesia, i Tāna ʼohipa i niʼa i te fenua nei i teie mahana. ʼUa ʼite maita’i tāna mau tāvini iāna i teie mahana.
Tuahine Ruth L. Renlund :’Ua māuruuru vau i te ’āmuira’a i tō’u ’itera’a pāpū ē, ’ua ’ite au ē, ’o Iesu Mesia tō tātou Fa’aora. ’Ia fa’a’ohipa tātou i te fa’aro’o, ’eiaha rā te fē’a’a, i tōna tusia tāra’ehara ’e te mau hotu o tāna tāra’ehara, e ha’amaita’ihia tō tātou orara’a ē a muri noa atu. ’Ua māuruuru vau i te fa’aho’ira’a mai ’oia i tāna ’Ēkālesia i teie mahana ma te mau ha’amaita’ira’a hope roa e noa’a i te mau tamari’i a te Atua i ni’a i te fenua nei.
Elder Dale G. Renlund :Tē ora nei Iesu Mesia ’e ’o ’oia te Fa’aora o te ao nei. Tē faʼaʼite pāpū nei au nō tōna aumihi, tōna here ’e tōna māna’ona’ora’a rahi i te mau tamari’i ato’a a te Atua. Te faʼaʼite pāpū nei au nō tōna tusia tāraʼehara fāito ʼore nō ʼoutou ʼe nōʼu nei. I tōʼu mātaura’a i te Faʼaora, ʼua ’apo mai au i tōna hinaʼaro rahi ʼia tauturu i te fa’aorara’a i te mau pēpē, ʼe ’ia rāpaʼau i te mau ʼāʼau ʼoto.
Tē pure nei au ’ia noa’a ia ’outou te mau ha’amaita’ira’a tao’a rahi roa a’e a te Atua. Tē pure nei au ’ia fa’atupu ’outou i te fa’aro’o ia Iesu Mesia, « ’eiaha [’outou] e fē’a’apiti, e fa’aro’o rā ».30Tē ani nei au ia ’outou ’ia fa’arahi i tō ’outou fa’aro’o i te Mesia nā roto i te tuatāpapara’a i te mau pāpa’ira’a mo’a ’e te mau parau a te mau peropheta ora, te purera’a ’e te paraparaura’a i te Metua i te Ao ra ’e te fa’aineine-māite-ra’a ’e te rave-ti’amā-ra’a i te ’ōro’a i te hepetoma tāta’itahi. E ha’amaita’i mai te Atua ia ’outou ’a fa’aitoito ai ’outou i roto i teie mau ’ohipa ha’amorira’a ’ōmo’e nō ’outou iho ’e ’a tāvini ’e ’a aupuru ai ’outou ia vetahi ’ē. I te i’oa o Iesu Mesia, ’āmene.
© 2019 nā Intellectual Reserve, Inc. Fatura’a pāruruhia. Parau pāpa’i : 10/18. ’Īritira’a nō « ‘Doubt Not, but Be Believing’ ». Tahitian PD60007608 895