“Buhat nga Mahinungdanon,” Alang sa Kalig-on sa mga Kabatan-onan, Ene. 2021, 20–21.

Buhat nga Mahinungdanon

Tema sa Kabatan-onan sa 2021:
Doktrina ug mga Pakigsaad 64:33–34

Pinaagi sa Kinatibuk-ang mga Kapangulohan sa Young Women ug sa Young Men

Ang Ginoo nagdapit kaninyo sa pag-apil sa “ang labing dako nga buhat” dinhi sa yuta.¹

Kamo talagsaong batan-ong mga babaye ug batan-ong mga lalaki mga kabahin sa usa ka talagsaong butang—kamo “nagpahimutang sa tukuranan sa usa ka mahinungdanon nga buhat” (Doktrina ug mga Pakigsaad 64:33). Kana nga buhat nagtabang sa Ginoo, si Jesukristo, sa pagpatuman sa Iyang misyon samtang moapil kita diha sa pagpundok sa Israel sa duha ka habig sa tabil ug sa pagtukod sa Zion.

Moapil sa Batalyon sa Kabatan-onan

Si Presidente Russell M. Nelson midapit sa matag usa kaninyo sa pag-apil niana nga buhat isip kabahin sa “grupo sa kabatan-onan sa Ginoo.”² Apan unsa ang usa ka batalyon? Ang usa ka batalyon mao ang usa ka espesyal nga yunit nga gituyo sa pagtuman sa piho nga mga tahas. Kana nagpasabut nga kamo kabahin sa usa ka espesyal nga yunit sa pagpangita ug pagtuman sa inyong bahin sa talagsaong buhat sa Ginoo.

Sa dihang ang propeta midapit kaninyo sa pagtan-aw sa katuyoan sa inyong kinabuhi inubanan sa pagtutok diha sa pagpundok sa Israel, ang inyong kinabuhi misugod nga mahisama ngadto sa kinabuhi ni Moises. Si Moises, kinsa gipadako isip usa ka prinsipe sa Ehipto, kinahanglang mopalayo alang sa iyang kinabuhi ug sa kaulahian nakontento na sa iyang kinabuhi sa pag-atiman sa karnero. Apan ang Ginoo mitawag kaniya ug mipahayag, “Ako adunay usa ka buhat alang kanimo” (Moises 1:6). Ang Atong Amahan sa Langit nasayud unsay wala buhata ni Moises: uban sa tabang sa Dios, si Moises mahimo nga instrumento sa pagluwas sa usa ka bantugan nga nasud—siya makahimo sa bisan unsang butang.

Kamo Makahimo og Kalainan

Tingali kamo maghunahuna, “dili man ko si Moises. Makahimo kaha ko og kalainan niining kalibutana?” Mibati usab kami sa samang paagi usahay, apan igo-igo na ang among gidugayon aron masayud nga ang tubag kay oo. Makita namo ang ordinaryo nga kabatan-onan sa kada adlaw kinsa nagpili nga magpakabuhi nga dili ordinaryo. Aduna silay gamhanang impluwensya niadtong naa sa ilang palibut pinaagi lang sa hilom nga pagkamatinuoron nga disipulo ni Jesukristo. Nagpalambo sila sa ilang mga talento ug nagtabang sa ilang mga pamilya nga nagmalampuson. Gitawag kamo sa usa ka propeta sa “pagpahimutang sa tukuranan sa buhat nga mahinungdanon.” Samtang kita mosalig ni Jesukristo ug magtinguha sa pagbuhat sa Iyang kabubut-on, kita makahimo og kalainan!

Wala kamo mag-inusara niini. Samtang kamo moapil sa batalyon sa Ginoo, nangapil kamo sa dakong pundok sa kabatan-onan sa tibuok kalibutan. Nagbarug kami sa inyong kiliran abaga sa abaga kauban sa inyong mga ginikanan, mga lider, ug mga higala, mga apostoles ug mga propeta, ug mismo ang mga anghel sa kalangitan, ang tanan nag-ambahan sa pagpaningkamot aron matuman ang buhat sa Ginoo (tan-awa sa Doktrina ug mga Pakigsaad 84:88).

Gikan sa Gagmay nga mga Butang Magagikan ang mga Dagko

Atoa kining buhaton sa hinay-hinay. Ang Ginoo nagdapit kanato sa paghimo og gagmay ug yanong mga lakang samtang kita anaa niining talagsaong buhat (tan-awa sa Doktrina ug mga Pakigsaad 64:33). Ang makanunayon, matinud-anong mga aksyon mao ang makapadayon nato ug modapit kanato sa pagduol ug pagtabang niadtong naglibut kanato. Ang uban niining yano nga mga butang mahimong personal nga gipahaum nganha kaninyo gumikan kay ang panaw sa tanan mahimong dili eksaktong parehas.

Pag-ampo aron makahibalo kon si kinsa kamo ug makasabut sa inyong personal nga tahas sa plano sa Dios. Pag-ampo aron masayud unsay gagmay ug yano nga mga butang nga inyong buhaton sa kada adlaw. Tingali kamo kinahanglan nga mogawas diha sa komportabling nahimutangan, apan kon kamo andam sa pagbuhat sa mga pag-aghat nga inyong madawat, hatagan kamo og dugang pa.

Sama sa bag-uhay lang nga gitudlo ni Presidente Nelson: “Samtang kita maningkamot nga mahimong mga disipulo ni Jesukristo, ang atong mga paningkamot sa pagpaminaw Kaniya kinahanglan nga mas gitinguha nato. Kinahanglan kini og tininuod ug makanunayon nga paningkamot sa pagpuno sa atong inadlaw nga kinabuhi sa Iyang mga pulong, sa Iyang mga pagtulun-an, sa Iyang mga kamatuoran.”³

Ang Ginoo Mopalapad sa Inyong mga Abilidad ug Mousbaw sa Inyong Kalipay

Samtang kamo magtinguha og pagpadayag, ang Ginoo mogiya kaninyo aron masayud kon unsaon sa paggamit ang inyong indibidwal nga mga talento ug mga personalidad sa pagserbisyo ug pagpakabuhi sa ebanghelyo. Lugwayan pa Niya ang inyong imahinasyon, pagkamamugnaon, ug kapasidad sa mga paagi nga wala gayud ninyo mahunahuna nga posible.

Samtang inyong ihalad ang inyong andam nga kasingkasing ug hunahuna ngadto sa Ginoo, inyong makaplagan ang dugang nga mga higala ug dugang nga mga oportunidad sa pagserbisyo. Ang inyong pagsabut sa pagkatawo ug katuyoan mapalig-on, ug kamo makakaplag og hingpit nga kalipay.

Usahay kita mobati nga kontento na nga mahimutang ug magpaundayon lang, apan ang Dios adunay laing butang nga giandam. Sama nga Siya adunay buhat nga mahinungdanon alang ni Moises, Siya adunay mahinungdanon nga buhat alang kaninyo. Ayaw pagluya! Kami adunay hingpit nga pagsalig diha kaninyo—ang batalyon sa kabatan-onan sa Ginoo.