“Raica! Sai Au na Kalou ni Caka Mana,” Me iSakisaki ni iTabagone, Me 2021.
Soqoni ena Yakavi ni Sigatabu
“Raica! Sai Au na Kalou ni Caka Mana”
Veitikina
Na cakacaka mana, ivakatakilakila, kei na veikatalei e yaco vei ira na imuri i Jisu Karisito edaidai, ena nomu bula kei na noqu. Na cakacaka mana era cakacaka vakalou, na ivakatakilakila ka ivakaraitaki ni Nona kaukauwa tawayalani, ka veivakadeitaki tawayalani ni “sai koyakoya tikoga na Kalou e nanoa, ena siga edaidai, ka sega ni mudu” [Moronai 10:19]. Sai Jisu Karisito, ka bulia na wasawasa, e rawa ni vakamaravutaka; o Koya e a dolava na matadra na mataboko sa rawa me laveta cake na noda rai ki lomalagi; o Koya sa savai ira na vukavuka sa rawa me vakatudonutaka na noda malumalumu; o Koya sa a vakabula na tamata sa wamalai sa rawa meda tu yani ni sa kacivi keda ena “Lako mai, mo muri au” [Luke 18:22].
E vuqa vei kemuni o ni sa raica na cakacaka mana, ko ni sa kurabui kina. Era rairai ka lailai sara ni vakatauvatani vei Jisu ni a vakabula na mate. Ia na kena levu e sega ni vakaduidutaitaka na caka mana, ia baleta ga ni sa mai vua na Kalou. …
Sa dau yaco ena so na gauna eda nuitaka kina na caka mana me vakabulai e dua na daulomani, me sukalesu e dua na caka cala, se vakamalumutaka e dua na yalo ni tamata sa cudru se tuvakatani. Ni raici na veika ena matada vakayago, eda sa gadreva na Turaga me takoso, ka vakavinakataka na ka sa vakacacani. Ena vakabauta, ena yaco mai na caka mana, dina ga ni sega ena noda gauna se ena kena iwali eda a gadreva kina. …
Sa veivakananumi vei keda na Turaga, “Sa duatani na noqu ivalavala ka dua tani na nomudou ivalavala” [Aisea 55:8]. E kaci tu ko Koya, “Dou lako mai vei au, koi kemudou vakaaduaga sa oca, ka colata na icolacola bibi, ia kau na vakacegui kemudou” [Maciu 11:28]—mai na lomaleqa, rarawa, rere, talaidredre, kauwai vei ira na daulomani, kei na lalawa sa yali se vakacacani. Na vakacegu ena loma ni veilecayaki se rarawa o ya na caka mana