Bōbraik Tōmak ko Aō

Juon bon̄ ikar bwebwenato bajjōk ippān kumi ko m̧ōtta. Kōm kar ekōnono im raar jino ruruwe ro m̧ōtta me raar jab pād. Ekar jab em̧m̧an aō mour kōn ta eo raar ba. Innām ikar bōk juon im̧we jān Jetōb bwe ij aikuj kwaļo̧k rie kōn ta eo ij tōmak.

Ilo ejjeļo̧k bar aipedped, ikar jiron̄ er ekar jab kanooj em̧m̧an aō mour kōn ta eo raar ba im kar kajjitōk eļan̄n̄e remaron̄ jab ruruwe ke ikar pād. Raar ba ekar m̧ōttan wōt mour im ejjab aorōk. Ilo aō jab kwaļo̧k inepata kake, ikar ron̄jake meļeļe eo aer innām kar kōmeļeļeik ta eo ij tōmak. Innām ikar jerkak im ilo̧k.

En̄jake eo aō bon̄ōn jab eo ekar kōm̧m̧an aō ļōmņak kōn ta eo Josep Smith ekar ioone. Ke Josep Smith ekar bōk pileij kooļ ko, ekar ioon elōn̄ kaen̄taanan ko. Jekdo̧o̧n ta ewi dettan kaen̄taanan ko rekar pād, Josep Smith ekar jutak pen wōt im kar jab itweļo̧k. Anij ekar pād ippān Josep Smith im kar jipan̄ e, im ijeļā bwe Anij ekar pād ippa barāinwōt ke ikar kwaļo̧k rie kōn ta eo ekar jim̧we.

Ekar jako jet iaan ro m̧ōtta ilo bon̄ōn jab eo n̄an bōbraik tōmak ko aō, im ikar būrom̧ōj kōn men jab eo. Bōtaab ikar en̄jake aenōm̧m̧an im ineenōm̧m̧an n̄an kōm̧m̧ane ta eo ekar jim̧we. Jidik iien tok ālik, juon iaan ro m̧ōtta ekar kam̧m̧oolol eō kōn ta eo ikar ba. Kōnke kōn men jab eo, ikar bōk juon jemjerā me ekar kajoorļo̧k jān eo kar m̧okta.

Andrew F., Utah, USA