Na Vuna Mo Marau Kina

Mai vei David A. Edwards

Mekasini ni Lotu

Marau tiko! Sa solia vei iko na Turaga na vuna.

Sa solia vei keda na Turaga e vuqa na veisureti. Ka dau tokaruataka wasoma o Koya na kena eso e bibi. (Kena ivakaraitaki, a sa kaya vakavica beka o Koya e dua na ka vakaoqo “Lako mai vei au”?)

E dua na veisureti o na raica ni tokaruataki ena ivolanikalou o ya: “Mo dou marau ga.”

E dau tukuna oqo na Turaga ena gauna era saga tiko kina na Nona tamata mera muri Koya ia era sotava tiko na veisaqasaqa kei na veivakatovolei. Ena gauna e dau sureti keda kina o Koya meda marau, e dau solia o koya na vuna me vakauqeti keda meda dau mamarau. Me kena ivakaraitaki, a kaya o Koya ena dua na gauna:

“Ia, dou marau ga, ni’u na liutaki kemudou tiko. Sa nomudou na matanitu kei na veivakalougatataki sa koto kina, ka sa nomudou na iyau ni gauna tawamudu” (Vunau kei na Veiyalayalati 78:18).

Me da vidavida mada oqori:

“Ia, dou marau ga, [Vuna 1] ni’u na liutaki kemudou tiko. [Vuna 2] Sa nomudou na matanitu kei [Vuna 2a] na veivakalougatataki sa koto kina, ka [Vuna 3] sa nomudou na iyau ni gauna tawamudu” (Vunau kei na Veiyalayalati 78:18).

Eke e vakananuma vei keda na Turaga na Nona veituberi kei na veivakalougatataki. Oqori eso na vuna vinaka me da dau marau kina.

Oqo e dua tale na ivakaraitaki.

“Dou reki ka marau na gonelalai; [Vuna 1] ni’u sa tiko ena kemudou maliwa, [Vuna 2] ka’u sa sega ni biuti kemudou”(Vunau kei na Veiyalayalati 61:36).

Kei na dua tale:

“O koya mo dou marau kina, ka kakua ni rere, [Vuna 1] ni’u sa tiko vata kei kemudou koi Au na Turaga, [Vuna 2] ka’u na tu e yasamudou” (Vunau kei na Veiyalayalati 68:6).

E vakananuma vei keda na Turaga ni sa tu volekati keda ka na vukei keda ni da segata me da muri Koya ka cakava na Nona cakacaka. Eda na qai rawa ni lako ena yalodei, io, ena mamarau. Me kena ilutua, na nona ituvatuva na Tamada Vakalomalagi sa ikoya na “ituvatuva ni bula marau” (Alama 42:8, 16), kei na muri ni ivakaro ni Turaga sa ikoya me da bula “ena ivalavala ni bula marau” (2 Nifai 5:27).

Kevaka sara mada ga sa tekivu me kauti keda sobu na noda veivakatovolei, kevaka eda gadreva meda muria na Turaga, ena vakayaloqaqataki keda o Koya meda marau ga. Ka solia vei keda o Koya eso na vuna vinaka me baleta oqori.