Dali, Sunod Kanako nga mga Kalihokan

Alang sa home evening o pagtuon sa kasulatan—o alang sa kalingawan lamang!

Agosto 26–Septiyembre 1

Lig-on nga mga Pundasyon

Alang sa Helaman 1–6

Gitudloan ni Helaman ang iyang mga anak nga lalaki sa pagtukod sa ilang kinabuhi diha sa lig-on nga pundasyon ni Jesukristo (tan-awa sa Helaman 5:12). Ang pundasyon mao ang kon unsa nga butang ang itukod niini. Ang lig-on nga pundasyon naghimo sa tibuok bilding nga lig-on, bisan pa sa mga bagyo. Pagtukod og duha ka tore—ang usa sa lig-on nga pundasyon ug usa sa huyang nga pundasyon. Hain sa tore ang mas lig-on? Unsaon nato pagtukod sa atong mga kinabuhi ngadto kang Jesukristo?

Alang sa mas gagmay nga mga bata: Tabangi ang inyong gagmayng mga bata sa pagpangita og butang nga sa ilang hunahuna lig-on gayod. Unsa ang ilang nakit-an? Itudlo nga kita mahimong lig-on uban ni Jesukristo.

Septiyembre 2–8

Pagpamatuod kabahin ni Kristo

Alang sa Helaman 7–12

Daghang mga tawo diha sa mga kasulatan nagtudlo ug nagpamatuod bahin ni Jesukristo (tan-awa sa Helaman 8:16–20). Mahimo ka usab nga magsugod sa pagtukod sa imong pagpamatuod bahin Kaniya! Ang pagpamatuod usa ka butang nga imong gituohan o nahibaloan nga tinuod mahitungod sa Langitnong Amahan ug ni Jesukristo. Isulat ang imong pagpamatuod ug praktisa ang pagpakigbahin niini sa imong pamilya o mga higala.

Alang sa mas gagmay nga mga bata: Pangutan-a ang inyong mga anak kon unsa ang ilang ganahan mahitungod ni Jesukristo. Dayon ipakigbahin ang inyong pagpamatuod kabahin sa Manluluwas ngadto kanila.

Septiyembre 9–15

Si Samuel Mikatkat sa Paril

Alang sa Helaman 13–16

Si Samuel usa ka propeta nga nagtudlo bahin ni Jesukristo diha sa ibabaw sa paril sa siyudad (tan-awa sa Helaman 13:4). Adto sa pahina 12 ug himoa ang craft aron matabangan ka sa pagsaysay sa istorya ni Samuel.

Alang sa mas gagmay nga mga bata: Guniti ang inyong gagmay nga mga bata samtang nagtindog sila sa usa ka lingkoranan ug nagpakigbahin sa unsay ilang nahibaloan bahin ni Jesukristo, sama sa gibuhat ni Samuel.

Septiyembre 16–22

Pagpundok nga Dula

Alang sa 3 Nephi 1–7

Misaad si Jesukristo nga Siya mopundok sa tanan Niyang mga anak tungod kay gihigugma Niya ang matag usa ug gusto nga sila makabaton sa ebanghelyo (tan-awa sa 3 Nephi 5:24). Pagdula og dula mahitungod sa pagpundok. Patindoga ang mga magdudula nga mag-alirong. Usa ka tawo sa tunga ang magsulti og usa ka kamatuoran bahin sa iyang kaugalingon, sama sa iyang paborito nga kolor. Kon kana nga kamatuoran tinuod ni bisan kinsa, moanha usab sila sa tunga. Padayon hangtod ang tanan mapundok diha sa tunga.

Alang sa mas gagmay nga mga bata: Pagdula og tago-tago uban sa inyong gagmay nga mga bata. Gaksa sila pag-ayo kon makit-an ninyo sila. Hisgoti kon sa unsang paagi si Jesukristo misaad nga Siya mopundok kanato bisan asa pa kita.

Septiyembre 23–29

Si Jesukristo Mao ang Kahayag

Alang sa 3 Nephi 8–11

Si Jesukristo mao “ang kahayag ug ang kinabuhi sa kalibotan” (3 Nephi 9:18). Tan-awa ang pagsubang o pagsalop sa adlaw uban sa inyong pamilya. Dayon pagdrowing og hulagway kon unsay inyong nakita. Samtang nagdrowing kamo, hisgoti ang mga rason nga gihigugma ninyo si Jesukristo ug giunsa Niya pagdala kaninyo og kahayag.

Alang sa mas gagmay nga mga bata: Adto sa gawas ug tan-awa ang lainlaing mga kahayag, sama sa adlaw, sa mga bituon, o sa bulan. Pangutan-a ang inyong gagmay nga mga bata kon unsa ang ilang gibati sa kahayag. Hisgoti kon sa unsang paagi si Jesukristo mao ang atong kahayag.

Mga paghulagway pinaagi ni Katy Dockrill