“Ira na Bisopi—Era iVakatawa ni Nona Qele ni sipi na Turaga,” Me iSakisaki ni iTabagone, Me 2021.
Soqoni ni Matabete
Ira na Bisopi—Era iVakatawa ni Nona Qele ni sipi na Turaga
Veitikina
Na bisopi e tiko na nona itavi bibi ena nona veiqaravi vaka ivakatawa me dusimaka na itabatamata ka tubu tiko mai oqo, oka kina o ira na itabagone qase cake sega ni vakawati, vei Jisu Karisito. …
O na rawa beka ni taroga, “Se cava na vuna e dusimaki kina na bisopi me vakayagataka e levu na gauna vata kei ira na itabagone?” Na Turaga e sa tuvanaka na Nona Lotu me rawati kina na veika bibi ka dodonu me vakaliuci. O koya gona, na tuvanaki ni Nona Lotu sa tiko kina na ituvatuva ka wasei rua tiko kina na itavi ni bisopi. E tiko na nona itavi vakaivunau ena tabanalevu raraba, ia sa tu talega na nona itavi vakaivunau ki na kuoramu ni bete. …
E vuqa vei kemuni na tamata gone lomani o ni se sega ni kila vakavinaka sara se o cei o iko kei koya e rawa mo yaco mo vakataka. Ia sa vakarau mo ni vakayacora na veidigidigi bibi duadua ni nomuni bula. Yalovinaka ni veivakasalataki vata kei ira nomuni itubutubu kei nomuni bisopi ena veidigidigi bibi eso ka sa tu e matamuni. Vakatara vei bisopi me nomu i tokani ka daunivakasala.
Keitou kila ni ko ni sa dauvakatovolei ka dautemaki ena veitiki ni nomuni bula kece sara. E gadrevi vei keda kece meda veivutuni e veisiga me vaka e vakavulica o Peresitedi Nelson. Yalovinaka veitalanoa kei nomu bisopi me baleta e dua na ka e rawa ni vukei iko kina e dua na turaganilewa me vakataudonutaki kina nomu bula vata kei na Turaga ena vakavakarau ki na “cakacaka levu” sa vakarautaka o Koya me nomu ena iotioti ni tabagauna oqo. Me vaka na veisureti nei Peresitedi Nelson vei iko, yalovinaka vakayacori iko mo kilikili mo lewe ni mataivalu ni itabagone ni Turaga!