“7 na iToqa‑ni-iboro ki na dua na Bula Mamarau,” Me iSakisaki ni iTabagone, Jiulai 2021, 8–11.
7 na iToqa‑ni-iboro ki na dua na Bula Mamarau
Na ikalawa rawarawa o taura ena veisiga yadua ena soqoni vata ki na dua na bula mamarau.
Droini mai vei Katy Dockrill
“Raica! Au cakava oqo me baleti iko!” a kaya na luvequ tagane ni taura tu e dua na nona iyaloyalo e mataqu. A terega mai na ucuqu na pepa ka sa dua walega na irairai buwawa ni roka. A dredre sara ga me’u raica vakamatata e dua na ka.
Ni’u dreta lesu na droini, a basika vinaka mai na veiwaki ni roka buwawa eso.
“Na cava o nanuma?” a taroga mai o koya.
A cakacaka vakabalavu o luvequ tagane me boroya na ka a nanuma ni dua na keirau irairai dina—vakavo ga ni drauniuluqu e sega ni dromodromo.
“A sega ni veirauti na noqu roka dravu,” a vakuria mai o koya. “Ka roka mamarau cake na dromodromo.”
Ni’u digova vakavoleka na nona cakacaka, au raica rawa na ivakarau ni yalololoma a boroya kina na iyaloyalo oqo na luvequ tagane. Au a sega ni wilika rawa na iwiliwili ni itoqa‑ni‑iboro. Era a sivia sara. Ia a dina sara o koya, au a rairai mamarau toka—oka kina na drauniuluqu dromodromo.
Vakasamataka mada e dua na droini o sa raica. O na raica ni sega ni dua ga na itoqa‑ni‑iboro e cakava me rairai totoka. Na kena dina, ni o raica e dua walega na itoqa‑ni‑iboro vakaikoya, e sega sara ga ni veivakauqeti. Ia, ni ko cokoti ira vata kece, sa tu e dua na nomu cakacaka‑ni‑liga veivakurabuitaki.1
Na kunei ni bula mamarau e tautauvata kei na droini. Era tu na itoqa‑ni‑iboro lalai, nakiti, se itaviqaravi ni veisiga, e rawa ni da cakava me da bulia kina e dua na bula e vakasinaiti ena mamarau. Ni ra cakava ga vakai ira se vakadua walega, na veika oqo ena sega ni vaka me vakasakiti sara. Ia ni da cokoti ira vata ena noda sasaga e veigauna e veisiga kei na veimacawa, ena rawa ni ra bulia e dua na bula mamarau e vuabale sara.
Oqo e vitu na itoqa‑ni‑iboro se itaviqaravi o rawa ni taracake mo bulia kina na mamarau e levu cake ena nomu bula.
iToqa‑ni‑iboro 1: Vakavolivoliti iko ena tamata Veilaveti.
Na mamarau e vakatau vakalevu mai vei ira na tamata o dau veimaliwai vata kaya. E sega ni kena ibalebale oqo ni sega ni rawa ni o veitokani kei ira na tamata ka dau rarawa tu ena so na gauna. Ia, eda dau sotava kece na rarawa ena veigauna eso.
Ia mo raica mo dau vakayagataka na nomu gauna vata kei ira na tamata veilaveti ka dau vakauqeti iko. O ira na itokani vinaka era vukei iko mo bulataka na ivakatagedegede ni Turaga ena rawa ni cakava na veisau levu ki na nomu bula marau. Ka tovolea mo dua na itokani veilaveti vei ira na tani. E rawa ni o cakava e dua na veisau levu ena nodra bula na tani.
iToqa‑ni‑iboro 2: Vakayagataka na sereivakatagi me vakatubura na nomu bula marau.
Na sereivakatagi e rawa ni tara kaukauwa sara na nomu vakasama. E rawa ni veisautaka vakaidina na kemisitiri ena nomu mona. Na sereivakatagi vinaka e rawa ni vukei iko mo vakila na yalodei, marau, kei na veivakauqeti. Tauyavutaka e dua na ituvatuva ni sere tokona-na-vakabauta ni marau, veivakayaloqaqataki, mo dau vakarorogo kina e veigauna.
iToqa‑ni‑iboro 3: Lako ki tautuba.
Na marautaki ni ibulibuli ni Kalou e dau veivakabulai sara ki na yaloda kei na yagoda. E ka bibi ki na nomu bula marau mo dau taura na gauna mo lako tani mai na retioyaloyalo, kompiuta, kei na sikirini ni talevoni ka lako yani ki tautuba ka marautaka na siga, veikau, kei na manumanu era tu vakavolivoliti iko. Lako vata ka taubale kei na nomu matavuvale kei na itokani, qito e tautuba, wilivola ka vuli e tautuba. O na kurabui ena nomu vakila na veika vinaka ni o cakava qori.
iToqa‑ni‑iboro 4: Me levu nomu gauna ni moce.
Sa kaya na Turaga ni moce sa ka bibi sara ki na bulabula ni nomu vakasama kei na yagomu (raica na na Vunau kei na veiyalayalati 88:124). Me vaka ga na batiri ni talevoni e gadrevi me vakatawani tale, na nomu mona e gadreva me moce me cakacaka vakavinaka kina. Me vaka ga ni o vakarautaka e dua na gauna mo yadra kina ena mataka, raica mo vakarautaka talega e dua na gauna mo na laki moce kina (ka kakua ni kauta vata kei iko na nomu talevoni!).
iToqa‑ni‑iboro 5: Dau veitalanoa vakatitobu e matanavotu.
Ena rawa ni totoka beka na nomu vakayagataka na itukutuku vaka‑text kei na vakauitukutuku raraba mo veivosaki kina kei ira na nomu itokani kei na matavuvale. Ia na veivosaki e matanavotu e dau cakava e dua na ka me baleta na nomu vakasama kei na yalomu ka sega ni rawa ni cakava na veitaratara vakalivaliva. Raica mo dau veimaliwai kei ira na nomu matavuvale kei na itokani. Taura na gauna mo vakarorogo ka veivosaki kei ira era tu wavoliti iko.
iToqa‑ni‑iboro 6: Dau vakaukauwa yago vakawasoma ka kania na kakana bulabula.
Na nomu mona ena rawa ga ni cakacaka vata kei na waiwai o solia kina. Na kakana qaqi era e tu kina e levu sara na suka (so na gauna e dau kilai tu me kakana tawayaga) era rawa beka ni vaikanakana vinaka ia e vakavuqa dau vakavuna mo vakila na gogo ni nomu vakasama kei na yagomu. Na itukutuku vinaka o ya ni ko kania vakalevu cake na vuanikau, kakana draudrau, kei na sorenikau taucoko, sa na lutu sobu na nomu garova na kakana tawayaga. E solia vei keda na Turaga e dua ga na yago, okoya me da na qarauna vinaka sara!
iToqa‑ni‑iboro 7: Dau Masu ka Vakasama vakatitobu.
Sa dau vakasalataki keda vakavuqa na Turaga kei ira na Nona parofita kei na iapositolo meda taura na gauna meda masu ka tiko lo. Na masu kei na vakasama titobu e dau tara vakavinaka na veitiki ni mona ka vakavuna mo vakila kina na mamarau. Kevaka o dau taura wasoma na gauna mo vakasama vakatitobu ka masu, ena tubu cake vakalailai ena veigauna yadua na nomu mamarau. Ena loma ni dua na gauna balavu, o na raica e dua na veisau levu ena ivakarau ni nomu bula vakacegu kei na yalodei.
Vaqara Tiko Eso Tale na Vakasama?
Na vitu na itoqa‑ni‑iboro oqo e vica walega na ikalawa ni veisiga e rawa ni da taura taucoko me da vakasinaita kina na yagoda kei na yaloda ena marau. Me baleta na vakasama tale eso, raica na ivola Me iSakisaki ni iTabagone me kilai kina na ivakavuvuli eso sa vakavuna na marau vei iko se o ira na tani ena veigauna sa oti. Na cava o vakauqeti kina mo cakava mo dau vakayagataka na veika oqo ena nomu bula ni veisiga?
Dau nanuma tiko ni ivurevure cecere ni bula marau sa ikoya noda iVakabula, o Jisu Karisito. Se cava ga na kemu ituvaki, sa tu vakarau o Koya me vakalougatataki iko ka vukei iko ena nomu bula dredre. Ena vukei iko o koya mo kunea na marau o nuitaka tiko.