“Na iTuvatuva Vakalou Meda Yaco Meda Vakavinakataki Cake Kina,” Me iSakisaki ni iTabagone, Jiulai 2021, 2–5.
Na iTuvatuva Vakalou Meda Yaco Meda Vakavinakataki Cake Kina
Ni da raica na bula oqo ena kena ivakarau, eda raica ni sega ni dua na taro ni “me da dua na ka se sega ni dua na ka?” ia “meda yaco vakalevu cake se meda sega ni da dua na ka?”
Au a vakalougatataki me’u tiko vata kei na watiqu ena nodra sucu na luvei keirau yadua ka me’u tiko talega ena nodrau takali na noqu itubutubu yadua. Au a kurabui ni’u vakila na veika au a vakila ena gauna ni sucu kei na gauna ni mate. Au a vakila ni a yaco tiko e dua na ka vakalou. Na noda gauna e vuravura sa dua na tiki bibi tawamudu ni noda bula. E makataka o lomalagi na itekitekivu kei na icavacava ni bula vakavuravura yadua.
Na ka e gadrevi meda cakava ni da tiko ena vuravura oqo e rawa ni da kila walega ena noda kila na veika e yaco ni bera na sucu kei na cava ena yaco ni oti na mate. Kevaka sa ikoya ga qori na noda bula e vuravura, sa rawa beka meda “kana, ka gunu, ka ia na marau” (2 Nifai 28:7) ka sega soti ni kauwaitaki ira na tani. Ia ni da raica na bula vakayago ena kena ivakarau, eda raica ni sa sega ni dua na taro “meda dua na ka se sega ni dua na ka?” Ia “meda yaco vakalevu cake se meda sega ni da dua na ka?”1
Na noda kila na yavu ni veivakabulai—na noda bula ni bera na sucu, na inaki ni noda bula e vuravura, na noda bula ni oti na mate—kei na itavi bibi ni noda iVakabula, o Jisu Karisito, ena ituvatuva oqori e vakaraitaka vei keda ni na vukei keda o Koya ena bula oqo. Ni da caka veiyalayalati vata kei Koya, eda sa biuti keda ena salatu ni veiyalayalati—ka da na yaco me da vakataki Koya kei na Tamada Vakalomalagi vakalevu cake, ena veikalawa yadua.
Noda Bula ni Bera o Vuravura
E vakavulica na ivakatakila ni o keda eda luvena vakayalo na Kalou ka da a bula vata kei Koya ena dua na gauna balavu ni bera noda lako mai ki vuravura. A vakarautaka o Tamada Vakalomalagi e dua na sala me rawa kina ni da yaco me vakataki Koya. O ira era a digitaka na yavu ni veivakabulai i Tamada se ituvatuva ni marau ena bula taumada—ka sai keda kece sara—a digitaka me da “yaco me da vakavinakataki cake kina.”
Elder Christofferson kei na watina kei ira na luvena.
Noda Gauna e Vuravura
Eda a lako mai ki na dua na vuravura ka bulia na Kalou kei na Luvena, o Jisu Karisito. Eda ciqoma e dua na yagoda. Na vakayago e bibi me ciqomi kina na lagilagi e taleitaka na Kalou. Kevaka eda vakaraitaka ni da na muria na ivakaro ni Kalou, eda na “rawata na lagilagi e vakaikuritaki e ulu[da] me sega ni mudu ka sega ni mudu” (Eparaama 3:26). Sa kena ibalebale oqo ni da na yaco me vakataki rau na noda itubutubu vakalomalagi ka bula vata kei rau me tawamudu. Eda a kaila ena reki ena veika lagilagi oqo.
O iko kei au daru a wawa tu mai vakabalavu sara, ia oqo eda sa mai tu oqo e vuravura. Eda sa vakanamata ki na gauna eda na tucaketale kina ena yago sa uasivi sara ka tawamate rawa ka curu ki na matanitu vakasilesitieli me da marautaka kina na bula tawamudu—e dua na ka e rui talei sara ka sega mada ga ni da vakasamataka rawa. Ia ena gauna mada ga oqo, eda sa vulica ka segata tiko meda “muria se sega na veika kece sa vakarota vei [keda] na Turaga na [noda] Kalou” (Eparaama 3:25). Baleta ni da kila tu na ituvatuva ni Kalou, eda kila ni ivakaro oqo e sega ni soli me vakatabui kina na noda bula galala se marau—ia na kena veibasai ga. Na ivakaro sa ikoya na noda idusidusi ki na cecere ni bula galala kei na reki.
A Vakarautaka o Koya e dua na iVakabula
Ia, e dau dredre tu ga na bula. Eda sa tarabe kecega ni da vulica meda bula ena vakabauta. Ia a yalataka vei keda na Kalou ni bera ni buli na vuravura ni na vakarautaka o Koya e dua na iVakabula me vueti keda mai na ivalavala ca kei na mate. Mai na Nona vakararawataki kei na mate—na Nona Veisorovaki—a sauma kina o Jisu Karisito na noda ivalavala ca ka solia vei keda na isolisoli ni veivutuni. Ni da sa veivutuni, ena vosota o Koya na noda ivalavala ca ka savai keda mai na kena revurevu. Ka ena Nona Tucaketale, sa solia kina na iVakabula vei keda na isolisoli ni noda tucaketale kei na tawa mate rawa.
Ena Tekiduru na Duru Vakayadua Ga, mai vei J. Kirk Richards
Lakovi ni Salatu ni Veiyalayalati
Me vaka ga ni da sa sucu vakayago ki na vuravura vakayago oqo, sa dodonu meda sucu tale vakayalo ki na matanitu vakalomalagi. Eda cakava oqo ena noda cakacakataka noda vakabauti Karisito, veivutuni, papitaiso, ka ciqoma na Yalo Tabu. Oqo na itekitekivu ni dua na veisau vakayalo ka na taura yani na noda bula taucoko e vuravura. Eda dau vakatoka ena so na gauna me “vosota me yacova na ivakataotioti,” ka kena ibalebale ni da segata me da maroroya na noda veiyalayalati ni papitaiso me da talairawarawa ena noda bula taucoko, ka veivutuni kevaka e gadrevi ka toso tikoga ki liu. “Io, ena veigauna kece era veivutuni kina na noqu tamata,” sa kaya o Jisu, “au na vosota kina na nodra lako sese vei au” (Mosaia 26:30).
E Rawa Ni O Okata na Veivuke ni Kalou
Ena nomu bula ni se bera ni o sucu, o a digitaka na Kalou, o a digitaki Karisito, o a digitaka mo “yaco mo vakavinakataki cake kina” ena Nodrau veivuke. Ka sa rawa ni o okata na Nodrau veivuke. O iratou na Lewetolu Vakalou eratou sega ni daudigova ka tawa‑kauwai ena noda bula. Eratou lomani keda vakaoti ka vakayagataka na nodratou kaukauwa me vukei keda, ena kena levu ga eda na vakatara. Eratou dau rokova tikoga na noda galala ni digidigi, ia Eratou sa guta me vakalougatataki keda. E sa vakadeitaka vei keda o Jisu, “Ka’u na sega ni guilecavi iko, na mataqali i Isireli. Raica, ka’u sa ceuti iko ena qeteqete ni ligaqu” (1 Nifai 21:15–16).
Yaco Mo Vinaka Cake ena Veikalawa Yadua
Eso era nanuma ni matanitu vakasilesitieli e dua na inuinui dina vei ira na tani ka sega ni ganiti ira. Na dina sa ikoya, e sega ni dua ena vakadonui ke sega na loloma soliwale i Jisu Karisito. Ena vakavinavinaka, sa rawa mo rawata na Nona loloma soliwale. A kaya vei keda o Jisu ni o Koya sa vakamalumalumutaki vuravura. Ena nomu papitaiso kei na veiyalayalati tale eso, o sa vauci iko kina Vua ka o sa vakamalumalumutaki vuravura talega vata kei Koya.
E sega ni gadrevi mo rawata na bula uasivi sara e vuravura eke. Na parofita o Josefa Simici a vakatauvatana ki na kena kabati e dua na ikabakaba: o na tekivu mai ra ka kabata vakaikalawa ena vulici kei na bulataki ni ivakavuvuli eso ni kosipeli. Ka na vuli oqori, a vakavulica o koya, e tomani tikoga yani ena taudaku ni bula oqo—“Ia ena sega ni kilai taucoko ena vuravura oqo.”2
Na malumalumu cava ga, na dredre, se na rarawa eda sotava e vuravura, sa yalataka na Kalou vei ira na Luvena yalodina ni na sega ni dua na veivakalougatataki ena tarovi kevaka eda na tikoga ena sala ni veiyalayalati (se me da lesu totolo tale kina). Ena qai veisotari vinaka kece sara. Oqori na ituvatuva vakalou me da yaco me da vakavinakataki cake kina!