“Ekkatak Kajin eo an Jetōb,” N̄an Kōkajoorļo̧k Jodikdik ro, Jān. 2021, 16–18.
Itok, Ļoor Eō
Ekkatak Kajin eo an Jetōb
Revelesōn ej āinwōt juon kajin kōj kajjojo jej aikuj in ekkatak.
Kōmeļeļeik jān Michael Mullan
Ekkatak juon kajin kāāl emaron̄ in juon jerbal epen. Eļan̄n̄e ekar wōr juon ami kūlaaj in kajin ilo jikuuļ ak kar kajjieon̄ in ekkatak juon kajin kōn kom̧ make, kom̧ maron̄ jeļā menin jān iminene! Ebōk buuļ jerbal im kijejeto. Ikar ekkatak kajin Jipānej ilo mijen eo aō, eo ekar pen ilo jinoin, bōtaab āliktata, kōn jipan̄ eo an Jetōb, Ikar jino iminene kake.
Ikōņaan ļōmņak kōn revelesōn āinwōt juon kain kajin—kajin eo an Jetōb—me kōj kajjojo jej aikuj in ekkatak ilo tōreān mour eo ad. Būreejtōn Russell M Nelson ekar ba, “Ilo raan ko rej itok, enaaj maron̄ pen n̄an jo̧o̧r ilo jetōb ilo ad jab tōl, jineet, kaenōm̧m̧an, im bōk kareel eo an Jetōb Kwojarjar.”1
N̄e kom̧ij ļōmņak kake, ekkatak juon kajin kāāl im ekkatak kajin eo an Jetōb ewōr juon men eļap eier wōt juon ie. Kalimjōk men kein reier wōt juon ie—remaron̄ lukkuun jipan̄ kom̧ ekkatak eļapļo̧k kōn ekōjkan n̄an bōk revelesōn jān kajin eo an Jetōb.
Repeļtan Ekkatak
N̄e ilo jinoin jej ekkatak juon kajin kāāl, jekjek ko rooktak jān doon rej jerbal n̄an armej ro n̄an aer keememej men ko. N̄a n̄a, ekkatak kūram̧a im jeje men ko relukkuun in kar jipan̄ ilo ekkatak kajin Jipenej. Mijenede ro jet raar kōņaan kaminene kōnono ippān eo m̧ōttaer. Juon jekjek emaron̄ in jipan̄ eļapļo̧k jān bar juon—kappukōt ta eo ej jerbal em̧m̧an tata n̄an kwe.
Jejjab aolep en̄jake ak ron̄ Jetōb ilo juon wōt wāwewen barāinwōt. Ļōmņak kōn jinō, n̄an waanjon̄ak. Ilo jidik iien ke ikar rūttoļo̧k, ikar inepata bwe ijjab maron̄ en̄jake Jetōb eo kōnke ijjan̄in kar bōk im̧we ko ilo wāween eo ekar būki. E ekōn aolep iien kōmeļeļeik im̧weo ko rej itok āinwōt naan ko n̄an ļōmņak eo an. Ejjan̄in kar waļo̧k wāween in n̄an n̄a, kōn menin iaar ļōmņak ijjab maron̄ en̄jake Jetōb eo. Bōtaab ikar lo ilo iien ko bwe Jetōb eo ej kōnono ippa eļap tata ilo en̄jake ko ak im̧weo ko ijello̧kin ilo naan ko. En̄jake ko an aenōm̧m̧an, lan̄lōn̄, im iakwe ekkā aer koba ippān en̄jake ko aō kōn revelesōn.
Ejja āinwōt ippān repeļtan ekkatak ko, juon wāween en̄jake Jetōb eo ejjab em̧m̧anļo̧k jān eo juon. Kōj kajjojo ejej uwaan, kōn menin Jetōb eo ej kōnono ippād kajjojo ilo jekjek ko rooktak jān doon. Ilo Katak im Bujen Ko, jemaron̄ ekkatak kōn aolep kain wāween ko Jetōb emaron̄ ekōnono n̄an kōj. E emaron̄ “kōmeramļo̧k [ļōmņak] eo ad,” “kwaļo̧k aenōm̧m̧an n̄an [ļōmņak] eo ad,” “ba n̄an [kōj] ilo ļōmņak eo ad im ilo [būruōd],” ak “pād ilo [būruōd],” ak māāņāņ ilo būruōm̧ iloam̧ ak “en̄jake bwe e jim̧we,” ebar āinwōt lōn̄ wāween ko jet (lale Katak im Bujen Ko 6:15, 23; 8:2; 9:8).
Ilo ad ekkatak jeje ko rekwojarjar im kaminene ron̄jake Jetōb eo, jemaron̄ kile ekōjkan An kōnono n̄an kōj.
Kajjitōk kōn Jipan̄
N̄e kom̧ij ekkatak juon kajin, emaron̄ in kanooj jipan̄ n̄an bōk jipan̄ jān juon eo me ejeļā kajin eo. Bok ko im kein jipan̄ ko jet aaer rejipan̄, bōtaab ekōm̧ōkajļok jekjek eo n̄an kōnono n̄an juon eo ej kōnono kajin eo.
N̄e jej kōņaan ekkatak eļapļo̧k kōn Jetōb, jemaron̄ bōk eļapļo̧k jipan̄ eļan̄n̄e jej kajjitōk ippān armej ro jej lōke er ekōjkan aer kōm̧m̧ane—ro uwaan baaml eo, ritōl ro, ak ro jerad. Bōtaab men eo aorōk tata ej n̄an kajjitōk ippān Jemādwōj Ilan̄. Jemaron̄ kajjitōk Ippān kōn men ko āinwōt ļapļo̧k in iien ko rem̧m̧an n̄an ron̄jake Jetōb ak n̄an jipan̄ kile n̄e jej bōk im̧we ko. Eļan̄n̄e jej ettā, kajjitōk Ippān n̄an jipan̄ kōj, im wōr tōmak bwe E enaaj jipan̄ kōj ekkatak ekōjkan en̄jake Jetōb eo, E enaaj jipan̄ kōj.
Je Men ko
N̄e kom̧ij ekkatak juon kajin, je men ko remaron̄ in kanooj ļap aer jipan̄ barāinwōt. Ikar bōk wōt ippa juon bok in jeje ilo aolepān raan eo n̄an je naan ko rekāāl ikar ron̄, im kōn kar kajjieon̄ je ilo kajin Jipenej ilo jōnōļ eo aō kajjojo bon̄ bwe in maron̄ kaminene. Ejjab em̧m̧an ememļo̧kjeņ ko ad, kōn menin je men ko ekōm̧m̧an ad bar ro̧o̧l likļo̧k n̄an etali.
Kar kajjitōk ippād jān ritōl ro ad n̄an je im̧we ko ilo jetōb bwe jen jab meļo̧kļo̧ki.2 Je kain men kein remaron̄ jipan̄ kōj kōn Jetōb eo ilo jejjo wāween ko: (1) Emaron̄ jipan̄ kōj keememej im̧weo ko im en̄jake ko ālkin an iien eļļāļo̧k. Bōlen juon im̧we m̧oktaļo̧k enaaj jipan̄ kom̧ ilo ilju jekļaj, ak emaron̄ kakeememej kom̧ bwe Jetōb eo ekar lukkuun kōnono n̄an kom̧. (2) Ej barāinwōt juon wāween em̧m̧an n̄an jeļā wōt ekōjkan ami kar en̄jake Jetōb eo m̧oktaļo̧k bwe en em̧m̧anļo̧k ami maron̄ kile ilo ilju im jekļaj. Ilo wāween in, emaron̄ alikkarļo̧k ami maron̄ kile Jetōb eo.
Kajjieon̄ Wōt
Im eo āliktata bōtaab ejjab diktata, jab ebbweer Jekdo̧o̧n kōn menin letok eo an lo ko, emaron̄ lukkuun bwe kom̧ij jab maron̄ ekkatak juon kajin ilo jetjet ilo juon bon̄. Ilo ami kōmālmel wōt im buuļ kate eok, enaaj itok, bōtaab kom̧ij aikuj in wōt tōmak im niknik wōt.
Ekkatak n̄an bōk revelesōn im eromļo̧k wōt ilo ekkejel ippān Jetōb eo ej lukkuun in juon kijejeto toon wōt ami mour. Ij m̧ool eļan̄n̄e kom̧ kar kajjitōk ippān ro jinemi im jemāmi ak ritōl ro an Kabun̄ in, ren kar ba bwe rej jerbale wōt barāinwōt. Kōn menin jab bweradikļo̧k eļan̄n̄e ej āinwōt ebōk juon iien—ejjab kom̧ wōt! Jej aolep aikuj iien n̄an ekkatak juon kajin kāāl. Kōn menin kōmaan wa, jab bōjrak kajjieon̄ , im Irooj enaaj pād n̄an jipan̄ kom̧ ekkatak kajin eo an Jetōb.