“Jibadbad eo Eļap an Jepļaaktok eo,” N̄an Kōkajoorļo̧k Jodikdik ro, Jān. 2021, 3–5.
Jibadbad eo Eļap an Jepļaaktok eo
Jerbal eo Josep im Hyrum Smith raar jinoe, kobaļo̧k ippān ekanooj armej ro retiljek jet, ej wōnm̧aanļo̧k wōt ilo Kabun̄ in rainin.
Ke Josep Smith eo edik ekar etal n̄an wōjke ko n̄an jar, ekar lo juon visiōn ekabwilōn̄lōn̄, eo jeļā kake rainin āinwōt Visiōn eo Kein Kajuon.
Ilo visiōn in, Rilo̧mo̧o̧r eo ekar jiron̄ Josep bwe jerawiwi ko an kar meļo̧kļo̧ki. Ekar barāinwōt uwaake kajjitōk eo an Josep im kar ba bwe ejjeļo̧k iaan m̧ōn jar ko ilo tōre eo kar “watōke jān Anij āinwōt m̧ōņ jar eo im aelōn̄ in kiin̄ eo an.”
“Ilo ejja iien eo wōt,” Josep ekar keememej, “[I] kar [bōk] bōk juon kallim̧ur bwe tarlep eo an gospel eo aikuj in ilo juon juon tōre ilju im jekļaj naaj kwaļo̧ke n̄an n̄a.”1
Ālkin visiōn in aiboojoj, Josep ekar waļo̧ktok jān Bukin Wōjke ko Rekwojarjar n̄an jino m̧aanjabpopo eo an n̄an erom juon rikanaan an Anij.
Moronai im Bok in Mormon
Jilu iiō tokālik, ilo 1823 eo, lan̄ ko rekar peļļo̧k bar juon alen āinwōt m̧ōttan Jepļaaktok eo an Gospel eo an Jisōs Kraist ilo raan kein āliktata. Juon enjeļ kar etan Moronai ekar waļokļo̧k n̄an e im kar ba, “bwe Anij ekar wōr juon an jerbal n̄an [e] n̄an kōm̧m̧ane … [im bwe] ekar wōr juon bok kar doore, ej jeje ioon pileij gold ko” bwe epād ie “tarlep in Gospel eo” (Josep Smith—Bwebwenato 1:33–34).
Āliktata, Josep ekar bōke, ukōte, im publish e ļo̧o̧k in etto eo, jeļā kake ilo raan kein āinwōt Bok in Mormon eo.
M̧aan ro Jein im Jatin Retiljek
Hyrum ļeo jein Josep ekar iien otemjej jutak ilikin Josep. Ilo iien mour ko aer, Josep im Hyrum rekar jelm̧ae rinana ro im aer jum̧ae er. N̄an waanjon̄ak, rekar m̧ojņo̧ ilo jekjek ko eļap aer nana ilo Jikin Kalbuuj Liberty ilo Missouri ium̧win ļalem allōn̄ ilo iien eo eļap an m̧ōļo ilo 1838–39.
Ilo iien jelm̧ae kakkure eo, Hyrum ekar kwaļo̧k tōmak ilo kallim̧ūr ko an Irooj, ekoba juon ļōmņak eo ejjeļo̧k kajjitōk kake n̄an ko jān rinana ro eļan̄n̄e ekālet n̄an ko. Ilo Juun in 1844 eo, kar leļo̧k n̄an Hyrum kāālet eo n̄an mour ak n̄an ajeļo̧k mour eo an n̄an aiboojoj eo an Anij im n̄an “sili naan in kam̧ool eo an kōn bōtōktōkin”—pād iturejet in eo jatin jitōnbōro Josep (lale Katak im Bujen Ko 136:39).
Juon wiik m̧okta jān kar kamej er, Josep ekar jiron̄ Hyrum n̄an bōk baam̧le eo an im em̧m̧akūt. Ej ļap wōt aō m̧weiur n̄e ij keememej uwaak eo an Hyrum: “Josep, Ijjab maron̄ ilo̧k jān eok.’’2
Kōn menin Josep im Hyrum rekar etal n̄an Jikin Kalbuuj Carthage, ijo rekar mej kōn jerbal eo an Kraist im kōn etan. “Ilo mour rekar jab ajej, im ilo mej rekar jab jepel!” (Katak im Bujen Ko 135:3; kōmejaja kar kobaitok).
Juon Kūr n̄an Jerbal
Jej aikuj iien otemjej keememej wōn̄āān eo Josep im Hyrum Smith raar kōļļāiki, ippānļo̧k ebar kanooj lōn̄ em̧m̧aan ro, kōrā ro, im ajri ro jet, n̄an kajutak Kabun̄ in bwe kwe im n̄an en maron̄ lem̧ōņōņōik elōn̄ kōjeraam̧m̧an ko im aolep m̧ool kein kar kwaļo̧ki ewōr ippād rainin. Jejjab aikuj meļo̧kļo̧k tiljek eo aer eļap!
M̧okta jān mej eo an ilo 1844, Josep ekar jeik juon leta obrak kōn kajoor n̄an Armej ro Rekwojarjar. Ekar juon kūr n̄an jerbal, eo ej wōnm̧aanļo̧k wōt ilo Kabun̄ in rainin:
“Em̧m̧aan ro rejitōnbōro [im kōrā ro], jenaaj ke jab wōnm̧aanļo̧k wōt ilo jerbal in eļap? Bun̄m̧aanļo̧k im jab kōmtālik. Peran, em̧m̧aan ro rejitōnbōro [im sister ro]; im wōnm̧aanļo̧k, wōnm̧aanļo̧k n̄an anjo̧! …
“… Jen, kōn menin, āinwōt juon kabun̄ im juon armej, im āinwōt Ro Rekwōjarjar ilo Raan Ko Āliktata, katok n̄an Irooj juon katok ilo wānōk” (Katak im Bujen Ko 128:22, 24; kōmejaja kar kobaitok).
Ļōmņak kōn ta katok eo kwonaaj leļo̧k n̄an Irooj ilo jim̧we ilo raan ko rej itok wōt. Kom̧win peran—jeere n̄an juon eo kwoj lōke, im men eo aorōktata, jouj im bōk iien n̄an kōm̧m̧ane!
Ijeļā bwe Rilo̧mo̧o̧r ej m̧ōņōņō n̄e jej leļo̧k n̄an E juon joortak jān būruwōd ilo jim̧we, āinwōt An kar em̧ōņōņō ippān kōn menin joortak ko rem̧ool an brother ro, Josep im Hyrum, im aolep Armej ro Rekwojarjar ro jet retiljek.