Ang Gikonektar nga Pagbasa sa Kasulatan

Ang mga kasulatan makatabang nato nga mobati og kahupayan ug gugma gikan sa atong Langitnong Amahan. Makahimo ka og usa ka kutay sa mga kasulatan nga basahon kon mabalaka o maguol ka.

Ang kolor ube nga mga porma adunay pipila ka mga bersikulo sa kasulatan nga imong magamit. Mahimo ka usab nga modugang sa imong mga paborito.

Paghangyo og ginikanan o lider sa Primary alang sa tabang!

Paghimo og lista sa imong paborito nga mga bersikulo sa kasulatan.
Diha sa imong mga kasulatan, pangitaa ang unang bersikulo diha sa imong lista. Paggamit og dekolor nga lapis sa pag-highlight sa bersikulo sa mainampingong paagi.
Tapad niini, isulat ang pakisayran sa kasulatan (o numero sa pahina, kon kana mas sayon kanimo) sa sunod nga bersikulo sa kasulatan nga gikan sa lista. Dayon adto niana nga bersikulo ug i-highlight usab kini.
Padayon sa pag-highlight sa mga bersikulo ug sa pagsulat sa pakisayran sa sunod nga kasulatan. Kon ma-highlight na nimo ang kataposan sa imong lista, isulat ang pakisayran sa kasulatan alang sa unang kasulatan nga imong gi-highlight.

Juan 14:27: “Kaninyo ibilin ko ang kalinaw, kaninyo ihatag ko ang akong kalinaw: hatagan ko kamo niini dili sama sa hinatagan sa kalibotan. Kinahangalan dili magkaguol ang inyong kasingkasing, ni magtalaw.”
Doktrina ug mga Pakigsaad 68:6: “Busa, paglipay, ug ayaw kahadlok, kay Ako ang Ginoo anaa uban kaninyo, ug mobarog diha kaninyo.”
Mga Proverbio 3:5: “Salig sa Ginoo sa bug-os mong kasingkasing.”
D&P 121:7: “Kalinaw nganha sa imong kalag; ug ang imong kalisdanan ug ang imong mga kasakitan sulod lamang sa mubo nga higayon.”
D&P 45:62: “Kay sa pagkatinuod Ako moingon nganha kaninyo, nga ang mga mahinungdanon nga butang nagpaabot kaninyo.”
Mga Proverbio 3:24: “Sa diha nga ikaw mohigda, dili ka malisang: Oo, ikaw mohigda, ug ang imong pagkatulog matam-is.”