Mga Pagpili alang sa Kahangtoran
Tibuok Kalibotan nga Debosyonal alang sa mga Young Adult uban ni Presidente Nelson
Dominggo, Mayo 15, 2022
Akong minahal nga kaigsoonan, si Sister Nelson ug ako nagpaabot niini nga gabii sulod sa pipila ka bulan na karon. Ang akong asawa, nga si Wendy, usa ka babaye nga adunay dakong hugot nga pagtuo ug kaalam. Ako morekomendar sa iyang mga pagtulun-an ngadto kaninyo.
Pagkanindot nga makigkita kaninyo sa anibersaryo sa Pagpahiuli sa Aaronic nga Pagkapari. Sa inyong nahibaloan, niadtong Mayo 15, 1829, si Propeta Joseph Smith ug si Oliver Cowdery miluhod diha sa usa ka hilit nga dapit diha sa kakahoyan duol sa panimalay ni Joseph ug Emma didto sa Harmony, Pennsylvania. Si Sister Nelson ug ako nakaadto nianang kakahoyan sa sugar maples.
Kini nga kakahoyan nahimong sagrado sa dihang si Juan Bautista mitugyan sa Aaronic nga Pagkapari ngadto kang Joseph Smith ug Oliver Cowdery.
Sa wala madugay, gipahiuli nila ni Pedro, Santiago, ug Juan ang Melchizedek nga Pagkapari sa maong kinatibuk-an nga dapit.
Niadtong Septyembre 2015, gipahinungod nako kana nga Dapit sa Pagpahiuli sa Pagkapari. Sa tanang kanhiay nga mga buluhaton nga akong nadawat kaniadto, kadto ang labing mahinungdanon alang kanako. Kana nga dapit naghinumdom sa pagpahiuli sa awtoridad ug mga yawe sa pagkapari ngadto sa tawo dinhi sa yuta. Kadto ug ubang mga yawe gikinahanglan aron sa pagpangulo sa gipahiuli nga Simbahan ni Jesukristo ug sa paghimong posible alang kanato sa pagpahigayon ug pagdawat sa gikinahanglan nga mga ordinansa, lakip sa pagsilyo sa mga pamilya nga mag-uban alang sa kahangtoran. Kana nga adlaw sa pagpahinungod mao ang talagsaon nga higayon sa akong kinabuhi!
Karon, kini usa ka talagsaon nga panahon sa inyong kinabuhi. Wala nay lain nga ingon og susama niini. Kamo nag-establisar og mga prayoridad ug mga sundanan nga makaapekto gayod dili lang sa inyong mortal nga kinabuhi apan sa inyong kinabuhing dayon usab.
Maghisgot kita mahitungod sa kinabuhi. Kana usa ka butang nga ako adunay gamay nga kasinatian. Nagdako ko atol sa usa ka Dakong Pagkahagsa sa Ekonomiya. Tin-edyer pa ko atol sa Ikaduhang Gubat sa Kalibotan. Ako nakabaton na og pipila ka kasinatian nga nag-ungaw sa kamatayon. Nakaadto ko sa unom ka kontinente sa makadaghang higayon ug wala pa makahimamat og katawhan o kultura nga wala makapadasig kanako.
Nakasinati usab ako og kasubo. Akong nakita ang duha ka bililhon nga mga anak nga babaye nga sa hinay-hinay, sa masakit, ug sa makalilisang nga paagi nga namatay tungod sa kanser. Ug nasinati nako ang pagkamatay sa talagsaong asawa, si Dantzel, ang inahan sa among 10 ka anak. Nahibalo nga dili maayo nga mag-inusara ang lalaki,1 mipili ako nga magminyo og usab. Giminyoan nako ang laing talagsaon nga babaye, si minahal nga Wendy.
Nakita nako ang mga higala ug mga sakop sa pamilya nga mihimo og bayanihon nga mga pagpili ug mipuyo og sulundon nga mga kinabuhi. Ug akong nakita ang uban nga mihimo og makaalaot nga mga desisyon nga midiskaril sa ilang potensiyal.
Sa laktod pa, nabuhi na ako sa taas nga panahon, ug niining puntoha, mihunong nako og palit og dili hinog nga mga saging! Ug mihunong usab ako sa paggahin og panahon sa mga butang nga dili mahinungdanon. Apan mahinungdanon gayod kamo kanako! Ug ang inyong kaugmaon mahinungdanon kaayo kanako! Dako kaayo ang akong dungog nga daghan kaayo kaninyo ang mianhi karong gabhiona. Ug nagpasalamat ako sa mga musikero nga misugod kanato sa nindot kaayo nga tono.
Karong gabhiona, gusto kong maghisgot kaninyo mahitungod sa inyong kaugmaon. Si Sister Nelson ug ako bag-ohay lang mitambong sa inagurasyon sa usa ka presidente sa unibersidad. Atol nianang maayo kaayo nga kalihokan, naghunahuna ko mahitungod sa dili maihap nga mga magtutudlo sa tibuok kalibotan kinsa mapahinungoron sa pagtudlo sa mga lalaki ug mga babaye nga sama ninyo og edad. Importante kaayo ang edukasyon. Gikonsiderar nako kini nga usa ka relihiyoso nga responsibilidad. Ang himaya sa Dios mao ang salabotan.2
Hinuon, adunay dako nga kalainan tali sa mga responsibilidad sa kalibotanon nga mga magtutudlo ug sa akong responsibilidad isip ang senior nga Apostol dinhi sa kalibotan. Ang ilang trabaho mao ang pag-edukar ug pag-andam kaninyo alang sa inyong mortal nga kasinatian—buot pasabot, unsaon sa paglampos sa inyong buhat sa kinabuhi. Ang akong responsibilidad mao ang pag-edukar ug pag-andam kaninyo usab alang sa inyong imortal nga kasinatian—buot pasabot, unsaon sa pag-angkon og kinabuhing dayon.
Ang mga pagtulun-an sa labing nindot nga mga institusyon sa mas taas nga pagkat-on adunay mga limitasyon, tungod kay sa kinatibuk-an ang secular nga edukasyon sa kasagaran nagbaliwala sa tulo ka dagkong mga kamatuoran nga wala kaayo gihisgotan:
-
Una, ang matag usa kanato mamatay.3
-
Ikaduha, tungod ni Jesukristo, ang matag usa kanato mabanhaw ug mahimong imortal.4
-
Ug ikatulo, ang Adlaw sa Paghukom umaabot alang sa matag usa kanato.5
Kining tulo ka hingpit nga mga kamatuoran kinahanglan moporma sa pundasyon sa inyong espirituhanon nga edukasyon.
Tungod sa Pagpahiuli sa ebanghelyo ni Jesukristo sa kahingpitan niini, daghan kita og nahibaloan mahitungod sa atong mga posibilidad human sa mortal nga kinabuhi. Nahibalo kita nga sa balay sa atong Amahan adunay daghang mga lawak.6 Nahibalo kita nga ang Dios nahigugma gayod sa Iyang mga anak nga, sama sa gitudlo ni Presidente Dallin H. Oaks, “ang tanang anak sa Dios”—nga adunay gamay lang kaayo nga mga eksepsiyon—“mahidangat ngadto sa usa ka gingharian sa himaya.”7 Hunahunaa lang gayod kini! Ang atong Amahan milalang og mga gingharian sa himaya—telestial, terrestrial, ug celestial—aron sa paghatag og mahimayaon nga dapit alang sa Iyang mga anak.
Ang akong katuyoan karong gabhiona mao ang pagseguro nga ang inyong mga mata bukas gayod sa kamatuoran nga kini nga kinabuhi mao gayod ang panahon nga makahimo kamo og desisyon kon unsa nga matang sa kinabuhi ang inyong gusto nga puy-an sa kahangtoran. Karon mao ang inyong panahon “sa pagpangandam sa pagsugat sa Dios.”8
Ang mortal nga kinabuhi daklit nga higayon ra gayod kon ikomparar sa kahangtoran. Apan, akong hinigugmang kaigsoonan, pagkaimportante gayod nga daklit nga higayon niini! Atol niini nga kinabuhi makapili kita kon unsa nga mga balaod ang andam natong tumanon—kadtong sa celestial nga gingharian, o sa terrestrial, o sa telestial9—ug, busa, hain nga gingharian sa himaya kita magpuyo sa kahangtoran.
Ang matag matarong nga pagpili nga inyong himoon dinhi maghatag gayod og dakong kaayohan karon. Apan ang matarong nga mga pagpili sa mortalidad mohatag og mas dakong kaayohan gayod sa kahangtoran. Kon kamo mopili nga mohimo og mga pakigsaad sa Dios ug magmatinud-anon niadto nga mga pakigsaad, kamo adunay saad sa “himaya nga idugang diha sa [inyong ulo] hangtod sa kahangtoran.”10
Kini nga mga kamatuoran kinahanglang moaghat sa inyong kinadak-an nga kahadlok nga mapakyas. Kamo adunay potensiyal nga makaabot sa celestial nga gingharian. Ang kinadak-an nga kahadlok nga mapakyas mao ang dili makaabot sa celestial nga gingharian, mopuyo lamang sa usa ka mas ubos nga gingharian tungod kay dinhi sa yuta mipili lang ka nga mosunod sa mga balaod sa mas ubos nga gingharian.
Ang kaaway, siyempre, dili gusto gani nga kamo maghunahuna sa ugma, unsa pa kaha ang kinabuhing dayon. Apan palihog ayaw pagkawalay kahibalo o inosente mahitungod sa mga oportunidad ug mga hagit sa mortalidad. Niana nga diwa, kinahanglan kamo makasabot sa tulo ka sukaranan nga mga kamatuoran nga motabang kaninyo sa pagpangandam sa inyong umaabot nga padulngan:
-
Una, hibaloa ang kamatuoran mahitungod kon kinsa kamo.
-
Ikaduha, hibaloa ang kamatuoran mahitungod sa unsay gitanyag kaninyo sa Langitnong Amahan ug sa Iyang Anak.
-
Ug ikatulo, hibaloa ang kamatuoran nga may kalabotan sa inyong pagkakabig.
Mamulong ako sa matag usa niining tulo ka punto.
Una: Hibaloa ang kamatuoran mahitungod kon kinsa kamo. Nagtuo ako nga kon ang Ginoo direktang namulong kaninyo karong gabhiona, ang unang butang nga Iyang segurohon nga inyong masabtan mao ang inyong tinuod nga pagkatawo.11 Hinigugma kong mga higala, kamo literal nga espiritu nga mga anak sa Dios. Gikanta ninyo kini nga kamatuoran sukad inyong nakat-onan ang mga pulong sa “Ako Anak sa Dios.”12 Apan kana ba nga mahangtoron nga kamatuoran napatik sa inyong kasingkasing? Kini ba nga kamatuoran nakaluwas kaninyo sa dihang nag-atubang og tintasyon?13
Ako nahadlok nga tingali kanunay ninyong nadungog kini nga kamatuoran nga kini daw mas sama sa usa ka bansilag [slogan] kay sa balaanon nga kamatuoran. Ug gani, ang paagi nga kamo maghunahuna mahitungod kon kinsa gayod kamo makaapekto sa hapit matag desisyon nga inyong himoon.
Niadtong 2006, sa dihang giminyoan nako si Wendy, nakasinati ako og pipila ka sorpresa isip resulta—kadaghanan niini maanindot gayod. Usa niadto nga mga sorpresa mao ang gidaghanon sa mga sinina nga iyang gipanag-iya nga nagpakita og logo—mga unibersidad diin siya migradwar, mga dapit diin siya mibiyahe, ug uban pa. Sa dihang sul-obon niya ang usa niadto nga mga aytem, sungogon nako siya pinaagi sa pagsulti, “Kinsa man ang imong gi-advertise karon?” Gidapit niya ako sa pag-apil sa kalingawan!
Ang mga timaan mahimong makalingaw ug magpakita sa inyong suporta alang sa bisan unsang gidaghanon nga positibo nga mga butang. Daghang timaan ang mausab alang kaninyo sa paglabay sa panahon. Ug dili tanang timaan ang managsama og bili. Apan kon ang bisan unsang timaan ang mohulip sa inyong labing importante nga mga timailhan, ang mga resulta mahimong espirituhanon nga makapeligro.
Sama pananglit, kon akong ihan-ay ang importansiya sa mga titulo nga mahimong magamit kanako, ako moingon: Una, ako usa ka anak sa Dios—usa ka anak nga lalaki sa Dios—dayon usa ka anak sa pakigsaad, dayon usa ka disipulo ni Jesukristo ug usa ka mapahinungoron nga miyembro sa Iyang gipahiuli nga Simbahan.
Sunod moabot ang akong madungganon nga mga titulo isip usa ka bana ug amahan, dayon Apostol ni Ginoong Jesukristo.
Ang tanang uban nga mga timaan nga naggamit kanako—sama sa medikal nga doktor, tig-opera, maniniksik, propesor, tenyente, kapitan, PhD, Amerikano, ug uban pa—mabutang dapit sa ubos sa lista.
Karon, ipadangat nato ang pangutana ngadto kaninyo. Kinsa man kamo?
Una ug labing importante, kamo anak sa Dios.
Ikaduha, isip miyembro sa Simbahan, kamo anak sa pakigsaad. Ug ikatulo, kamo disipulo ni Jesukristo.
Karong gabhiona, mangamuyo ako kaninyo nga dili hulipan kining importante kaayo ug dili mausab nga mga timailhan og laing uban pa, tungod kay ang pagbuhat sa ingon makapugong sa inyong pag-uswag o dili makiangayong mobutang kaninyo sa usa ka naandan [stereotype] nga mahimong mopakgang sa inyong mahangtorong pag-uswag.
Sama pananglit, kon kamo kasagarang giila isip usa ka Amerikano, kadtong dili mga Amerikano mahimong maghunahuna, “Nahibalo ko sa tanang nahibaloan mahitungod kanimo” ug molakip og sayop nga mga tinuohan ngadto kaninyo.
Kon kamo moila sa inyong kaugalingon pinaagi sa inyong politikal nga koneksiyon, kamo diha dayon makategoriya nga adunay piho nga mga tinuohan—bisan og wala koy bisan kinsang nailhan nga nagtuo sa tanan nga kasamtangang gihangop sa ilang ganahan nga grupo sa politika.
Mahimo kitang magsige og padayon, maghisgot sa mga dili maayo bahin sa nagkadaiyang timaan nga atong gibutang sa atong kaugalingon o nga gibutang sa ubang tawo kanato.
Ang uban tingali motimaan kanako isip usa ka “tigulang nga lalaki.” Apan mas bata pa gayod ko kaysa kang Adan—ug kang Noe usab.14 Ang pagpihig base sa edad, kaliwat, nasod, sekso, ug daghan pang ubang mga pagpihig makalimita sa kinatibuk-an.
Pagkasubo kon ang usa ka tawo motuo sa timaan nga gihatag kanila sa laing tawo. Hunahunaa ang kaguol sa usa ka bata kinsa gisultihan, “Bugo ka.” Gamhanan ang mga timailhan ug mga timaan!
Ang kaaway nagmaya sa mga timaan tungod kay kini nagbahin kanato ug nagpugong sa paagi nga kita maghunahuna mahitungod sa atong kaugalingon ug sa usag usa. Pagkaguol kon kita mopasidungog sa mga timaan kay sa kita mopasidungog sa usag usa.
Ang mga timaan mahimong mosangpot ngadto sa pagpanghukom ug kaligutgot. Ang bisan unsang pag-abuso o pagpihig ngadto sa laing tawo tungod sa nasyonalidad, kaliwat, sekswal nga kahilig, gender, naabot sa edukasyon, kultura, o ubang mahinungdanon nga mga timailhan makapasilo sa atong Tiglalang! Ang kana nga pagmaltrato makaingon nga kita magpuyo ubos sa atong gidak-on isip Iyang pakigsaad nga mga anak nga lalaki ug mga anak nga babaye!
Adunay nagkadaiyang timaan nga mahimong importante kaayo kaninyo, siyempre. Palihog ayaw ko saypa sa pagsabot. Wala ako nagsulti nga ang ubang mga titulo ug mga timailhan dili mahinungdanon. Ako nag-ingon lamang nga kinahanglan walay timailhan ang motangtang, mohulip, o mag-una sa prayoridad niining tulo ka malahutayon nga mga titulo: “anak sa Dios,” “anak sa pakigsaad,” ug “disipulo ni Jesukristo.”
Ang bisan unsang timailhan nga dili mobagay niining tulo ka sukaranan nga mga titulo makapasagmuyo kaninyo sa kataposan. Ang ubang mga timaan makapasagmuyo kaninyo sa paglabay sa panahon tungod kay kini walay gahom sa paggiya kaninyo paingon sa kinabuhing dayon diha sa celestial nga gingharian sa Dios.
Ang kalibotanon nga mga timailhan dili gayod mohatag kaninyo og panglantaw kon kinsa kamo mamahimo sa kataposan. Kini dili gayod momatuod sa inyong balaanon nga DNA o sa inyong walay limitasyon, balaanon nga potensiyal.
Tungod kay adunay halangdon nga plano sa kaluwasan nga gisulat sa Langitnong Amahan, dili ba kani rason nga kamo usab adunay balaanon nga padulngan?15
Ayaw og kasayop niini: Balaanon ang inyong potensiyal. Uban sa inyong makugihon nga pagtinguha, ang Dios mohatag kaninyo og mga pasiplat kon kinsa kamo mamahimo.
Mao nga kinsa man kamo? Una ug labing importante, kamo anak sa Dios, anak sa pakigsaad, ug disipulo ni Jesukristo. Samtang inyong hangopon kini nga mga kamatuoran, ang atong Langitnong Amahan motabang kaninyo nga makab-ot ang inyong kinatas-an nga tumong sa pagpuyo sa kahangtoran diha sa Iyang balaanon nga presensiya.
Ikaduha: Hibaloa ang kamatuoran mahitungod sa unsay gitanyag kaninyo sa Dios nga Amahan ug sa Iyang Anak, si Jesukristo.
Sa laktod pa, Sila mitanyag kaninyo sa tanan!
Ang plano sa Langitnong Amahan alang sa Iyang mga anak magtugot kanato nga magpuyo kon asa ug sa unsang paagi Siya nagpuyo ug sa kataposan anam-anam nga mamahimong mas sama Kaniya. Ang Iyang Plano literal nga mohimo sa labing buhong nga mga panalangin sa tanang kahangtoran nga maanaa alang kanato, lakip sa potensiyal alang kanato nga mamahimong “isigkamanununod uban kang Kristo.”16
Ang Dios nasayod sa tanan ug nakakita sa tanan. Sa tanang kahangtoran, wala nay laing mas nakaila kaninyo o nagpakabana mahitungod kaninyo kaysa Kaniya. Wala nay laing mas duol kaninyo kaysa Kaniya. Kamo makapahayag gayod sa inyong mga gibati ngadto Kaniya ug makasalig Kaniya nga mopadala sa Espiritu Santo ug sa mga anghel sa pag-atiman kaninyo. Iyang gipakita ang Iyang kinadak-an nga gugma sa dihang Iyang gipadala ang Iyang Bugtong Anak aron mamatay alang kaninyo—aron mahimong inyong Manluluwas ug inyong Manunubos!
Pinaagi sa Iyang Pag-ula, si Ginoong Jesukristo nakabuntog sa kalibotan.17 Busa, Siya “gamhanan sa … paglimpyo [kaninyo] gikan sa tanan nga dili matarong.”18 Siya moluwas kaninyo gikan sa inyong kinalisoran nga mga kahimtang sa Iyang kaugalingon nga paagi ug panahon.19 Samtang kamo moduol ngadto Kaniya sa hugot nga pagtuo, Siya mogiya, mopreserbar, ug mopanalipod kaninyo. Siya moayo sa inyong masulub-on nga kasingkasing ug mohupay kaninyo sa inyong kaugtas.20 Siya mohatag kaninyo og pagtugot nga makagamit sa Iyang gahom. Ug Siya mohimo sa imposible sa inyong kinabuhi nga mahimong posible.
Si Jesukristo mao lamang ang malahutayon nga tinubdan sa paglaom, kalinaw, ug hingpit nga kalipay alang kaninyo. Dili gayod masunod ni Satanas ang bisan unsa niini. Ug si Satanas dili gayod motabang kaninyo.
Sa laing bahin, ang buhat sa Dios ug ang Iyang himaya mao ang pagpahinabo sa “pagka-imortal ug sa kinabuhi nga dayon sa tawo.”21 Ang Dios mobuhat sa tanan nga Iyang mahimo, gawas lang sa paglapas sa inyong kabubut-on, aron motabang kaninyo nga dili mapakyas sa kinadak-an nga mga panalangin sa tanang kahangtoran.
Ang Dios adunay espesyal nga gugma alang sa matag tawo nga mohimo og pakigsaad Kaniya diha sa mga tubig sa bunyag.22 Ug kana nga balaanon nga gugma mapalawman samtang ang dugang pa nga mga pakigsaad gihimo ug matinud-anong gituman. Dayon sa kataposan sa mortal nga kinabuhi, bililhon ang paghiusa sa matag anak sa pakigsaad sa atong Langitnong Amahan.23
Siya nagpakabana gayod og maayo nga ang tanan sa Iyang mga anak adunay kahigayonan nga makadungog sa malipayon nga mga balita sa gipahiuli nga ebanghelyo. Ang Langitnong Amahan nagpadala sa Iyang mga anak ngadto sa yuta sa sobra unom ka libo ka tuig. Kadaghanan niini nga mga tawo wala pa makadawat sa mga ordinansa nga mopasarang nila sa kinabuhing dayon. Mao kana ngano nga ang mga templo mahinungdanon kaayo. Mao kana ngano nga ang pagpundok sa Israel sa duha ka habig sa tabil mao ang labing importante nga kawsa sa yuta karon. Kamo, akong minahal nga mga kauban niini nga balaan nga buhat, adunay mahinungdanon nga tahas niini nga pagpundok, ug ako nagpasalamat kaninyo alang niini.
Kini karon modala kanako sa akong ikatulong punto.
Hibaloa ang kamatuoran nga may kalabotan sa inyong pagkakabig. Ang kamatuoran mao nga kinahanglan inyong angkonon ang inyong kaugalingon nga pagkakabig. Walay laing makahimo niini alang kaninyo.
Karon, mahimo bang dapiton ko kamo sa pagkonsiderar og pipila ka pangutana? Gusto ba kamong mobati og kalinaw mahitungod sa mga kabalaka nga kasamtangang naghasol kaninyo? Gusto ba kamong mas makaila ni Jesukristo? Gusto ba kamong makat-on kon sa unsang paagi ang Iyang balaanon nga gahom makaayo sa inyong mga samad ug mga kahuyang? Gusto ba kamong makasinati sa tam-is, makahupay nga gahom sa Pag-ula ni Jesukristo nga naglihok sa inyong kinabuhi?
Ang pagtinguha sa pagtubag niini nga mga pangutana magkinahanglan og paningkamot—dakong paningkamot. Ako mangamuyo kaninyo sa pag-ako sa responsibilidad sa inyong pagpamatuod. Trabahoa kini. Angkona kini. Atimana kini. Amumaha kini aron motubo kini. Palamboa kini gamit ang kamatuoran. Ayaw kini hugawi sa sayop nga mga pilosopiya sa dili matuohon nga mga lalaki ug mga babaye ug dayon matingala nganong nagkahuyang ang inyong pagpamatuod.
Buhata ang inadlaw, sinsero, mapainubsanon nga pag-ampo. Amumaha ang inyong kaugalingon gamit ang mga pulong sa karaan ug sa modernong panahon nga mga propeta. Hangyoa ang Ginoo sa pagtudlo kaninyo kon unsaon nga mas maayong makapaminaw Kaniya. Paggahin og dugang nga panahon diha sa templo ug sa buhat sa family history.
Samtang inyong himoon ang inyong pagpamatuod nga inyong kinatas-an nga prayoridad, bantayi ang mga milagro nga mahitabo sa inyong kinabuhi.
Kon kamo adunay mga pangutana—ug ako naglaom nga kamo aduna—pangita og mga tubag nga inubanan og mainiton nga tinguha nga motuo. Pagkat-on sa tanan nga inyong mahimo mahitungod sa ebanghelyo ug seguroha nga modangop ngadto sa mga tinubdan nga puno sa kamatuoran alang sa giya. Nagpuyo kita sa kapaigoan nga “walay [ma]tago.”24 Mao nga, sa paglabay sa panahon, ang Ginoo motubag sa atong tanang pangutana.
Sa pagkakaron, ihumol ang inyong kaugalingon diha sa buhong nga kapanguhaan sa pagpadayag nga dali ra kaayo natong ma-access. Ako mosaad nga ang pagbuhat sa ingon mopalig-on sa inyong pagpamatuod, bisan kon pipila sa inyong mga pangutana wala pa matubag. Ang inyong sinsero nga mga pangutana, nga gipangutana sa hugot nga pagtuo, mosangpot kanunay sa mas dako nga hugot nga pagtuo ug dugang nga kahibalo.
Kon ang mga higala ug pamilya mopalayo gikan sa Simbahan, padayon sa paghigugma kanila. Wala kaninyo ang paghukom sa pagpili sa laing tawo sama ra nga kamo dili usab angayan nga sawayon sa pagpabiling matinud-anon.
Karon, palihog paminawa ko kon ako mosulti: Ayaw itugot nga kamo mahisalaag pinaagi niadtong kansang mga pagduhaduha nga gipakaingon sa mga butang nga dili ninyo makita sa ilang mga kinabuhi. Labaw sa tanan, ipakita sa inyong maduhaduhaon nga mga higala kon unsa kadako ang inyong paghigugma sa Ginoo ug sa Iyang ebanghelyo. Isorpresa ang ilang maduhaduhaon nga mga kasingkasing gamit ang inyong matuohon nga kasingkasing!
Samtang akohon ninyo ang responsibilidad sa inyong pagpamatuod ug mopahinabo niini nga motubo, mahimo kamong mas epektibo nga instrumento diha sa mga kamot sa Ginoo. Kamo “[m]adasig pinaagi sa usa ka maayo nga katuyoan”25—ang kawsa ni Jesukristo!
Walay laing nahitabo niini nga yuta nga mas importante kaysa pagpundok sa Israel alang Kaniya. Pahibaloa ang inyong Langitnong Amahan nga gusto kamong motabang. Hangyoa Siya nga ibutang kamo sa pagbuhat niining mahimayaon nga kawsa. Ug dayon barog ug katingala sa unsay mahitabo kon tugotan ninyo ang Dios nga mopatigbabaw labaw sa tanan sa inyong kinabuhi.
Akong minahal nga mga higala, gimahal ko kamo. Ako magpasalamat kaninyo. Ako nagtuo kaninyo. Isip ang propeta sa Ginoo, gipanalanginan ko kamo nga masayod sa kamatuoran mahitungod kon kinsa kamo ug sa paghatag og bili mahitungod kon unsa gayod ang inyong mahimayaon nga potensiyal. Panalanginan ko kamo nga akohon ang responsibilidad sa inyong kaugalingon nga pagpamatuod. Ug panalanginan ko kamo nga makabaton sa tinguha ug kalig-on sa pagtuman sa inyong mga pakigsaad.
Kon inyong buhaton, ako mosaad nga kamo makasinati sa espirituhanon nga paglambo, kagawasan gikan sa kahadlok, ug usa ka pagsalig nga dili kaayo ninyo mahunahuna karon. Kamo makabaton sa kalig-on nga magkaanaa og positibo nga impluwensiya nga labaw gayod sa inyong natural nga kapasidad. Ug ako mosaad nga ang inyong kaugmaon mahimong mas makadasig kaysa bisan unsang butang nga inyong kasamtangan nga gituohan.
Ako sa ingon mopanalangin kaninyo ug mopahayag pag-usab sa akong pagpasalamat ug gugma alang kaninyo sa sagradong ngalan ni Jesukristo, amen.