Pagtulun-an human sa usa ka Pagtulun-an

Pagpahimutang sa Tukuranan

Ang tema niining tuiga makatabang ninyo nga makakita sa inyong tahas sa pagtukod sa gingharian sa Dios.

Doktrina ug mga Pakigsaad 64:33–34

33 Busa, ayaw pagluya diha sa maayo nga buhat, kay kamo nagpahimutang sa tukuranan sa usa ka mahinungdanon nga buhat. Ug gikan sa gagmay nga mga butang magagikan ang mga dagko.

34 Tan-awa, ang Ginoo nagkinahanglan sa kasingkasing ug sa usa ka andam nga hunahuna; ug ang andam ug ang masulundon mokaon sa kaayo sa yuta sa Zion sa katapusan nga mga adlaw.

Maayo nga buhat

Ang pagbuhat og maayo nga makapadasig o makapagana sa uban sa paghangop ug sa pagbuhat og maayo ug halangdon nga mga butang.

Tukuranan

Ang ilalom nga bahin sa gambalay, nagdala sa kabug-at sa estraktura sa ibabaw niini.

Mahinungdanon nga buhat

Ang atong mahinungdanon nga buhat mao ang pagtabang sa pagpalig-on sa gingharian sa Dios dinhi sa yuta, lakip sa pagpundok sa Israel.¹

Gikan sa gagmay nga mga butang

Matag gamay nga maayong butang nga inyong gibuhat nakatabang sa pagtukod og dakong butang.

Ang kasingkasing ug usa ka andam nga hunahuna

Ang Ginoo nagkinahanglan nga kita mopahinungod sa atong mga tinguha, mga hunahuna, ug mga pagbati ngadto sa Iyang buhat.

Mokaon sa kaayo sa yuta

Gikan sa Daang Tugon, nagpasabut og pagtunhay ngadto sa kabuhong (tan-awa sa Isaias 1:19).

Zion

Ang Zion mahimong mangahulogan nga: ang katawhan sa Ginoo, usa ka dapit diin magpuyo ang katawhan sa Ginoo, o sa unsang paagi nagpakabuhi ang katawhan sa Ginoo (putli og kasingkasing, nga nagpuyo sa celestial nga balaod).

Tan-awa sa Giya ngadto sa mga Kasulatan, “Zion,” scriptures.ChurchofJesusChrist.org; Gospel Topics, “Zion,” topics.ChurchofJesusChrist.org.

Mubo nga sulat

1. Tan-awa sa Russell M. Nelson, “Paglaum sa Israel” (tibuok kalibutan nga debosyonal alang sa kabata-onan, Hunyo 3, 2018), HopeofIsrael.ChurchofJesusChrist.org.