Mesej blong Divosen blong Ol Yang Adalt
Divosen blong Ol Yang Adalt Raon long Wol
Sandei 3 Novemba, 2024
I naes tumas blong kambak long BYU–Idaho, wan ples we yumi save gud long hem mo lavem tumas. Taem Elda Bednar i stap givim seves olsem wan presiden blong BYU–Idaho, ol pikinini blong mitufala oli bin ol yang adalt. Tedei long naet, !mifala i stap ia wetem sam long ol apu pikinini blong mitufala we oli ol yang adalt! Mi prea se Tabu Spirit bae i stap wetem mi mo yu taem mi stap serem sam tingting mo filing we i bin kam long maen mo hat blong mi.
Sam yia i pas, Elda Bednar mo mi i bin go long wan divosen blong kwestin mo ansa wetem wan bigfala grup blong ol yang adalt. I no longtaem i pas, mi stap go tru long handred blong ol kwestin we oli bin givim i kam mo mi bin faenem plante kwestin abaot fraet, nogat tras long yuwan, mo stap gat tu tingting abaot yuwan. Mi disaed blong toktok moa tedei long naet abaot sam long ol kwestin ia mo serem sam tingting insaed long skripja mo aot long ol eksperiens blong miwan, wetem yufala, mo mi hop se bae i helpem yu long wokbaot blong yu long laef—naoia mo long fiuja.
Maet yu tu, yu stap gat ol kwestin ia taem yu stap lisin long ol kwestin ia:
-
?Olsem wanem yumi mekem lav mo fet olsem hemia blong Kraes, i tekem ples blong fraet?
-
?Olsem wanem mi save stap strong taem mi filim se mi slak tumas?
-
?Olsem wanem mi save lanem blong trastem God?
Mi sua se yumi evriwan i bin gat ol kwestin ia.
Skripja we mi wantem yusum plante tedei long ol toktok blong mi tedei long naet i stap long Aesea 41:10:
“Yufala i no fraet; Mi mi stap wetem yufala. Mi mi God blong yufala, Yufala i no seksek; mi bambae mi mekem yufala i strong, Mi bambae mi givhan long yufala. Mi bambae mi blokemgud yufala, mi sevem yufala.”
Mi hop se taem yumi stap stadi long skripja ia tugeta blong sam minit, bae yu kasem ol filing mo tingting we bae i helpem yu blong mekem lav mo fet olsem hemia blong Kraes, i tekem ples blong fraet blong yu, holemtaet wan strong tingting se yu save stap strong taem yu filim yu slak tumas, mo kasem moa tras long yuwan taem yu lanem blong trastem God.
Blong stat, bae yumi lukluk moa long fas pat blong Aesea 41:10:
“Yufala i no fraet; Mi mi stap wetem yufala.”
Tingbaot storian long skripja blong Luk 24 long dei ia we Jisas i Girap bakegen long Ded, tu long olgeta we oli stap folem Hem, oli stap wokbaot long Jerusalem blong go long vilej blong Emeas.
Long rod blong tufala, wan man we tufala i no save, i joenem tufala mo askem from wanem tufala i harem nogud. Tufala i sapraes se man ia i no save wan samting abaot wanem i bin hapen long Jerusalem mo tufala i storian long Hem abaot ol samting we i bin hapen long ol tri dei we i jes pas. Tufala i talem olsem wanem oli bin jajem Jisas rong mo arestem Hem blong kilimded Hem, oli hangem Hem long kros, mo afta Hem i girap bakegen long ded olsem wan merikel. Tufala man ia i no bin save, kasem taem oli finisim wokbaot blong olgeta we i samples 11 kilo mita, se tufala i stap wokbaot wetem Lod ia nao we i bin girap bakegen long ded.
?From wanem stori ia i impoten? From se mi bilivim se Jisas i stap wokbaot wetem yu mo mi long wokbaot blong yumitu long laef ia, bitim we bae yumitu luksave. Hem i stap wetem yumi. ?Olsem wanem yumi save mekem lav mo fet olsem hemia blong Kraes, i tekem ples blong fraet? Tingbaot toktok ia we i kam long Aesea:
“Yufala i no fraet; Mi mi stap wetem yufala:”
Naoia bae yumi luklukbak long seken pat blong skripja ia:
“Mi mi God blong yufala, Yufala i no seksek; mi bambae mi mekem yufala i strong, Mi bambae mi givhan long yufala.”
Taem mifala i stap laef long ples ia long Rexburg sam yia i pas, mi bin draev i go long Sol Lek blong stap wetem kasen blong mi, wan dei afta we hasban blong hem i bin go tru long wan operesen blong hat. Hem i bin wan taem blong nogat paoa, mo afta we kasen blong mi i luk hasban blong hem, mi kam blong luksave from wanem hem i wari tumas. Hem i no stap kam oraet tumas, mo ol dokta oli disaed se hem i nidim blong oli givim blad long hem.
Mi neva luk we oli givim blad bifo mo mi sapraes blong luk taem blad i stap drop sloslo i go daon long wan smol paep i go insaed long string blong hem. Taem mi stap wajem, mi tingbaot Sevya blong yumi mo tingting long hamas drop blong blad blong Hem i bin ron from mi. Afta sam aoa nomo i pas, mi bin witnesem niu laef mo paoa we blad ia i bin givim.
Long wan wei we mi no tekem gud o andastanem fulwan, sakrifaes blong Atonmen blong Sevya i givim paoa mo i help blong mekem ol samting we i had. Yumi gat blesing blong mekem ol samting we yumi no ting se yumi save mekem. ?Olsem wanem yumi save stap strong taem yumi filim se yumi slak tumas? Tingbaot toktok ia we i kam long Aesea:
“Mi mi God blong yufala, Yufala i no seksek; mi bambae mi mekem yufala i strong, Mi bambae mi givhan long yufala.”
Bae mi serem sam tingting abaot las toktok blong Aesea long Aesea 41:10:
“Mi bambae mi blokemgud yufala, mi sevem yufala.”
Raet han plante taem yumi long hem olsem kavenan han. From kavenan koneksen blong yumi wetem Kraes, yumi save trastem se Sevya blong yumi bae i leftemap yumi, holemtaet yumi, mo sapotem yumi.
Hemia i mekem mi tingbaot stori insaed long Matiu 14 taem ol disaepol blong Jisas oli stap long wan sip long medel blong solwota we win mo ol wef i stap saksakem olbaot. Pita i luk Jisas we i stap wokbaot long wota mo i askem Jisas blong i singaotem hem blong go long Jisas. Jisas i akseptem rikwes ia, mo Pita i stat blong wokbaot long wota i go from Jisas. Hem i oraet nomo i stap taem hem i lukluk nomo long Jisas. Be taem Pita i stat blong luksave ol strong win, hem i stat blong draon mo hem i krae long Jisas blong i sevem hem. “Nao wantaem nomo, Jisas i stretem han blong hem, i holem hem.” Mo mi bilivim tru se bae Hem i holem yumi tu.
?Olsem wanem yumi save lanem blong trastem God? Tingbaot toktok ia we i kam long Aesea:
“Mi bambae mi blokemgud yufala, mi sevem yufala.”
Mi testifae se Papa blong yumi long Heven i save mo i lavem yumi. Mi testifae se Jisas Kraes i Sevya mo Ridima blong yumi. Hem i stap wokbaot wetem yumi; mo Hem i stap mekem yumi strong; mo Hem i stap helpem yumi. Mo yumi save trastem se bae Hem i leftemap yumi, holemtaet yumi, mo sapotem yumi taem yumi tingbaot kavenan koneksen blong yumi wetem Hem. Mi save se Tabu Spirit i stap soem ol samting long yumi mo i stap karem ol tingting i kam long maen blong yumi mo ol filing i kam long hat blong yumi. Mi save se God i bin singaotem Elda Bednar “tru long profesi mo tru long ol han we oli putum antap long hed.” Hem i wan Aposol blong Lod, Jisas Kraes.
Long nem blong Jisas Kraes, amen.