Mushroom Scholarship eo

Jān Jun Hori

Ta katak ko imaron̄ ekkatak jān juon men eo an kajōjō āinwōt mushroom ro?

Kōmeļeļe jān Julia Yellow

Ejjab em̧m̧an ippa mushroom ko. Bwin im jekjek in—Idkeļo̧k wōt er n̄an jidik. Bōtaab ro jinō im jema raar jino kōpooj mushroom ko ke ikar juon ajri, kōn menin kōm kar m̧ōn̄ā ilo iien m̧ōn̄ā ko aolep raan. Ilo tōre in iien m̧adm̧ōd, ikōn jipan̄ ro jinō im jema ļo̧k em ebon̄. Ikōn jon̄e 200 gram in mushroom ko, kanni ilo juon pakij, im kōddāpe jiiļ eo ioon pakij eo. Ij keememej aō kōn limo kōnono ippān baam̧le eo aō. Ekar āinwōt eitien aolep iien juon nokon in jotan an baam̧le aolep raan.

Ekar barāinwōt letok kein mour n̄an baam̧le eo, kōn menin kōm kar aikuj in jipan̄. Bōtaab ewōr ruo kapan̄pan̄ ko, Eo m̧oktata, juon iaan tipi būrookraam̧ ko aō em̧m̧an tata ekar ilo iien eo kōmij aikuj in jerbal, kōn menin ikar jab maron̄ alooje. Im eo kein karuo, ilo iien eo ekar dedeļo̧k aō jerbal, pā ko peiū rekōn kilmej jān mushroom ko, im ekar pen n̄an joļo̧k kōļar eo im nām eo kōn joob. Ke ikar juon ajri, jet iien ikar ellotaan kōn etke iaar aikuj in lukkuun in jipan̄ aolep raan.

Mushroom ko rekar letok juon jeraam̧m̧an em̧m̧an ium̧win jidik iien, bōtaab āliktata wōņāān ko raar wōtlo̧k āinwōt an oran rikōm̧m̧an mushroom ro raar ļapļo̧k. Ikar ļōmņak bwe raar bōjrak kōnke wōņāān ko rowōtlo̧k, bōtaab ikar ekkatak juon m̧ool me ekar kailbōk eō ke ikar kadiwōjļo̧k jān kaļōj.

Ro jinō im jema raar aikuj jino kōpooj mushroom ko n̄an kakkoņ jāān ko n̄an kaļōj n̄an n̄a im ļeo jeiū im ļeo jatū. Raar bōjrak wōt kōnke raar tōpar jon̄an oran eo raar jibadōke. Ke ikar jeļā, ikar jook kōn aō kōn ellotaan. Ikar jab jeļā bwe ikar jerbal n̄an wōņāān kaļōj eo aō ilju im jekļaj. Ippānļo̧k men kein, baam̧le eo aō ekar jipan̄ eō!

Ikar ellotaan im bar ellotaan ilo jab jeļā bwe kōm kar kaddōk mushroom ko n̄an scholarship eo aō make. Alin̄ūrn̄ūr eo aō ekar āinwōt Leman im Lemuel ilo 1 Nipai 2:12: “Im āindein Leman im Lemuel … raar ellotaan kōnke raar jab jeļā kōn kōm̧m̧an ko an Anij eo eaar kōm̧anm̧an er.” Ikar kanooj in lem̧ōņōņō bwe Irooj elukkuun in jeļā kajjiō im kar kōjeraam̧m̧an eō, mekarta ellotaan eo aō.

Ikar jab ļōmņak inaaj kar indeeo m̧ōn̄ā mushroom ko. Bōtaab eļan̄n̄e enaaj kar ejjeļo̧k mushroom ko, imaron̄ kar ilo m̧ool būrom̧ōj jidik, kōnke imaron̄ kar jab wōr aō iien em̧m̧an n̄an keememej en̄jake ko ippān baam̧le eo aō. Kōnke kōn er, ikar ekkatak n̄an karorōk kōjeram̧m̧an ko aō im lōke ilo karōk eo an Irooj—im jab ellotaan! Kōn menin jekdo̧o̧n ikar dike mushroom ko, ij kiiō kam̧oolol kake er. Rej juon kōkaļļe aorōk n̄an eō n̄an keememej kōtaan ko an baam̧le eo aō.

Rijeje eo ej jokwe ilo Shingawa City, Japan.