Ol Samting Olsem We Oli Rili Stap 2.0
Divosen blong Ol Yang Adalt Raon long Wol
Sandei 3 Novemba, 2024
Susan mo mi, i talem tangkyu long janis ia blong wosip mo lan wetem yu. !Mifala i lavem yu! Raon long wol, weaples yu stap long hem, !mifala i lavem yu!
Mo mitufala i prea wetem tru hat se, Tabu Spirit bae i blesem wanwan long yumi blong harem wanem yumi nid blong harem mo blong luk wanem yumi nid blong luk, mekem se yumi save gohed i go fored wetem fet long Sevya mo wan tingting long hat blong wantem folem mo givim seves long Hem.
Dispensesen blong En blong Taem we Evri Wok blong God i Kamtru
Yumi kasem blesing blong laef long wan bigfala sisen blong las dispensesen blong gospel, iven dispensesen ia blong taem blong evri wok blong God i kamtru. Ol toktok blong ol tabu skripja mo ol profet oli helpem yumi blong lanem abaot mo glad moa fulwan long ol spesel dei we yumi stap laef long hem.
Profet Josef Smit i talemaot se, “Wok blong bildimap Saeon i wan wok we i bin pulum tingting blong ol pipol blong God long evri taem; hem i wan stamba toktok we, ol profet, ol pris, mo ol king oli bin stastap tokbaot wetem spesel glad; oli bin wet, wetem glad, from dei ia we yumi stap laef long hem tedei; mo wetem hat mo glad blong heven, oli bin singsing mo raetem, mo talem profesi abaot taem blong yumi, tedei; be oli bin ded mo oli no luk taem ia; … yumi nao yumi stap luk, tekpat, mo help blong rolem Lata-dei glori ia i go.”
Long ol nara taem, Profet i talemaot se “Prishud blong heven bae i joen wetem hemia blong wol, blong mekem ol bigfala stamba tingting ia oli kamtru, … wan wok we God mo ol enjel oli bin stap lukluk wetem glad blong ol jeneresen we oli pas finis; hemia i bin laetem faea blong sol blong ol petriak mo ol profet blong bifo; wan wok we i blong prapa spolem gud ol paoa blong tudak, mekem wol ia i kam niu, glori blong God, mo sevem ful famli blong man.”
Impoten samting long saed blong spirit blong ol las dei, i bin blong lukluk nomo long tingting blong ol profet blong plante handred yia. Mo spesel sisen we yumi stap laef long hem naoia mo bae i gohed blong fulap wetem naesfala divelopmen mo ol samting we oli stap hapen long saed blong spirit.
Wok blong Teknoloji long Spesel Sisen Ia blong Wol
Wan impoten pat blong wok blong God i kam tru we i stap blong yumi tedei, i wan proses blong ol jenis mo ol kriesen blong ol samting we i save mekem wok blong God i sevem man mo kam olsem wan God, i kwik: long ol tren i go long ol mesej we oli raetem i go long ol redio i go long ol ol trak i go long ol plen i go long ol telefon i go long ol transista i go long ol kompiuta i go long satelaet transmisen i go long intanet i go long paoa we kompiuta i gat blong tingting mo lan—mo i go plante moa lis blong ol teknoloji we i no gat en mo ol tul we oli blesem laef blong yumi. Evri divelopmen ia, oli pat blong stap mekem wok blong Hem i stap go hariap long ol las dei ia.
Long 1862 Brigham Yang i talemaot se: “Evri samting we oli faenemaot long saens mo art we oli rili tru mo oli ol man oli save yusum, oli bin kam tru long daerek revelesen we i kam long God, be sam nomo oli luksave. Oli bin givim wetem wan stamba tingting blong mekem rere rod we long en, trutok i win mo fasin blong pemaot wol aot long paoa blong sin mo Setan. Yumi mas yusum gud evri gudfala samting we oli faenemaot ia, oli givim tugeta ol waes tingting blong ol olfala o yangfala, mo givim long ol pikinini blong yumi save abaot evri pat blong laef, blong oli yusum blong gud blong olgeta, blong mekem oli rere olgeta go fored mo mekem pat blong olgeta i hapen insaed long bigfala wok ia.”
Long 1966, Presiden David O. McKay i profesae abaot ol samting we hem i faenemaot long saens we i mekem “man i sapraes tumas,” bae i save mekem fasin blong talemaot gospel long evri famli, lanwis mo pipol, i kam posibol. Blong ademap: “I gat ol samting we oli slip yet we bambae oli faenem we oli gat bigfala paoa i stap; bae oli kam blong save blesem man, o i save prapa spolem ol man, mo bae i putum responsabiliti blong kontrolem olgeta samting ia i stap long han blong man, mo responsabiliti ia i wan we i bigwan evriwan we oli eva putum long han blong man. Taem naoia i fulap long ol denja we oli no save stop, mo tu i gat ol samting we oli posibol we tingting i no save tingting long hem.”
Ol Samting Olsem We Oli Rili Stap
Fiftin yia i pas, long wan wolwaed divosen blong ol yang adalt, mi bin tokbaot bigfala plan ia blong God, blong stap glad long ol pikinini blong Hem. Mi tokbaot plante hamas ol bodi blong yumi oli impoten insaed long plan ia blong Papa, olsem wanem Lusifa i pulum tingting blong yumi blong ting nating mo yusum nogud bodi blong yumi, mo bin leftemap voes blong givim woning abaot ol paoa blong dijitol teknoloji we i save spolem sol blong yumi mo rilesensip blong yumi wetem ol nara pipol.
Mi tokbaot plante se i nomata ol fasin blong jenis o kwik jenis we dijitol i mekem insaed long olgetawan oli gud o nogud. Be, mi givim woning se, tru jalenj i blong andastanem tugeta fasin blong mekem jenis o ol jenis insaed long andastaning blong plan blong stap glad we i no save finis. Mo tu, mi bin askem “tu kwestin blong stap tingting long hem long taem blong we yu stap tingting hevi mo prea blong stap stadi” abaot stap yusum ol teknoloji ia long stret fasin.
-
Blong stap yusum ol defdefren teknoloji mo midia, ?hemia i invaetem o stopem kampani blong Tabu Spirit blong stap oltaem long laef blong yu?
-
Taem ia we yu spendem blong stap yusum ol defdefren teknoloji mo midia ia, ? i mekem i kam bigwan o kontrolem paoa blong yu blong stap ia, blong lavem mo givim seves long ol wei we i gat moa mining?”
Taetol blong mesej blong long 2009 i bin “Ol Samting Olsem We Oli Rili Stap.” Hemia long tetaem ia.
Taetol blong mesej blong mi tedei hem i “Ol Samting Olsem We Oli Rili Stap 2.0.” Hemia i naoia.
Stap Waes
Mi tekem mesej blong mi blong tedei insaed long las toktok blong wan toktok long divosen we i kam long Brigham Yang Yunivesiti long Jenuware blong yia ia.
“Taem yu traehad blong lanem gospel blong Jisas Kraes mo mekem wok we yu mas mekem, mi talem strong yu blong stap waes speseli long taem yu yusum ol tul blong teknoloji blong tedei. Ol fasin blong mekem jenis olsem paoa blong kompiuta blong tingting mo lan tugeta, i [save] (1) help blong mekem yu stap kasem ol naesfala blesing mo (2) katemdaon mo kilimded gud fasin blong fridom blong mekem joes blong yu. Plis no letem tingting ia se, ol teknoloji blong tedei i mekem evri samting i stret evriwan, i spid mo i mekem laef i isi, blong pulum tingting blong yu blong stopem o ovarem wok we i stret gud we i invaetem ol blesing we yu nidim blong kam long laef blong yu. Ol brata mo sista blong mi we mi lavem tumas, i nogat sotkat blong gro long saed blong spirit.”
Naoia bae mi toktok nomo long tri topik we mi talem i impoten long fas toktok blong mi: paoa blong kompiuta blong tingting mo lan, gud fasin blong fridom blong mekem joes mo wok we i stret mo gud.
Paoa blong Kompiuta blong Tingting mo Lan
Paoa blong kompiuta blong tingting mo lan, oli talem oltaem olsem, AI, hem i teknoloji i mekem se i posibol blong ol kompiuta mo ol masin oli wok olsem bren blong man mo paoa blong stretem ol problem. Long ol yia we i jes pas, divelopmen mo yus blong ol AI teknoloji i bin muv fored long wan wei stap jenis kwik mo we i no nomol mo i afektem kolosap evri eria we man i konek wetem blong mekem samting—meresin, saens, edukesen, art o disaen mo konstraksen, komunikesen, smol stoa, faktri mo plante, plante nara samting. Mo taem yus blong AI i seraot i go moa bitim bifo, ol denja we oli no save stop mo ol samting we oli posibol we tingting i no save tingting long hem we Presiden McKay i profesae long hem, i kam eva moa klia.
Naesfala teknoloji ia i givim paoa ia blong kasem bigfala save, mekem kwaliti blong laef i kam moa gud, komunikesen i kam moa isi mo koneksen, mekem tingting man o woman blong stap lanem samting i kam bigwan mo leftemap tingting blong stap krietem samting mo mekem jenis.
Mo tu, AI i gat paoa blong mekem blong mekem i no klia, tru aedentiti blong yumi olsem ol pikinini boe mo gel blong Papa long Heven we i gat lav, i blokem yumi blong no luksave ol trutok we i no save finis mo wok we i stret mo gud we i gat nid blong mas hapen blong kam antap long saed blong spirit, i mekem hae tingting i kam antap mo mekem trutok ia se yumi dipen long God i kam smol, mo pulumaot o riplesem tingting ia blong storian mo mekem samting wetem ol nara man o woman.
“Taem we oli gat plante save oli ting se oli waes, mo oli no mekem folem ol kaonsel blong God, from oli putum olgeta long saed, from oli ting se olgetawan oli save samting, taswe, waes tingting blong olgeta i krangke fasin mo i no helpem olgeta. Mo bae oli ded.
“Be blong gat save i gud sapos oli mekem folem ol kaonsel blong God.”
Tingting long ol denja ia we i save hapen. Wan kompanion we AI i developem, wan gelfren o boefren, oli save “disaenem long wan wei we i save givim evri infomesen blong pulum tingting mo gat ol eksperiens we oli no save kontrolem, mo i pulum tingting blong wan bigfala namba blong ol nid long saed blong filing mo sosol.”
“Wei ia i krietem wan filing blong koneksen mo andastaning, stap mekem ol storian wetem ol kompanion ia fes tu fes, i kam moa intresting. Filing blong intres i kam moa bigwan blong gat 24/7 fridom blong stap ia mo oltaem, oli faenemaot se i no gat problem long ol tru rilesensip blong o man o woman. Blong stap tingbaot ol impoten deit mo save givim ansa long stret taem oltaem, Ol AI [kompanion] ia, oli oganaesem olgeta blong mekem i hapen ol responsabiliti we tufala kompanion i no save mekem long laef, [speseli] blong stap mekem olgeta oli no save lego olgeta” mo tantanem tingting blong olgeta blong luk “ol samting olsem we oli rili stap” insaed long ol rilesensip blong man o woman.
Blong ademap, fes tu fes onlaen kompanion, oli disaenem speseli blong pulum tingting mo blong developem sloslo, ol filing long wan man o woman, blong gat nid ia seperetem ol fas sef rilesensip. Olsem ol posen gas, olsem onlaen fes tu fes rilesensip, hemia i save kam “man blong posen” long ol rilesensip. Ol filing we i no ril, blong stastap kolosap i save riplesem ol filing blong stastap kolosap long ril laef—stret samting ia nao we i fasem tu pipol tugeta. Wan man o woman i save faenem kamfot mo sapot long wan onlaen fes tu fes kompanion long wan wei we, sloslo, bae i spolem filing ia bitwin wan man o woman blong stap dipen long tufalawan oltaem. Mo sam bae oli foldaon long trap ia, mo no stap luksave se hem i wan aksen blong brekem ful komitmen long wan patna, from se, onlaen kompanion i no “ril” mo oli no save kaontem olsem wan nara man o woman.
Oltaem tingbaot se, wan AI kompanion i sam rul nomo blong folem. Hem i no laekem yu. Hem i no kea long yu. Hem i no rili save se sapos yu rili stap o no gat. Blong ripitim, hem i wan program blong kompiuta blong stretem tu samting tugeta, we bae i tritim yu olsem wan samting we i no gat laef, blong yusum nomo, sapos yu letem. Plis, yu no letem teknoloji ia i trikim yu blong kam samting we i no gat laef.
Eksampol ia i wan long o milian denja we i save hapen wetem paoa we kompiuta i gat blong tingting mo lan.
Tingting blong mi i no blong talem se paoa blong kompiuta blong tingting mo lan i nogud blong gat; i no olsem. Mo mi no stap talem tu se yumi no mas yusum plante samting we AI i save mekem long stret wei blong lan, long komunikesen, blong leftemap mo mekem laef i gus mo blong bildim mo mekem Jos i kam strong moa; yes yumi mas yusum. Yumi no mas stap fraet i traem blong haed long AI. Be ol stret mo gud wok blong naesfala teknoloji tul ia, oli save luksave nomo, sapos yumi save gud long hem mo gat stap sef aot long ol denja blong hem.
Blong luksave sistem we i stap wok blong krosem laef long saed blong spirit mo teknoloji, Ol Lata-dei Sent oli mas putum tingting stap daon mo prea (1) faenemaot ol gospel prinsipol we i save givim daereksen long olgeta blong yusum paoa blong kompiuta blong tingting mo lan(2) mas gat nid blong traehad wetem tru hat blong gat kampani blong Tabu Spirit mo presen blong revelesen long saed blong spirit.
Mi invaetem yu blong luklukbak mo stadi long ol prinsipol gaed blong AI we Jos i developem mo serem eli long yia ia. Ol prinsipol ia oli letem Jos i save abaot yus blong paoa blong Kompiuta blong Tingting mo Lan mo givim wan strong fandesen we long hem, yu save bildimap proteksen blong yuwan long hem, agensem ol denja blong ol nogud fasin blong yusum teknoloji.
Long fas jeneral konfrens toktok blong hem, Presiden blong Jos Ia blong Jisas Kraes blong Ol Lata-dei Sent, Presiden Russell M. Nelson, i tokbaot plante revelesen blong wanwan man o woman i impoten long laef blong yumi. Hem i talem: “Sevya mo Ridima blong yumi, Jisas Kraes, bambae i mekem sam bigbigfala wok bitwin naoia mo taem we bae Hem i kambak bakegen. Tru long merikel, bae yumi luk ol saen we God Papa, mo Pikinini blong Hem, Jisas Kraes, Tufala i prisaed ova long Jos ia wetem hae paoa mo glori. Be, long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem mo kamfotem yumi wetem paoa blong Hem.”
Yumi talem tangkyu, O God, from wan profet, mo long naet ia yumi talem ol tangkyu from ol woning blong Presiden David O. McKay mo Presiden Russell M. Nelson.
Gud Fasin blong Fridom blong Mekem Joes
Mi bin talem bifo finis se paoa blong kompiuta blong tingting mo lan i gat paoa blong katemdaon mo kilimded gud fasin blong fridom blong mekem joes blong yumi. ?Wanem nao stetmen ia i minim mo olsem wanem kaen samting olsem i save hapen?
Ol stamba tingting we i kavremap evri samting long bigfala plan ia blong stap glad blong Papa, oli blong givim ol janis blong kasem wan bodi, blong lanem “gud aot long ivel,” long ol spirit pikinini blong Hem” tru long eksperiens long wol ia, blong gro long saed blong spirit mo progres i go long laef we i no save finis. Mo gud fasin blong fridom blong mekem joes i wan stamba pat long plan ia blong God blong mekem ol pikinini boe mo gel blong Hem, oli nomo save ded mo i kasem laef we i no save finis.
Toktok ia gud fasin blong fridom blong mekem joes i kam wetem fulap wetem instraksen. Ol toktok we i semmak long toktok ia gud fasin i tekem tu, “gud,” “ones,” “stap stret mo gud,” mo “gudfala man o woman.” Ol toktok we i semmak long toktok ia fridom blong mekem joes i save tekem tu, “aksen,” “aktiviti,” mo “wok.” From hemia, gud fasin blong fridom blong mekem joes, oli save andastanem olsem paoa mo spesel janis blong jusum mo tekem aksen yumiwan long ol gudfala wei, stap ones, stap stret mo gud, mo stap gudfala man o woman.
Ol kriesen blong God i tekem tugeta “ol samting blong tekem aksen long olgeta, mo ol samting we oli tekem aksen long yumi.” Mo hemia we i moa impoten i we, gud fasin blong fridom blong mekem joes i tabu disaen blong “fri paoa blong tekem aksen ” we i givim paoa long yumi olsem ol pikinini blong God we oli fri blong tekem aksen olgetawan nomo mo no stap wan samting nating we i blong ol samting oli tekem aksen long yumi.
Lod i givim instraksen long Inok abaot stret poen ia blong doktrin.
“Luk olgeta brata blong yu; oli wanem we mi wokem long han blong mi, mo mi givim save blong olgeta long dei ia we mi bin krietem olgeta; mo insaed long Garen blong Iden, mi givim long man fridom blong hem blong mekem joes;
“Mo mi bin talem long ol brata blong yu, mo mi bin givim komanmen long olgeta tu, se oli mas lavlavem olgeta bakegen, mo se bae oli mas jusum mi, Papa blong olgeta.”
Plis tekem not se, ol stamba tingting blong yusum fridom blong mekem joes oli blong lavem wanwan long olgeta mo blong jusum God. Tingting se yumi kasem komanmen—i no woning, advaes o kaonsel nomo—be kasem komanmen blong yusum fridom blong mekem joes blong yumi blong tanem yumi i go aotsaed, blong lavem wanwan long yumi, mo blong jusum God.
Wan singsing we yumi save gud, taetol, “Jusum Raet” from wan risen. Yumi no kasem blesing wetem gud fasin blong fridom blong mekem joes, blong mekem eni samting yumi wantem long eni ples bae yumi mekem. Be, folem plan ia blong God, yumi bin kasem gud fasin blong fridom blong mekem joes blong lukaotem folem mo tekem aksen folem trutok we i no save finis. Olsem “olgeta we oli ripresentem Hem [yumiwan],” yumi mas wok wetem strong tingting long wan ol gud wok, “mo mekem plante samting long tingting blong [yumiwan] nomo, mo mekem plante stret mo gud wok oli kamtru.”
Stamba samting we i impoten abaot gud fasin blong fridom blong mekem joes i kamaot insaed long skripja stori blong kaonsel we i tekem ples long laef bifo long wol ia. Lusifa i girap agensem plan ia blong Papa mo hemia we i moa impoten i fasin blong hem blong go agens i stap nomo long prinsipol blong gud fasin blong fridom blong mekem joes.
“Taswe, from se Setan i bin kam agensem mi, mo i bin wantem blong prapa spolem gud fridom blong man blong mekem joes, … Mi bin mekem se oli sakemaot hem.”
Selfis plan blong enemi i bin blong karemaot long ol pikinini boe mo gel blong God, presen blong “oli fri blong mekem samting olgetawan nomo” we oli mekem folem stret mo gud fasin. Tingting blong hem i we, evri pikinini blong Papa long Heven bae oli kam samting we i blong ol samting oli tekem aksen long yumi.
Wol ia oli krietem olsem wan ples we ol pikinini blong Papa long Heven oli kasem tes blong luk sapos bae oli mekem “evri samting we Lod, God blong olgeta bae i givim oda long olgeta.” Stret stamba tingting blong Kriesen mo laef blong yumi long wol ia i blong luk sapos yu mo mi, bae i jusum mo tekem aksen blong kam wanem Lod i invaetem yumi blong kam olsem. Taem Presiden Nelson i talemaot se: God i Papa blong yumi long Heven, Hem i wantem yu blong jusum blong kam hom long Hem. Plan blong Hem blong yu progres blong taem we i no save finis, i no fasfas, mo i sapotem fridom blong joes blong yu.”
Hop mo tingting blong hat blong yumi i selestial glori wetem ol famli blong yumi long ples we Papa long Heven mo Pikinini blong Hem, Lod, Jisas Kraes we Hem i Lavem Tumas. From hemia mo plante nara risen, Presiden Nelson i bin invaetem yumi blong “tingting selestial.”
Naoia, lukaot. Filing ia blong yusum isi samting, blong luk se i stret gud, mo taem we ansa i kam kwik we i soem, paoa blong kompiuta blong tingting mo lan, i save krietem wan stret fasin blong giaman, filing blong no save kontrolem, kilimded paoa blong yusum gud fasin blong fridom blong mekem joes blong yumi. From se AI i haed gud insaed long tingting blong trastem mo ol promes we sistem blong teknoloji i givim, maet bae yumi soem se yumi no waes mo yumi save givim gud fasin blong fridom blong mekem joes blong yumiwan i go long wan teknoloji we i tingting telestial nomo. Blong mekem olsem, maet sloslo, bae yumi jenis i kam olgeta we oli kam ol samting we olgeta samting i save tekem aksen long olgeta. Mo bae yumi no save stret se yumi stap helpem Lusifa blong kasem long laef ia wanem we hem i no save kasem long laef bifo long wol ia.
Trutok save ia blong ol samting olsem we oli rili stap. Paoa blong kompiuta blong tingting mo lan i no save aktem, mekem kopi o riplesem paoa blong Tabu Spirit long laef blong yumi. Nomata hamas AI teknoloji i samting blong wol o i naes tumas long ol wei blong hem, i simpol nomo se, hem i no save talemaot witnes abaot Papa mo Pikinini, talemaot trutok abaot evri samting, o mekem olgeta we oli sakem sin mo bin kasem baptaes, oli kam tabu.
Trutok i wan save blong ol samting olsem we bae oli rili stap. Olsem we yumi waes, protektem mo yusum gud fasin blong fridom blong yumi blong mekem joes, blong lavem God mo givim seves long ol brata mo sista blong yumi, mo tekem Tabu Spirit olsem wan we i givim daereksen long yumi, yumi save stap longwe long fasin blong giaman mo win long saed blong spirit aot long ol jalenj mo ol taem blong blesing we yumi laef long hem.
Wok We I Stret mo Gud
Wan andastaning abaot plan ia blong Papa long Heven blong stap glad, i helpem yumi blong luksave se wok we i stret mo gud, i wan nid blong mekem progres long saed blong spirit.
Olsem ol pikinini boe mo gel blong God, “wanwan [long yumi] i bin gat wan tabu fasin mo fiuja blong yumi” mo bin kasem ol paoa long saed blong spirit long Hem. Papa blong yumi long Heven mo Pikinini blong Hem we Hem i Lavem tumas, Tufala i Ol Man blong krietem samting mo givim wok long yumi long ol pat blong laef long wol ia, ol paoa we Tufala i krietem. Spesel paoa blong yumi blong wok mo krietem samting, i wan spesel samting stret long saed blong spirit, from se, hem i stamba long plan ia blong Papa mo i krietem ol en tingting ia abaot tabu paoa blong yumi blong save mekem samting.
Presiden Thomas S. Monson i eksplenem se: “God i lego haf wok blong wol ia i stap blong [ol man mo woman] blong traem ol skil blong [olgeta] long hem. Hem i lego lektrisiti long klaod mo oel lon wol. Hem i lego ol reva we i no gat brij mo ol bus we oli no katemdaon mo ol siti we oli no bildim yet. God i givim long [yumi] ol jalenj blong ol gat ol samting we yumi mas mekem gud yet, be i no samting we i isi mo i finis. Hem i lego ol pikja we oli no peintem mo miusik we oli no singsing long hem, mo ol problem we oli no stretem, we maet [yumi] save ol glad mo glori blong kriesen.”
Gud fasin blong fridom blong mekem ol joes, stap fri mekem samting yumiwan, mo wok we i stret mo gud, oli konek mo joen tugeta long ol tru wei we i gat paoa. Stap tingting, eksampol, mining blong fet long Lod, Jisas Kraes we oli putum i go fored tru long Lectures on Faith:
“Fet long Kraes i fasfala prinsipol long relijin, i fandesen blong evri stret mo gud fasin, mo i prinsipol blong aksen long eniwan we i gat waes tingting.”
Presen blong fet long saed blong spirit long Kraes i mas nid blong hapen taem yumi yusum fridom blong yumi blong mekem joes blong tekem aksen folem Hem, laef folem ol tijing blong Hem, obei ol komanmen blong Hem, fasem yumiwan i go wetem Hem tru ol kavenan, trastem ol promes blong Hem, mo no stap flas blong akseptem tingting mo taem blong Hem long laef blong yumi. Blong tekem aksen folem ol stret doktrin mo ol prinsipol we Ridima i taltalemaot, hem i stamba, “from fet, sapos i no gat wok wetem, hem i ded.”
Mo tu, yumi lanem aot long Lectures on Faith se “fet i no prinsipol blong aksen nomo, be blong paoa tu, …nomata se long heven o long wol.” Oltaem fet long Kraes i lid i go long aksen we stret mo gud, we i mekem i kam antap janis mo paoa blong yumi long saed blong spirit.
From hemia, fetful disaepol blong oli ol wokman we oli wok wetem strong tingting from se “paoa ia i stap long olgeta, we i mekem olgeta oli fri blong mekem samting olgetawan nomo.” Ol fetful disaepol, long evri samting mo long wei we i soem responsabiliti, folem paoa mo ol situesen blong olgetawan, oli tekem aksen olsem ol fri man we oli mekem samting long tingting blong yuwan, blong mekem samting long tugeta pat long saed blong ol samting long wol mo spirit long laef blong olgeta mo long wok blong olgeta long ol narawan.
Blong stap andastanem se fet long Sevya i wan prinsipol blong aksen mo blong paoa, oli givim wan paten blong ol stret mo gud wok we i stap gogohed, hemia i wan stamba tingting blong stap lukaotem sapot long mo gat tras long Hem mo i wan ples blong stap lan mo kam antap. From ol impoten risen ia, wok i mas gat nid blong hapen from i blong yumi progres long saed blong spirit.
Presiden Ezra Taft Benson i bin tijim se: “Blong yumi, i wan gospel blong wok—i gat stamba tingting, i no selfis mo gohed blong stap fetful long spirit blong tru lav blong Kraes. From tru long hemia, yumi save gro blong kasem ol fasin olsem blong god. From tru long hemia, bae yumi save kam ol tul we oli klin inaf long han blong Lod.”
Wan long ol bigfala wari blong mi hem i we, blong stap dipen tumas long AI teknoloji, bae i mekem yumi kam les long saed blong spirit mo no gat samting—mo lusum ol blesing we oli save kam tru ol wok we oli stret mo gud.
Mi stap tingting se hamas mesej blong sakramen miting mo ol lesen blong Sandei Skul, prishud mo Rilif Sosaeti bae i lid i go long AI. Wan simpol oda we oli talem i go insaed long dijitol tul blong yu, wet blong hamas seken o minit, mo yu gat wanem we yu nidim. ?Be, yu rili gat wanem we yu nidim?
Naoia, mi bilivim se stret situesen blong AI i we, i save help blong karem i kam tugeta ol infomesen, blong stap skelem tingting mo stael blong raeting blong yumi, mo mekem proses blong lanem samting i hariap, “tijing folem tijing [mo] rul folem rul.” Be ol tabu paoa blong krietem wok i speseli blong wanwan long yumi olsem ol boe mo gel blong God. I tru tumas se, yumi save krietem ol naesfala samting insaed long toktok blong sakramen miting wetem AI. Be stamba tingting i no blong stap givimaot o soem nomo paoa blong ol samting we i gat insaed; be, hem i blong stap wok mo stap kam wanem God i wantem tumas blong yumi kam tumas olsem.
Mi wan mi no yusum teknoloji ia blong krietem o raetem ol toktok, atikol o ol narafala samting insaed long ol projek blong mi. Hemia i mas kam hadwok blong mi blong krietem wok mo hemia we i moa impoten, mi lukaotem blong stap open blong kasem insperesen we i kam long Tabu Spirit.
Mi stap yusum teknoloji tu blong skelem ol wok blong mi. Eksampol, afta we mi raetem finis toktok ia mi stap givimaot long yufala naoia, mi askem Ap blong AI blong skelem mo tokbaot wanem saon blong toktok blong i go ol yang adalt raon wol we oli ol memba blong Jos Ia blong Jisas Kraes blong Ol Lata-dei Sent. Hemia fidbak we mi bin kasem:
“Saon blong toktok ia i kam tru long gat mo i givim plante infomesen, taem we man we i toktok i yusum gud ol skripja refrens mo ol eksperiens blong hemwan blong tij abaot hamas fasin blong luksave wanem i haed long saed blong spirit aot long ol giaman samting blong wol we oli no tru. Toktok ia i givim hop mo leftemap tingting tu, taem we man we i toktok i invaetem ol yang adalt blong lukaotem revelesen mo folem eksampol blong Sevya long evri dei laef blong olgeta. Stamba tingting blong toktok i blong givim insperesen abaot fet mo aksen long medel blong olgeta we oli lisin mo blong wonem olgeta abaot ol trik mo giaman blong Setan.”
Folem hemia, mi bin mekem sam jenis we mi hop se i mekem evri mesej i kam moa gud.
Plis, oltaem tingbaot—yumi no mas salem raet we yumi bon wetem blong “[stap] save se glad mo ol glori blong kriesen” blong wan bol glas teknoloji blong “supsup.”
“Yufala i no mastik long samting ya. I no gat wan man i save giaman long God. Wanem sid we man i planem fastaem long garen blong hem, be frut blong hem nomo man ya bambae i mas kakae.
“Sipos man i planem rabis fasin we tingting blong hem i wantem, rabis fasin ya blong hem bambae i givim kakae long hem, we ded nomo. Be sipos hem i planem fasin we Tabu Spirit i wantem, Tabu Spirit bambae i givim kakae long hem, we Hemia laef ya we i no save finis.”
Loa blong karemaot kaekae we i redi, i tru—yestedei, tedei, mo blong oltaem.
Blong gohed blong jenisim laef i go long Lod i nidim, tingting we i lukluk nomo long, i givim sapot, mo mekem wok we i stret mo gud. Yumi traehad blong stap wan gud eksampol blong praktisim fet long Sevya mo tekem aksen mo stop blong stap nomo wan samting we olgeta samting oli tekem aksen long yumi.
Oltaem tingbaot se, blong stap kam wan fetful disaepol, i nidim blong lukluk nomo, sapotem mo mekem ol wok we oli stret mo gud. Yumi mas traehad blong stap wan gud eksampol blong praktisim fet long Sevya mo tekem aksen mo stop blong stap nomo wan samting we olgeta samting oli tekem aksen long yumi.
Blong kasem revelesen blong yuwan, i nidim tingting we i stap nomo long, sapotem mo mekem ol wok we oli stret mo gud. Yumi mas traehad blong stap wan gud eksampol blong praktisim fet long Sevya mo tekem aksen mo stop blong stap nomo wan samting we olgeta samting oli tekem aksen long yumi.
Blong stap lukaotem stret ol presen blong Spirit, i nidim tingting we i stap nomo, sapot mo mekem ol wok we oli stret mo gud. Yumi mas traehad blong stap wan gud eksampol blong praktisim fet long Sevya mo tekem aksen mo stop blong stap nomo wan samting we olgeta samting oli tekem aksen long yumi.
Blong mekem i klia, yumi no wok from o kwalifae nomo from ol blesing blong God o tru long wok blong yumi wanwan. Tingting mo taem blong God, bae i talem olsem wanem mo wetaem bae yumi kasem kea mo sore blong Hem. Be yu mo mi, yumitu gat responsabiliti long saed blong spirit blong wok, krietem mo lanem blong yumiwan.
Promes mo Testemoni
Woning voes we mi resemap long 2009 i bin kam tru long hat, i strong, mo i ejen from se, ol denja blong teknoloji mo ol samting we oli save mekem we yumi stap tokbaot oli jes stat ia nao. Hemia long tetaem ia.
Woning voes we mi resemap tedei i kam moa wetem tru hat, i moa strong mo iven i moa ejen from se ol denja blong teknoloji mo samting we oli save mekem we yumi stap tokbaot oli stap long evri ples, evri taem. Hemia i naoia.
Tabu Spirit i talem witnes abaot trutok. Yu mo mi i gat wan responsabiliti blong mekemsua se Tabu Spirit i save oltaem stap olsem wan pruff blong trutok mo stap olsem fas ples blong evri samting we yumi talem mo serem, tugeta long sep blong yumi mo insaed long yumi. Promes blong wanwan long yumi i we, yumi save lanem blong yusum teknoloji ia long stret fasin wetem daereksen, proteksen mo ol woning we oli kam tru long paoa blong Tabu Spirit.
Mi promes se, taem yumi “lukluk i go long [Sevya] long evri tingting” mo lukaotem kampani blong Tabu Spirit, bae yumi kasem blesing blong wokbaot wetem fasin blong save wet longtaem wetem spirit blong Lod mo gat pis tru long Hem. Mo bae yumi “no gat tu tingting, no fraet,” mo luksave trutok long evri samting, iven “ol samting olsem we oli rili stap.”
Mi testifae se Papa long Heven i stap laef mo hem i man we i raetem bigfala plan ia blong stap glad. Mi witnes se Jisas Kraes, Hem i Pikinini Ia Nomo blong Papa we I Lavem tumas. Mo mi witnesem se Hem i laef bakegen long ded. Hem i stap laef. Hem i Ridima mo Sevya blong yumi. Mo mi testifae se yumi kasem blesing blong laef long wan bigfala sisen blong dispensesen ia blong taem we evri wok blong God i kam tru. Mi serem witnes blong mi wetem glad abaot ol trutok ia long tabu nem blong Lod, Jisas Kraes, amen.