“Kabokbok n̄an Tiim ko Jim̧or,” Jera, Jeptōm̧ba 2024, 30–31.
Kabokbok n̄an Tiim ko Jim̧or
Jayne ej kajememe. Ekar jab kōņaan bwe tiim eo juon en wiin!
Bwebwenato in ekar waļo̧k ilo South Korea.
Jayne ekar kōm̧m̧ane ikkūk eo an āliktata n̄an ramiin eo kijen. Mmmm. Enno̧!
“Jen ikkure Yut Nori!” Eo nej jema Ji-Ho ekar ba.
Ekar bar tōpar iien eo ilo juon iiō bar juon alen! Baam̧le eo an rekar kōjeraam̧m̧ane Chuseok, Raan in Kam̧m̧oolol ilo Korean. Rainin baam̧le eo an Jayne rekar aiintok doon n̄an m̧ōn̄ā elōn̄ m̧ōn̄ā ko im ikkure Yut Nori ippān doon. Yut Nori ekar ikkure eo em̧m̧antata ippān Jayne.
Aolep rekar jijet ilo juon doulul ioon laļ. Jayne reito reitak ipeļaakin. Tiim ta eo ekar kōņaan pād ie? Ekar etal im jijet turin eo nej Jemen Ji-Ho. “Ikōņaan pād ilo tiim eo am̧!” ekar ba. “Jenaaj erom riwiin ro!”
Eo nej Jemen Ji-Ho ekar ettōn̄. “Kwe ilo tiim eo am, em̧ool emaron̄ wōr juon iien ad jide!”
Jinen Jayne ekar likūti rā in ikkure eo ioļapļap in doulul eo. Jayne ekar jipan̄ eo karōk m̧ōttan kein ikkure ko. Rekar leļo̧k emān aļaļ ko n̄an tiim̧ eo me enaaj jinoe m̧okta.
Ana rilikin Jayne ekar jinoe kajjojo eo kein kajuon. Ekar joļo̧k aļaļ ko n̄an mejatoto. Wāween an aļaļ ko jok ekar kwaļo̧k jete bukwōn ko me tiim eo emaron̄ em̧m̧akūt ie ioon rā in ikkure eo. Aolep aļaļ ko emān rekar jitlaļļo̧k, eo me meļeļein bwe Ana ekar bōk juon Yut! Ekar aikuj kōm̧akūt m̧ōttan kein ikkure ko an tiim̧ eo an emān bukwōn m̧aanļo̧k im kar bōk bar juon an iien kōm̧m̧ane.
Ak Ana ekar jab pād ilo tiim̧ eo an Jayne.
Jayne ekar nikwij pā ko pein im kajememe mejān. “Ikar kōjatdikdik bwe eban kōm̧m̧ane juon kadkad em̧m̧an,” Ekar unoojdikdik n̄an eo nej Jemen Ji-Ho.
“Kwon m̧ōņōņō!” Eo nej Jemen Ji-Ho ekar ba. “Ikkure in ej kab jinoe.” Ekar ettōn̄ dikdik n̄an im rōjan̄ e.
Ālkin kadkad eo an Ana kein karuo, tiim eo an Jayne rekar jolōn̄ļo̧k aļaļ ko. Ak rekar jab aikuj kōm̧akūt m̧ōttan kein ikkure ko ejjab āinwōt an kar tiim̧ eo an Ana.
Ilo aolep jolōn̄ļo̧k aļaļ ko aer kajjojo, ro uwaan baam̧le eo an Jayne rekar m̧ōņōņō im ettōn̄. Jayne ekar lale an m̧ōttan kein ikkure ko em̧m̧akūt ipeļaakin rā eo. Aolep rekar m̧ōņōņō.
Aolep bōtaab Jayne. Tiim eo an rekabde luuj wōt.
Āliktata, ekar itok an Jayne iien jolōn̄ļo̧k aļaļ ko. Ekar jolōn̄ļo̧k aļaļ ko imejatoto, ak juon wōt ekar jok im jitlaļļo̧k. Tiim eo an rekar kōm̧akūti m̧ōttan kein ikkure ko m̧aanļo̧k ak juon wōt bukwōn.
Jayne ekar nukwij pā ko pein. “Ij kam̧ōj eō!” ekar lam̧ōj. “Ikōņaan bwe kōm̧ en wiin.”
Iien eo wōt, aolep rekar jab keroro. Ke ekar reilōn̄ļo̧k, baam̧le eo an rekar kalimjōke e. Rekar āinwōt reilbōk bwe ekar lukkuun illu.
Turin mejān Jayne ekar bwil. Ekar nana an en̄jake bwe ekar jab m̧ōņōņō kōn baam̧le eo an. Ejjab ekkā an kajju lukkuun illu. Ekar jutak im etal jān doulul eo.
Eo nej Jemen Ji-Ho ej erļo̧ke ļo̧k pein. “Kwojjab aikuj in etal,” ekar ba. “Wiin ejjab aolep men. Baj kajjieon̄n̄an limo.”
“Ekwe.” Jayne ekar bar jijet laļļo̧k. Ekar kōņaan m̧ōņōņō āinwōt aolep ro jet. Ekar bōk kitwōn im lale an eo rilikin Ben jolōn̄ļo̧k aļaļ ko.
“Em̧m̧an am̧ kadkad, Ben!” Eo nej Jemen Ji-Ho ekar ba. Ekar āinwōt elukkuun m̧ōņōņō.
Jayne ekar reilo̧k n̄an eo nej Jemen Ji-Ho kōn mejān elukkuun in kabūrōrō. Ekar kabokbok n̄an tiim̧ eo juon! Bōlen en̄ņe etke ekar lukkuun m̧ōņōņō.
Ke rekar jino iien eo aer, Jayne ekar pepe bwe en kabokbok n̄an aolep ilo tiim ko jim̧or. Eo nej Jemen Ji-Ho ekar jim̧we. Wiin ekar jab men eo aorōk. Jisōs ekar maron̄ jipan̄ e m̧ōņōņō kōn ro uwaan baam̧le eo an men̄e ekar luuj.
Ke ekar iien an Ana ejjolōn̄ļo̧k aļaļ, Jayne ekar ettōn̄ dikdik n̄an e. “Jeraam̧m̧an! Kwomaron̄ kōm̧m̧ane.”
Jān turājet in doulul eo, Ana ekar ettōn̄ dikdik ļo̧k n̄ane. Jayne ekar en̄jake okmeņeņ itulowa. Ekar ļapļo̧k an m̧ōņōņō!
Kōmeļeļe ko jān Uran Duo