“Vulica na Vosa ni Yalo,” Me iSakisaki ni iTabagone, Janu. 2021, 16–18.
Lako Mai, Mo Muri Au
Vulica na Vosa ni Yalo
Na ivakatakila e vaka e dua na ivosavosa eda gadreva yadua me da vulica.
Droini mai vei Michael Mullan
Na vulici ni dua na ivosavosa vou ena rawa ni cakacaka dredre. Kevaka a sa dua na nomu kalasi ni vosa e koronivuli se o sa tovolea mo vulica vakataki iko e dua na vosa, o na kila beka na veika oqo ena veika o sa sotava! E taura na cakacaka vakaukauwa kei na yalodina. Au vulica na vosa vaka-Sipeni ena noqu kaulotu, a dredre taumada, ia ni toso tiko, ena veivuke ni Yalo, sa qai matau mai.
Au taleitaka meu vakasamataka na ivakatakila me vaka e dua na ivosavosa—na ivosavosa ni Yalo—ni da gadreva yadudua me da vuli ena noda gauna ni bula. A vakavulica o Peresitedi Russell M. Nelson, “Ia ena veisiga ka lako mai, ena sega ni rawa na bula tiko vakayalo ke sega na cakacaka veituberi, veidusimaki, ka veivakacegui ni Yalo Tabu.”1
Ni o vakasamataka, na vulici ni dua na ivosavosa vou kei na vulici ni vosa ni Yalo e levu sara na ka erau tautauvata kina. Raica mada na veika tautauvata oqo—e rawa ni ra vukei iko mo vulica e levu na ka me baleta na ivakarau ni kena ciqomi na ivakatakila ena vosa ni Yalo.
iVakarau ni Vuli
Ena gauna eda vulica taumada kina e dua na ivosavosa vou, e duidui na iwalewale e muria na tamata yadua me rawata kina. Vei au, na vulici ni ituvatuva ni vosa kei na volavola a veivuke sara ena noqu vulica na vosa vaka-Sipeni. Eso tale na daukaulotu era vinakata me ra vakatovotovotaka na veivosaki kei ira nodra itokani. Ena rawa ni veivuke vakalevu cake e dua na iwalewale mai na kena tale kadua—mo raica na cava ena vinaka duadua vei iko.
Eda na sega ni vakila taucoko se rogoca na Yalo ena dua ga na sala. Taura mada na tinaqu, me kena ivakaraitaki. E dua na gauna niu tubu cake tiko, au a lomaleqataka niu sega ni vakila na Yalo baleta niu sega ni vakauqeti ena ivakarau vata a yaco vua. E dau vakamacalataka e veigauna ni dau yaco mai me vaka na vosa ki na nona vakasama na veivakauqeti. A sega vakadua ni bau yaco vei au me vaqo, au sa mani nanuma kina ni sa sega ni rawa niu vakila na Yalo. Ia au sa qai raica rawa ni toso na gauna ni dau veitaratara tiko kei au na Yalo vakalevu ena veika au vakila se uqeti kina na lomaqu ka sega ena vosa. Na yalo vakacegu, reki, kei na loloma era veiwekani vata kei na veika au sotava ena ivakatakila.
Me vaka ga ena iwalewale ni vuli, e dua na sala e vakilai kina na Yalo e sega ni vinaka cake mai na dua tale. Eda duidui kece o keda, o koya e duidui kina na nona veitaratara mai vei keda na Yalo. Ena Vunau kei na Veiyalayalati, e rawa ni da vulica kina na veimataqali sala kecega e rawa ni vosa kina vei keda na Yalo. E rawa ni “vakararamataka na [noda] vakasama,” “vakaceguya na [noda] vakasama,” “tukuna ki na [noda] vakasama kei na vu ni [yaloda],” se “tiko ga e yaloda,” se eda na vakila ni katakata mai na lomada se da na “vakila sara ni sa dodonu,” ka vakakina ena vuqa tale na sala (raica na Vunau kei na Veiyalayalati 6:15, 23; 8:2; 9:8).
Ni da vulica na ivolanikalou ka vakatovotovotaka na vakarorogo ki na Yalo, e rawa ni da kila na sala e vosa kina vei keda o Koya.
Kerea na Veivuke.
Ni o vulica tiko e dua na vosa, e rawa ni yaga sara vakalevu me da vukei mai vua e dua e kila na vosa. Na ivola kei na ivurevure tale eso e rawa ni veivuke, ia ena totolo cake na iwalewale ni da veivosaki kei na dua e dau vosataka na vosa.
Ni da vinakata me da vulica e levu cake na ka me baleta na Yalo, e rawa ni da vukei kevaka eda tarogi ira na tamata eda vakabauta na iwalewale era cakava kina—o ira na lewe ni matavuvale, iliuliu, se itokani. Ia e bibi duadua me da kerea vua na Tamada Vakalomalagi. E rawa ni da kerea Vua na veika me vaka na vakalevu cake ni madigi me da rogoca na Yalo se na veivuke me da kila ni da sa ciqoma na veivakauqeti. Kevaka eda sa yalomalumalumu, kerei Koya me vukei keda, ka vakabauta ni na vukei keda o Koya me da vulica na sala meda vakila kina na Yalotabu, ena vukei keda o Koya.
Vola na Veika Eso
Ni o vulica tiko e dua na vosa, nomu vola na veika eso e rawa ni veivuke vakalevu sara. Au dau kauta tiko e dua na ivolalailai ena siga taucoko meu vola na vosa vou au rogoca, kau na tovolea meu vakalewe ivolaniveisiga ena vosa vaka-Sipeni ena veibogi me rawa niu vakatovotovo kina. E sega ni taucoko sara na noda kato ni vakanananu, ni da vola na veika eso ena vakavuna me da railesuva tale.
Eda sa sureti mai vei ira na noda iliuliu me da dau vola na veivakauqeti vakayalo me da kakua kina ni guilecava.2 Ni da vola na veika vakaoqo ena rawa ni vukei keda vata kei na Yalo ena vica na sala: (1) e rawa ni vukei keda meda nanuma na veivakauqeti kei na vakanananu ni sa toso na gauna. Ena rawa beka ni vukei iko e dua na veivakauqeti taumada ena veisiga ni mataka, se ena vakananuma ga vei iko ni a vosa dina vei iko na Yalo. (2) Sa dua talega na sala cecere mo vola na sala o a vakila kina na Yalo ena gauna sa oti mo rawa ni kidava vakavinaka cake ena veisiga ni mataka. Ena sala oqori, sa rawa ni tekivu mo kila vakamatata cake na Yalo.
Tovolea Tikoga!
Kena iotioti ka sega ni lailai, kakua ni soro. Ena isolisoli ni vosataka na duivosavosa, ena sega sara ni rawa ni o vulica ga ena dua na bogi e dua na vosa. Ni ko ni vakatovotovo tikoga ka cakacaka tiko vakaukauwa, ena yaco mai, ia mo ni vakabauta ka kakavaki tikoga.
Na vulici ni kena ciqomi na ivakatakila ka yaco me salavata kei na Yalotabu e dua dina na sasaga ni bula taucoko. Au vakadeitaka kevaka o tarogi rau na nomu itubutubu se iliuliu ni Lotu, era na kaya ni ra se cakacakataka tiko ga. Kakua ni yalolailai kevaka o vakila ni taura tiko e dua na gauna—e sega ni o iko duadua ga! Eda gadreva taucoko na gauna me da vulica e dua na vosa vou. Mo dau vosota, tovolea tikoga, ka na tiko kina na Turaga me vukei iko mo vulica na vosa ni Yalo.