Ang Laay nga Adlaw ni Patrik

Ni Rebekah Jakeman

(Gibase sa usa ka tinuod nga istorya)

Ang mga magulang nga lalaki ni Patrik kanunay nga bisi kaayo nga dili na siya matagad.

Kini nga istorya nahitabo sa USA.

Si Patrik nagtutok sa kisame samtang naghayang siya nga nanghuyatid sa iyang higdaanan. Gilaay siya. Nabasa na niya ang iyang mga libro mahitungod sa mga hayop, milukso sa trampoline, ug nagbisikleta palibot sa kasilinganan. Unsay iyang mahimo karon?

Mibangon si Patrik ug miadto sa kwarto sa iyang magulang nga lalaki nga si Daniel. “Mahimo ka ba nga makigdula nako?” Nangutana si Patrik.

“Sori, dili ko. Kinahanglan kong magtuon,” miingon si Daniel. Wala lang gani siya mohangad gikan sa libro nga iyang gibasa.

Nadismaya ug naguol si Patrik. Si Daniel kanunay lang nga nagtuon. Dili ba siya pwede nga mopahulay og kadali?

Sige na lang. Si Daniel bisi, apan si Patrik mahimong mohangyo sa iyang lain nga igsoon, si Simion. “Gilaay man ko. Mahimo ka ba nga makigdula nako?” Nangutana si Patrik.

“Dili, ayaw karon. Mogawas ko kauban sa akong mga higala.” Gisul-ob ni Simion ang iyang dyaket ug migawas na sa atubangan nga pultahan.

Suko kaayo si Patrik! Ang iyang kasingkasing mipaspas sa pagpitik. Ang iyang mga magulang nga lalaki kanunay nga bisi kaayo nga dili siya matagad. Midagan siya padulong sa iyang kwarto ug gilamba ang pultahan.

Dili kini makiangayon! Naghunahuna si Patrik.

Giundak niya ang iyang tiil ug mihapa sa iyang higdaanan. Mura og mihuot ang iyang dughan. Gilaay kaayo siya! Apan suko kaayo siya aron makahunahuna kon unsay buhaton.

Dayon nakahinumdom siya og usa ka butang nga iyang nakat-onan sa eskwelahan. Ang iyang titser mitudlo nila nga ang pagginhawa og lawom makatabang nila nga mokalma.

“Lisod ang pagsulbad og bisan unsang butang kon ikaw mobati og kasuko,” miingon ang titser. Tingali kon mas kalma siya, si Patrik makahunahuna og paagi aron masulbad ang iyang kalaay.

Mao nga si Patrik mihimo og dako, lawom nga pagginhawa. Dayon miginhawa na pod siya. Human sa pipila pa ka laing pagginhawa, ang iyang dughan wala na maghuot. Apan wala gihapon siya makahibalo kon unsa ang buhaton.

Milingkod siya ug mitan-aw sa litrato ni Jesukristo nga naa sa bungbong. Unsa ang Iyang gustong ipabuhat ni Patrik?

Si Patrik miluhod. “Langitnong Amahan, palihog tabangi si Daniel samtang siya nagtuon,” miingon siya. “Tabangi si Simion nga malingaw kauban ang iyang mga higala. Ug palihog tabangi ko nga dili na kaayo laayon.”

Sa dihang nahuman na siya sa iyang pag-ampo, si Patrik naka-ideya. Midagan siya ngadto sa kwarto ni Daniel.

“Daniel, kon mahuman na ka, mahimo ba kitang magdula?”

Si Daniel mihangad gikan sa iyang libro ngadto sa orasan sa bungbong. “Mahimo kong mopahulay human sa mga 30 minutos. Dayon mahimo tang manggawas. Ganahan ka bang mobuhat niana?”

“Oo!” Mipahiyom si Patrik ug mibalik og dagan ngadto sa iyang kwarto. Nakakita siya og libro sa mga hayop mahitungod sa mga tigre nga ganahan niyang tan-awon. Human kini basaha og kadali, nagdula siya og mga bloke. Sa wala madugay milabay na ang oras, ug siya ug si Daniel mipaingon sa kakahoyan duol sa ilang balay.

“Ganahan ka ba nga magdula og mga manggugubat sa kawanangan o mga tigsiksik sa kalasangan?” Nangutana si Daniel.

“Bisan unsa lang. Nalipay lang ko nga nagkauban ta. Mas maayo pa kini kay sa laayon,” miingon si Patrik.

Mingisi si Daniel. “Bitaw, ang pagpakigdula nimo mas lingaw pa kay sa magtuon alang sa usa ka eksamin.”

Gibati ni Patrik ang kalipay samtang siya ug si Daniel mikamang sa kasagbotan. Ang pagkalma nakatabang niya nga mas makahunahuna og tarong aron masulbad niya ang iyang problema. Ug ang Langitnong Amahan mitabang kaniya nga mas mahimong mahisama ni Jesukristo. Kini nahimo pa gihapon nga usa ka maayo nga adlaw.

Mga paghulagway pinaagi ni Linh My Nyguyen