« 7 pōta’a pēni nō te hō’ē orara’a ’oa’oa a’e », Nō te Pūai o te Feiā ’Āpī, Tiurai 2021, 8–11.

7 pōta’a pēni nō te hō’ē orara’a ’oa’oa a’e

Nā te mau ta’ahira’a ’ōhie tā ’outou e rave i te mahana tāta’itahi e fa’atupu i te hō’ē orara’a ’oa’oa.

« ’A hi’o na ! ’Ua hāmani au i teie nā ’oe ! » te parau ïa a tā’u tamaiti ’a tāpe’a ai ’oia i tāna hōho’a i mua maita’i i tō’u mata. ’Ua ū mai te ’api parau i ni’a i tō’u ihu, ’e ’ua riro ’ei ’ū māramarama ’ore. E’ita e ti’a ’ia ’ite māramarama mau i te hō’ē mea.

’A ’īriti ai au i te hōho’a pēni, ’ua ’ite atu vau i te mau pahīra’a o te mau ’ū māramarama ’ore.

’Ua ui mai ra ’oia ē, « e aha tō ’oe mana’o ? »

E rave rahi hora tō tā’u tamaiti pēnira’a i te mea tāna i feruri e riro ’ei fa’a’itera’a mau nō māua—maori rā, e ’ere tō’u roru i te mea re’are’a.

« ’Aita i nava’i tā’u pēni ’ō’aha », tāna ïa i parau nō te turu mai. « ’E te re’are’a e ’ū ’oa’oa a’e te reira ».

’A hi’o maita’i ai au i tāna ’ohipa, e nehenehe tā’u e ’ite i te here rahi o tā’u tamaiti i te pēnira’a i teie hōho’a. ’Aita tā’u e nehenehe e tai’o i te rahira’a o te mau pōta’a pēni. E mea rahi roa ra. ’E ’ua tano ’oia, e hi’ora’a ’oa’oa roa tō’u—e tae noa atu i te rouru re’are’a.

’A feruri i te hō’ē hoho’a pēni tā ’outou i ’ite. E ’ite outou ē, e ’ere nā te hō’ē pōta’a pēni e hōro’a i tōna nehenehe. ’Oia mau, ’ia hi’o ana’e ’outou i te hō’ē noa iho pōta’a pēni,e ’ere roa atu i te mea fa’ahiahia. Terā rā, ’ia tāhō’ē ana’e ’outou ia rātou pā’āto’a, e mure te aho i mua i te reira ’ohipa nehenehe mau.¹

Te ’imira’a i te ’oa’oa i roto i te orara’a, ’ua tū’ati noa ïa i te ’ohipa pēnira’a. Tē vai ra te mau pōta’a pēni na’ina’i, tei ’ōpuahia, ’aore rā, te mau ’ātivite i te mau mahana ato’a, e nehenehe tā tātou e rave nō te fa’atupu i te hō’ē orara’a tei ’ī i te ’oa’oa. Te ’ohipara’a ’outou ana’e, ’aore rā, ’ia ravehia te reira hō’ē ana’e iho taime, e’ita te reira e riro ’ei mau mea fa’ahiahia. Terā rā, mai te mea e ’āmui tātou i te reira ’e fa’ahou ā i roto i te mau tauto’ora’a o te mau mahana ato’a ’e o te mau hepetoma ato’a, e nehenehe te reira e fa’atupu mai i te hō’ē orara’a ’oa’oa auhune.

Teie e hitu pōta’a pēni ’aore rā, ’ātivite e nehenehe ’outou e fa’ahotu nō te fa’atupu i te ’oa’oa hau a’e i roto i tō ’outou orara’a.

Pōta’a pēni 1 : ’A hā’ati ia ’outou iho i te mau ta’ata e fa’ateitei.

E ’ohipa rahi tā te ’oa’oa e rave i ni’a i te mau ta’ata tā ’outou e fārerei. E ’ere te aura’a ē, e’ita ’outou e nehenehe e fa’ahoa i te ta’ata ’oa’oa ’ore i te tahi mau taime. ’Oia mau, e tupu mai te ’oa’oa ’ore i roto ia tātou pā’āto’a i terā ’e terā taime.

’Ia pāpū rā ’ia ’outou, tē rave nei ’outou i te taime nō te pārahi i pīha’i iho i te mau ta’ata e fa’ateitei ’e e fa’auru ia ’outou. Te mau hoa maita’i ’o tē tauturu nei ia ’outou ’ia ora i te mau fa’aturera’a a te Fatu, e nehenehe rātou e fa’atupu i te ta’a-’ē-ra’a rahi nō tō ’outou ’oa’oa. ’E ’a tāmata i te riro ’ei hoa fa’atetei nō vetahi ’ē. E nehenehe ’outou e fa’atupu i te ta’a’ēra’a rahi i roto i te orara’a o te tahi mau ta’ata.

Pōta’a pēni 2 : ’A fa’a’ohipa i te pehe nō te fa’arahi i tō ’outou ’oa’oa.

E mana rahi tō te pehe e fa’atupu i ni’a i tō ’outou ferurira’a. E nehenehe te reira e taui hope roa i te hēmia o tō ’outou roro. E tauturu te pehe maita’i ia ’outou ’ia fa’atupu i te mana’o maita’i, te ’oa’oa, ’e te fa’auru. ’A hāmani i te hō’ē tāpura tai’ora’a pehe nō te ’oa’oa, te fa’aitoitora’a ’e te fa’ananea i te fa’aro’o, tā ’outou e fa’aro’o tāmau.

Pōta’a pēni 3 : ’A haere i rāpae.

Te ’oa’oara’a i te mau poietera’a a te Atua, e fa’aorara’a rahi te reira nō tō tātou vārua ’e te tino. E mea faufa’a roa nō tō ’outou ’oa’oa ’ia rave tāmau noa i te taime ’ia fa’aātea i te ’āfata teata, i te rorouira, ’e i te paruai o te niuniu nō te haere i rāpae ’e ’ia fana’o i te mahana, te mau rā’au tanu, ’e te mau ’ānimara e hā’ati ra ia ’outou. ’A haere e ori haere ’e tō ’outou ’utuāfare ’e te mau hoa, ’a ha’uti i rāpae, ’a tai’o ’e ’a tuatāpapa i rāpae. E māere ’outou i te maita’i tā ’outou e ’ite ’ia nā reira ana’e ’outou.

Pōta’a pēni 4 : ’Ia nava’i te ta’oto.

’Ua parau te Fatu ē, e mea faufa’a te ta’oto nō te ea o tō ’outou ferurira’a ’e te tino (hi’o Te Parau Ha’api’ira’a ’e te mau Parau Fafau 88:124). Mai te hō’ē putu uira nō te niuniu e tītauhia ’ia fa’a’ī, e hina’aro tō ’outou roro e ta’oto nō te rave maita’i i te ’ohipa. Mai ia ’outou e fa’atano i te hō’ē hora nō te ara mai i te po’ipo’i, ’ia pāpū e fa’ata’a ato’a i te hō’ē taime nō ’outou nō te haere i ni’a i te ro’i (’e ’eiaha e rave i tā ’outou niuniu !)

Pōta’a pēni 5 : ’Ei paraparaura’a hōhonu i te ta’ata iho.

Te fa’a’ohipara’a i te poro’i ’e te tūreiara’a tōtiare nō te paraparau i tō ’outou mau hoa ’e i te ’utuāfare, e nehenehe te reira e riro ’ei ’ohipa fa’ahiahia. Terā rā, e fa’atupu te paraparaura’a i te ta’ata iho i te hō’ē mea nō tō ’outou ferurira’a ’e te vārua, ’o tā te ’āparaura’a nā roto i te mātini rorouira e ’ore e fa’atupu. ’Ia pāpū ia ’outou te fārereira’a i tō ’outou ’utuāfare ’e te mau hoa. ’A rave i te taime nō te fa’aro’o ’e nō te paraparau i te mau ta’ata ’ati a’e ia ’outou.

Pōta’a pēni 6 : ’A fa’a’eta’eta tāmau noa i te tino ’e ’a tāmata i te ’amu i te mā’a maita’i.

E’ita tō ’outou roro e ’ohipa noa ’e te mōrī tā ’outou e hōro’a nāna. Te mau mā’a tei fa’ahuru-’ē-rahi-hia, ’e e mea rahi te tihota i roto (tei parauhia i te tahi taime, e mā’a pa’ia ’ore) e mea au roa ’ia ’amu, terā rā e mea pinepine te reira i te fa’atupu i te ta’ere i roto i tō ’outou vārua ’e tō ’outou tino. Te parau ’āpī maita’i rā, ’oia ho’i, mai te mea e ’amu hau atu ’outou i te mau mā’a hotu, te mau pota, ’e te huero, e iti mai tō ’outou hina’aro e ’amu i te mā’a pa’ia ’ore. ’Ua hōro’a mai te Fatu ia tātou hō’ē ana’e tino, nō reira, e mea maita’i a’e ’ia ’atu’atu maita’i tātou i te reira !

Pōta’a pēni 7 : ’A pure ’e ’a feruri maite.

’Ua a’o pinepine mai te Fatu ’e tāna mau peropheta ’e te mau ’āpōsetolo ia tātou ’ia rave i te taime nō te pure ’e ’ia vai hau. E fa’atupu te pure ’e te ferurira’a hōhonu i te maita’i i ni’a i te roro, i reira ho’i tātou e ’ite ai i te ’oa’oa. Mai te mea e rave tāmau noa ’outou i te taime nō te feruri ’e nō te pure, e rahi tō ’outou ’oa’oa mā’a vāhi iti i te taime tāta’itahi. I roto i te hō’ē tau roa, e ’ite ’outou i te hō’ē ta’a-’ē-ra’a rahi i roto i te fāri’ira’a ’outou i te hau ’e te ti’aturi.

Tē ’imi ra ’outou i te mau mana’o hau atu ?

Teie mau pōta’a e hitu, ’o te tahi noa ïa o te mau ta’ahira’a i te mahana tāta’itahi tā tātou pā’āto’a e nehenehe e rave nō te fa’a’ī i tō tātou tino ’e te vārua i te ’oa’oa. Nō te mau mana’o hau atu, ’a ’imi i roto i te buka iti Nō te Pūai o te Feiā ’Āpī nō te ’ite i te mau parau tumu tei fa’a’oa’oa ia ’outou ’e ia vetahi ’ē i tahito ra. E aha te mea e fa’auruhia ra ia ’outou ’ia rave nō te fa’aō pāpū atu ā i te reira mau ’ohipa i roto i tō ’outou orara’a i te mau mahana ato’a ?

’A ha’amana’o tāmau noa ē, te tumu rahi o te ’oa’oa ’o tō tātou ïa Fa’aora o Iesu Mesia. Noa atu te huru o tō ’outou orara’a, tē ti’a nei ’oia ma te ineine ’ia ha’amaita’i ia ’outou ’e ’ia tauturu ia ’outou i roto i tō ’outou mau fifi. E tauturu ’oia ia ’outou ’ia ’ite i te ’oa’oa tā ’outou e tīa’i nei.