Sa Vaka E Dua na iCurucuru ni Yalomu

Mai vei Richard M. Romney

Mekasini ni Lotu

Ena gauna era sa lagasere kina ena nodra matasere ni tabanalevu ena dua na soqo ni sereivakatagi ni veimatalotu, era sa vulica kina na itabagone oqo e vuqa na sala e rawa ki na sereivakatagi me kauti ira vata kece mai na tamata vakabauta.

tolu na itabagone

Megan C., Ethan M., kei Romy C. e tiko e dua na ka e rau tautauvata kina: E rau taleitaka na sereivakatagi ni vakarokoroko. E rau taleitaka na sala e veilaveti ka vakauqeti rau kina, na sala e rau vakila kina. Ka rau taleitaka na sala e veilaveti ka vakauqeti ira kina na tamata.

Megan, 18; Ethan, 19; kei Romy, 17, e tiko talega e dua na ka e ratou tautauvata kina: E ratou lagasere kece ena nodratou matasere ni tabanalevu mai Florida, Amerika. Ka se qai oti toka ga oqo na kena soli vei iratou na madigi levu cake mai na matasere me ratou wasea na nodratou taleitaka na sereivakatagi ena nodratou vakaitavi ena Soqo ni Sereivakatagi ni Veimatalotu.

“Na noda itikotiko raraba e tiko kina e dua na isema ni veimatavakabauta e kauti ira vakalevu vata mai na tamata mai na veiduidui veimatalotu,” e vakamacalataka o Ethan. Me kena ivakaraitaki, a vakarautaka na ilawalawa e dua na veivosaki ena dua na vakayakavi ni Iftar (na kakana vakayakavi ni Musolomani ni cava na nodra lolo ena veisiga ena vula tabu o Ramadan), ka tuvanaki kina e vica na cakacaka ni veivakatorocaketaki me vakataka na vakarautaki ni beqi dreketi ni vuli baleti ira na gone era vakaleqai tu, ka vakayacori e vica na vakayakavi kau mai vale, ka ra dabe veitikivi kina ena teveli vata ga ka ra veivosakitaka na kakana, na itovo vakavanua, kei na vakabauta era marautaka ena nodra itovo vakavanua.

era kana, lagasere, ka veiqaravi na itabagone

Era taleitaka na lewe ni matasere na kana vakayakavi ka veiqaravi vata kei ira na veimatalotu tale eso.

Meda sa Veitokani.

Na inaki ni cokovata, sai koya, mera vukei na tamata mai na veiduidui ivakarau ni bula mera mai veitokani.

“E tiko e dua na matavuvale mai Turky au dau raica tiko ena vakayakavi ni veimatalotu, ka ratou dau cici mai vei au ka kaya, ‘Keitou marau sara ga na raici iko tale! ’” A kaya o Romy. “Ena loma ni vuravura oqo sa levu sara kina na vakacacani ni matalotu kei na vakabauta, sa ka totoka me da lako vata mai ka mai veitalanoa vakai keda.” Ena dua na veiqaravi ni veivakatorocaketaki, “era a totoka sara na marama ena dua tale na lotu,” e kaya o koya. “Era a sega ni kauwaitaka na nona lotu e dua tale. Era a tiko ga e kea me ra solia na nodra veivuke. Sa veivakabulabulataki dina.”

“Eda na vakabauta beka na duidui ni veika eso,” e kaya o Megan, “ia au dau doka tikoga na nodra vakabauta na tamata ka sa ka totoka me da sema vata kei ira ena veigauna vakaoqo eda via vulica kina na veika baleti keda yadua.”

“Na noda lotu e dua vei ira na lewe vou ni cokovata oqo,” a kaya o Ethan. “Au sa vakavinavinaka sara ga ena veika era a cakava vei keda kei na nodra veiciqomi mai. Au kila ena so na vanua, era dau nanuma cala baleta na Lotu. O koya gona au sa dau vakavinavinaka kina ni sa rawa vei ira na tamata me ra ciqoma na nodra duidui ka vakasaqara na veika era tautauvata kina.”

Ena Lewa Vata

Ka dua vei ira na ka era tautauvata kina na ilawalawa ni vakabauta vakalotu kece oqo o ya na sereivakatagi. Na Soqo ni Sereivakatagi ni Veimatalotu sa rawa me madigi cecere vei ira na tamata vakabauta mera lomavata ena kena vakacaucautaki na Kalou. Na matasere ni tabanalevu sa na dua vei ira na veimama ni daseni ni ilawalawa era matataka tiko na veivavakoso ena siti taucoko.

“A tiko e dua na matasere ni lali, e dua na domorua, e dua na matasere levu, e dua na matasere lailai, e dua na domorua ni bituvakatagi kei na piano, kei na so tale,” e vakamacalataka o Megan. “Era a kerei na ilawalawa yadua me ra cakava e rua na sereivakatagi.”

A tomana o Megan, “Keimami a via vakadeitaka ni veika keimami sa lagata ena vakavuna mera kila na tamata ni da sa vakabauti Jisu Karisito ka vakakina ni da sa vakabauta na Tamada Vakalomalagi. Keimami a vinakata me keimami vakatubura e dua na yalo ni sokalou.”

Era a lewa na matasere e rua na sereivakatagi era a lagata taumada, “Na Veika Cecere kei na Veika Lalai,” mai vei Steven Kapp Perry, kei na “Sakaramede kei na iVakatakarakara,” mai vei Janice Kapp Perry, Steven Kapp Perry, kei Lynne Perry Christofferson.

“Na imatai ni sere e a domocake. E solia na veivakadeitaki ni mai vua na Kalou, e rawa ni o cakava e dua na ka, se vakacava sara na kena lailai se bibi sara, “e kaya o Ethan. “Na ikarua ni sere e tiko kina e dua na vakarokoroko titobu. E voleka ni vaka e dua na same, ka vakatubura e dua na yalo dina ni sokalou. ”

Vakatovotovo, Vakatovotovo, Vakatovotovo

Ni ra sa vakarau me ra lagasere, a vakayagataka o Ethan e dua na iwalewale sa vakayagataka oti o koya. “Au tovolea meu vakaliuca meu dromuci ena sere,” e kaya o koya. “Au raica rawa ni gauna au dau vakarorogo kina ki na ibalebale ni sere, au a rawa ni marautaka vakavinaka cake. E dina sara niu vakadeitaka meu rawa ni lagata vakavinaka, ia au raica ni rawarawa vei au meu cakava ena gauna e tiko kina na yaloqu ena itukutuku e tovolea tiko me tukuna. Au dau taleitaka meu vakaliuca na vakavakarau vakayalo. ”

“Keimami se lagasere tikoga ena soqoni ni sakaramede ka vakatovotovotaka na veika tale eso,” e kaya o Megan. “Ia keimami kila na bibi ni soqo ni veimatalotu, ka keimami sa vakadeitaka me sa vakarau vinaka tu na kena veitikina. Keimami a cakacaka sara kina vakaukauwa. ”

Ena ikarua ni sereivakatagi, a vakalailaitaki sobu na matasere lewe 14 ki na rua na domova. “Keitou na vakatovotovo tiko ena vei-Tusiti, vei ira na Cauravou kei na Goneyalewa,” e kaya o Megan. “E vakavuna meu vakasamataka mada na sere ena dua taucoko na macawa, ena dua na vula taucoko. Au sega ni dau cakava na ka oqo, ia au a kunea na sere ena YouTube kau a vakatagitaka sara tiko vakaveitarataravi. Au a vinakata meu torocake sara. Au a vinakata meu lagasere vakavinaka sara ka me keimami tara na yalodra na tamata tale eso. ”

A vakadonuya o Ethan, Megan, kei Romy ni vakatovotovotaka kece sara a laki yaga. “Ni o tokaruataka tiko ena veigauna kece,” e kaya o Romy, “na itukutuku ni sere ena tiko ga ena nomu vakasama kei na yalomu.”

matasere ni itabagone

Era a lagasere na matasere ena Soqo ni Sereivakatagi ni Veimatalotu.

Ena Vakasama, ena Uto

Na yalo o ya ena nodra vakasama kei na utodra sa ivakadinadina bula ni ra sa lagasere na matasere. “Na sere ruarua e totoka sara ga,” e kaya o Romy. “Era a vakanomodi na vakarorogo ka ra vakila na tamata yadua na Yalo ni sa lagati na sere e rua. Keimami a vakila kece na duavata. ”

“Na imatai ni sere e dau noqu sere marautaki,” e kaya o Megan. “Au vakila ni a yaco na kaukauwa o ya ena soqo. A dua na gauna marautaki niu sa lagata tiko kau nuitaka ni ra na marautaka kece talega. Ia ena ikarua ni sere, e a veiwaki vata vakavinaka na domo. Au vakabauta ni o ira kece era rogoca era a vakila e dua na yalo ni veidokai kei na qoroqoro vua na Kalou. ”

Ni sa yakavi bogi mai, a tomana o Megan, “Keimami a veivosaki rawa kei ira na vakaitavi kei ira na lewe ni vakarorogo. Au kila ni o ira na tamata era a taroga tiko na neimami daunisere me baleta na sere keimami a lagata — ‘Na mataqali sere vakacava o ya?’ se ‘Ni a kauta maivei na ilagalaga vaka o ya? ’ Keimami a qai veikilai sara vakayadudua ka veivosakitaka na sereivakatagi keimami a wasea kece. Au vakila ni sa rawa meu kilai ira vinaka sara vakalevu cake ena nodra sere, ka ra kilai keimami cake sara ena vuku ni neimami sere. Na sereivakatagi sa vaka e dua na icurucuru ni yalomu. ”

Na iBalebale ni Sereivakatagi Kivei Au

Megan: “E dua na vuna e tiko kina na serenilotu vei keimami, ka tiko na vuna e tiko kina na neimami sere raraba. Au vakabauta ni vuna ga o ya ni gadreva na Turaga meda vakila na vakacegu vata kei Koya. E dua na gauna bibi au rawa ni vakila kina na Yalo o ya niu dau vakasamataka na sere ni sakaramede. E vukei keda me da nanuma kina na iVakabula kei na veika kece e sa cakava o Koya vei keda. ”

Ethan: “Na sereivakatagi e baleta na kena kauti tiko na vakasama ena mua ni dua na itukutuku. E tiko e dua na duidui ena kena tukuni, ‘Ena rawa ni vukei au na Kalou ena gauna ni veivakatovolei,’ ni sa ka vinaka ka dina, kei na lagati e dua na serenilotu ena itukutuku vata ga o ya. Ena kerei iko mada vakalailai tale, ni ko lagata tiko. E vukei iko mo kila vakavinaka sara na itukutuku o ya ka sema ki na dua na ivakatagede titobu cake. Na lagasere e veiqaravi me vakarogoya cake se cava ga o via tukuna tiko vei ira era vakarorogo tiko. ”

Romy: “Niu dau vakarorogo tiko ki na ivakatagi tabu, au vakila niu sa voleka sara vei Jisu Karisito. Au kila deivaki ni o Jisu Karisito sa biuta mai na sereivakatagi ena vuravura oqo me rawa ni da reki ka kauti ira mai na tani ki vua. Niu gadreva meu vakila na Yalo Tabu, au na lagata e dua na serenilotu e yaloqu kei na noqu vakasama. Sa ikoya o ya e dua na sala talei meu reki kina. ”