“Kinsa Gayod Ikaw,” Higala, Septiyembre 2024, 32–33.
Higala ngadto sa Higala
Kinsa Gayod Ikaw
Gikan sa usa ka interbiyo uban ni Olivia Kitterman ug Diana Evelyn Nielson.
Ang atong Langitnong Amahan nahigugma kanato. Gusto Niya nga motabang nato nga mahibalo kon kinsa kita. Iyang gimugna ang atong mga espiritu sa wala pa kita moanhi sa yuta. Kitang tanan anak nga mga lalaki ug anak nga mga babaye sa Dios.
Usahay mobati ta nga nag-inusara o nabalaka nga dili gayod kita mamahimong igo ang kamaayo. Si Jesukristo nasayod gayod kon unsay atong gibati. Motabang Siya kanato sa pagbuntog sa bisan unsa nga hagit. Ang lisod nga mga butang nga atong giatubang niini nga kinabuhi makatabang kanato nga mahimong sama ni Jesukristo kon modangop kita ngadto Kaniya.
Ang ebanghelyo motabang kanato nga makita ang atong kaugalingon sama sa pagtan-aw sa Langitnong Amahan kanato. Pinaagi sa atong hugot nga pagtuo kang Jesukristo, ang atong mga pagsulay mahimong mga panalangin. Ang pagkahibalo kon kinsa kamo ug sa unsang paagi ang Dios nagtan-aw kaninyo mopanalangin ni bisan kinsa sa bisan unsang edad!
Samtang kita makasabot kon kinsa kita isip mga anak sa Dios, kita makatutok kon kinsa ang gusto sa Langitnong Amahan nga kita mamahimo. Atong atubangon ang atong mga hagit uban Kaniya. Bisan kita dili perpekto ug makahimo og mga sayop, makakaplag kita og paglaom sa pagkahibalo nga kita mga anak sa Dios.
Pangitaa ang mga Paborito
Kitang tanan managlahi. Aduna kitay lainlaing mga talento, mga ganahan, ug mga dili ganahan. Apan kitang tanan mga anak sa Dios!
Gamita ang mga timailhan sa pagpuno sa tsart ug pangitaa kon unsa ang nakapainteres sa matag usa niini nga mga higala. Sugyot: Butangi ug X ang imong nahibaloan nga dili tinuod. Ang una gihimo alang nimo. Kon nahuman na mo, ang matag kolum kinahanglang adunay usa ka walay sulod nga kwadrado!
-
Ang motukar sa piano dili si Amara o si Jade.
-
Si Max dili ganahan og math.
-
Wala sa mga batang lalaki ang motukar og instrumento o mokarate.
-
Ang batang babaye nga ganahan og mga hayop kay dili si Amara.
-
Si Kai lang ang ganahan og basketball.
Mga paghulagway pinaagi ni Sabrina Gabrielli