Gikan sa Unang Kapangulohan

Ang Paghinulsol Mahimayaon Kaayo!

Ni Presidente Dallin H. Oaks

Unang Magtatambag sa Unang Kapangulohan

Gikuha gikan sa “Malimpyo Pinaagi sa Paghinulsol,” Liahona, Mayo 2019, 91–94.

Ang paghinulsol usa ka kalipay. Importante kini nga bahin sa plano sa Dios. Kitang tanan kinahanglan nga maghinulsol.

Aron makahinulsol, kita kinahanglan nga magsugod sa hugot nga pagtuo kang Jesukristo. Kinahanglan natong biyaan ang atong mga sala ug ikompisal kini. Kini nagpasabot sa pag-angkon nga kita nakahimo og sayop, mangayo og pasaylo niadtong atong napasakitan, ug mopili sa paghimo og mas maayo nga mga pagpili. Gikinahanglan usab kita moambit sa sakramento matag adlawng Igpapahulay.

Kon kita maghinulsol, kita malimpyo. Ang Ginoo misaad nga Siya “dili na mahinumdom [sa atong mga sala]” (Doktrina ug mga Pakigsaad 58:42). Pagkaanindot nga saad! Pagkadako nga milagro! Pagkadako nga panalangin!

Ang atong mahigugmaong Manluluwas mituyhad sa Iyang mga bukton aron sa pagdawat sa tanan nga maghinulsol ug mosunod Kaniya.

Limpyo na Usab

Buhata kini nga kalihokan aron matabangan kamo nga makakat-on mahitungod sa paghinulsol!

1. Pun-a sa tubig ang usa ka sihag nga sudlanan. Dayon paghulog og pipila ka bato ug yuta sa tubig. Kini nagrepresentar sa sayop nga mga pagpili nga atong gihimo.

2. Aron mahimo na usab nga limpyo, kinahanglan kitang mohunong sa paghimo og sayop. Aron sa pagrepresentar niini, kuhaa ang mga bato gikan sa sudlanan. Unsa na ang hitsura sa tubig karon? Hugaw ba gihapon kini?

3. Aron lubos nga makahinulsol, gikinahanglan nato si Jesukristo. Kinahanglan kitang magbaton og hugot nga pagtuo Kaniya ug sa Iyang Pag-ula. Kupti ang sudlanan sa tubig tungod sa gripo. Paagasi og limpyo nga tubig ang sudlanan hangtod nga ang tanang hugaw nga tubig moawas! Kini nagrepresentar sa gahom ni Jesukristo aron matabangan kita nga mahimong limpyo.

Mga paghulagway pinaagi ni Alyssa Tallent