“Bo̧o̧k In Inepata Eo,” Jera, Jeptōm̧ba 2024, 36–37.
Bo̧o̧k In Inepata Eo
Olivia ekar ļōmņak kōn inepata ko an rellōn̄.
Bwebwenato in ekar kōm̧m̧an ilo USA.
Olivia ekar ekkairir nam̧ōjļo̧k jān kūlaaj ruum̧ eo an m̧okta jān an jem̧ļo̧k jikuuļ. Ekar kajjieon̄ jab reilo̧k n̄an jabdewōt ilo mej.
Rainin ekar raan eo kein kajuon an Olivia lo therapy. Jinen ekar kōmeļeļeiki bwe enaaj maron̄ kweilo̧k ippān juon taktō eo emaron̄ jipan̄ e kōn inepata ko an. Olivia ekar ļap an en̄jake inepata. Jet iien ej en̄jake inepata im ekar lukkuun pen n̄an kiki ak m̧ōņōņō ippān ro jeran.
Olivia ekar iuwe ilo wa eo ippān Jinen im addimakoko ilo an jijet ilo jea eo.
“Em̧m̧an ke am̧ mour?” M̧am̧a eaar kajjitōk.
Olivia ekar jab uwaak ium̧win jidik iien. “Etke ij aikuj etal n̄an taktō?”
Jinen ekar jino kattōre wa eo. “Jemedwōj Ilan̄ ej letok n̄an kōj taktō ro n̄an jipan̄ kōj. Āinwōt wāween An letok n̄an kōj men ko jet n̄an jipan̄ kōj, āinwōt ro m̧ōttad im jeje ko rekwojarjar. Kwoj ke keememej laajrak in jeje ko rekwojarjar jaar kōm̧m̧ani?”
Olivia ekar em̧ajidjid. Jinen ekar jipan̄ e pukot eoon ko me rekar jipan̄ e kōn inepata ko an. Kajjojo eoon, Jinen ekar je ijo n̄an pukote eo juon. Ke Olivia ekar inepata ilo bon̄ōn̄, liin ekōn jar im pukot eoon ko ilo jeje ko rekwojarjar. Innām enej riiti eoon ko ilo laajrak eo m̧ae iien emaron̄ kiki.
Ke Olivia im Jinen rekar etetal laļļo̧k n̄an opiij eo an taktō eo, Dr. Posy ekar kwaļo̧k kajieen. Ekar kajjitōk ippān Olivia kōn en̄jake ko an. Olivia ekar jiron̄ e jidik kōn inepata ko an.
“Ebo̧o̧ļ armej ewōr ippāer men eo jej ņaetan inepata,” Dr. Posy ekar ba. “Eļap aer inepata āinwōt kwe. Ak kwomaron̄ kōm̧m̧ane jet men ko n̄an jipan̄ eok kadikļo̧k am̧ en̄jake inepata. Kwomaron̄ kajjieon̄ juon iaer ippa?”
Olivia ekar reilo̧k n̄an juuj ko an im emajidjid.
Dr. Posy ekar leļo̧k n̄an Olivia juon bo̧o̧k jidikdik. “En̄in ej juon bo̧o̧k in inepata. Ej kōjparok inepata ko ad, bwe jen jab aikuj ļōmņak kaki.”
Olivia ekar karo̧o̧lole bo̧o̧k eo ilo pein. Ejjab āinwōt n̄e elōn̄ jabdewōt men raorōk ie.
“Tokālik kwoj en̄jake mijak, je inepata ko am̧ ilo juon peba im likūt ilowaan bo̧o̧k in,” Dr. Posy ekar ba. “Innām kāālet juon iien n̄an kōppeļļo̧ke bo̧o̧k eo aolep raan kōn iien inepata. Eļan̄n̄e kwoj inepata kōn jabdewōt men m̧okta jān iien inepata eo, ej ba, ‘Ijjab aikuj in ļōmņak kake menin kiiō.’”
“EM̧M̧AN,” Olivia ekar ba. Dr. Posy ekar jipan̄ e je inepata ko an reļļap, im Oivia ekar kadeļo̧n̄e ilowaan bo̧o̧k eo.
Tokālik ilo raan eo, juon an Olivia inepata ekar kaju waļo̧k ilo kōļmenļo̧kjeņ eo an. Ej pād ilowaan bo̧o̧k in inepata eo, ekar ba ippān make. Imaron̄ inepata kōn men in tokālik. Ekar kajjieon̄ in kabōjrak an ļōmņak kake. Ekar ikkure kake ippān ļaddik eo jatin
Ke ekar iien kiki, Olivia ekar ikkōm̧kōm̧. Abūnmake ekar waļo̧k n̄e inepata ko an rej nanaļo̧k wōt. Ej likūti bo̧o̧k in inepata eo an im jeje ko rekwojarjar an iturin im kar kūr jinen.
“Ta eo ej waļo̧k eļan̄n̄e ejjab jerbale?” ekar kajjitōk.
Jinen ekar atbakwōje. “Innām jej kajjieon̄ wot. Jemedwōj Ilan̄ enaaj jipan̄ eok lo wāween ko jet me rejipan̄.”
Olivia ekar emajidjid. “Bōlen ij aikuj je men ņe n̄an bo̧o̧k in inepata eo barāinwōt.”
“Juon ļōmņak em̧m̧an,” M̧am̧a eaar ba. Ekar jar ippān Olivia. Men in ekar jipan̄ Olivia em̧m̧anļo̧k jidik an en̄jake.
Jidik iien ālkin an jinen kar kune tōma ko, juon inepata ekar waļo̧ktok ilo kōļmenļo̧kjeņ eo an Olivia Ekar kabbōl ļaam̧ eo an. Ekar je inepata eo im likūti ilowaan bo̧o̧k eo n̄an tokālik. Ekar bar jar im kajjitōk ippān Jemedwōj Ilan̄ n̄an kaenōm̧m̧an e.
Innām ekar kōppeļļo̧ke jeje ko an rekwojarjar im pukote juon eoon kar m̧aake jān laajrak in jeje ko rekwojarjar. Eo kein kajuon ekar loe ekar Aiseia 41:10. Ekar ba, “Kwōn jab mijak, bwe Ij pād ippam̧.”
Eo juon turin eoon eo, Jinen ekar je “Katak im Bujen Ko 6:36.” Olivia ekar etale eoon eo im kar kōļap ainikien an riiti. “Reitok n̄an Eō ilo ļōmņak otemjeļo̧k; jab pere, jab mijak.”
Olivia ekar en̄jake aeņōm̧m̧an. Ekar jeļā bwe enaaj bōlen ļōmņak kōn elōn̄ļo̧k inepata ko. Ak Jemedwōj Ilan̄ ekar leļo̧k n̄an e elōn̄ men ko n̄an jipan̄ e em̧m̧anļo̧k an en̄jake. Ekar uwaake jar ko an. Im men ņe ekar lukkuun jipan̄!
Kōmeļeļe ko jān Jennifer Naalchigar