Fren I Go long Fren
Wan Filing blong Pis
Tru long wan intaviu wetem Lucy Stevenson Ewell.
Wan moning taem mi gat 11 yia nomo, mi wekap mo harem ol voes long salong. I nogat wan i kam blong wekemap mi, blong go long skul olsem oltaem. Taem mi go blong luk, wanem i stap hapen, mi faenemaot se papa blong mi i ded.
Taem ol famli blong mi, i stap storian long salong, mi go long garen blong mifala. Garen blong mifala i bigwan, mo mi bin wok wetem papa blong help lukaotem garen ia. Mi sidaon long stul andanit long ol tri mo krae. Mi filim se mi harem nogud tumas mo konfius.
Afta sam minit i pas, mi luk Praemeri tija blong mi i openem get. Hem i kam mo sidaon long stul mo talem, “Joni, ?yu tingbaot lesen we yumi gat las Sandei abaot plan ia blong fasin blong sevem man? Tija blong mi i eksplenem long mi bakegen se, sol blong yumi, oli mekem wetem spirit mo wan bodi. Hem i talem se spirit blong papa blong mi i stap long wan gudfala ples, mo wan dei bae i girap bakegen long ded. Wan dei bae mi luk hem bakegen.
Iven we mi harem i nogud, be mi filim pis. Mi tingbaot pis ia evri taem mi tingbaot eksperiens ia. Praemeri tija blong mi i givhan long mi, mo Tabu Spirit i givim kamfot long mi. Hem i help blong bildimap testemoni blong mi abaot lav blong Papa long Heven mo plan ia blong fasin blong sevem man.
Nomata wanem yu stap go tru long hem, God i stap kea abaot yu. I no nid blong yu kam bigwan blong filim Spirit i testifae long yu se, evri samting bae i ORAET. Yu save bildimap testemoni blong yu abaot plan blong Papa long Heven. Yu save filim pis.
Ol pikja oli kam long Arthur Lin