“Vale cecere ni Vakabauta,” iTokani, Julai 2023, 10–11.
Vale cecere ni Vakabauta
A vinakata o Dashanel nona vakabauti Karisito me tubu balavu ka kaukauwa.
Na italanoa oqo a yaco e Jamaica.
A vukei tuakana o Dashanel me kauta laivi na madrai niu mai na ovani. Sa totoka dina na kena iboi!
A qai rogoca e dua na tukituki e katuba. “E rau tiko qo na daukaulotu!” a kaci o ganena.
A cici ki katuba o Dashanel. E dau taleitaka o koya ni rau lako mai na daukaulotu. E dau yalovinaka sara ni rau veisiko mai. Ena so na gauna era dau kauta mai na qito vua kei ira na tacina me ra qito kina.
“Sa bulia tale o Tyrell na madrai niu!” A kaya o Dashanel. E dau taleitaka o ganena me caka kakana me baleti rau na daukaulotu.
“Au sega ni rawa ni wawa meu tovolea eso,” a kaya o Elder Colas. Erau a curu yani ki loma kei Elder Yusaki ka dabe sobu ena vuloa. Eratou dabe mai yasana kadua o Dashanel, na tacina, ganena, kei Na.
“Na cava eda na cakava me baleta na lesoni nikua?” A taroga o Dashanel.
A dreta mai o Elder Yusaki e dua na ibinibini bilo. “Eda na tara cake e dua na vale cecere ni vakabauta. Na bilo yadua oqo e matataka e dua na ka eda rawa ni cakava me tarai cake kina na noda vakabauti Jisu Karisito.“
Sa tekivu me veitabeitaka na bilo o Elder Yusaki ki na dua na vale cecere. A raica o Dashanel ni sa volai tu vei ira na bilo na vosa me vaka na “masu,” “vulica na ivolanikalou,” kei na “lotu”.
“Oqo na veika kece o ni kerea me keimami cakava vakamatavuvale,” e kaya o koya.
“Donu vinaka oya,” e kaya o Elder Colas. “Ni o cakava na veika oqo, o sa tara cake tiko na nomu vakabauti Jisu Karisito.”
Eratou veivukevuke o Dashanel kei iratou na tacina ena nodratou tara na nodratou vale cecere ena bilo ni ratou vakarorogo ki na lesoni.
Ni ra sa biubiu na daukaulotu, a vakasamataka sara o Dashanel na veika erau vakavulica. E vinakata me balavu ka kaukauwa na nona vakabauti Karisito, me vaka ga na vale cecere a tara.
Ni toso na veivula, a vulica vakalevu cake o Dashanel na kosipeli mai vei rau na daukaulotu. Sa tekivu me lako i lotu kei na nona matavuvale. A raitayaloyalotaka na nona valececere ni vakabauta ni tubu balavu cake tiko.
Ena dua na siga ni rau sa biubiu na daukaulotu, a vosa o Dashanel vei Na. “E rawa beka niu papitaiso?” a taroga.
“O sa vakarau dina?” a taroga o Na.
“Io” a kaya o Dashanel. “Au vinakata meu muri Jisu.”
“Sa donu,” a kaya o Na. “Kevaka o vinakata, o rawa ni papitaiso.”
Eratou a digitaka na taci Dashanel kei ganena me ratou papitaiso talega. E kaya o Na ni a sega ni vakavakarau me papitaiso.
Ena siga ni nodratou papitaiso, eratou a vakaisulu vulavula o Dashanel kei iratou na tacina. Erau a wawa toka vakamalua me rau papitaiso.
Ni sa yaco mai na gauna i Dashanel, a vukei koya o Elder Yusaki me sobu yani ki wai. A qai cavuta na vosa ni masu ni papitaiso ka dromuci koya sobu ki lomaniwai. Ni lamata cake mai o Dashanel, a sega ni tarova rawa nona matadredredre! A vakila na marau kei na savasava. A sega ni vinakata me guilecava na yalo oqo.
A cakava tikoga o Dashanel na veika eso me tara cake na nona vakabauti Jisu Karisito. A wilika na ivolanikalou vata kei na nona matavuvale. A masu vua na Tamada Vakalomalagi. A cakava na veika vinaka vei ira na tani. Ka qai nanuma o koya na veika a vakila ena gauna e papitaiso kina. E vinakati Na me vakila talega na yalo oqori.
“Na, na cava na vuna o sega kina ni papitaiso?” A taroga o Dashanel ena dua na siga.
A sega ni vosa o Na ena vica na miniti. “O sa vakarautaka e dua na ivakaraitaki vinaka vei au. Ia oqo au sa gadreva meu ivakaraitaki vinaka vei iko,” a kaya o koya. “Au vinakata meu papitaiso.”
Ena siga ni papitaiso nei Na, sa marau vakalevu o Dashanel. Ni sa lamata cake mai wai o Na, era matadredredre kece. Ia oqo sa rawa ki na matavuvale taucoko nei Dashanel me ra tara vata nodra vale cecere ni vakabauta.
Droini mai vei Alyssa Tallent