“Paglaom diha kang Kristo,” Alang sa Kalig-on sa mga Kabatan-onan, Mayo 2021.
Sabado sa Hapon nga Sesyon
Paglaom diha kang Kristo
Mga Kinutlo
Mga kaigsoonan, niining panahon sa Pasko sa Pagkabanhaw kita nakatutok sa mahimayaong Pagkabanhaw sa atong Ginoo ug Manluluwas, si Jesukristo. Kita naghinumdom sa Iyang mahigugmaong pagdapit nga “duol kamo kanako, kamong tanan nga gikapuyan ug gibug-atan sa inyong gipas-an, ug papahulayon ko kamo.
“Isangon ang akong yugo ug sunda ninyo ako kay malumo ako ug mapaubsanon sa espiritu ug makapahulay kamo.
“Kay masayon ang akong yugo, ug magaan ang akong luwan” [Mateo 11:28–30].
Ang pagdapit sa Manluluwas nga moduol ngadto Kaniya usa ka pagdapit sa tanan nga dili lamang moduol ngadto Kaniya kon dili magpasakop usab sa Iyang Simbahan. …
Si Jesus gusto nga kita masayod nga ang Dios usa ka mahigugmaong Langitnong Amahan.
Ang pagkahibalo nga kita gihigugma sa atong Langitnong Amahan makatabang nato nga makaila kon kinsa kita ug masayod nga kita nahisakop sa Iyang dakong mahangturon nga pamilya. …
… Apan, bisan pa man sa mga hagit nga atong giatubang sa kinabuhi, sama nianang unang kabuntagon sa Pasko sa Pagkabanhaw, kita mahimong momata ngadto sa usa ka bag-ong kinabuhi diha kang Kristo, uban sa bag-o ug talagsaon nga mga posibilidad ug bag-ong mga kamatuoran samtang kita modangop sa Ginoo alang sa paglaom ug pagkahisakop. …
Ako namulong bahin sa paglaom diha kang Kristo dili agig panghinaot. Kon dili, namulong ko bahin sa paglaom nga gipaabot nga matuman. Ang ingon nga paglaom mahinungdanon sa pagbuntog sa kalisdanan, pagpasiugda og espirituhanong kalig-on ug kusog, ug pagkasayod nga kita gihigugma sa atong Amahan sa Kahangtoran ug nga kita Iyang mga anak, nga nahisakop sa Iyang pamilya. …
Ayaw kalimot nga kamo anak sa Dios, ang atong Amahan sa Kahangtoran, karon ug hangtod sa hangtod. Siya nahigugma kaninyo, ug ang Simbahan nagkinahanglan kaninyo. Oo, kami nagkinahanglan kaninyo! Kami nagkinahanglan sa inyong mga tingog, mga talento, mga kahanas, kamaayo, ug pagkamatarong.