Rere fromTempol
Stori ia i hapen long Jamaeka.
“?Olsem wanem mi save karem wan rekomen?” Ajan i askem.
“Meksua se yufala i mekem evri samting long taem we yufala i klin inaf” (Momon 9:29).
Ajan i smael bigwan taem hem harem wan noknok long doa. Madda (Mama) i bin invaetem givhan brata blong olgeta blong helpem olgeta wetem wan spesel haos naet.
Hem i openem doa. “!Wah gwaan, Brata Williams!” (“?Afta?”)
“!Evri samting i iri!” Brata Williams i talem. (“!Evri samting i oraet!”) Hem i givim wan basket blong manggo we hem i karem long haos blong hem long Ajan.
Brata Williams i sidaon long sofa. Madda i askem long smol sista blong Ajan blong talem prea.
Afta long prea, Brata Williams i talem, “Yia ia bae Ajan i kasem 12 yia blong hem. “?I gat eniwan i save from wanem yia ia i wan spesel yia blong hem?”
Smol brata blong Ajan, Tejaun, i jiamjiam wetem glad. “!From se bae hem i save kasem prishud mo pasem sakramen!”
“Yes. !Hemia nao!” Brata Williams i talem. “Be i gat wan narafala risen tu.”
Hem i openem paos blong hem mo pulumaot wan smol pis blong pepa. “Hemia i wan tempol rekomen.”
Hem i givim long Ajan.
“!Naes tumas!” Ajan i tajem tempol we i gol we i stap long kad. “?Wanem nao bae yu mekem wetem?”
“Mi soem long man we i sidaon long tebol long fored insaed long tempol. Hemia i soem long olgeta se mi mi klin inaf blong go insaed long tempol.
“!Mi wantem luk!” Dana i karemaot long Ajan mo lukluk gud wanem i stap long hem.
“?Olsem wanem nao bae yu filim sapos yu gat wan rekomen blong yuwan?” Brata Williams i askem.
“!Bae mi filim spesel!” Ajan i lukluk i go antap long kad. “Be mi no save sapos mi save go long tempol. I nidim plante mane blong pem wan plen tikit blong go long ples ia.”
Brata Williams i talem: “Mi no save go long tempol tu evri taem.” “Be rekomen blong mi i oltaem rimaenem mi blong stap rere blong go insaed.”
Ajan tingting smol taem. Hem i talem: “Mi wantem stap rere tu”. “?Olsem wanem nao mi save karem wan rekomen?”
Brata Williams i talem: “Bae yu mitim bisop.”. “Hem bae i askem sam kwestin long yu blong luk sapos yu rere.”
“So, ?i olsem wan tes?” Ajan i askem wetem smol fraet.
Brata Williams i talem: “I moa olsem wan storian.” “Bisop i fren blong yu, mo i wantem blong helpem yu blong stap rere.”
Ajan i saksakem hed blong agri. Hem i laekem bisop.
“Yu yu wantem blong luk ol kwestin?” Brata Williams i givim wan pis pepa we i gat sam kwestin long hem. Dana mo Tejaun oli kam kolosap raon long hem blong luk tu.
“Namba wan,” Ajan i ridim. “‘?Yu yu gat fet long mo wan testemoni long God, Papa we i No Save Finis, Pikinini blong Hem, Jisas Kraes mo Tabu Spirit?’”
Hem i smael. Hemia i isi. “!Yes!”
Hem i gohed blong ridim ol kwestin, wan afta wan. Madda mo Brata Williams tufala i eksplenem mining blong sam samting.
Afta, Ajan i ridim wan nara kwestin: “‘?Yu stap andastanem mo stap obei long Tok blong Waes?’” Hem i mekem fes blong hem i nogud. Hem i talem: “Wantaem D’andre i bin givim ram frut jus long mi taem mi bin stap long haos blong hem.” “Be mi neva wantaem blong drink bakegen. ?Hemia i minim se bae mi no save gat wan tempol rekomen?”
Brata Williams i talem: “Blong stap obei long Tok blong Waes i minim blong no stap dring alkol, mo ram frut jus we i gat alkol long hem.” “Be yu save sakem sin oltaem mo stap klin inaf blong go long tempol.”
Tejaun i talem: “!From Jisas!”
“!Hemia nao!” Brata Williams i talem. “Afta, bae tempol rekomen blong yu i save rimaenem yu blong stap obei long Tok Waes. Mo blong oltaem stap rere blong go long tempol.”
Ajan i smael. Hem i filim moa gud.
Ajan i talem: “Ating bae mi go long tempol i no longtaem.” “!Mo taem mi mekem, hem i from mi rere!”
Pikja droing i kam long Shawna J. C. Tenney