“Pagkat-on sa Pinulongan sa Espiritu,” Alang sa Kalig-on sa mga Kabatan-onan, Ene. 2021, 16–18.
Dali, Sunod Kanako
Pagkat-on sa Pinulongan sa Espiritu
Ang pagpadayag sama sa usa ka pinulongan nga matag usa kanato kinahanglan makat-on.
Paghulagway ni Michael Mullan
Ang pagkat-on og bag-ong pinulongan mahimong lisud nga buluhaton. Kon kamo nakasulay na og usa ka klase sa pinulongan sa eskwelahan o naningkamot sa pagkat-on og pinulongan sa inyong kaugalingon, lagmit nakahibalo kamo niini gikan sa kasinatian! Nagkinahanglan kini og pagkugi ug pagpahinungod. Nakat-on ko og Spanish sa akong misyon, nga sa sinugdanan malisud, apan sa kadugayan, uban sa tabang sa Espiritu, naanad ra ko niini.
Ganahan ko maghunahuna sa pagpadayag isip usa ka matang sa pinulongan—ang pinulongan sa Espiritu—nga kinahanglan atong makat-unan sa atong kinabuhi. Si Presidente Russell M. Nelson miingon, “Sa umaabut nga mga adlaw, dili na posible ang espirituhanong pagsugakod kon wala ang paggiya, pagdumala, paghupay, ug makanunayon nga impluwensya sa Espiritu Santo.”1
Kon inyong hunahunaon ang bahin niini, ang pagkat-on og usa ka bag-ong pinulongan ug pagkat-on sa pinulongan sa Espiritu adunay daghang pagkasusama. Tan-awa ang mosunod nga pagkasusama—gayud kini makatabang kanimo nga makat-on pa kon unsaon sa pagdawat og pagpadayag pinaagi sa pinulongan sa Espiritu.
Mga Estilo sa Pagkat-on
Sa dihang nagsugod pa kita sa pagkat-on og usa ka bag-ong pinulongan, ang lahi nga mga pamaagi magsilbi alang sa lainlaing mga tawo aron mahinumduman ang mga butang. Alang kanako, ang pagtuon sa gramatika ug pagsulat sa mga butang nakatabang gayud sa pagkat-on og Spanish. Ang uban nga mga misyonaryo mipili sa pagbansay nga makig-istorya sa ilang kompanyon. Usa ka pamaagi lagmit makatabang kay sa lain—sutaa unsay labing maayo alang nimo.
Kitang tanan dili makabati o makadungog sa Espiritu sa samang paagi usab. Hunahunaa ang akong mama, pananglitan. Sa kasamtangan nga nagtubo pa ako, nabalaka ko nga wala ko makabati sa Espiritu tungod kay wala ko makadawat og mga pag-aghat sama kaniya. Kanunay niyang ihulagway ang mga pag-aghat nga moabut nga mga pulong ngadto sa iyang hunahuna. Wala gayud kini nahitabo naku, mao nga naghunahuna ko nga dili jud ko makabati sa Espiritu. Apan sa paglabay sa panahon akong nadiskubrihan nga ang Espiritu makigsulti kanako kasagaran pinaagi sa mga pagbati o mga impresyon kay sa pinaagi sa mga pulong. Mga pagbati sa kalinaw, kalipay, ug gugma maoy sagad magkauban sa akong kasinatian sa pagpadayag.
Sama sa mga estelo sa pagkat-on, ang usa ka paagi sa pagbati sa Espiritu dili mas maayo kay sa uban. Ang matag usa kanato lahi, busa ang Espiritu makigsulti sa matag usa kanato sa lainlaing paagi. Sa Doktrina ug mga Pakigsaad, atong makat-unan mahitungod sa tanang matang sa mga paagi nga ang Espiritu makigsulti kanato. Siya mahimong “makalamdag sa [atong] mga hunahuna,” “mosulti og kalinaw sa [atong] mga hunahuna,” “mosulti [kanato] sa atong hunahuna ug sa [atong] kasingkasing”, o “mopuyo diha sa [atong] kasingkasing,” o tingali kita mobati og kainit sa atong dughan o “mabati nga kini husto”, ingon man usab sa daghang mga paagi (tan-awa sa Doktrina ug mga Pakigsaad 6:15, 23; 8:2; 9:8).
Samtang magtuon kita sa mga kasulatan ug magpraktis sa pagpaminaw sa Espiritu, makaila kita kon sa unsang paagi Siya makigsulti kanato.
Pangayo og Tabang
Kon kamo magkat-on og usa ka pinulongan, mahimong mapuslanon kaayo ang magpatabang gikan sa tawo kinsa nasayud sa pinulongan. Ang mga libro ug ubang mga kapanguhaan siguradong makatabang, apan kini nakapadali sa proseso nga makig-istorya ngadto sa tawo kinsa makasulti sa pinulongan.
Kon gusto kita nga magkat-on og dugang kabahin sa Espiritu, makakuha kita og dugang pa nga tabang kon mohangyo kita sa mga tawo nga atong gisaligan kon giunsa nila sa pagbuhat niini—mga sakop sa pamilya, mga lider, o mga higala. Apan ang labing importante mao ang paghangyo sa Langitnong Amahan. Mahimo kita nga mangayo Kaniya sa dugang nga mga oportunidad sa pagpaminaw sa Espiritu o alang sa tabang nga makaila kon kita makadawat og mga pag-aghat. Kon kita magmapainubsanon, mohangyo Kaniya sa pagtabang kanato, ug magbaton og hugot nga pagtuo nga Siya motabang kanato nga makat-on kon unsaon sa pagbati sa Espiritu, Siya motabang kanato.
Isulat Kini
Kon kamo nagkat-on og usa ka pinulongan, ang pagsulat usab sa mga butang makatabang kaayo. Magtinil ko og gamay nga notebook ngari nako sa tibuok adlaw aron isulat ang bag-ong mga pulong sa bokabularyo, ug mosulay ko sa pagsulat og journal diha sa Spanish sa matag gabii aron ko makapraktis. Wala kitay hingpit nga mga panumduman, mao nga ang pagsulat sa mga butang makapahimo kanato nga makaribyu.
Gidapit kita sa atong mga lider sa pagsulat sa mga espirituhanong mga impresyon aron dili kita makalimot niini.2 Ang pagsulat sa maong mga butang makatabang kanato sa Espiritu sa pipila ka mga paagi: (1) Makatabang kini kanato sa paghinumdom sa mga pag-aghat ug mga pagbati human ang panahon milabay. Tingali ang nangagi nga pag-aghat makatabang ninyo sa umaabut, o mahimo lang kini makapahinumdom kaninyo nga ang Espiritu gayud nga mamulong kaninyo. (2) Mao usab kini talagsaong paagi sa pagsubay kon giunsa ninyo pagbati sa Espiritu sa ngangagi aron mas mailhan pa ninyo kini sa umaabut. Nianang paagiha, makasugod kamo sa pag-ila sa Espiritu nga mas klaro.
Padayon sa Pagpaningkamot
Ug ang katapusan pero dili ang pinakaubos, ayaw pag-undang. Bisan adunay gasa sa mga dila, kini lagmit dili ninyo makat-unan ang usa ka pinulongan sa hingpit sulod sa tibuok gabii. Kon magpadayon kamo sa pagpraktis ug maningkamot og maayo, moabut kini kaninyo apan kinahanglan kamo nga magbaton og hugot nga pagtuo ug mopadayon sa paglahutay.
Ang pagkat-on sa pagdawat og pagpadayag ug mahimong mas nahiangay gayud sa Espiritu mao gayud ang usa ka tibuok kinabuhi nga paningkamot. Sigurado ko nga kon mangutana kamo sa inyong mga ginikanan o sa mga lider sa Simbahan, sila moingon nga sila naningkamot pa usab gihapon. Busa ayaw pagpakawala sa paglaum kon ang pamati niini ingon og dugay—dili lang kamo! Kitang tanan nagkinahanglan og panahon sa pagkat-on og bag-ong pinulongan. Busa pailub, padayon sa pagpaningkamot, ug ang Ginoo anaa aron sa pagtabang kaninyo nga makat-on sa pinulongan sa Espiritu.