“Nag-abiba sa Duha ka Team,” Higala, Septiyembre 2024, 30–31.
Nag-abiba sa Duha ka Team
Si Jayne nagmug-ot. Dili siya gusto nga makadaog ang laing team!
Kini nga istorya nahitabo sa Habagatang Korea.
Gikaon ni Jayne ang kataposang hungit sa iyang noodles. Mmmm. Lami!
“Magdula ta og Yut Nori!” Miingon si Tiyo Ji-Ho.
Mao na usab kadto nga panahon sa tuig! Ang iyang pamilya nagsaulog sa Chuseok, Thanksgiving sa Korean. Karon ang pamilya ni Jayne nagpundok aron mangaon og daghang pagkaon ug magdula og Yut Nori. Ang Yut Nori mao ang paborito nga dula ni Jayne.
Ang tanan naglingkod nga nag-alirong diha sa salog. Mitan-aw si Jayne sa palibot. Unsa kaha nga team ang ganahan niyang apilan? Dali siyang milingkod tupad ni Tiyo Ji-Ho. “Gusto ko nga maapil sa inyong team!” miingon siya. “Seguradong makadaog gyod ta!”
Mikatawa si Tiyo Ji-Ho. “Tungod kay naa ka sa among team, seguradong aduna tay dakong tyansa!”
Gipahimutang sa mama ni Jayne ang game board diha sa tunga sa sirkulo. Mitabang si Jayne niya sa pagpahimutang sa mga pamato. Ilang gipasa ang upat ka stick sa team nga maoy mouna.
Ang ig-agaw ni Jayne nga si Ana maoy miuna. Iyang giitsa ang mga stick pataas. Ang paagi sa pagtugpa sa mga stick nagpakita kon pila ka luna ang mahimong sibogon sa team diha sa game board. Ang tanang upat ka stick nakulob, nga nagpasabot nga si Ana nakakuha og Yut! Kinahanglan niyang isibog ang pamato sa iyang team og upat ka mga luna paabante ug nakakuha pa og dugang nga turno.
Apan si Ana wala sa team ni Jayne.
Gikyugpos ni Jayne ang iyang mga bukton ug nagmug-ot. “Unta dili siya makahimo og maayo nga pag-itsa,” gihunghongan niya si Tiyo Ji-Ho.
“Kaya nimo na!” Miingon si Tiyo Ji-Ho. “Bag-o lang nagsugod ang dula.” Mihatag siya og madasigon nga pahiyom kaniya.
Human sa ikaduhang turno ni Ana, ang team ni Jayne miitsa sa mga stick. Apan wala sila makasibog sa ilang mga pamato sama sa nahitabo sa team ni Ana.
Sa kada turno, ang mga sakop sa pamilya ni Jayne malipay ug mangatawa. Gitan-aw ni Jayne ang mga pamato sa dula nga gisibog diha sa board. Ang tanan nalingaw.
Ang tanan gawas ni Jayne. Pildihonon gihapon ang iyang team.
Sa kataposan turno na ni Jayne. Iyang giitsa ang mga stick pataas, apan usa lang ang nakulob. Ang pamato sa iyang team gisibog paabante og usa lang ka luna.
Gikyugpos ni Jayne ang iyang mga bukton. “Moundang na ko!” misinggit siya. “Gusto ko nga modaog ta.”
Sa kalit, ang tanan nahilom. Sa iyang paghangad, ang iyang pamilya nagtutok kaniya. Natingala sila nganong suko kaayo siya.
Nanginit ang nawong ni Jayne. Dili maayo ang iyang gibati nga siya dili malipayon alang sa iyang pamilya. Dili siya kasagaran masuko. Mitindog siya aron mobiya sa sirkulo.
Gigunitan siya ni Tiyo Ji-Ho. “Dili ka kinahanglang mohawa” miingon siya. “Ang pagdaog dili importante. Paningkamot lang nga malingaw.”
“OK.” Mibalik og lingkod si Jayne. Gusto niyang malingaw sama sa uban. Miginhawa siya og lawom ug mitan-aw sa iyang ig-agaw nga si Ben nga nag-itsa sa mga stick.
“Maayohang Ben ahh!” Miingon si Tiyo Ji-Ho. Malipayon siyang paminawon.
Gitan-aw ni Jayne si Tiyo Ji-Ho nga nahingangha. Nag-abiba siya sa pikas team! Tingali mao kana ang hinungdan nga siya nalingaw pag-ayo.
Sa pagsugod sa sunod nga turno, nakahukom si Jayne nga moabiba sa duha ka team. Sakto si Tiyo Ji-Ho. Ang pagdaog dili importante. Si Jesus makatabang kaniya nga magmalipayon alang sa mga sakop sa iyang pamilya bisan og pildi siya.
Sa dihang turno na usab ni Ana, mipahiyom si Jayne kaniya. “Good luck! Makahimo ka niini.”
Gikan sa atbang sa sirkulo, mipahiyom usab si Ana. Si Jayne mibati og kainit sa kahiladman. Mas nalingaw na siya!
Paghulagway pinaagi ni Uran Duo