“E dua na cakacaka cecere,” Me iSakisaki ni iTabagone, Janu. 2021, 20 – 21.

Dua na CakacakaCecere

2021 na iToko ni iTabagone:
Vunau kei na Veiyalayalati 64:33–34

Mai vei ira na mataveiliutaki raraba ni Goneyalewa kei na Cauravou

Sa sureti kemuni na Turaga mo ni lewena “na cakacaka cecere duadua ”e vuravura.¹

iVakatakilakila

Na iTawake ni iToko ni iTabagone 2021

Oi kemuni na goneyalewa kei na cauravou vakasakiti o ni tiki ni dua na ka totoka—o ni sa “tara tiko na yavu ni dua na cakacaka levu” (Vunau kei na Veiyalayalati 64:33). Na cakacaka o ya ena vukea na Turaga, o Jisu Karisito, me vakayacora na nona ilesilesi ni da vakaitavi ena vakasoqoni vata nei Isireli ena yasa ruarua ni ilati kei na tarai cake kei Saioni.

Lewena na Mataivalu ni iTabagone

Sa sureti kemuni yadua o Peresitedi Russell M. Nelson mo ni vakaitavi ena cakacaka oya me vaka ni o ni lewena na “mataivalu ni itabagone.”² Ia na cava na mataivalu? Na mataivalu e dua na lawalawa kenadau e caka me ra rawata vata eso na cakacaka bibi. Kena ibalebale ni o sa tiki ni dua na ilawalawa kenadau mo kunea ka qarava na nomu itavi ena cakacaka cecere ni Turaga.

Ena gauna e sureti iko kina na parofita mo raica na inaki ni nomu bula ka vakanamata tiko ki na vakasoqoni vata nei Isireli, sa tekivu me vaka na bula nei Mosese na nomu bula. O Mosese, ka a susugi cake vaka e dua na ravouvou ni Ijipita, a yaco me drotaka nona bula ka qai yaco e muri me matau ena nona bula rawarawa ni qaravi sipi. Ia a kacivi koya na Turaga ka kaya, “Au sa solia vei iko e dua na cakacaka” (Mosese 1:6). Sa kila tu na Tamada mai Lomalagi na veika e sega ni kila o Mosese: ni ena veivuke ni Kalou, sa rawa kina vei Mosese me cakacakataka na kena vueti e dua na matanitu cecere—e rawa ni cakava na ka kecega.

Sa Rawa Mo Vakayacora na Veisau

O na rairai vakataroga beka, “Au sega ni o Mosese. E rawa mada ga niu cakava e dua na veisau ena vuravura oqo? ” Eda sa vakila na sala vata ga ena so na gauna, ia sa rui balavu beka na noda tiko voli me da kila ni kena isau na io. Eda raici ira na itabagone e veisiga era sa digitaka tiko mera kakua ni bulataka na bula wele. Era sa veivakayarayarataki vakaukauwa sara vei ira era tiko veivolivoliti kaya ena nodra lako vakamalua voli me vaka ni ra tisaipeli dina i Jisu Karisito. Era sa vakatorocaketaka tiko na nodra taledi ka vukea na nodra matavuvale me ra bula qaqa. O sa kacivi mai vua e dua na parofita mo “vakadavora na yavu ni dua na cakacaka levu.” Ni da vakabauti Jisu Karisito ka segata meda cakava na lomana, eda na vakayaco veisau!

O ni sega ni tu duadua ena ka oqo. Ni o curu ki na mataivalu ni Turaga, o sa lewena e dua na ilawalawa itabagone vakaitamera e vuravura taucoko. Keimami tu tikivi kemuni kei ira na nomuni itubutubu, iliuliu, kei na itokani, iapositolo kei na parofita, kei ira na agilosi mai lomalagi, na sasaga kece me rawati na cakacaka ni Turaga (raica na Vunau kei na Veiyalayalati 84:88).

“Ia ena Tubu mai na Veika Lalai na Veika Lelevu.”

Eda na taura vakalailai ena dua na gauna. E sureti keda na Turaga me da taura na ikalawa lalai ka rawarawa ni da qarava na cakacaka cecere oqo (raica na Vunau kei na Veiyalayalati 64:33). Na itovo tudei, ka yalodina ena kauti keda yani ki liu ka sureti keda meda dolele yani ka vukei ira era tiko wavoliti keda. Eso vei ira na ka rawarawa oqo e caka sara ga me baleti iko me vaka ni na sega ni tautauvata na ilakolako ni tamata yadua.

Masulaka mo kila o cei o iko ka kila na nomu itavi ena ituvatuva ni Kalou. Masulaka mo kila na veika lalai ka rawarawa mo cakava ena veisiga. O na rairai lako tani beka mai na nomu vanua ni logaloga vinaka, ia ni o tuvakarau mo cakacakataka na veika o vakauqeti kina, ena soli vakalevu vei iko.

Me vaka a vakavuvulitaka ena dua na gauna walega oqo o Peresitedi Nelson, “Ni da sa tisaipeli i Jisu Karisito, sa gadrevi sara ki na noda sasaga meda rogoci Koya me vakainaki vakalevu cake. Ena taura na vakasama donu kei na sasaga gugumatua meda vakasinaita noda bula e veisiga ena Nona vosa, Nona veivakavulici, Nona dina.”³

Ena Vakarabailevutaka na Nomu iGu ka Vakalevutaka na Nomu Reki na Turaga

Ni o vakasaqara na ivakatakila, ena tuberi iko na Turaga mo kila me vakayagataki vakacava na nomu taledi kei na nomu ivakarau ni bula mo qarava ka bulataka na kosipeli. Ena vakarabailevutaka na nomu vakasama, nomu maqosa, kei na veika o rawata ena veisala o sega vakadua ni nanuma mo na rawata.

Ni o cabora na yalomu kei na nomu vakasama vua na Turaga, o na kunea e levu cake na itokani ka vakalevutaka na madigi ni veiqaravi. Ena vaqaqacotaki na nomu vakila na kemu ivakatakilakila kei na inaki, ka da na kunea na reki.

Ena so na gauna eda dau nanuma ni sa rauti keda me da sa vakacegu mada, ia na Kalou e tu tale vua eso na ka. Me vaka ga ni a tu Vua e dua na cakacaka levu vei Mosese, sa tu talega Vua e dua na cakacaka cecere me baleti iko. “Mo kakua ni oca; Keimami vakanuinui tu vei iko—na Nona mataivalu ni itabagone na Turaga.